Read Kpelle Kɔlɔnikɔ Veerɛi 26 Bible Online

Kɔlɔnikɔ Veerɛi 26 - Kpelle bible

Kɔlɔnikɔ Veerɛi 26

¹Zuda-ƃelai dí Uzia kɛ̀ a káloŋ ǹâŋ Amazia pɔ́ɔ ŋá. Uzia è kɛ̀ a kóraŋ puu-káo-lɔ́ɔlu mɛi da díkɛ gɛ̀ a kâloŋ Zuda lɔii mɛi.

²Amazia kɛ́ɛ a sàai, Uzia è Ila tɔ̀ɔ é gɛ́ a Zuda lɔi da.

³Uzia è wɔ́lɔ kɛ̀ a kóraŋ puu-káo lɔ́ɔlu mɛi da díkɛ gɛ̀ a kâloŋ Zuda mɛni ma. È gɛ̀ gâloŋ-laai su a kóraŋ buu lɔ́ɔlu káo-feerɛ. Zeɛɛ è kɛ̀ Zerusâlɛŋ. Ǹee láa ƃé kɛ̀ a Zikolia. È kɛ̀ a Zerusâlɛŋ nuu.

⁴Dûa-pere è wɔ́lɔ kɛ̀ a ǹɛ́lɛɛ Yâwɛɛ ŋɛ́i yɛ̂ɛ ǹâŋ Amazia.

⁵Tãi Zɛkɛrɔya è wɔ́lɔ kɛ̀ la ɣele mai, Uzia è wɔ́lɔ kɛ̀ Ɣâla pôlu. Zɛkɛrɔya ƃa kâa kili-ŋa pôno tɛ̀ɛ bɔ́ é pîlaŋ Ɣâla ma. Tãi kpɔ́ nɔ́ è wɔ́lɔ kɛ̀ la Yâwɛɛ pôlui, Ɣâla a kâa kɛ̀ nɔ́ bôlu mɛni lɛ́lɛɛ su.

⁶È wɔ́lɔ lì é kɔ́ pɛ́lɛ Felesia-ŋai dîa é ziɣãŋ wólo Gâa, Zabinɛ, da Asɔdɔ dîa. Naa pôlu ma é taa-ŋa tɔ̀ɔ Asɔdɔ kɔlɛ ma da kwaa da kpɛ́ni ma Felesia-ŋai sáma.

⁷Tãi laa-saa è kɛ̀ la Uzia da Felesia-ŋai, Arebia-ŋai kɛ̀ Guɔ Baai, da Mɛu-ŋai díloai, Ɣâla è tɔ̀ɔ bôlu.

⁸Amɔŋ-ŋai dí pà bɔ́ a ŋuŋ-fela. Nya ƃe maa mɛni duŋ è tàa-taa kpɔ́ é seri Ize ŋɔkɔyɛŋ perei ma, kpɛ́ni fêi è kɛ̀ a ŋ̀wála-walaa.

⁹Uzia è yeŋkêŋ-ŋa tɔ̀ɔ Zerusâlɛŋ. È dɔnɔ tɔ̀ɔ Ziɣãŋ ŋɔsoŋ-wo su siaŋ lá-ƃerei, é dɔnɔ tɔɔ Gbotoloi su siaŋ lá-ƃerei, é ŋɔ́nɔ dɔnɔ tɔɔ ziɣãŋ ɣâlei ŋá. È díkelee kpɔ́ dí maa kônaŋ.

¹⁰È yeŋkêŋ-ŋa tɔ̀ɔ máŋ vɛ̃ɛ-kpâlaŋ su é lóa-ŋa tée yá soŋ mɛni ma, kpɛ́ni fêi taa-tulɛ támaa è kɛ̀ ǹyêei ǹyéei kwára da diŋ-tiŋ su. Ǹûai díkɛ̀ ǹyéei-ŋa díkɛ tíi kɛ̀ mì gbâlaŋ-ŋa da gbɔmɔ-ƃa kpalaŋ ŋá nyii-ŋai kɛ̀ ǹyéei mai da ǹɔii lɛ́lɛɛi mai. È kɛ̀ a núu nyíi kɛ̀ a ǹɔii wɛ́liɛɛi.

¹¹Kɔkuluƃa-ŋa díkɛ̀ Uzia yêei nyii-ŋai kɛ̀ a dí kpɛtɛɛ kɔ́ kɔ́ mɛni mai. Díkɛ̀ a díŋa kɔlɛɛ a díkpulu-ŋa yɛ̂ɛ berei Zeiɛ nyíi kɛ̀ a gɔlɔ pɔ̃yɛ-nuui da Maaseia nyíi kɛ̀ a ǹúu kɛ́tɛi Anania yée mui díwɔlɔ gɛ̀ lai. Anania è wɔ́lɔ kɛ̀ a gâloŋ yée mu nuu kɛ́tɛi dɔnɔ.

¹²Núu-suu-ŋai nyii-ŋai kɛ̀ gɔ́kɔ-ƃelai mɛi díkɛ̀ a núu wála ŋuŋ feerɛ pôlu ŋuŋ lɔ́ɔlu mɛi da (2,600).

¹³Kɔkûluƃa wála ŋuŋ saaƃa káo lɔ́ɔlu mɛi feerɛ pôlu ŋuŋ lɔ́ɔlu (307,500) ƃé kɛ̀ ǹûai ŋí yée mu. Díkɛ̀ a kɔ́kɔ-ƃela lɛ́lɛɛ-ŋa nyii-ŋai kɛ̀ a díkpîŋ kpɛtɛɛ kɔ́kɔ mɛni ma a tãi kélee. Díkɛ̀ a díkpîŋ kpɛtɛɛ a gɛ́ɛ dí kɔ́ gâloŋ kpɔara-ƃelai pɔ́ a tãi kélee.

¹⁴Uzia è kɔkɔ-sãa kɛ́ɛ yɛ̂ɛ kpála ŋá-ɣale kɔli-kalaŋ-ŋa, kpála-ŋa, kɔ́kɔ gba-ƃɛlɛ-ŋa, kɔli-yɛkɛ-ŋa, kerâŋ-ŋa da vûma da kɔni-ŋa tɛ̀ɛ ŋɔkɔ-kuluƃa-ŋai kélee pɔ.

¹⁵Táre-ƃela da-ni dí wɔ́lɔ sɛŋ da kpɛ̀tɛ mì Zerusâlɛŋ dí zee ǹyekêŋ ŋá da ziɣãŋ ɣâlei ŋ̀á a gɛ́ɛ díkɛ tɔ̃a pîli da kɔni-kpaya-kpaya ŋa. Maa mɛni duŋ è tàa-taa kpɔ́ a zu kɛ́tɛ. È kɛ̀ a ŋ̀wála-walaa, kpɛ́ni fêi, kpɔŋ-ma tá è pà mì.

¹⁶Kɛ́lɛ tãi Uzia è nâa wàla-wala la a ŋánaai, è nâa kɛ̀tɛ gbîŋ ŋɛ́i gɛ̀ nâa yoŋka tèe zɛŋ ƃé gɛ̀ gɛ́ tòo mu. È nâa bôlu tɔ̀ɔ Yâwɛɛ ma, va kâa ƃaa kɛ́-maa tɛ̀ɛ Yâwɛɛ pɔ́ nyíi kɛ̀ a Ŋɔɣâlai. A kâa lɔ̀ Yâwɛɛ ŋɔpɛ́rɛi kɛ́tɛi mu gɛ́ kéreŋ sala kùla naa géreŋ-sɛŋ kúŋ-nɛ̃ɛi maa Ɣâla-teƃelei ŋá.

¹⁷Nya ƃe zâla láa-soŋ-nuui Azaria da Yâwɛɛ ŋɔsâla láa soŋ-ƃela buu lɔ́ɔlu-mɛi saaƃa líi kpeliɛɛ-ŋa dí làaŋ ma Ŋ̀âla-pɛrɛ Kɛ́tɛi mu.

¹⁸Dí mò ma dîyɛɛi, “Uzia, vé a mɛni sãai a gɛ́ɛ íkereŋ sɛŋ kúŋ-nɛ̃ɛ kéreŋ Yâwɛɛ ma. Zâla láa-soŋ-ƃelai díkaa a Eelɔŋ ŋɔsuui su-ƃelai ƃé gáa a díkɛ tii. Kula Ŋ̀âla-pɛrɛ Kɛ́tɛi mu, kpɛ́ni fêi, ya ípôlu tɔɔ Yâwɛɛ Ɣâla ma. Ífa ƃaa kɛ́-maa tɛ̂ɛ bɔ́.”

¹⁹Uzia è kɛ̀ tɔɔ̂-ni géreŋ sɛŋ-kuŋ-nɛ̃ɛ kéreŋ sɛŋ-foloi kɛ́ ƃò ǹyêei, kpɛ́ni fêi è nâa kɛ̀ a gbɛtɛɛ a gɛ́ɛ é géreŋ sɛŋ kúŋ-nɛ̃ɛi kéreŋ. Nya ƃe è ǹíi ŋwàna. Tãi è kɛ̀ lônoi la zâla láa-soŋ-ƃelai dîa gɛ́ ƃò tɔɔ̂-ni géreŋ-sɛŋ kúŋ-nɛ̃ɛ kéreŋ ɣala-teƃelei kɔlɛ Ŋ̀âla-pɛrɛ Kɛ́tɛi mui, kɔlɔ-kara-maa kɔlɔ-fela nyɔmɔɔ è zòŋ dôŋ-la.

²⁰Tãi zâla láa-soŋ nuu kɛ́tɛi Azaria da marâa sala láa soŋ-ƃela dí gàa la a gɛ́ɛ gɔlɔ-kala-maa kɔlɔ-felai nyɔmɔɔi è kɛ̀ mai, dízòŋ dí kúla la a maa félaa. Nya kpîŋ è kɛ̀ ŋ̀wɛ̂lii a gɛ́ɛ é kúla a maa félaa, kpɛ́ni fêi è gɔ̀lɔŋ a gɛ́ɛ Yâwɛɛ è mɛni kpɔ̂lu làa ma.

²¹Gɔlɔ-kala-maa kɔlɔ-fela nyɔmɔɔ è lɛ̀ɛ kpɔ́ Uzia ma é lɛ́ɛ la zu zaa-tãi é seri. Tãi gɔlɔ-felai ŋí è kɛ̀ la m̀ai, dí bili zɛnɛ mu. Dífa kâa faa m̀a a gɛ́ɛ é lí Yâwɛɛ ŋɔpɛ́rɛi mu. Nya ƃe ǹóŋ Zotaŋ è nâa lɛ̀ɛ gâloŋ-pɛrɛi mɛi gɛ́ ǹûai mɛi kâa ǹɔii su.

²²Ɣâla ŋɔlono-kɛ nuui Azaya nyíi kɛ̀ a Emɔ ǹóŋ è m̀ɛni da kpɛ́ni-ŋai kélee pɔ̃yɛ nyíi Uzia è wɔ́lɔ gɛ̀ é síɣe ŋɔkâloŋ-laai kɔ́ɔ pîlanii é seri gbɛɛ-ŋai mai.

²³Uzia è sàa dí ǹoo zuai su nyíi kɛ̀ a gâloŋ-ŋai pɔɔi. Kpɛ́ni fêi ǹûai dí mò, “A gɛɛ kɔlɔ-kala-maa kɔlɔ-fela nyɔmɔɔ è kɛ̀ ma.” Nya ƃe ǹóŋ Zotaŋ è wɔ́lɔ lɛ̀ɛ bɔ́ɔ-ŋa a kâloŋ.