Read Kpelle Kɔlɔnikɔ Veerɛi 27 Bible Online

Kɔlɔnikɔ Veerɛi 27 - Kpelle bible

Kɔlɔnikɔ Veerɛi 27

¹Zotaŋ è wɔ́lɔ kɛ̀ a kóraŋ buu-feerɛ káo lɔ́ɔlu díkɛ gɛ̀ a kâloŋ. È gɛ̀ gâloŋ-laai su a kóraŋ puu káo lɔ́ɔlu mɛi da. Zeɛ̀ɛ è kɛ̀ Zerusâlɛŋ. Ǹee láa ƃé kɛ̀ a Zɛrusa. Zɛrusa è kɛ̀ a Zadɔ ǹóŋ nɛni.

²Zotaŋ sɔŋ è kɛ̀ a ǹɛ́lɛɛ Yâwɛɛ ŋɛ́i yɛ̂ɛ berei ǹâŋ Uzia è wɔ́lɔ kɛ̀ lai. Kɛ́lɛ Zotaŋ fé wɔ́lɔ lɔ́-ni Ŋ̀âla-pɛrɛ Kɛ́tɛi mu a gɛ́ɛ é kéreŋ sɛŋ kúŋ-nɛɛ kéreŋ naa ŋ̀âla-teƃelei ma yɛ̂ɛ ƃerei ǹâŋ è wɔ́lɔ gɛ̀ lai. Tãi ŋí yée mu, ǹûai díkɛ̀ nɔ́ nîi dítûa-pere nyɔ̂ŋ-ŋai kɛ̂i.

³Zotaŋ è ziɣãŋ lá-ƃerei nyíi kɛ̀ yá ŋûa-perei Ŋ̀âla-pɛrɛ Kɛ́tɛi ma kpɛ̀tɛ. È ŋɔ́nɔ ziɣãŋ lá-ƃelei da kùla Ofɛɛ yéei ma-pere.

⁴È taa-ŋa tɔ̀ɔ ǹyéei ma Zuda lɔii su. È siɣãŋ-ŋa da yeŋkêŋ tɔ̀ɔ ŋ̀úru-ŋai sáma pere.

⁵Zotaŋ da Amɔŋ-ŋai díkɔ kɔ́ é díyee mɛi ɣále. Maa koraŋ tí, Amɔŋ-ŋai dí káne pãŋ 7,480, wiî kpɔlɔ-kuu wála buu lɔ́ɔlu (50,000), da balee kpɔlɔ-kuu wála buu lɔ́ɔlu (50,000) tɛ̀ɛ bɔ́. Amɔŋ-ŋai dí ŋɔ́nɔ pà bɔ́ a zãai ŋí góraŋ veerɛi da zaaƃai su.

⁶Wála-wala-laa támaa è kɛ̀ Zotaŋ yêei, kpɛ́ni fêi, vé wɔ́lɔ bôlu tɔ̀ɔ ní Yâwɛɛ ma nyíi kɛ̀ a Ŋɔɣâlai.

⁷Mɛnii nyii-ŋai Zotaŋ è wɔ́lɔ gɛ̀ ŋɔkâloŋ-laai sui da gɔ́-ŋai è wɔ́lɔ gɔ̀i, gélee káa Eezuɛ da Zuda kaloŋ-ŋai dí mɛni pɔlɔi su.

⁸È wɔ́lɔ kɛ̀ a kóraŋ buu-feerɛ káo lɔ́ɔlu díkɛ gɛ̀ a kâloŋ. È gɛ̀ gâloŋ-laai su a kóraŋ puu káo lɔ́ɔlu mɛi da. Zeɛɛ è wɔ́lɔ kɛ̀ Zerusâlɛŋ.

⁹Zotaŋ è làa ǹyée nyɔ́mɔɔ mɛi pere, nya ƃe dí ǹoo Deeƃé ŋɔtaa-lêei su. Ǹóŋ-surɔŋ Eea ƃé wɔ́lɔ lɛ̀ɛ bɔ́ɔ ŋá a kâloŋ.