Read Kpelle Kɔlɔnikɔ Veerɛi 28 Bible Online

Kɔlɔnikɔ Veerɛi 28 - Kpelle bible

Kɔlɔnikɔ Veerɛi 28

¹Eea è kɛ a koraŋ buu-feerɛ tãi è kɛ la a kâloŋ. È gɛ̀ galoŋ-laai su a koraŋ puu-káo lɔ́ɔlu mɛi da. Zeɛɛ è kɛ Zerusâlɛŋ. Dua-pere è kɛ a nyɔmɔɔ Yâwɛɛ ŋɛ́i.

²Dua-pere e wɔ́lɔ kɛ nɔ́ yɛ̂ɛ Eezuɛ kaloŋ-ŋai. È wɔ́lɔ ŋâla-pɔkɔɔŋ Baâ pɔkɔɔŋ kpɛtɛ a kɔli a gɛ́ɛ gɛ vɛli.

³È wɔ́lɔ kɛ́ kereŋ sala kulai Bɛŋ Ínɔŋ Tiŋ-tiŋ su. E wɔ́lɔ kɛ́ ǹônii-sinaai kulai a kereŋ-sâla. A kâa tua nɔ́ yɛ̂ɛ ǹɔii-ŋûŋ-ŋai ti Yâwɛɛ è wɔ́lɔ díkpɛ Eezuɛ ŋɛ́i-tuɛi su ƃela.

⁴A kâa sala kula gɛ́ kéreŋ sɛŋ kuŋ-nɛ̃ɛ kereŋ ɣâla da kpɛ́ni-ŋa fɛli kwaa-ŋa ma ǹyée-ŋai tôŋ-su da gbɔlɔ ŋai mu.

⁵Eeɣa kɛ́ɛ a sɔnyɔ̂ŋ kɛ̂i, Ŋɔɣâlai Yâwɛɛ è gɛ Siria-ŋai díkaloŋ é ǹyée mɛi ɣale. Siria-ŋai dí Eezuɛ ƃelai da-ni sòŋ a kɔ-sôŋ dí li a dîa Dɛmɛika. Eezuɛ kaloŋ è wɔ́lɔ pɛlɛ Siria kaloŋ mâ é ŋɔnûai damaa paa.

⁶È kɛ̀ a tãi tɔnɔ da, Pika nyíi kɛ a Limalia ǹóŋ surɔ̂ŋ, e wɔ́lɔ Zuda kɔkuluƃa-ŋai ŋɔwála ŋuŋ tɔ̂nɔ pôlu buu feerɛ (120,000) pàa a ɣele tɔnɔ. Kpɛni fêi Zuda è wɔ́lɔ bôlu tɔɔ Yâwɛɛ nyíi kɛ a dínâŋ-ni Díɣâlai ma.

⁷È kɛ a tãi tɔnɔ da, Ifiraŋ kɔkuluƃai Zikari e wɔ́lɔ galoŋ ǹóŋ-surɔŋ Maaseia paa, é bɛlɛ galoŋ-pɛrɛi mɛi ǹúu kɛ́tɛi Azirikɛŋ ma da Ɛɛkana nyíi kɛ a galoŋ kɔlɛ mâ ǹúui.

⁸Eezuɛ-ŋai dîa máŋ díwɔlɔ lí dí díkaayɔɔ-ŋai dínɛ̃ɛi, dílonii-sinaai, da dílônii-ǹɛyɛ̃ɛi ŋɔwála ŋuŋ feerɛ (200,000) sóŋ é pɛlɛ díkɔ̃lîŋ támaa ma. Kɛ́lɛ dílene pôlu a dîa Sameria.

⁹Yâwɛɛ ŋɔlono-kɛ-nuu tɔnɔ nyíi dakâa doli a Odɛi è kɛ naa. È díkaa tãi dílene la pôlu Sameria. È mò dîa ǹyɛɛi, “Kpɛni fêi Yâwɛɛ nyíi gáa a Kánâŋ-ni Díɣâlai è kɛ a ǹíi ŋwanaa Zuda mai zɛŋ ƃé gɛ gɛ́ dítɛɛ ká pɔ. Kɛ́lɛ ká dípaa a ŋwana-lɔ̂ɔ nyíi duŋ a seri Ɣâla-taa.

¹⁰Ǹaa pôlu ma, ká ŋ̀wɛli a gɛ́ɛ ká Zuda da Zerusâlɛŋ ƃelai kɛ́ a káluɛ ŋa. Káa máŋ káfe niî gɔ́lɔŋ ni a gɛ́ɛ ka sɔnyɔ̂ŋ kɛ́ a Yâwɛɛ nyíi gáa a Kánâŋ-ni Díɣâlai?

¹¹M̀ɛni m̀a, ka káwoli tɔɔ mâ! Kákaayɔɔ-ŋai ká dísôŋ a kɔ-sôŋ-ŋai ká dí tɛɛ pôlu. Kpɛ́ni fêi Yâwɛɛ líi ŋwânai kpɔ́ kâa a ŋ̀ánaa.”

¹²Nya ƃe Zeoanaŋ ǹóŋ-surɔŋ Azaria, Mɛsilemɔ ǹóŋ-surɔŋ Berekaya, Saluŋ ǹóŋ-surɔŋ Ziezikia da Adilai ǹóŋ Amasa, nyii-ŋai kɛ a Ifiraŋ-ŋai laa-tuɛ ƃelai dílôno diai kɛ kulai gɔi mai pɔ diɛi,

¹³“Káfe pá a gɔ-sôŋ-ŋai tí ƃɛ. A kɛ́ tí, kwa kɛ́ mɛni nyɔmɔɔ kɛ̂i a Yâwɛɛ. Ká ŋ̀wɛ́li ŋɔ́nɔ kúsɔnyɔ̂ŋ da é pú m̀a? Kpɛni fêi kúmɛni nyɔmɔɔi kɛ́tɛi. Ǹyaŋ Yâwɛɛ ŋɔlii-ŋwanai kɛ́tɛi káa nâa Eezuɛ ma.”

¹⁴Gɛ́ɛ tí, gɔ-kuluƃa-ŋai dí nâa gɔ-soŋ-ŋai da díkɔlĩŋkélee tɛɛ pôlu nuu-laa-tuɛ ƃelai da ǹûai kélee ŋɛ́i.

¹⁵Nya dí Azaria, Berekaya, Ziezikia, da Amasa toli a gɛ́ɛ dípa dí seɣe kula zãai dízoŋ gɔ-sôŋ ŋai yêei su dɛ̀ɛ diai seɣe fé kɛ́ ni diai pɔ. Dí seɣe da kpaŋ-kpali, mii-sãa da kpele-sãa é pɛlɛ sale ma tɛɛ dípɔ. Diai kélee dífii e kɛ kpɛɛ̂i, dí dísee wɛlɛ-sôo mɛi. Nya ƃe dílene a díkaayɔɔ-ŋai pôlu Zɛleko. Daai nyíi da doli a Dou-taa-lêei. Dîa máŋ dílene pôlu dí li Sameria.

¹⁶Maa tãi ti ma, Galoŋ Eea è worɛ tɛɛ Asiria kaloŋ pɔ a gɛ́ɛ é kpɔŋ m̀a.

¹⁷Idɔŋ-ƃelai dí pa dí pɛlɛ Zuda ma díli kpɔ́ a kɔ-sôŋ támaa.

¹⁸Tài tɔnɔ ŋí yée mu ƃe Felesia-ŋai dí pa la dítoo daa-ŋai su ǹyée kwára da diŋ-tiŋ su Zuda. Dí Bɛɛ Simɛsi, Aizalɔŋ, Gidɛrɔ, Soko, Tiŋna, da Giŋzo da naa kɔlɛ mâ kpanaŋ-ŋai kulayêi kɛ̀ dísee naa.

¹⁹Yâwɛɛ è Zuda maa-yeŋ, kpɛ́ni fêi Zuda kaloŋ Eea è wɔ́lɔ ŋwana-lɔɔ sêei kula Zuda lɔii su, é ŋɔ́nɔ tɔɔ Yâwɛɛ ma a zu kɛtɛ.

²⁰Asiria kaloŋ Tikila-Pilasɛ è pa bɔ, kɛ́lɛ vé kpɔŋ-mâ tɛɛ ní bɔ́. Kɛ́lɛ è tɔɔ ma.

²¹Nya ƃe Galoŋ Eea è Ŋ̀âla-pɛrɛ Kɛ́tɛi mu sãai da-ŋa siɣe é bɛlɛ galoŋ-pɛrɛi mu sãai da-ŋa dîa é pɛ́lɛ ǹûa kpaya-kpayai dípɛrɛ ŋai mu sãai da-ŋa dîa é dɛ̀ɛ Asiria kaloŋ pɔ. Kɛ́lɛ vé kpɔŋ-mâ tɛɛ ní bɔ́ a dɔnɔ kpîŋ.

²²Tãi Eea è kɛ̀ la mɛni-kpɔlu ŋí sui, maa tãi ƃe e tela bolu kpîŋ tɔɔ la Yâwɛɛ ma.

²³A kâa kɛ sala-ŋa kulâi ŋâla-ŋai kɛ Dɛmɛikai dîa. Kpɛni fêi Dɛmɛika ƃelai dí ǹyée mɛi ɣale, gɛ mo ǹyɛɛi, “Tãi Siria-ŋai díkâloŋ-ŋai dí ǹyée mɛi ɣalei, ŋa pâi díɣâlai fɛlii a gɛ́ɛ é kpɔŋ mâa.” Kɛ́lɛ dí gɛ Eea da Eezuɛ dítoo.

²⁴Nya ƃe Eea è Ɣâla ŋɔpɛrɛ-kɛtɛi mu sãai kélee kula naa é gélee wolo-wolo. È gbôŋ-ŋai kélee láa-tɛ Yâwɛɛ ŋɔpɛ́rɛi ma. È li é Ɣâla-teƃele-ŋa tɔɔ Zerusâlɛŋ dâai gwaa kélee ma.

²⁵È kwaa-ŋa ma kpɛtɛ Zuda taa-ŋai kélee su a gɛ́ɛ gɛ sala kula ɣâla da kpɛ́ni ŋa dîa gɛ́ Yâwɛɛ nyíi kɛ a ǹâŋ-ni Díɣâlai líi-ŋwana mɛni kɛ.

²⁶Mɛni-ŋai nyíi kélee è wɔ́lɔ gɛ̀ ŋɔkaloŋ-laai sui da dua-pere kélee díkaa Zuda da Eezuɛ kaloŋ-ŋai díkɔlɔi su.

²⁷Eeɣa è laa ǹyée nyɔmɔ mɛi pere dí ǹoo Zerusâlɛŋ taa-lêei su. Kɛ́lɛ dífe wɔ́lɔ ǹoo ni ƃɛɛi da kâa Eezuɛ kaloŋ-ŋai loo naai. Nya ƃe ǹóŋ surɔ̂ŋ Ɛsekaya è wɔ́lɔ lɛɛ bɔɔ-ŋa a kaloŋ.