Read Kpelle Kɔlɔnikɔ Veerɛi 29 Bible Online

Kɔlɔnikɔ Veerɛi 29 - Kpelle bible

Kɔlɔnikɔ Veerɛi 29

¹Ɛsekaya è wɔ́lɔ kɛ a koraŋ buu-feerɛ káo-lɔ́ɔlu díkɛ gɛ a kâloŋ. E gɛ galôŋ-laai su a koraŋ buu-feerɛ káo-lɔ́ɔlu mɛi náaŋ. Ǹee láa ƃe a Aƃiza nyíi kɛ̀ a Zɛkɛraya ǹóŋ nɛnii.

²Dua-pere è kɛ a ǹɛ́lɛɛ Yâwɛɛ ŋɛ́i yɛ̂ɛ Gâloŋ Deeƃé.

³Ɛsekaya kɛ́ɛ a kâloŋ, ŋalôŋ duɛ-tuɛi nyíi kɛ ŋɔkoraŋ maa-ŋuŋ sui, e Yâwɛɛ ŋɔpɛ́rɛi láa ƃo é pɛlɛ bɛŋ-pɛlɛɛ ma.

⁴E pa a zala-laa soŋ ƃelai da Liiva-ŋai é dí ŋa-tɛ gîe ma Ŋ̀âla-pɛrɛ Kɛ́tɛi ŋɔfolo kulâi-pere ƃelai ma.

⁵E mò dîa ǹyɛɛi, Liiva-ŋa, ka káwoli tɔɔ ma! Ka kákpîŋ maa-waa lonii ma, ká Yâwɛɛ nyíi gáa a kánâŋ ni Díɣâlai ŋɔpɛ́rɛi maa waa. Ka zãa maa liƃiɛɛ-ŋai kélee kula Ŋ̀âla-pɛrɛ Kɛ́tɛi mu.

⁶Kúnâŋ-ni dí dípôlu tɔɔ ma. Dí mɛni nyɔmɔɔ támaa kɛ a Kúɣâlai Yâwɛɛ dí dípôlu kula ǹyêei.

⁷Dí gpoŋ-ŋai láa tɛ dí laŋpo-ŋai liîŋ. Dífe kéreŋ sɛŋ kuŋ-nɛ̀ɛ kéreŋ-ni, kpaa máŋ díkereŋ sala kula Eezuɛ Ɣâlai ŋɔkwaa mâ waai ma.

⁸Mɛni ma, Yâwɛɛ a ǹíi ŋwana Zuda da Zerusâlɛŋ dîa. A díkɛ da pili laa-kpala maa mɛ̂ni su. A gɛ̀ nûa díkɛ dísĩa mii a dîa yɛ̂ɛ berei yâ gaai gɛ̀ kɛ́ a diai.

⁹M̀ɛnii ŋí ƃé a gɛ́ díkɛ kúnâŋ-ni pàa a ƃóa-sɔ̂kpɔ, díkɛ kúnɛyãai da kúlônii sòŋ a kɔ-sôŋ-ŋa.

¹⁰“À kɛ̀ tí, ŋá gbɛtɛ a gɛ́ɛ ŋá kpanaŋ-woo kɛ Yâwɛɛ da Eezuɛ Ŋɔɣâlai yêei a gɛ́ɛ é ŋɔlii-ŋwana kɛ́tɛi ŋí kula kûa.

¹¹Ńônii, káfe m̀ɛnii ŋí siɣe a vii-kpɛɛ. Kpɛni fêi Yâwɛɛ a ká siɣe a gɛ́ɛ kátɔɔ ŋ̀ɛ́i tuɛ, kátii kɛ mi, ka kɛ́ ǹûai téniŋ tɔ̂ɔ a tãi da kɛ́ ḿvɛlîi lai. Kákɛ kéreŋ sɛŋ kuŋ-nɛ̃ɛ ŋa kèreŋ mi.”

¹²Liiva-ŋai dípɛlɛ tíi kɛ́ɛ ma: Diai kula Koa ŋɔsuui sui, Maâi nyíi kɛ̀ a Amasai ǹóŋ-surɔŋ da Zoɛɛ nyíi kɛ̀ a Azaria ǹóŋ-surɔŋ. Diai kùla Melali-ŋai sámai, Kesi nyíi kɛ̀ a Abidi ǹóŋ-surɔŋ da Azaria nyíi kɛ̀ a Zealɛlɛɛ ǹóŋ-surɔŋ. Diai kula Gɛsɔŋ-ŋai samai, Zoa nyíi kɛ a Zima ǹóŋ-surɔŋ da Idɛŋ nyíi kɛ a Zoa ǹóŋ-surɔŋ.

¹³Diai kula Ilazafɔŋ ŋɔsuui sui, Siŋri da Zeiɛ. Diai kula Asafa ŋɔsuui sui, Zɛkɛraya da Matania.

¹⁴Diai kula Emaŋ ŋɔsuui sui, Zeiɛ da Simei. Diai kula Zedutuŋ ŋɔsuui sui, Semaiya da Uziɛ.

¹⁵Dí díƃaraai ŋa-tɛ gîe ma dí díkpîŋ maa waa. Nya ƃe dílɔ Yâwɛɛ ŋɔpɛ́rɛi mu dí m̀aa waa yɛ̂ɛ berei galoŋ è mò lai. Dí m̀ɛni ŋí kɛ nɔ yɛ̂ɛ berei Yâwɛɛ ŋɔtɔ̂ŋ è mò lai.

¹⁶Zala-laa-soŋ ƃelai dílɔ gwaa mâ waai mâ dí ǹaa maa waa. Nya ƃe díkula a zãa maa liƃiɛɛ-ŋai kɛ̀ Yâwɛɛ ŋɔpɛ́rɛi mui banaŋ-ma. Liiva-ŋai dí gélee siɣe díli a dîa Kidɔŋ-tiŋ-tiŋ su.

¹⁷Dípɛlɛ dii ŋí kɛ́ɛ ma a ŋaloŋ ŋɔfóloi maa-ŋuŋ. Voloi ǹɔɔlu mɛi saaƃa ɣelei ƃe díseri la Yâwɛɛ ŋɔpia-saâi su. Dí ŋɔ́nɔ fólo lɔ́ɔlu mɛi saaƃa siɣe a gɛ́ɛ dí Yâwɛɛ ŋɔpɛ́rɛi kpiŋ-kpîŋ mu kpɛtɛ. Dí kpɛɛ dii ŋí kélee ma a ŋaloŋ ŋɔfólo puu-káo lɔ́ɔlu mɛi da ɣele.

¹⁸Nya ƃe díli Galoŋ Ɛsekaya pɔ naa dí mò m̀a diɛi, “Kwaa Yâwɛɛ ŋɔpɛ́rɛi mu-kpɛtɛ. Kú gereŋ-sala kéreŋ Ɣâla-teƃelei da m̀aa-sɛŋ-folo-ŋai, gbólo maa-waai láa-teƃelei da maa-sɛŋ-folo-ŋai kélee maa waa.

¹⁹Tãi Galoŋ Eeɣa è bôlu tɔɔ la Yâwɛɛ mai, zãai kélee è gula Ŋ̀âla-pɛrɛ Kɛ́tɛi mu, kwâa gélee kpɔ́ maa waa kwa bu Yâwɛɛ ŋɔ-ŋ̀âla-teƃelei ŋɛ́i tuɛ.”

²⁰Ǹaa pôlu ma ɣèle-wala pɛ-pɛi, Galoŋ Ɛsekaya è daa-ƃela kpaya-kpayai siɣe da dîa ni díli Ŋ̀âla-pɛrɛ Kɛ́tɛi la.

²¹Dí pá a niŋa-sirɛ lɔ́ɔlu-mɛi feerɛ, ƃala-sirɛ lɔ́ɔlu-mɛi feerɛ, ƃala-loniii-sirɛ lɔ́ɔlu-mɛi feerɛ da ƃoli sirɛ lɔ́ɔlu mɛi feerɛ. Dí gélee kula a sɔnyɔ̂ŋ-sala galoŋ-laai mɛ̂ni ma, Ŋ̀âla-pɛrɛ Kɛ́tɛi, é pɛlɛ Zuda ma. Galoŋ è mò zâla láa-soŋ-ƃelai ƃelai nyíi ŋai kɛ a Eelɔŋ ŋɔsuui su-ƃelai dîa a gɛ́ɛ dí zãai ŋí kula a sâla Yâwɛɛ ŋɔ-ŋ̀âla-teƃelei ŋa.

²²Nya ƃe zâla láa-soŋ-ƃelai ƃelai dí niŋa-sirɛ ŋai paa dí díŋaa kpɛ-mɛŋ ŋ̀âla-teƃelei ma. Dí m̀ala-sirɛ ŋai paa dí díŋaa kpɛ-mɛŋ ŋ̀âla-teƃelei ma. Dí ŋɔ́nɔ m̀ala-lonii-sirɛ ŋai paa dí díŋaa kpɛ-mɛŋ ŋâla-teƃei ma.

²³Dí pà a m̀oli-ŋai zɔnyɔ̂ŋ-salai kula mɛni ma. Nya ƃe gâloŋ da ǹûai kélee dí díŋa tɛ gîe ma dí díyee pɛlɛ m̀oli-ŋai dîa.

²⁴Zâla láa-soŋ-ƃelai dí m̀oli-ŋai paa dí pa a díŋaa ŋ̀âla-teƃelei ma a sɔnyɔ̂ŋ-sala Eezuɛ-ŋai dísɔnyɔ̂ŋ su mɛ̂ni lɛ̀ɛ mɛni ma. Kpɛni fêi, galoŋ è mò dîa a gɛ́ɛ dí kéreŋ-sala da sɔnyɔ̂ŋ sala kula Eezuɛ-ŋai kélee mɛ̂ni ma.

²⁵È Liiva-ŋai see Yâwɛɛ ŋɔpɛ́rɛi mu é ńyɛŋ-yɛŋ, kɔniŋ da ɣale-sãa tɛɛ dípɔ yɛ̂ɛ berei Deeƃé da galoŋ ŋɔmɛni maa-kpɛɛ-nuui Gâa da Ɣâla ŋɔlono kɛ nuui Netaŋ ni díwɔlɔ mò lai. Yâwɛɛ ƃé wɔ́lɔ m̀ɛnii ŋí ƃo ŋɔlono-kɛ-ƃelai sarâi.

²⁶Liiva-ŋai díkɛ tɔɔ-ni díkpîŋ kpɛtɛɛ Deeƃé ŋɔɣale-sãai kɛ ƃo díyeêi. Duru-ŋai díkɛ zâla láa-soŋ-ƃelai ƃelai yêei dîa máŋ.

²⁷Ɛsekaya è mò a gɛ́ɛ dí nâa géreŋ-salai kúla ŋ̀âla-teƃelei ma. Dípɛ̀lɛ nɔ́ a zâlai kuláa da wule toɔ́ɔ Yâwɛɛ ma a tãi tɔnɔ. Díkɛ̀ dúrii fɛ̂ɛi díkɛ Deeƃé ŋɔɣale-sãai ɣâle.

²⁸Ǹûai kélee dí díŋuŋ mâ pìlaŋ díkɛ Ɣâla fɛ̀li. Ŋ̀ule-too ƃelai da dúru fɛ́ɛ-ƃelai díkɛ̀ wule toôi. Dílɛ̀ɛ kpɔ́ nyíŋi kɛ̂i é lɛ́ɛ la zu díkpɛɛ a zâlai kuláa

²⁹Díkɛɛ da kpɛɛ a zalai kulaai, galoŋ da diai kélee kɛ naai dí pîlaŋ díkpeleŋ-ŋa díkɛ Ɣâla fɛli.

³⁰Gâloŋ Ɛsekaya da ŋɔtíi kɛ ƃela kpaya-kpayai dí mò Liiva-ŋai dîa a gɛ́ɛ dílaa-ma-tɛ tɛɛ Yâwɛɛ pɔ a Deeƃé da Asafa nyíi kɛ̀ a Ɣâla ŋɔlono kɛ̀ nuui díwoo-ŋai. Nya ƃe dílaa-maa-tɛ wule too díkɛ lii-nɛɛ kula díŋuŋ-mâ pîlaŋdíkɛ Ɣâla fɛli.

³¹Ɛsekaya è mò ǹûai dîa ǹyɛɛi, “Kâa naa kákpîŋ tɛɛ Yâwɛɛ pɔ́. Ka pá kásala kula, ká pá a sɛɣɛ-fei sama-sɛŋ Yâwɛɛ ŋɔpɛ́rɛi mu.” Nya ƃe ǹûai kélee dí pá dí sala kula dí pá a sɛɣɛ-fei sama-sɛŋ. Diai kélee díkili kulâi, dí pá díkereŋ sala kula.

³²Gereŋ-sala sãai ǹûai dí pá lai gélee è kɛ a niŋa-sirɛ buu-lɔ́ɔlu mɛi feerɛ, ƃala-sirɛ ŋuŋ-tɔnɔ, da ƃala-lonii-sirɛ ŋuŋ-feerɛ. Dí pa a zãai ŋí kélee díkereŋ sala kula a dîa Yâwɛɛ ma.

³³Daa-tulɛi nyíi kélee dí pa la zalai kula mɛ̂ni mai, è kɛ a niŋa-sîrɛ ŋuŋ lɔ́ɔlu mɛi-da (600), ƃoli da ƃála wála saaƃa (3,000).

³⁴Zala-laa-soŋ ƃelai dífe kɛ ni a dí támaa a gɛ́ɛ dí gereŋ-salai kula taa-tulɛi kélee kɔlɔ kula. Nya ƃe dí díkaayɔɔ-ŋai kɛ a Liiva-ŋai marê kɛ a gɛ́ɛ dí kpɔ̂ŋ mâ tɛɛ dípɔ. Liiva-ŋai díkpɔŋ dîa é lɛɛ la zu dí kpɛɛ dîi kélee ma. Gbɔŋ-mai ŋí ƃé gɛ̀ zâla láa-soŋ-ƃelai ƃelai da-ni díkɛ pere kâa a gɛ́ɛ dí dímaa waa. Liiva-ŋai díkɛ a díkpaaŋɔɔ dí dímaa-waa é tɛɛ la zâla láa-soŋ-ƃelai dîa.

³⁵Gereŋ-sala sãai è kɛ̀ kpɔ́ a dámaa a ŋanaa é pɛlɛ zua-wulɔi ma nyíi kɛ̀ ǹii-sêe sama-sɛŋ mɛni mai da gbele-sɛŋ sama-sɛŋ nyíi lɛɛ gereŋ-salai pôlu ma. Tãi ŋí ƃe dí nâa pɛlɛ la Ɣâla fɛlii Yâwɛɛ ŋɔpɛ́rɛi mu ŋɔ́nɔ.

³⁶Ɛsekaya da ŋɔnûai kélee dílii-nɛɛ kula m̀ɛnii Ɣâla è gɛ dísamai mɛ̂ni ma. Kpɛni fêi, dím̀ɛni-ŋai ŋí kɛ kpɔ́ a maa felaa.