Read Kpelle Kɔlɔnikɔ Veerɛi 30 Bible Online

Kɔlɔnikɔ Veerɛi 30 - Kpelle bible

Kɔlɔnikɔ Veerɛi 30

¹Naa kɛ́ɛ tiî, Ɛsekaya è worɛ tɛɛ Eezuɛ da Zuda è ŋɔ́nɔ kɔlɔ tɛɛ Ifiraŋ da Manasɛ dílɔii-kpinîŋ su a gɛ́ɛ dí pá Yâwɛɛ ŋɔpɛ́rɛi la Zerusâlɛŋ dí Dɛɛ-mɛi kuui kɛ́ Eezuɛ-Ɣâlai Yâwɛɛ ma.

²Nya ƃe gâloŋ da ŋɔtíi-kɛ-ƃela kpaya-kpayai é pɛlɛ ǹûai kélee kɛ Zerusâlɛŋ dîa, dí gbɛtɛ a gɛ́ɛ dí Dɛɛ-mɛi kuui kɛ́ ŋaloŋ-veerɛi su.

³Dífe pɔri ni kɛ guui kɛ̂i a gɛ̀ tãi pɔlɔi. Kpɛni fêi zâla láa-soŋ-ƃelai ƃelai damaa ɣele dífe kɛ́ ní a dímaa-waa. Kpaa máŋ ǹûai kélee dífe niî díŋa tɛ ni ma Zerusâlɛŋ.

⁴Mɛni kpɛtɛɛ ŋí è laa galoŋ da ǹûai kélee líi ma.

⁵Díkelee dí gbɛtɛ a gɛ́ɛ díworɛ tɛɛ Eezuɛ gwaa kélee ma é siɣe Bɛɛsiba é too Daŋ ŋɔlɔii-kpîniŋ su díkɛ ǹûai kélee toli a gɛ́ɛ díli Zerusâlɛŋ dí Dɛɛ-mɛi kuui kɛ́ naa Eezuɛ-Ɣâlai Yâwɛɛ ma. Núu támaa fé niî kɛ guui ŋí kɛ ni yɛ̂ɛ berei è kɛ a bɔ̃yɛɛ lai Mose ŋɔtɔ̂ŋ sui.

⁶Nya ƃe kela-ŋa dí li a gɔlɔ-ŋai Eezuɛ da Zuda lɔii gwaa kélee ma yɛ̂ɛ berei gâloŋ è mò lai. Gɔlɔi ŋí è kùla gâloŋ da ǹaa tii kɛ́ lɔɔi-ƃelai yêei. Ǹono woo ƃé kɛ̀: “Eezuɛ-ƃela, ka lene pôlu ká Yâwɛɛ fɛli nyíi gáa a Eberaɣɛ̃ɛ, Aise da Zeeka Díɣâlai, a gɛ́ɛ ǹyaa máŋ é lene pôlu kaai kâa lɛɛi ká pɔ naa. Kaai káfe lɛ̀ɛ ni Asiria kaloŋ-ŋai yêei mui.

⁷Káfe kɛ̀ yɛ̂ɛ kánûa pɔlɔ-ŋai nyii-ŋai wɔ́lɔ dí pôlu tɔ̀ɔ Yâwɛɛ ma nyíi gáa a dínâŋ ni Díɣâlai nyíi gɛ̀ gɛ́ mɛni maa-pɔlɔ-pɔlɔ laa dîa yɛ̂ɛ berei káwɔlɔ díkàa lai.

⁸Káfe ŋuŋ-su kpânaŋ kula yɛ̂ɛ berei kánâŋ ni díwɔlɔ gɛ̀ lai. Ka Yâwɛɛ wóo mɛni. Ka pá Ŋ̀âla-pɛrɛ Kɛ́tɛi la nyíi aâ m̀aa wáa wɔ́lɔ-wɔlɔ da wɔlɔi. Ka tíi kɛ́ Káɣâlai mî a gɛ́ɛ é ŋɔlii-ŋwanâi ŋá ŋánai kúla kâa.

⁹À kɛ̀ ka tìnaŋ Yâwɛɛ pɔ́ pere, gɛ̀ ní diai kánîa-pɛlɛɛi da kákaayɔɔ-ŋai sôŋ da pâi dí malôŋ kâai dí pá a dia pôlu ǹɔii ŋí ma. Kpɛ́ni fêi Yâwɛɛ nyíi gáa a Káɣâlai gáa a maloŋ kâa Ɣala, ǹyaŋ a pâi káŋɛi malôŋ kâai. Vé pâi bôlu tɔɔ̂i kâa à kɛ̀ kà tìnaŋ bɔ́-naa pere.”

¹⁰Gelâ-ŋai dí lì a gɔlɔ-ŋai daa-lêe-ŋai kélee su tɛi-tɛi, Ifiraŋ da Manasɛ gwaa kélee ma. Dí lí kpɔ́ é lɛ́ɛ la zu díseri Zɛbulɔŋ. Kɛ́lɛ ǹûai kélee dípɛ̀lɛ ɣɛ́lɛ-maa kulâi díkponôi díkɛ dílaa nyɔ́mɔɔ ƃò.

¹¹Berei máŋ dí gɛ̀ tí lai, ǹûai da ni díkula Asɛ, Manasɛ da Zɛbulɔŋ lɔii-kpiniŋ su dí pá dí dímaa-yêŋ dí li Zerusâlɛŋ.

¹²Ɣâla yée è kɛ Zuda ƃelai pôlu é dílii kɛ tɔnɔ dí pá galoŋ da naa tii kɛ́ lɔɔi-ƃelai pɔ yɛ̂ɛ berei Yâwɛɛ è mò lai.

¹³Nya ƃe kpɔŋ kɛtɛ è ŋa tɛ ma Zerusâlɛŋ dí Dɛ́-sɛŋ féu kpoloi maa kuui kɛ a ŋaloŋ veerɛi.

¹⁴Dí ŋ̀âla-teƃelei-ŋai kélee kpɔ́ kula Zerusâlɛŋ dí bɛlɛ gereŋ-sɛŋ kuŋ-nɛɛi kereŋ Ɣâla-teƃelei-ŋai dîa dí dípili Kidɔŋ tiŋ-tiŋ su.

¹⁵Dí Dɛɛ-mɛi kuui mãa ƃala-loŋ pâa a ŋaloŋ veerɛi ŋɔfólo puu-káo náaŋ ɣele. Ŋumɛ è zâla láa-soŋ-ƃelai ƃelai da Liiva-ŋai sôŋ díli dí díkpîŋ maa-waa dípa dí gereŋ-salai kula Yâwɛɛ ŋɔpɛ́rɛi mu.

¹⁶Nya ƃe náa dí pɛlɛ dítii-ŋai kɛ́ɛ ma yɛ̂ɛ berei bɔ̃yɛɛi la ŋâla-nalôŋ Mose ŋɔtɔ̂ŋ sui. Liiva-ŋai dípa a zua ŋãa dí dɛɛ zâla-laa-soŋ ƃelai pɔ́. Nya ƃe Zâla-laa-soŋ ƃelai dí ŋãai taa-taa ŋ̀âla-teƃelei ma.

¹⁷Núu támaa díkɛ gbɔŋ su nyii-ŋai dífe kɛ́ ni a dímaa waa. Diai ni ƃe Liiva-ŋai ƃe daa-tulɛ-ŋai dí díwɔ taa-tulɛ-ŋai paa. Dí Dɛɛ-mɛi kuu ƃalai ŋí paa ǹûai diɛ kpɛ́ni fêi berei ŋí nɔ ƃe dípɔri gɛi la a gɛ́ɛ dí m̀ala-loŋ ŋai maa-waa Yâwɛɛ mɛni ma.

¹⁸Ǹûai kɛ gbɔŋ sui damaa è kula Ifiraŋ, Manasɛ Isaka, da Zɛbulɔŋ. Dífe kɛ ni a dímaa-waa a gɛ́ɛ dí Dɛɛ-mɛi kuu mii-sɛŋ da mii, yɛ̂ɛ berei è kɛ a bɔ̃yɛɛ lai. Kɛ́lɛ Ɛsekaya è Ɣâla fɛli dímaa mɛ̂ni ma ǹyɛɛi, “Tɔɔ Yâwɛɛ nyíi zɔŋ-lɛ̂lɛɛi é ǹûai kélee malôŋ kaa

¹⁹nyíi ŋai da díkili tɔɔ Ɣâla, Yâwɛɛ ma nyíi gáa a dínâŋ-ni Díɣâlai, a ǹɛɛ ma dífe kɛ a dímaa waa yɛ̂ɛ berei Ŋ̀âla-pɛrɛ Kɛ́tɛi ŋɔtɔ̂ŋ-ŋai díkaa lai.”

²⁰Yâwɛɛ è Ɛsekaya wóo mɛni é ǹûai ƃalo.

²¹Eezuɛ ƃelai nyii-ŋai kɛ Zerusâlɛŋ dí Dɛ́-sɛŋ féu kpoloi maa kuui kɛ a fólo lɔ́ɔlu mɛi feerɛ díkɛ lii-nɛɛ kula. Tãi ŋí ma, zâla láa-soŋ-ƃelai ƃelai da Liiva-ŋai díkɛ naa díkɛ wule tòo Yâwɛɛ ma a ɣele kélee díkɛ Yâwɛɛ ŋɔlaa-ma-tɛ ɣale-sãai ɣale.

²²Nya ƃe Ɛsekaya è lono kpɔ́ Liiva-ŋai pɔ a kili-kula pere, kpɛ́ni fêi dítua pere è ǹɛ a gɛ́ɛ díkɛ a dítareɛ berei su da pɔ̂ri Yâwɛɛ fɛlîi lai. Kpɛ́ni fêi vólo lɔ́ɔlu mɛi feerɛi tí yée mu, dí m̀ii-sãai mîi nyíi nɔ́ kɛ̀ a dímii-sɛ̂ŋ. Dí ŋɔ́nɔ laoi-laa sama-sɛŋ da laa-ma-tɛ tɛɛ Yâwɛɛ nyíi gáa a dínâŋ-ni Díɣâlai pɔ.

²³Gɛ́ɛ tí, ǹûai kélee dífaa m̀a a gɛ́ɛ dí guui ŋí kɛ́ ŋɔ́nɔ fólo-kuu lɔ́ɔlu-mɛi feerɛ yée mu. Nya ƃe dí ŋɔ́nɔ guui kɛ a fólo-kuu lɔ́ɔlu mɛi feerɛ a lii-nɛɛ pere.

²⁴Zuda kaloŋ Ɛsekaya è guui kɛ a niŋa-sîrɛ wála ŋuŋ tɔ̂nɔ (1,000), é pɛlɛ ƃála wála lɔ́ɔlu mɛi feerɛ (7,000) ma. Dii-kɛ-ƃela kpaya-kpayai dîa máŋ dí guui kɛ a niŋa-sîrɛ wála tɔ̂nɔ (1,000), é pɛlɛ ƃála wála puu (10,000) ma. Zala-laa-soŋ ƃelai dámaa dí díkpîŋ maa waa.

²⁵Zuda ƃelai kɛ nâai díkelee da zâla láa-soŋ-ƃelai ƃelai da Liiva-ŋai dí lii-nɛɛ kula kpɔ́ a zukɛtɛ é pɛlɛ diai kula Eezuɛi dîa. Ŋɔ̃ya-ŋai kɛ Eezuɛi da Zudai díkelee kpɔ́ dí lii-nɛɛ kula máŋ.

²⁶Ǹii-nɛ̃ɛi kɛ Zerusâlŋ a tãi tí è kɛ kpɔ́ a zukɛtɛ. É siɣe Eezuɛ kaloŋ Deeƃé ǹóŋ Saloma ŋɔtãi ma, dífe ta wɔ́lɔ lii-nɛɛ sĩi kɛ́ɛ ŋí kula ni Zerusâlɛŋ.

²⁷Zâla-laa-soŋ ƃelai da Liiva-ŋai dítɔɔ dílûwa too ǹûai dîa. Ɣâla è dífɛli-wooi mɛ̂ni, kpɛ́ni fêi, è seri kpɔ́ Ɣâla-taa ŋɔmaa waa kwaai ma ƃɛ́ɛi gáa naai.