Read Kpelle Kɔlɔnikɔ Veerɛi 31 Bible Online

Kɔlɔnikɔ Veerɛi 31 - Kpelle bible

Kɔlɔnikɔ Veerɛi 31

¹Nyiŋi kélee pôlu ma, Eezuɛ ƃelai nyii-ŋai kɛ nâai dí lí kpɔ́ Zuda taa-lee-ŋai kélee su dí ŋ̀âla da kpɛ́ni ŋai fɛlii wolo. Dí ŋâla-nɛnî Asira ɣâla-ŋɛi-kɛ maa wurii têe. Dí ŋâla-pɔkɔɔŋ-ŋai fɛlii kara. Dí díɣâla teƃele-ŋai wólo nyíi kɛ Zuda, Bɛŋsima, Ifiraŋ da Manasɛ lɔii gwaa kélee sui. Eezuɛ-ŋai kɛ́ɛ da kpɛɛ a zãai ŋí woloɔɔi, dílene pôlu dípɔ̂i taai díkɔ̃liŋ-ŋai mɛi.

²Ɛsekaya è zâla láa-soŋ-ƃelai ƃelai da Liiva-ŋai ŋáa kɔlɛ a gbulu-ŋa yɛ̂ɛ berei dítii-kɛɛi è kɛ lai. Zala-laa-soŋƃelai da Liiva-ŋai díkɛ naa díkɛ kereŋ-sâla da laoi-laa sala kula. Díkɛ naa díkɛ tii kɛ. Díkɛ sɛɣɛ-fei tɛɛ. Díkɛ laa-ma-tɛ wule too Yâwɛɛ ŋɔpɛ́rɛi ŋɔsiɣãŋ-la

³Galoŋ è sãa kula gɔ̃lîŋ su a ɣele-wala da ɣele-wulii kéreŋ sala mɛni ma, da kɛ́ ƃó kéreŋ sala kula mɛ̂ni ma vii-tɔɔ ɣelei mɛni ma, ŋ̀áloŋ ninai da gúu-ŋai mɛni ma yɛ̂ɛ berei è kɛ a bɔ̃yɛɛ la Yâwɛɛ ŋɔtɔ̂ŋ sui.

⁴E mò Zerusâlɛŋ ƃelai dîa a gɛ́ɛ dí zãai m̀aa nɛ̂ɛi dí dɛɛ zâla láa-soŋ-ƃelai ƃelai da Liiva-ŋai pɔi tɛ́ɛ a gɛ́ɛ dí Yâwɛɛ ŋɔtɔ̂ŋ mɛi káa yɛ̂ɛ berei Gâa lai.

⁵Dɔ̂ŋ ŋí kɛ́ɛ a serii, Eezuɛ-ŋai dí dísi-sɛŋ m̀aa-ŋuŋ ŋai tɛɛ kpɔ́ a kili-kula pere. Zãai ŋí díkɛ a mii-sɛŋ da ŋwã̂ai nina, ɔle wúlɔ da kwɛ̃ŋ-wulɔ, é pɛlɛ zãai kélee ma kɛ̀ díkpâlaŋ-ŋai. Dí pa sãai kélee buu ɣelei.

⁶Eezuɛ da Zuda sinaai nyii-ŋai kɛ daa-ŋai su Zudai dîa máŋ dípa a dísɛŋ-puui nyíi dí gula díniŋa-ŋai da díƃala-ŋai samai. Dí ŋɔ́nɔ pa a zɛŋ-puui nyíi dí gula zãai ŋai kɛ̀ naa Yâwɛɛ Díɣâlai mɛni mai sama. Dí zãai ŋí ŋáa tɛ gîe ma a gbulu kɛtɛ-ŋa.

⁷Dí pɛlɛ zãai ŋí tɛɛ ma ŋaloŋ zaaƃai su díkpɛɛ ŋaloŋ mɛi feerɛi su.

⁸Tãi Ɛsekaya da naa tii kɛ́ lɔɔi ƃelai dí pá la dí zãai ŋí kaai, dí Yâwɛɛ láa maa tɛ dí lûwa too ŋɔnûai Eezuɛ ƃelai dîa.

⁹Ɛsekaya è zâla láa-soŋ-ƃelai ƃelai da Liiva-ŋai marê kɛ é pîlaŋ zãa ŋá tɛ̂ɛ gîe mai mɛ̂ni ma.

¹⁰Nya ƃe Azaria nyíi kɛ a zâla láa-soŋ-ƃelai nuu kɛ́tɛi, nyíi kula Zadɔ ŋɔsuui sui è ŋ̀óo su too ǹyɛɛi, “E siɣe kpɔ́ tãi ma ǹûai dí pɛlɛ la pâa ma a zãai Yâwɛɛ ŋɔpɛ́rɛi lai, mii-sãa támaa káa ƃɛ kú m̀ii, kú da lâai kɛ. Kpɛni fêi Yâwɛɛ a lûwa too ǹûai dîa, m̀ɛni ma m̀ii-sãai damaa a lɛɛ.”

¹¹Nya ƃe Ɛsekaya è mò a gɛ́ɛ dí mii-sãai lâai kɛ kwaa ma kpɛtɛ Yâwɛɛ ŋɔpɛlɛi mu. Dí fâa ŋ̀oo ma dí gɛ tí.

¹²Dí pa kpɔ́ a zãai ŋí a ténîŋ ƃo pere. Dí pa a zɛŋ-puui da zama-sãai nyíi kɛ a gbɛtɛɛ Ɣâla mɛni mai. Dí Kɔnania nyíi kɛ a Liiva ǹúui kɛ́ zãai ŋí mɛi. Ǹeɣe Simei ƃé kɛ̀ a gɔlɛ ma ǹúui.

¹³Galoŋ Ɛsekaya da Azaria nyíi kɛ Ɣâla ŋɔpɛ́rɛi mɛi dí ǹûai ŋí: Zeiɛ, Azaria, Nâa, Asaɛ, Zɛrimɔ, Zozaƃa, Ilaiɛ, Maa da Benaa lɛ a gɛ́ɛ díkɛ tíi kɛ Kɔnania da ǹeɣe Semei díyee mu.

¹⁴Kore nyíi kɛ a Liiva ǹúui Iŋna ǹóŋ, nyíi kɛ vóloi kulai pere siɣãŋ laƃelei mɛi kâai, ƃe dí gɛ̀ gula-gili-ŋa sama-sɛŋ nyíi dakâa dɛ̀ɛ Ɣâla pɔi, mɛi gɛ zãai ŋáa kɔlɛ nyii-ŋai dakâa dɛɛ Yâwɛɛ pɔi da zama-sãa maa waai.

¹⁵Idɛŋ, Miniami, Zasua, Semaiya, Amaria da Sekanaƃa kâa kpɔŋ-mâ tɛɛ bɔ a ténîŋ ƃo pere díkɛ zãai ŋí ŋáa kɔlɛ díƃaraŋ sala-laa-soŋ ƃelai dîa daa-ŋai su yɛ̂ɛ berei díkɛ a díŋa kɔlɛɛ lai, núu-pɔlɔ-ŋa kpaa máŋ ǹyaŋkpa-ŋa.

¹⁶Naa pôlu ma, dakâa ŋ̀aa kɔlɛ zinaai dîa nyii-ŋai díkoraŋ è kɛ saaƃa é tɛ ǹaa mɛi perei ma nyii-ŋai dílaa è kɛ ǹuu-suu kɔlɔi mai. Diai ŋí ƃe dakâa li Yâwɛɛ ŋɔpɛ́rɛi mu díkɛ díɣele kélee tii kɛ naa yɛ̂ɛ berei dítii è kɛ la díkpulu mai.

¹⁷Dakâa ŋɔ́nɔ zãai ŋí ŋáa kɔlɛ zâla láa-soŋ-ƃelai ƃelai dîa dílaa è kɛ dínûai dínuu-suu kɔlɔi mai da Liiva-ŋai nyii-ŋai díkoraŋ è kɛ buu-feerɛ é tɛ m̀ɛi-perei. Diai ŋí ƃe dakâa tíi kɛ Yâwɛɛ ŋɔpɛ́rɛi mu yɛ̂ɛ berei díkɛ la díkpulu mai.

¹⁸Dí zãai ŋí da tɛ̂ɛ máŋ dínîa-pɛlɛɛi, dínɛyɛ̃ɛi, dílonii-sinaai da dílonii-nɛyɛ̃ɛi kélee pɔ díkoli su nyii-ŋai dílaa è kɛ dínuu-suu kɔlɔi sui. Kpɛni fêi ǹûai ŋí dífaa m̀a a gɛ́ɛ dí díkpîŋ kpɛtɛ diî kɛ mɛni ma.

¹⁹Zâla-laa-soŋ ƃelai nyíi ŋai kɛ a Eelɔŋ ŋɔsuui su-ƃelai nyii-ŋai kɛ gbanâŋ-ŋai lá daa-lee-ŋai kɔlɛi dí ǹûai lɛ a gɛ́ɛ dízãai ŋáa kɔlɛ zinâai kélee dîa nyíi kɛ̀ dísamai, é pɛlɛ diai kélee ma dílaa è kɛ a bɔ̃yɛɛ Liiva-ŋai dínuu-suu kɔlɔi mai.

²⁰Mɛni ŋai ŋí ƃe Ɛsekaya è wɔ́lɔ gɛ̀ Zuda gwaa kélee ma. E m̀ɛnii kɛ nyíi kɛ́ a ǹɛ́lɛɛ, zãa, denîŋ ƃoɔɔ Yâwɛɛ, Ŋɔɣâlai ŋɛ́i.

²¹M̀ɛnii nyíi kélee kpɔ́ è gɛ a tíi kɛ́ɛ Ɣâla ŋɔpɛ́rɛi mu da dɔ̂ŋ é pɛlɛ Ɣâla ŋɔtɔ̂ŋ mai è gɛ̀ a woo mɛ̂ni pere. È Ɣâla nîa mɛni kɛ ŋɔtíi kɛ̂ɛi su a ǹíi kélee, m̀ɛni ma, è ƃûu-ƃo ŋɔtiî kélee su.