Read Kpelle Kɔlɔnikɔ Veerɛi 32 Bible Online

Kɔlɔnikɔ Veerɛi 32 - Kpelle bible

Kɔlɔnikɔ Veerɛi 32

¹Gâloŋ Ɛsekaya kɛ́ɛ galoŋ-laai su Zuda lɔii mɛi ŋɔkoraŋ puu-káo náaŋ su, Asiria kaloŋ Sinakari è pà é kɔ́ pɛ́lɛ Zuda taa-lêe-ŋai siɣãŋ-ŋa díkɛ̀ a dítinaŋɔɔ diai ḿâ é díkelee sóŋ.

²Tãi Ɛsekaya è Gâa la a gɛ́ɛ Sinakɛtri è pa a gɛ́ɛ é kɔ́ pɛlɛ Zerusâlɛŋ mai,

³È ŋɔtíi-kɛ ƃelai da gɔ-kuluƃa-ŋai láa-tuɛ ƃelai marê kɛ a kɛ da pɔri ǹyái ɣilii banaŋ mâ pere daa-lêei su. Nya ƃe dífaa ma.

⁴Kpakolo kpulu kɛ́tɛ è pa dí ǹyá-ŋai kɛ ǹɔii-su gwaa kélee ɣíri. Dí mò dîyɛɛi, “Lé mɛni ƃe Asiria kaloŋ-ŋai da pâi ƃɛ́ díkɛ yá támaa kàa lai?”

⁵Nya ƃe è tíi kɛ̀ kpɔ́ a gbanaŋɔɔ é ziɣãŋ pɛ́ŋ-pɛlɛ, é yeŋkêŋ ŋ̀aa tɔɔ m̀a. È ŋɔ́nɔ siɣãŋ nîna tɔ̀ɔ bɔlɔi pôlu pere. É bɛ́rɛ-kaŋ mɛi kpuaa-ŋai kɛ̀ Deeƃé ŋɔtaai sui, su kpànaŋ. È ŋɔ́nɔ kɔ́kɔ-sãa da kpála-ŋá-ɣale kɔli-kalaŋ-ŋa kpɛtɛ.

⁶È kɔkuluƃa mɛi-ƃela sèe ǹûai mɛi. É díŋa tɛ̀ ma daa-lêei ŋɔsiɣãŋ lá-ƃerei. É gili-kula wooi ŋí ƃo dîa:

⁷“Kákɛ a kátɔɔ̂i kpanaŋɔɔ, kálii kpeliɛɛ. Káfe yao, kpaa máŋ kálii é tóo pôlu. Kpɛ́ni fêi, Asiria-ŋai díkâloŋ aâ pá a kɔkuluƃa kpulu kɛ́tɛ kɛ́ɛ ŋí. Kpɛ́ni fêi, wála-wala-laa kɛ́tɛ káa kápôlu é tɛɛ dîa.

⁸Diai díkaa bôlui díkaa nɔ́ a núu-kpune. Kɛ́lɛ Yâwɛɛ Kúɣâlai káa kúpôlu a gɛ́ɛ é kpɔ́ŋ kûa kú gɔi ŋí kɔ́.” M̀ɛnii ŋí Zuda kaloŋ Ɛsekaya è mò ǹûai diai, è díkili kula.

⁹Zãâi tí sɔlɔ ƃóɔɔ mì pôlu mai, Asiria kaloŋ è ŋɔkɔ́-kɔ-ƃelai gbulu kɛ́tɛ kùla Lakee taa-lêei su é dí tɛ́ɛ a gɛ́ɛ dí kɔ́ pɛ́lɛ Ɛsekaya ma Zerusâlɛŋ taa-lêei su. È ŋɔkɔ́-kɔ-ƃela túɛ-ƃela kpaya-kpaya saaƃai tɔ̀ɔ dí mɛi. Tãi dí sèri la naai, gɔ́-kɔ-ƃela mɛi-ƃelai dí tɔ̀ɔ berei su ƃɛ́i zeɣe kpɛtɛ-ƃelai dítii kɛ́ kwaai ma è kɛ̀ naai. Ǹaa è kɛ̀ berei ma ƃɛ́i ǹûai da seɣe wâa naa, ǹya-ɣɛ̂lii kwára nyíi a kûla bóai su ǹyéei ŋûa-perei.

¹⁰Asiria-ŋai dí kɔ́-kɔ-ƃela mɛi-ƃelai dɔnɔ è mò dîa, “Worɛ̂-woo káa ńa Ɛsekaya mɛni ma é kúla Asiria kaloŋ kɛ́tɛi yêei. Ka lí ká marê kɛ́ lé kpîŋ ƃé gíli tɔ̂ɔi kpɔ́ tí m̀a ǹâai kpɔ́ tí a gbîŋ a gɛ́ɛ tîi?”

¹¹Asiria kɔ-kɔ-ƃela mɛi-nuui è lì tuɛ a ŋ̀óo, “Kpaa Ɛsekaya kíli tɔɔ̂i nâa Yâwɛɛ, Káɣâlai ma?

¹²Ɛsekaya fé Yâwɛɛ fɛli kwaa-ŋai ma su kara ní, é ŋɔŋâla-teƃele-ŋai wólo, fɛ̂ɛ nɔ́ Yâwɛɛ fɛli kwaa-ŋai dɔnɔ ma da ǹaa Ɣâla-teƃelei? Vé mó ní Zerusâlɛŋ da Zuda-ƃelai dîa a gɛ́ɛ gwaai tí ma nɔ́ ƃé fɛ̂ɛ dí Ɣâla fɛli naa Zerusâlɛŋ?

¹³Káfe ǹɛɛ naa Ɛsekaya é káƃoo. A m̀o kâa a gɛ́ɛ Yâwɛɛ a pâi káŋuŋ ma ƃôi, káfe làa-la. Ɣâla da a pɔ̂ri ǹɔii-ŋûŋ-ŋai kula-yêei kɛ̂i Asiria kaloŋ yêei?

¹⁴Ǹɔii-ŋai ǹâŋ è wɔ́lɔ dísu karai nênɛ ƃe Ŋɔɣâlai a ta ŋɔnûai kula yêei kɛ? Vé tí! Káɣâlai a pɔri ká kulâi leŋ ǹyée-ŋa? Và pɔ̂ri gɛ̂i!”

¹⁵È kɛ̀ tí, gɔ́-kɔ-ƃelai mɛi-nuu kɛ́tɛi è mù sìɣe é tɔ́ɔ, é láɣi a ɣêlei-pere Ibulu-wooi su ǹyɛɛi, “Kákelee ka káwoli tɔ́ɔ mɛnii ma Asiria kaloŋ kɛ́tɛi a môi kâai. Káfe nɛ̀ɛ naa Ɛsekaya é ká pɛ̀lɛ. Ɛsekaya fa pɔ̂ri kámaa-kɔ̃ɔ̂i a dɔnɔ kpîŋ.”

¹⁶Sinakɛri naa tii kɛ́ lɔɔi ƃela kpaya-kpayai dia máŋ dílòno a ǹyɔ́mɔɔ é pîlaŋ Yâwɛɛ Ɣâlai da ǹyée-mu ǹúui Ɛsekaya dîa.

¹⁷Sinakɛri è ŋɔ́nɔ kɔlɔ pɔ̃yɛ é Eezuɛ Ŋɔɣâlai wòo-yɔ̂ŋ fé. È mò ǹyɛɛi, “Berei nɔ́ tí ǹɔii-ŋûŋ-ŋai tí su ɣâla-ŋai dífe pɔri ni dínûai kulâi la ǹyêei, bere nɔ́ ƃe Ɛsekaya Ŋɔɣâlai fé pâi pɔri da ŋɔnûai kulâi la ǹyêei.”

¹⁸Nya ƃe dílono ǹûai kɛ ziɣãŋ mɛi Zerusâlɛŋ pɔ a Ibulu-woo a gɛ́ɛ dí dímaa-yao dí daai soŋ.

¹⁹Dílòno é pîlaŋ Zerusâlɛŋ Ɣalai ma yɛ̂ɛ berei nɔ́ dílòno la ǹûa da kpɛ́ni-ŋai díɣâlai-ŋai ma ŋ̀éniɛi su nyíi da gbɛ̀tɛ a núu yeei.

²⁰Gâloŋ Ɛsekaya da Ɣâla ŋɔlóno kɛ́-nuui Azaya nyíi kɛ̀ a Emɔzi ǹóŋ díwɔ̀lɔ Ɣâla ma nyíi gáa Ɣâla-taai a m̀ɛnii ŋí.

²¹Maa kpîni tí, Yâwɛɛ è ŋɔkélai dɔnɔ tɛ̀ɛ Asiria-ŋai díƃûui su. È díkɔ-kuluƃai-ŋai wála-wala-ŋai da dílaa-tuɛ ƃelai da díi-kɛ́ ƃela kpaya-kpayai páa. Nya ƃe Asiria kaloŋ è lì pôlu ŋɔlɔii sú a ŋumɛ-pere. Tãi è li lai, è lì Ŋɔɣâlai ŋɔpɛ́rɛi kɛ́tɛi mui, a gɛ́ɛ é vɛ̀li. Ǹônii sinaai veerɛ dí lí naa dí bàa a díƃoa-sɔkpɔ-ŋai.

²²Bere ƃe Yâwɛɛ è Ɛsekaya da Zerusâlɛŋ ƃela kula la Asiria kaloŋ Sinakɛri yêei da ǹúui gbeli-ŋai. È dímɛi kâa kpɔ́ a pere-sii kélee lii-see su.

²³Nya ƃe núu támaa dí pà a sama-sãa Yâwɛɛ pɔ́. Dí pà a sãâ maa mɛ̂ni kpanaŋɔɔ Ɛsekaya pɔ Zerusâlɛŋ. É síɣe tãi tí ma, ƃaa kɛ́-maa kɛ́tɛ è kɛ̀ m̀a ǹɔii ŋuŋ-ŋai su.

²⁴Tãi tɔnɔ da Gâloŋ Ɛsekaya è kɔ̀lɛ kpɔ́ ǹaa é lɛ́ɛ a guro-té gɛ́ pà saâi. È Yâwɛɛ fɛ̀li. Nya ƃe Emɔ ǹóŋ Azaya è lì bɔ́ naa a gɛ́ɛ é gáa. Yâwɛɛ è ŋ̀óo mɛ̂ni é nâa ŋ̀ɛi-kɛ-maa da lɛ́ m̀a a gɛ́ɛ a pâi ƃâloi.

²⁵Kɛ́lɛ Ɛsekaya è nâa yoŋka tèe ǹíi su vé ǹyée see ní m̀ɛni lɛ́lɛɛi tí mu. Ɣâla è ǹíi ŋwàna ma da Zuda, é pɛ́lɛ Zerusâlɛŋ-ƃelai dîa.

²⁶Nya ƃe Ɛsekaya è nâa bôlu tɔ̀ɔ ŋɔ-yoŋka téɛɛi ma yɛ̂ɛ berei nɔ́ Zerusâlɛŋ-ƃelai dí gɛ̀ la dîa máŋ. Gɛ́ɛ tíi, Yâwɛɛ è ǹíi ŋáa yèŋ dîa Ɛsekaya ŋɔkɛ ɣéniɛi su.

²⁷Tɔɔ-sãa támaa da ƃaa kɛ́-maa è kɛ Ɛsekaya yêei. È sɛŋ-lâai kɛ́ kwaa ma kpɛtɛ ŋɔkanei, ŋɔgooi, kɔni-Sɔ̃ɔ-kpanaŋɔɔi, ŋɔsãa-kuŋ-nɛɛi, ŋɔkpala-ŋa ɣale-sãai da zãa mɛni kpanaŋɔɔi mɛ̂ni ma.

²⁸È ŋɔ́nɔ pɛrɛ-ŋa tɔɔ mii-sãa, ŋwã̂ai-nina da wurɔ pui kɛ mɛni ma. È pɛrɛ tɔɔ m̀ala-kpulu-ŋai mɛ̂ni ma.

²⁹È kpânaŋ-ŋa pu é ƃála da niŋa kpulu támaa sɔlɔ ƃo. Kpɛni fêi Ɣâla è tɔɔ-sãa támaa tɛɛ bɔ.

³⁰Ɛsekaya ƃé wɔ́lɔ Gioŋ Yai ɣîri ŋ̀ûa pere é gɛ ǹyái kɛ́ tɛ̀ɛ ǹoai-su pere Zerusâlɛŋ vóloi-liî-pere. È mɛni lɛ́lɛɛ sɔlɔ ƃô m̀ɛni-ŋai è gɛ̀i gélee su.

³¹Kɛ́lɛ tãi ǹaa-kaa-kɛ ƃelai díkula la Babelɔŋ dí pa bɔ-naa dímarê kɛ́ é pîlaŋ ŋ̀ɛi-kɛ-maa kɛ́tɛi mɛni ma ǹɔii sui, Ɣâla è ǹɛɛ zukɔ̂ɔŋ ŋí su a gɛ́ɛ é m̀ɛnii kélee kɔlɔŋ nyíi kɛ ǹíi sui.

³²Mɛni-ŋai kélee Ɛsekaya è wɔ́lɔ gɛ ŋɔkaloŋ-laai sui da berei è wɔ́lɔ gbîŋ tɛɛ lai gélee káa Ɣâla ŋɔlono-kɛ-ǹúui Azaya nyíi kɛ a Emɔzi ǹóŋ ŋɔzĩ̂ai su nyíi gáa Zuda da Eezuɛ-ŋai díkâloŋ-ŋai dímɛni pɔlɔi sui.

³³Ɛsekaya è làa ǹyée nyɔmɔi mɛi dí ǹoo ǹyéei ma ƃɛ̂ɛi díwɔlɔ Deeƃé ŋɔsuui-su-ƃelai ƃolôŋ ŋuŋ-tuɛ pere. Zuda da Zerusâlɛŋ ƃelai kélee dí pá díƃaa kɛ́-maa tɛɛ bɔ a tãi è sàa lai. Nya ƃe ǹóŋ Manasɛ è lɛ̀ɛ bɔɔ-ŋa a kâloŋ.