Read Kpelle Kɔlɔnikɔ Veerɛi 33 Bible Online

Kɔlɔnikɔ Veerɛi 33 - Kpelle bible

Kɔlɔnikɔ Veerɛi 33

¹Manasɛ è wɔ́lɔ kɛ a koraŋ puu-káo-feerɛ tãi díwɔlɔ gɛ la a kâloŋ. È gɛ galoŋ-laai su a koraŋ buu-lɔ́ɔlu káo-lɔ́ɔlu. Zeɛɛ è kɛ Zerusâlɛŋ.

²È tùa-nyɔ̂ŋ támaa kɛ Yâwɛɛ ŋɛ́i. A kâa tùa nɔ́ yɛ̂ɛ ǹɔii-ŋai kɛ gɔlɛ mai su-ƃelai nyíi ŋai Yâwɛɛ è wɔ́lɔ díkpɛ Eezuɛ-ŋai ŋɛ́i-tuɛi.

³È wɔ́lɔ ŋ̀âla da kpɛ́ni-ŋai fɛli kwaa-ŋai ma tɔ̀ɔ nyíi ǹâŋ Ɛsekaya è wɔ́lɔ ǹaa woloi. E ŋɔ́nɔ ɣâla-teƃele kpɛtɛ Baa-ŋai mɛ̂ni ma. É Asira ɣâla-ŋɛi-kɛ maa wurii tɔ́ɔ ŋɔ́nɔ pôlu. A kâa máŋ kɛ ŋ̀elei-su sãai fɛlii.

⁴È ɣâla-teƃele-ŋa tɔ̀ɔ ɣâla-da kpɛ́ni-ŋa mɛni ma Yâwɛɛ ŋɔpɛ́rɛi mu. Ǹyaŋ gwaa ŋí mâ ƃé Yâwɛɛ è wɔ́lɔ mò ǹyɛɛ, “Ǹáa a pâi kɛ̂i Zerusâlɛŋ wɔ́lɔ-wɔlɔ da wɔ́lɔ-wɔlɔ.”

⁵E ɣâla-teƃele-ŋa tɔɔ ŋ̀elei-su-sãai maa mɛ̂ni ma Yâwɛɛ ŋɔpɛ́rɛi m̀ela-feerɛ ma.

⁶E ǹóŋ-surɔŋ kula a sala ŋɔŋ-su Bɛŋ-Inɔŋ Tiŋ-tiŋ su. A kâa tɛli-kpɛ. Gɛ ponîŋ kɛ̀. Gɛ tuɛ mɛni ƃo. Gɛ̀ lono mɔleŋ-ŋa pɔ. È mɛni nyɔmɔɔ támaa kɛ a Yâwɛɛ nyíi gɛ̀ Yâwɛɛ é ǹíi ŋwanai.

⁷È wuru saa é dɔɔ Ɣâla ŋɔpɛ́rɛi mu. Bɛrɛi ŋí ƃe Ɣâla è wɔ́lɔ mò Deeƃé da ǹóŋ Saloma dîa ǹyɛɛi, “Bɛrɛi ŋí da Zerusâlɛŋ nyíi ŋa zîe Eezuɛ-sii-ŋai samai ƃe ŋa pâi ǹáa seêi m̀a wɔ́lɔ-wɔlɔ da wɔ́lɔ-wɔlɔ.

⁸Ḿve ŋɔ́nɔ pâi ǹɛɛ̂i naa Eezuɛ kɔ́ɔ e kula ǹɔii ŋí ma nyíi ŋa dɛ̀ɛ dínua-pɔlɔ-pɔlɔ ŋai pɔi, a kɛ da dímɛi káa dí m̀ɛnii kélee ŋa-see kɛ nyíi gáa ŋátɔ̂ŋ su nyíi ǹyée mu ǹúui Mose è bɔ̃yɛɛ̂i.”

⁹Kɛ́lɛ Manasɛ è gɛ̀ Zuda da Zerusâlɛŋ ƃelai díkula berei ma dí mɛni nyɔmɔ támaa kɛ́ é tɛɛ ǹɔii-ŋai su-ƃelai dîa nyii-ŋai Yâwɛɛ è wɔ́lɔ díkpɛ Eezuɛ-ŋai tuɛi.

¹⁰Yâwɛɛ è lono Manasɛ da ŋɔnûai pɔ́, kɛ́lɛ dífe díwoli tɔɔ ní a dɔnɔ kpîŋ.

¹¹Nya ƃe Yâwɛɛ è gɛ Asiria kaloŋ ŋɔkɔ-kuluƃa ŋai dí pa dí Manasɛ sòŋ a kɔ-sôŋ dí kpawɔ pili zũai, Dí bili ƃara-kpɔnɔ ŋá díli la Babelɔŋ.

¹²Tãi è kɛ la mɛni kpɔlui ŋí sui, è Yâwɛɛ nyíi kɛ̀ a Ŋɔɣâlai fɛli a mãa-yêŋ pere é m̀aa yêŋ ǹâŋ-ni Díɣâlai ŋɛ́i.

¹³Nya ƃe è Ɣâla fɛli, Ɣâla é m̀aloŋ kàa é ŋ̀woli tɔɔ ŋɔkpera-fêi ma. Gɛ́ɛ tí, è pa la pôlu Zerusâlɛŋ é zèe ŋɔkaloŋ-laai su. Manasɛ è nâa gɔ́lɔŋ a gɛ́ɛ Yâwɛɛ ƃe Gâa a Ɣâla.

¹⁴Nyiŋi pôlu ma, è nâa ziɣãŋ pôlu pere ŋɔi tɔ̂ɔ Deeƃé ŋɔtaai ma, é siɣai voloi liî pere Gioŋ ya-loŋ kɔlɛ nyíi kɛ̀ Kidɔŋ diŋ-tiŋ su. E li la é lɛɛ la zu é seri la Ǹyɛ̃ɛ siɣãŋ laƃelei. È ziɣãŋ ŋí tɔ̂ɔ é dínaŋ Ofɛ yêei ma. È dɔ̀ɔ a mɛi koyaa. È kɔkuluƃa mɛi-ƃela-ŋa sèe Zuda taa-ŋai su nyíi maa è kɛ a dínaŋɔɔ a siɣãŋ.

¹⁵È ŋ̀âla da kpɛ́ni-ŋai da ŋ̀úru-sâa-ŋai kùla Yâwɛɛ ŋɔpɛ́rɛi mu, é ŋ̀âla-teƃele-ŋai nyii-ŋai e dɔ̀ɔ Zerusâlɛŋ Ŋ̀âla-pɛrɛ Kɛ́tɛi kɔlɛ ǹéei mai kula naa. È ŋ̀âla-teƃelei nyii-ŋai kɛ́ Zerusâlɛŋ kélee kula naa é dípili.

¹⁶Nya ƃe è Yâwɛɛ ŋɔɣâla-teƃelei kpɛtɛ pôlu é laoi-laa da sɛɣɛi-fei sama-sɛŋ kula ŋ̀á a sala. E mò Zuda ƃelai dîa a gɛ́ɛ dítii kɛ Yâwɛɛ nyíi gáa a Eezuɛ Ŋɔɣâlai mi.

¹⁷Ǹûai díkɛ nɔ́ niî sâla kulâi ŋ̀âla da kpɛ́ni-ŋai fɛli kwaai ma. Kɛ́lɛ Yâwɛɛ nyíi gáa a Díɣâlai nɔ́ ƃé díkɛ̀ zâla-ŋai ŋí kulâi ma.

¹⁸M̀ɛni-ŋai nyíi kélee Manasɛ è gɛ ŋɔkaloŋ-laai-sui, ŋɔɣâla fɛli wooi ma da ŋ̀óo ŋai Ɣâla ŋɔlono kɛ ƃelai díwɔlɔ mò ma Yâwɛɛ nyíi gáa a Eezuɛ Ɣâlai láai sui gélee káa Eezuɛ-kaloŋ ŋai díkoraŋ kɔlɔi su.

¹⁹Ŋɔɣâla fɛli wooi da berei Ɣâla è wɔ́lɔ zu too la da ŋɔsɔnyɔ̂ŋ, berei è wɔ́lɔ kula la Ɣâla polui, gwaa-ŋai è wɔ́lɔ gbɛtɛ gɛ ɣâla dakpɛ́ni-ŋa fɛli nâai da ŋâla-nɛniî Asira ŋ̀ɛi-kɛ-maa wurii da ŋâla-pɔkɔɔŋ-ŋai è wɔ́lɔ dɔ̀ɔ é lɛɛ pâi gbîŋ maa yenîi, gélee káa Ɣâla ŋɔlono-kɛ-ƃelai dímɛni pɔlɔi su.

²⁰Manasɛ è nâa làa ǹyée nyɔ́mɔ mɛi dí nòo ŋɔkâloŋ-pɛrɛi lá. Nya ƃe ǹoŋ-surɔŋ Amɔŋ è lɛ̀ɛ bɔɔ ŋa a kâloŋ.

²¹Díwɔlɔ Amɔŋ kɛ̀ a kâloŋ a tãi è kɛ̀ la a kóraŋ buu-feerɛ káo-feerɛi. È kɛ gâloŋ-laai su a koraŋ feerɛ. Zeɛ̂ɛ è wɔ̀lɔ kɛ́ Zerusâlɛŋ.

²²È wɔ́lɔ mɛni nyɔ́mɔ támaa kɛ̀ a Yâwɛɛ yɛ̂ɛ berei ǹâŋ Manasɛ è wɔ́lɔ gɛ lai. Amɔŋ è wɔ́lɔ kɛ̀ sala kulâi ŋâla-pɔkɔɔŋ ŋai kélee dîa Manasɛ è wɔ́lɔ gbɛ̀tɛi.

²³Kɛ́lɛ Amɔŋ fé wɔ́lɔ gbîŋ maa-yeŋ ni Yâwɛɛ ŋɛ́i yɛ̂ɛ berei ǹâŋ Manasɛ è wɔ́lɔ gɛ̀ lai. Mɛni ma, ŋɔsɔnyɔ̂ŋ su e kɛ́ kpɔ́ a gɛtɛ a ŋánaa.

²⁴Nya ƃe Amɔŋ ŋɔtíi-kɛ-ƃela kaya-kaya-ŋai dí tɔɔ m̀a dí baa ŋɔkâloŋ-pɛrɛi mu.

²⁵Gɛ́ɛ tí, Zuda ƃelai dí dímu sìɣe dí ǹûai gâloŋ Amɔŋ paai páa. Dí ǹóŋ-surɔŋ Zosaya see bɔɔ-ŋa a kâloŋ.