Read Kpelle Kɔlɔnikɔ Veerɛi 34 Bible Online

Kɔlɔnikɔ Veerɛi 34 - Kpelle bible

Kɔlɔnikɔ Veerɛi 34

¹Tãi Zosaya è wɔ́lɔ kɛ la a koraŋ lɔ́ɔlu mɛi saaƃai, dí gɛ a kâloŋ. E gɛ̀ galoŋ-laai su a koraŋ buu-saaƃa káo-tɔnɔ. Zeɛ́ɛ è kɛ Zerusâlɛŋ.

²È wɔ́lɔ mɛni lɛ́lɛɛ kɛ Yâwɛɛ ŋɛ́i. E wɔ́lɔ tûa yɛ̂ɛ ǹâŋpɔlɔi Deeƃé. Vé wɔ́lɔ kula ní berei mâ é tínaŋ ǹáa-mii-yêe, kpaa máŋ gɔ̀ɔ-yêe mɛi pere.

³Gɛɛ gâloŋ-laai su ŋɔkóraŋ ǹɔ́ɔɔlu-mɛi saaƃai, tãi ŋí su è kɛ̀ niî a ǹyaŋkpa. È nâa pɛ̀lɛ ǹâŋ pɔlɔi Deeƃé Ŋɔɣâlai fɛlíɛɛ ma. Góraŋ buu-káo feerɛi su, è nâa pɛ̀lɛ ŋ̀âla da kpɛ́ni-ŋai fɛli kwâa-ŋai mâ su karâi. È ŋâla-nɛnii Asira ŋ̀ɛi-kɛ-maa wurii, ŋâla-pɔkɔɔŋ nyii-ŋai dí gbɛ̀tɛ a wurii da nyii-ŋai dí dɔɔ̂i kélee kulâi Zuda da Zerusâlɛŋ.

⁴Ŋɔtɔ̂ŋ lá wòo ma, dí Baa ŋɔɣâla-teƃelei-ŋai wólo. È gereŋ-sɛŋ kûŋ-nɛɛi kereŋ ɣâla-teƃelei su tee-têe a gbua-kpûa. È ŋâla-nɛnî Asira ŋɛi-kɛ-maa wurui fũa-fũa, é pɛlɛ ŋâla-pɔkɔɔŋ-ŋai dîa. È zãai ŋí fũa-fũa é dí taa-taa diai dakâa sala kula diɛi díƃolôŋ mɛi.

⁵È dísala-laa-soŋ ƃelai káo kereŋ díɣâla-teƃele ŋai ŋá. Berei ŋí ƃe è Zuda da Zerusâlɛŋ maa waa la.

⁶È m̀ɛni tɔnɔi ŋí kɛ̀ Manasɛ, Ifiraŋ da Simiɔŋ dílɔii kpiniŋ su taa-ŋai su é lɛɛ la zu é seri Nɛfɛtɛli da daa-pileŋ ŋai kɛ̀ ǹaa kɔlɛ mai su.

⁷È ŋâla-teƃele-ŋai da ŋâla-nɛnii Asira ŋɛi-kɛ-maa wurii kélee kpɔ́ wólo, é ŋâla-pɔkɔɔŋ-ŋai kélee kpɔ́ fũa-fũa. È gereŋ-sɛŋ kûŋ-nɛɛi kereŋ-ɣâla-teƃelei su tée-têe a gbua-kpûa Eezuɛ gwaa kélee ma. É lene pôlu é lí Zerusâlɛŋ.

⁸Gɛɛ gâloŋ-laai su ŋɔkóraŋ buu káo lɔ́ɔlu mɛi saaƃai su, gɛɛ a kpɛɛ a ŋ̀âla da kpɛ́ni-ŋai fɛli mɛ̂ni kula ǹɔii sui, è Safaŋ nyíi kɛ̀ a Azilia ǹóŋ-surɔŋ da Maaseia nyíi kɛ̀ daai mɛi, da Zoa nyíi kɛ̀ a Zoazi ǹóŋ-surɔŋ nyíi kɛ̀ a m̀ɛni-pɔ̂lɔ pɔyɛ̃ɛ ǹúui ni tɛ̀ɛ Ŋɔɣâlai Yâwɛɛ ŋɔpɛ́rɛi kpɛtɛ mɛ̂ni ma.

⁹Dí lí zâla láa-soŋ-ƃelai núu kɛtɛ̂i Ɛɛkea pɔ́ a zɛŋ-káoi ǹûai dí pa la Ɣâla ŋɔpɛ́rɛi lai nyíi Liiva-ŋai kɛ bɛ́rɛi laƃelei mɛi kâai dí zɔlɔ ƃo ǹûai kula Manasɛ, Ifiraŋ da ǹûai gbeli-ŋai kɛ̀ Eezuɛi, é pɛlɛ Zuda da Bɛŋsima da Zerusâlɛŋ ƃelai yêei.

¹⁰Nya ƃe dí dɛ̀ɛ ǹûai pɔ nyíi kɛ Yâwɛɛ ŋɔpɛ́rɛi tɔɔ mɛnii m̀ɛ́i. Ǹûai ŋí dí dii-kɛ-ƃelai fela fé bɛ́rɛi pɛ́ŋ-pɛlɛ mɛni da m̀u kpɛtɛ mɛ̂ni ma.

¹¹Dí ŋɔ́nɔ sɛŋ-kao tɛ̀ɛ diai kɛ̀ tíi kɛ̂i a ŋ̀úru-ŋai da diai kɛ̀ bɛ́rɛi tɔɔ̂i a gɛ́ɛ dí kɔni da wuru-ƃela maa-kiiŋɔɔ-ŋa yá dí bɛ́rɛi kpɛtɛ la nyíi Zuda kaloŋ-ŋai dí ǹɛɛ naa gɛ̀ woloi.

¹²Zinaai kɛ bɛ́rɛi ŋí tɔ̂ɔi dí dɔ̀ɔ kpɔ́ a tenîŋ ƃo pere. Ǹûai kɛ̀ dílaa tuɛ diî ŋí kɛ mɛni mai ƃɛ́ kɛ́ a: Zoa da Odidaya nyíi ŋai kula Liiva ǹúui Melali ŋɔsuui sui, é pɛlɛ Zɛkɛrɔya da Mesulɛŋ dîa nyíi ŋai kula Koa ŋɔnuu-suui sui. Liiva-ŋai ŋí kélee dakâa pɔri ɣale-sãa ɣalêi a ǹɛ́lɛɛ.

¹³Ǹûai ŋí ni ƃé kɛ̀ dii-kɛ-ƃelai mɛi diî kɛ mɛni ma. Liiva-ŋai da-ni díkɛ a kɔlɔ-mɛi-káa ƃela. Da-ni díkɛ ƃo a kɔlɔ-pɔ̃yɛɛ ƃela. Gbeli-ŋai díkɛ ƃo a zãai mɛi káa-ƃela.

¹⁴Díkɛɛ pâi a zɛŋ-káoi díwɔlɔ li la Yâwɛɛ ŋɔpɛrɛ kɛ́tɛi mui, Ɛɛkea nyíi kɛ a zâla láa-soŋ-ƃelai ǹúui è Yâwɛɛ ŋɔtɔ̂ŋ-kɔlɔi kâa nyíi Mose è wɔ́lɔ bɔ̃yɛɛi.

¹⁵Nya ƃe Ɛɛkea è mò gɔlɔ-pɔ̃yɛɛ-kɛ ǹúui Safaŋ ma ǹyɛɛi, “Ŋâa Dɔ̂ŋ-kɔlɔi káa Yâwɛɛ ŋɔpɛ́rɛi mu.” È nâa dɛ̀ɛ Safaŋ pɔ.

¹⁶Safaŋ è gɔlɔi siɣe é li la galoŋ pɔ é goraŋ-ƃo m̀í ǹyɛɛ mai, “Itii-kɛ-ƃela kpaya-kpayai da diî kɛ̂i nɔ́ yɛ̂ɛ berei dím̀o la diai.

¹⁷Dâa zɛŋ-káoi kɛ Yâwɛɛ ŋɔpɛ́rɛi mui tɛ́ɛ dii-mɛi ƃelai pɔ, diaŋ da dɛ̀ɛ dii-kɛ́ ƃelai pɔ.”

¹⁸Gɛ́ɛ tí, gɔlɔ-pɔyɛ̃ɛ-ǹúui Safaŋ è mò galoŋ ma ǹyɛɛi, “Ɛekea nyíi gáa a zâla láa-soŋ-ƃelai ǹúui è kɔlɔ da tɛ́ɛ ḿbɔ.” Nya ƃe Safaŋ è gɔlɔi kpîŋ lono galoŋ ŋɛ́i.

¹⁹Tãi gâloŋ è Dɔ̂ŋ lóno woo mɛni lai, è ŋɔseɣei fála.

²⁰È mò ǹûai ŋí: Ɛɛkea, Aikaŋ nyíi kɛ a Safaŋ ǹoŋ-surɔŋ, Abidɔŋ nyíi kɛ a Maka ǹoŋ-surɔŋ, Safaŋ nyíi kɛ a gɔlɔ-pɔyɛ̃ɛ-ǹúui da Asaya nyíi kɛ galoŋ mɛi kâai, ǹyɛɛi,

²¹“Ka lí ká Yâwɛɛ marê kɛ́ kwa Eezuɛ-ŋai da Zuda ƃelai gbulu-loŋ da lɛɛ̂i kúmɛni ma é pîlaŋ gɔlɔi ŋí kâa gaai ŋ̀oo ma. Yâwɛɛ a ǹíi ŋwána kûa a ŋanaa, kpɛ́ni fêi, kúnûa-pɔlɔ-ŋai dífe ŋ̀óo mɛi káa ni. Dífe tûa ní yɛ̂ɛ ŋ̀óoi gáa gɔlɔi ŋí sui.”

²²Nya ƃe Ɛɛkea da diai galoŋ è dí lɛi dí li Ɣâla ŋɔlono-kɛ ǹúui Uda pɔ naa. Uda è wɔ́lɔ kɛ a ɣâla-ŋɔlono-kɛ nɛnî. È kɛ̀ Toa ǹoŋ-surɔŋ Saluŋ ŋɔnɛnii. Ara è kɛ a Saluŋ ǹâŋ-ŋɔǹâŋ. Saluŋ ƃé kɛ̀ a Ŋ̀âla-pɛrɛ Kɛ́tɛi mu seɣe-ŋai mɛi káa nuu. Uda seɛ́ɛ è kɛ Zerusâlɛŋ m̀éla ninai m̀â pere.

²³Uda è mò dîa ǹyɛɛi, “M̀ɛnii Eezuɛ Ŋɔɣâlai Yâwɛɛ a môi ǹya ƃa ká m̀ó ǹalôŋ ká tɛɛ ƃɛ́i m̀a kâa,

²⁴Yâwɛɛ ǹyɛɛ a pâi pâi a mɛni-kpɔ̂lu gwaai ŋí ma da ǹaa ƃela dîa yɛ̂ɛ mɛnii dí ǹono gɔlɔi ŋí su Zuda kaloŋ ŋɛ́i.

²⁵Kpɛ́ni fêi da dípôlu tɔɔ ḿâ díkɛ kéreŋ-sɛŋ kuŋ-nɛɛ kèreŋ ɣâla da kpɛ́ni ŋa dîa. Da ǹii-ŋwana a díkpɛtɛ-sãai kélee. Ǹíi a pâi kɛ̂i a ŋwánaa dîa ŋ̀aa fá yêŋ.

²⁶Ka mò Zuda kâloŋ nyíi ká tɛɛ a gɛ́ɛ ká Yâwɛɛ marê kɛ̂i, ‘Mɛnii Eezuɛ Ɣâlai Yâwɛɛ è mò é pîlaŋ mɛnii ma ímɛnii ká tí.

²⁷Kɛ́lɛ Yâwɛɛ è mò ǹyɛɛ kpɛ́ni fêi ílii mu è siɣe í ímaa-yeŋ Ɣâla ŋ́ɛi tuɛ tãi í mɛnii ŋí mɛ̂ni la é pîlaŋ gwaai ŋí da naa-ƃela diai ǹyaŋ í ímaa-yeŋ ŋ̀ɛi-tuɛ í íseɣei fála íwɔlɔi, ŋaâ nâa íwoo mɛni.

²⁸Mɛni ma, ŋa pâi liî a yâ ínaŋ ni pɔ naa. Da pâi ílooi lii-see su. Ífe pâi lɛɛ̂i ɣele ma é lɛɛ la zu mɛni-ŋai ŋí ŋa-see é kɛ.’ ” Nya ƃe dí lene pôlu dí li Zosaya pɔ́-naa dí m̀ɛnii ŋí ŋá lɛ́ m̀a.

²⁹Nya ƃe gâloŋ è Zuda da Zerusâlɛŋ nuu-pɔlɔ-ŋai tòli.

³⁰Da Zuda é pɛlɛ Zerusâlɛŋ ƃelai, zâla láa-soŋ-ƃelai ƃelai, Liiva-ŋai da Eezuɛ ƃelai kélee, é siɣe nîa-pɛlɛ-pɛlɛɛ ŋai, é too nuu-kpaya-kpayai dîa díkelee dí li Yâwɛɛ ŋɔpɛ́rɛi la. Gɛ́ɛ tí, galoŋ è Gbanaŋ-woo-kɛɛ maa kɔlɔi nyíi dí gàa Yâwɛɛ ŋɔpɛ́rɛi mui lôno díkelee díɛ.

³¹Nya ƃe galoŋ è li é tɔɔ galoŋ tɔɔ̂i kwaa ma Ŋ̀âla-pɛrɛ Kɛ́tɛi mu, é gbanaŋ-wooi kɛ naa a nina Yâwɛɛ yêei a gɛ́ɛ a pâi Yâwɛɛ ŋɔtɔ̂ŋ-ŋai kélee mɛi kâai a ǹiî kélee da ŋɔmɔ̃leŋ kélee, é tela ǹyée see gbanaŋ-wooi mu yɛ̂ɛ berei bɔ̃yɛɛi la gɔlɔi sui.

³²Nya ƃe è gɛ̀ ǹûai kula Bɛŋsima da diai kɛ Zerusâlɛŋ dí díkono-tee a gɛ́ɛ da pâi gbanaŋ-wooi ŋí mɛi kâai yɛ̂ɛ berei dínaŋ pɔlɔ Díɣâlai è mò lai.

³³Zosaya è ŋ̀âla-pɔkɔɔŋ-ŋai kélee kpɔ́ kùla Eezuɛ lɔii su. È gɛ̀ diai kɛ́ Eezuɛi díkelee díkɛ Yâwɛɛ fɛ̀li. Tãi Zosaya è kɛ̀ la ɣele mai, ǹûai díkɛ nɔ́ dínâŋ-ni Díɣâlai Yâwɛɛ fɛlîi. Dífii fé wɔ́lɔ kpɛɛ ní.