Read Kpelle Kɔlɔnikɔ Veerɛi 35 Bible Online

Kɔlɔnikɔ Veerɛi 35 - Kpelle bible

Kɔlɔnikɔ Veerɛi 35

¹Gɛ́ɛ tí, galoŋ Zosaya è Dɛɛ-mɛi kûui kɛ̀ Yâwɛɛ mɛni ma Zerusâlɛŋ. Dí Dɛɛ-mɛi kûui maa ƃala-loŋ páa a ŋalôŋ maa-ŋuŋ ŋɔfólo púu-káo ŋaaŋ ɣele.

²È zâla láa-soŋ-ƃelai ƃelai lɛ́ dítii ŋai kɛ́ mɛ̂ni ma Yâwɛɛ ŋɔpɛ́rɛi mu.

³È mò Liiva-ŋai nyíi ŋai kɛ sɛŋ lɛ̂i Eezuɛ ŋai dîa nyii-ŋai dí díkpîŋ maa waa Yâwɛɛ maa mɛni mai ǹyɛɛi, “Ka Gbanaŋ-woo-kɛɛ maa gãla maa waai lɔ Ŋ̀âla-pɛrɛ Kɛ́tɛi mu nyíi Deeƃé ǹóŋ Saloma è wɔ́lɔ dɔ̀ɔi. Káfaa ŋɔ́nɔ pɔri ǹaa kákaraŋ-ŋa ká lí la. A kɛ́ tí, ká tíi kɛ́ Káɣâlai Yâwɛɛ da ŋɔnûai Eezuɛ díɛ.

⁴Ka kákpîŋ kpɛtɛ yɛ̂ɛ berei kákaa la ǹuu-suui mai, yɛ̂ɛ berei ká ŋakɔlɛɛi la kákpulu ma, yɛ̂ɛ berei Eezuɛ kaloŋ Deeƃé da Saloma díwɔlɔ bɔ̃yɛɛ la gɔlɔi sui.

⁵Ka tɔɔ a gbanaŋɔɔ gwaa-ma-waai mâ kâai a Liiva-ŋai a gɛ́ɛ kákɛ a kákpîŋ kpɛtɛɛ ká kpɔŋ ǹuu-suu ŋai dîa Eezuɛ.

⁶Ka Dɛɛ-mɛi kûui maa ƃala-loŋ páa ká kákpîŋ maa waa ká m̀álai kpɛtɛ kánûai maa mɛ̂ni ma, kákɛ m̀ɛnii-ŋai kɛ̀ nyíi Yâwɛɛ è wɔ́lɔ mò kâa Mose sarâi.”

⁷Zosaya è ƃála da ƃoli wála buu saaƃa (30,000) tɛ̀ɛ diai kɛ̀ naai díkelee dí mɛni ma a Dɛɛ-mɛi kûu-sama-sɛŋ. È niŋa-sîrɛ wála saaƃa (3,000) tɛ̀ɛ zalai kula mɛ̂ni ma. Zãai ŋí kélee è kula ǹyaa tɔnɔ ǹyêei.

⁸Ŋɔtii-kɛ ƃela kpaya-kpayai dîa máŋ dí gula-ǹii-su sama-sɛŋ tɛ̀ɛ ǹûai da zâla láa-soŋ-ƃelai ƃelai da Liiva-ŋai dímaa mɛ̂ni ma. Ɣâla ŋɔpɛ́rɛi mɛi-káa ƃelai Ɛɛkea, Zɛkɛrɔya da Zeiɛ dí Dɛɛ-mɛi kûui maa sama-sɛŋ da ƃala da ƃoli-lônii wála feerɛ pôlu ŋuŋ lɔ́ɔlu mɛi-da (2,600) tɛ̀ɛ zâla láa-soŋ ƃelai pɔ́. Dí niŋa-sîrɛ ŋuŋ saaƃa (300) tɛ̀ɛ máŋ.

⁹Naa pôlu ma, Kɔnania, é pɛlɛ Semaiya da ǹeɣe Nɛtaniɛ, da Asaƃia, Zeiɛ da Zozaƃa nyii-ŋai kɛ̀ a Liiva-ŋai láa tuɛ ƃelai dí pa a Dɛɛ-mɛi kûu sama-sɛŋ, nyíi kɛ a ƃala-lonii da ƃoli lônii wála lɔ́ɔlu (5,000) é pɛ́lɛ niŋa-sîrɛ ŋuŋ náaŋ (500) ma dí dɛɛ Liiva-ŋai maa mɛni ma.

¹⁰Dí gûui mɛ̂ni kpɛ̀tɛ zâla láa-soŋ-ƃelai ƃelai da Liiva-ŋai dí lɛ́ɛ dítɔ̂ɔi a díkpulu yɛ̂ɛ berei galoŋ è wɔ́lɔ mò lai.

¹¹Liiva-ŋai dí nâa Dɛɛ-mɛi-kûu ƃala-loŋ páa dí gɔlɔ kula. Dí ŋãa tɛ́ɛ zâla láa-soŋ-ƃelai ƃelai pɔ díkɛ gbɛmɛŋ ŋ̀âla-teƃelei ma.

¹²Dí géreŋ-sala sama-sɛŋ kùla ma dí zée a da kpɛ́ni a gɛ́ɛ dí dɛ̀ɛ ǹúai pɔ́ díkpulu ma dí sala kula lá Yâwɛɛ ma yɛ̂ɛ berei bɔ̃yɛɛi la Mose ŋɔtɔ̂ŋ sui. Dí ŋɔ́nɔ m̀ɛni tɔnɔi ŋí kɛ nɔ́ a niŋa-sirɛ-ŋai.

¹³Nya ƃe dí Dɛɛ-mɛi kûui maa fɛnɛ-sɛŋ ŋɔŋ yɛ̂ɛ berei bɔ̃yɛɛi lai. Kɛ́lɛ dí zama-sãa maa waai ɣili leɣe, tii-kélei da pane-ŋa su dí ŋa-kɔlɛ ǹûai dîa a maa félaa.

¹⁴Nyiŋi pôlu ma, Liiva-ŋai dí mii-sɛŋ kpɛ̂tɛ díkpîŋ mɛni ma da zâla láa-soŋ-ƃelai ƃelai. Kpɛ́ni fêi, Zâla-laa-soŋ ƃelai díkɛ gereŋ-sama sɛŋkerenii dí kɛ́ zua-wulɔi kereŋ é lɛɛ la zu gbini é pɛlɛ.

¹⁵Ŋule-too ƃelai nyíi ŋai kɛ̀ a Asafa ŋɔnuu-suui su-ƃelai, díkɛ dítɔɔi ƃɛɛ̂i Deeƃé, Asafa, Emaŋ da Zedutuŋ nyíi kɛ a Ɣâla ŋɔlono-kɛ nuui gâloŋ mɛ̂ni mai díwɔlɔ naa tɛ̀ɛ dípɔi. Ziɣãŋ laƃelei mɛi káa-ƃelai dífe kula ní dítɔɔ̂i, kpɛ́ni fêi, Liiva-ŋai díkɛ Dɛɛ-mɛi kûu mii-sɛŋ kpɛtɛi dímɛ̂ni ma.

¹⁶Gɛ́ɛ tí, dí m̀ɛni ŋai kéele kɛ yɛ̂ɛ berei galoŋ Zosaya è gbɛtɛ lai. Dí Yâwɛɛ fɛli. Dí Dɛɛ-mɛi kuui kɛ, dígereŋ-salai kula Yâwɛɛ ŋɔɣâla-teƃelei ŋa.

¹⁷Eezuɛ-ŋai kɛ ǹaai dí Dɛɛ-mɛi kûui kɛ a maa tãi ti. Dí ŋɔ́nɔ lɛɛ naa dí Dɛ́-sɛŋ féu kpoloi maa kûui kɛ fólo kûu lɔlɔu mɛi feerɛ yée mu.

¹⁸É siɣe Ɣâla ŋɔlono-kɛ nuui Samia ŋɔtãi mâ, dífe ta wɔ́lɔ Dɛɛ-mɛi kuui kɛ́ ni a bere-sĩi ŋí. Galoŋ pɔlɔ-ŋai kɛ́ ǹaai da fé gûui ŋí kɛ̀ ni a bere-sĩi ŋi. Zosaya ŋɔtãi ŋí mâ, zâla láa-soŋ-ƃelai ƃelai, Liiva-ŋai, Zuda ƃelai, Eezuɛ ƃelai da Zerusâlɛŋ ƃelai díkelee díkɛ naa.

¹⁹Dí Dɛɛ-mɛi kuui ŋí kɛ Zosaya ŋɔkaloŋ-laai ŋɔkoraŋ buu-káo lɔ́ɔlu mɛi saaƃai su.

²⁰Zosaya kɛ́ɛ a kpɛɛ a m̀ɛni-ŋai ŋí kélee kɛ̂ɛi, a Ŋ̀âla-pɛrɛ Kɛ́tɛi kɛ́ a gɛ̀ perei, Ize kaloŋ Niko da ŋɔkɔ-kuluƃa-ŋai dí pa a gɛ́ɛ dí kɔ́ pɛlɛ Kasimisi ma Yufeletii Ya-leei kɔlɛ. Nya ƃe Zosaya è li a gɛ́ɛ é kɔ́ dípɔ.

²¹Kɛ́lɛ, Niko è kera-ŋa tɛ̀ɛ bɔ naa é mò m̀a ǹyɛɛi, “Zuda kaloŋ, lé láa-saa ƃé kwa yá kúloai? Ḿve pá ní ípɔ a laa-sâa. Kɛ́lɛ, ǹúui kwa ǹyaa kúkaa kɔ̂i ƃé ŋá pá bɔ́. Ɣâla aâ mó ḿâ a gɛ́ɛ ŋá lí a maa félaa. M̀ɛni ma, yè kpera tɔɔ̂i Ɣâla ma nyíi gáa ḿbôlui. À wála kɛ́ tí, a pâi ípaâi.”

²²Kɛ́lɛ Zosaya fé ŋ̀óli tɔɔ ní a dɔnɔ kpîŋ. È li é ŋɔkâloŋ-seɣei kúla m̀a è seɣe da kpɛ́ni tòo m̀a a gɛ́ɛ núu da fa lâa gɔ́lɔŋ la a kâloŋ é kɔ́ bɔ́. Vé ŋ̀óli tɔ̀ɔ ní m̀ɛnii ma Niko è m̀o m̀a é pîlaŋ Ɣâla wóo mai. Kɛ́lɛ è pɛ̀lɛ Niko ma Mɛgido tiŋ-tiŋ su.

²³Tãi dí pɛlɛ la gɔ̂i mai, Kerâŋ-pili-núu tɔnɔ è galoŋ Zosaya ƃòŋ a ŋɔkerâŋ. Nya ƃe Zosaya è m̀o naa tii kɛ́ lɔɔi-nuu kɛ́tɛi m̀a ǹyɛɛi, “Lí a ńyãa a maa félaa, kpɛni fêi, daâ ŋ́wana a ŋ̀ánaa.”

²⁴Nya ƃe dí gula gɔkɔ-kereŋ su dí bili da kpɛ́ni su dílene la pôlu Zerusâlɛŋ ƃɛ̂ɛi è saa naai. Dí ǹoo ǹâŋ ní díƃolôŋ la. Zuda da Zerusâlɛŋ ƃela kélee dízàa wɔ́lɔ kɛ.

²⁵Gɛ́ɛ tí, Ɣâla ŋɔlono-kɛ nuui Zɛlemaya è malôŋ-wule pɔ̃yɛɛ é pîlaŋ m̀a. É siɣe tãi ti ma é too gɔlɔi ŋí pɔ̃yɛɛ tãi ma, ǹɛyɛ̃ɛi da zinaai dakaâ ŋule ŋí tòo a kili-too-ŋa é pîlaŋ Zosaya ma. Mɛni ŋí è nâa kɛ a ǹûai tûa-pere Eezuɛ-lɔii su. Nya ƃe dí bɔ̃yɛɛ m̀aloŋ-tôo-maa ŋule-woo kɔlɔi su.

²⁶M̀ɛnii nyíi ŋai Zosaya è wɔ́lɔ gɛ̀ ŋɔkaloŋ-laai sui, yɛ̂ɛ berei è wɔ́lɔ ǹyée see la Yâwɛɛ mui, yɛ̂ɛ berei bɔ̃yɛɛi la Yâwɛɛ ŋɔtɔ̂ŋ sui,

²⁷é siɣe gɔ̀ɔ pîlanii é seri gbɛɛ-ŋai mai gélee káa Zuda da Eezuɛ-ŋai díkâloŋ-ŋai dímɛni-pɔlɔi su.