Read Kpelle Kɔlɔnikɔ Veerɛi 36 Bible Online

Kɔlɔnikɔ Veerɛi 36 - Kpelle bible

Kɔlɔnikɔ Veerɛi 36

¹Nya ƃe ǹûai dí Zosaya ǹóŋ Zoazi kɛ̀ a kâloŋ ǹâŋ pɔ́ɔ ŋa Zerusâlɛŋ.

²Zoazi è kɛ̀ a koraŋ buu-feerɛ káo-saaƃa díkɛ gɛ̀ a kâloŋ. È gɛ̀ galoŋ-laai su a ɣaloŋ saaƃa. Zeɛ́ɛ è wɔ́lɔ kɛ Zerusâlɛŋ.

³Nya ƃe Ize kaloŋ è pa é gula galoŋ-laai su Zerusâlɛŋ, é ŋuŋ-fela-fêi pú Zuda ma. Ŋuŋ-fela-fêi ŋí è kɛ̀ a káne pãŋ wála lɔ́ɔlu mɛi feerɛ pôlu ŋuŋ lɔ́ɔlu (7,500) da gôo pãŋ buu lɔ́ɔlu mɛi-feerɛ káo lɔ́ɔlu.

⁴Ize kaloŋ Niko è Zoazi ǹeɣe Iliakiŋ sèe bɔ̀ɔ ŋá a kâloŋ Zerusâlɛŋ, Zuda-lɔii su. È Iliakiŋ láa maa faleŋ a Zɛoakiŋ. Niko è pa é Iliakiŋ ǹîa, Zoazi siɣe é li la Ize.

⁵Zɛoakiŋ è wɔ́lɔ kɛ a koraŋ buu feerɛ-káo lɔ́ɔlu díkɛ gɛ̀ a kâloŋ. È gɛ̀ galoŋ-laai su a koraŋ puu-káo tɔnɔ. Zeɛɛ è kɛ̀ Zerusâlɛŋ. È mɛni nyɔ́mɔ támaa kɛ a Ŋɔɣâlai Yâwɛɛ.

⁶Nya ƃe Babelɔŋ kaloŋ Nɛbukinaza è pa é kɔ́ pɛ́lɛ mà é ǹyée tóo ƃara-kpɔnɔ ŋá é lí la Babelɔŋ.

⁷Nɛbukinaza è ŋɔ́nɔ li a Yâwɛɛ ŋɔpɛ́rɛi mu sãa támaa Babelɔŋ é dí pu ŋɔkâloŋ-pɛrɛ kɛ́tɛi mu.

⁸Mɛni-ŋai nyíi kélee Zɛoakiŋ è wɔ́lɔ gɛ̀ ŋɔkaloŋ-laai sui, é pɛlɛ m̀aa-kula maa tûa-ŋai é gɛ̀i bɔ̃yɛ̂ɛi Eezuɛ da Zuda-ƃelai díkâloŋ-ŋai dí mɛni pɔ̂lɔ-kɔlɔi su. Gɛ́ɛ tí, ǹóŋ Zɛoasiŋ è lɛ̀ɛ bɔ́ɔ-ŋa a kâlôŋ.

⁹Zɛoasiŋ è kɛ̀ a kóraŋ puu-káo lɔ́ɔlu mɛi saaƃa díkɛ gɛ̀ a kâloŋ Zuda-lɔii mɛi. È gɛ̀ gâloŋ-laai su a ɣáloŋ saaƃa, fólo-puu. Zéɛɛ è kɛ̀ Zerusâlɛŋ. È wɔ́lɔ kɛ́ a sɔnyɔ̂ŋ ǹuu Yâwɛɛ ŋɛ́i.

¹⁰Vólo-laa ƃóɔɔi kpɛɛ-ŋa tãi, gâloŋ Nɛbukinaza è dòli é pá Babelɔŋ a Yâwɛɛ ŋɔpɛ́rɛi mu-sãa sɔ̃ɔ kpanaŋɔɔ-ŋai. Nya ƃe è Zɛoasiŋ gerâ Zɛdikaya kɛ̀ a kâloŋ Zuda da Zerusâlɛŋ mɛi.

¹¹Zɛdikaya è kɛ a koraŋ buu-feerɛ káo-tɔnɔ díkɛ gɛ̀ a kaloŋ. È kɛ galoŋ-lai su a koraŋ puu-káo tɔnɔ. Zeɛɛ è kɛ Zerusâlɛŋ.

¹²È wɔ́lɔ sɔnyɔ̂ŋ támaa kɛ Ŋɔɣâlai Yâwɛɛ ŋɛ́i. Vé ŋumɛ-maa tua kɛ ni a Zɛlemaya nyíi kɛ a Ɣâla ŋɔlono-kɛ-nuui, nyíi a kâa Yâwɛɛ ŋɔwooi ƃoi.

¹³È ŋɔ́nɔ tɔɔ gâloŋ Nɛbukinaza ma nyíi gɛ̀ é vóo a Ɣâla laai. È kɛ kpɔ́ a ŋ̀oli-kpɔlɔɔ. È ǹíi su kpanaŋ kpɔ́ ve tínaŋ ní Eezuɛ Ɣalai Yâwɛɛ pɔ́ pere.

¹⁴Maa tãi tí ma, zâla-laa-soŋ ƃelai láa túɛ-ƃela kpaya-kpayai kélee dí dípôlu tɔɔ Ɣâla ma díkɛ mɛni nyɔ́mɔ támaa ŋa kɛ ǹɔii su, díkɛ Ŋ̀âla-pɛrɛ Kɛ́tɛi maa-tĩa kara nyíi Yâwɛɛ è maa waa Zerusâlɛŋ.

¹⁵Yâwɛɛ nyíi gáa a dínâŋ ni Díɣâlai è wɔ́lɔ lono dípɔ ŋɔlono-kɛ-ƃelai sarâi a tãi támaa. Kpɛni fêi, ŋɔnûai maloŋ è kɛ ma da ŋɔpɛ́rɛi.

¹⁶Kɛ́lɛ, dí ɣɛlɛ-maa kula Ɣâla ŋɔlo-kɛ-ƃelai kponoi. Dífe díyee see ní ŋ́oo mu. Díkɛ ɣɛlɛ-maa kulâi ŋɔlóno-kɛ ƃelai kponôi é lɛɛ la zu Yâwɛɛ é ǹíi ŋwana dîa nyíi gula-maa fé kɛ ni ma.

¹⁷Nya ƃe Yâwɛɛ è pà a Babelɔŋ kaloŋ-ŋai díkɔ pɛlɛ dîa. Dí ǹyaŋkpá-ŋai pâa a ƃóa-sɔ̂kpɔ ŋa dílɛɛ gbeli-ŋai pôlu é lɛ́ɛ la zu dí seri Ŋ̀âla-pɛrɛ Kɛ́tɛi mu. Dífe nyáŋkpa, kpaa máŋ nɛnî-kpela tɔnɔ kpîŋ lɛɛ ní, kpaa máŋ siɛ pɔ̂lɔ, kpaa máŋ núu-pɔ̂lɔ da. Ɣâla è díkelee kpɔ́ dítɛ̀ɛ Nɛbukinaza pɔ́.

¹⁸È lì a Ɣâla ŋɔpɛ́rɛi mu sãai kélee kpɔ́ é máŋ kɛ́ a bɛlɛɛ-pɛlɛɛ, kpaa máŋ gbaya-kpayai Babelɔŋ. È lì a gâloŋ ŋɔpɛ́rɛi mu sɛŋ-kaoi kélee da ǹyée-ŋa sɛŋ mɛni kpanaŋɔɔ-ŋai é pɛ́lɛ ŋɔtíi-kɛ-ƃela kpaya-kpayai dîa.

¹⁹Dí ŋɔŋ tôo Ɣâla ŋɔpɛ́rɛi ma dí ziɣãŋ nyíi kɛ̀ a dínaŋɔɔ Zerusâlɛŋ mai wólo. Dí gâloŋ-pɛrɛi kêreŋ dí ǹaa sãai kélee su kara.

²⁰Nɛbukinaza è li a diai nyíi kélee dífe dí paâ ni Babelɔŋ díkɛ tii kɛ mi da ǹônii-sinaai. Dí lɛ̀ɛ tîi kɛ̂i diɛ é lɛɛ la zu Pɛsia-ŋai dí Babelɔŋ yée mɛi ɣále.

²¹Tãi ŋi yée mu, ǹɔii è vii-tɔɔ ŋɔfii-tɔɔ-ɣelei ma. Núu da fé kɛ ni naa é tíi kɛ́ ǹɔii ma kóraŋ buu-lɔ́ɔlu mɛi feerɛ yée mu. Mɛnii ŋí è kɛ a Yâwɛɛ wóo ŋa-see kɛ̂i nyíi è m̀o Zɛlemaya sarâi.

²²Tãi Salɔ è wɔ́lɔ kɛ̀ la a kâloŋ Pɛsia lɔii mɛi ŋɔkóraŋ m̀aa-ŋuŋ su, Yâwɛɛ è wɔ́lɔ Salɔ lii mu-siɣe a gɛ́ɛ m̀ɛnii Yâwɛɛ è m̀o Zɛlemaya sarâi ŋ̀aa-see é kɛ. Salɔ lii mu è siɣe é tɔ̂ŋ tɛɛ ŋɔlɔii gwaa kélee ma é ŋɔ́nɔ bɔ̃yɛɛ kɔlɔ ma ǹyɛɛi:

²³Pɛsia kaloŋ Salɔ ǹyɛɛi, “Yâwɛɛ Ɣâla nyíi gáa ɣâla-taai a ŋ̀éniɛi su kaloŋ-laai kélee tɛɛ ḿbɔ a ǹɛ́ a gɛ́ɛ ŋá ɣâla-pɛrɛ kɛtɛ tɔɔ mi Zerusâlɛŋ Zuda-lɔii su. M̀ɛni m̀a, kaai kélee kákaa a Ɣâla ŋɔnûai, ka li naa. Ɣâla é kɛ́ ká kɔlɛ ma.”