Read Kpelle Kɔlɔnikɔ Veerɛi 4 Bible Online

Kɔlɔnikɔ Veerɛi 4 - Kpelle bible

Kɔlɔnikɔ Veerɛi 4

¹Saloma è Ɣâla-teƃele kpɛ̀tɛ a ƃara gɛ́ ƃò a kɔ́ɔ ƃɔ̂rɔnii buu saaƃa, Ŋɔŋa-kɛtɛ kɛ́ ƃò a kɔ́ɔ ƃɔ̂rɔnii buu saaƃa, ŋɔmɛi kôya kɛ́ ƃò a kɔ́ɔ ƃɔ̂rɔnii puu-káo lɔ́ɔlu.

²È yá-leɣi kpɛ̀tɛ a ƃara. Ǹeɣii ŋí ŋɔŋa kɛ̂tɛ è kɛ̀ a kɔ́ɔ ƃɔ̂rɔnii puu káo lɔ́ɔlu, ŋɔmu-siɣe kɛ́ ƃò a kɔ́ɔ ƃɔ̂rɔnii lɔ́ɔlu mɛi feerɛ da gbûra. Ǹeɣii ŋí ŋa-kɛ̂tɛ è kɛ̀ a kɔ́ɔ ƃɔ̂rɔnii buu-náaŋ káo lɔ́ɔlu.

³Dí ǹeɣii ŋí pɔ̃yɛ dí dinaŋ m̀a é síɣe ŋ̀óli mu é yéŋ. È kɛ̀ a bɔ̃yɛɛ a niŋa pɔkɔɔŋ-ŋa. Dí kɛ̀ a dítɔɔ-tɔ̂ɔ díkîe-ni mɛi é tinaŋ m̀a. Bɔkɔɔŋ ŋí ǹɔ́ɔlu mɛi-da è kɛ̀ a guláa gîe ma a kɔ́ɔ ƃɔ̂rɔniii tɔnɔ-tɔnɔ. Bɔkɔɔŋ ŋí è kɛ̀ a gbɛtɛɛ a ǹeɣii ŋí kpono.

⁴Ǹyá-leɣii ŋí è kɛ̀ sêeni ƃara niŋa pɔkɔɔŋ puu káo feerɛ pôlu. Ǹiŋa-ŋai ŋí zaaƃa ŋɛ́i è kɛ̀ Yá-ŋûa pere. Zaaƃa ŋɛ́i kɛ́ ƃò Séɣai pere. Zaaƃa ŋɛ́i liɛɛ Vóloi kulai pere. Zaaƃai gbéli ŋɛ́i liɛɛ vóloi liî pere. Díkelee díwɛrɛ è kɛ̀ ǹeɣii mu pere.

⁵Ǹya-lêɣii ŋí kpono ŋɔkpi-kpi-tili è kɛ̀ a núu yée-gbua samɛi ŋ̀ɔi ŋɔkôya. Ŋ̀óli è kɛ̀ a gbakpáa yɛ̂ɛ kpele kɔ̂pu lá-ƃerei m̀óloŋɔɔ wuru-pôa ma. Ǹeɣii ŋí a kâa yá tîŋ ŋɔ wála saaƃa (3,000) sòŋ.

⁶È ŋɔ́nɔ sɛŋ-folo puu kpɛ̂tɛ nyíi da kâa géreŋ salai kula sãai maa wâa zui. Zɛŋ fóloi ŋí ǹɔ́ɔlu è kɛ̀ yá-ŋûa pere, ǹɔ́ɔlu kɛ́ ƃò séɣai pere. Kɛ́lɛ zâla láa-soŋ-ƃelai nɔ́ ƃé da kâa dímaa-wâa a ǹeɣi kɛ́tɛi su yai.

⁷È laŋpo see-wûru kpɛ̀tɛ a gôo yɛ̂ɛ berei maa nɛ̃ɛ̂i dí díkpɛtɛ lai. È dítɔ̀ɔ Ŋ̀âla-pɛrɛ Kɛ́tɛi mu. È ǹɔ́ɔlu tɔ̀ɔ séɣai pere, é ǹɔ́ɔlu tɔ́ɔ yá-ŋua pere.

⁸È ŋɔ́nɔ teƃele puu kpɛ̀tɛ é zée ŋ̀âla pɛrɛi mu. È ǹɔ́ɔlu sèe séɣai pere, é ǹɔ́ɔlu sée yá-ŋûa pere. Naa pôlu ma, è gôo sɛŋ-folo ŋuŋ tɔnɔ kpɛ̀tɛ a gɛ́ɛ dí kɛ́ zãai kpɛmɛŋ la.

⁹Saloma è zâla-laa soŋ-ƃelai seêi kpɛ̀tɛ pôlu pere é ŋɔ́nɔ zeêi kɛ̂i kɛ́tɛ ɣelei kpɛtɛ tuɛ-pere é kpôŋ tòo díloai. È gbôŋ ŋí mɛi pɛlɛ a ƃara.

¹⁰È ǹyá-leɣi kɛ́tɛi sèe séɣai pere, vólo liî-pere bɛ́rɛ-kaŋ zoŋoi su.

¹¹Ulaŋ è ŋɔ́nɔ leɣi, sɔ̂ƃele da sɛŋ-fôlo-ŋa kpɛ̀tɛ. È zãâi kélee kpɛ̀tɛ Ŋ̀âla-pɛrɛ Kɛ́tɛi mɛni ma yɛ̂ɛ berei è mò la Saloma mai. Zãâi è gbɛ̀tɛi dia ƃé kɛ̀ a: Bɛ́rɛ-yée mu-wuru-feerɛi zɛŋ-fôlo feerɛi è kɛ̀ díŋai. Zãâi dí zɛŋ-fôlo feerɛi mɛi pɛ̂lɛ la dãɣai ŋái. Pɔmegurane ŋuŋ náaŋ (400) ŋai nyii-ŋai kɛ̀ deɣaŋ seɣei ma nyíi kɛ̀ bane-ŋai mɛi nyii-ŋai kɛ̀ bɛ́rɛ-yée mu wurui mɛi. Zɛŋ-folo-ŋai da díseêi, Ǹyá-leɣi kɛ́tɛi da nina pɔkɔɔŋ puu-káo feerɛi kɛ̀ mui, ǹeɣi-ŋai, sɔƃele-ŋai, zua-soŋ kɔli taɣaŋ lá ƃóɔɔ-ŋai é pɛ́lɛ díi-kɛ-sãai gbéli-ŋai dîa. Zãâi nyíi Ulaŋ Aƃi è gbɛ̀tɛ Saloma mì Yâwɛɛ ŋɔpɛ́rɛi tɔɔ mɛni mai, gélee kpɔ́ è kɛ̀ a ƃara lɛ́lɛɛ.

¹⁷Saloma è gɛ̀ dí zãai ŋí kélee kpɛtɛ ƃɛ́i da kâa bɔ̂rɔ leɣi-ŋai kpɛ̀tɛ naa Sukɔ da Zeletaŋ díloai diŋ-tiŋ su Zɔdiŋ Ya-leei kɔlɛ.

¹⁸Zãai dí gbɛ̀tɛi è kɛ̀ kpɔ́ a dámaa dífe pɔri ní m̀arai dí díi kɛ̀ lai lônoi.

¹⁹Saloma è Ɣâla ŋɔpɛ́rɛi mu sãai kélee kpɛ̀tɛ. Dia ƃé kɛ̀ a gôo ɣala-teƃelei da kâa Ɣâla ŋɛ́i-tuɛ kpoloi lâa ŋái.

²⁰Dí laŋpo-see wurii kpɛ̀tɛ a gôo-kao nyíi laŋpoi a kâa kɛ̀ see-ni ŋa gɛ́ lèŋ Ŋ̀âla-pɛrɛ Kɛ́tɛi mu-perei yɛ̂ɛ berei dí wɔ́lɔ gbɛ̀tɛ lai.

²¹È gôo wuru-poa pɔkɔɔŋ da laŋpo sèe sɛŋ ma kpɛ̀tɛ a gôo-kao.

²²È gôo laŋpo níiŋ sɛŋ kpɛ́tɛ da zɛŋ-foloi-ŋai. È géreŋ-sɛŋ kuŋ-nɛ̃ɛ kéreŋ sɛŋ-folo-ŋai kpɛtɛ. É ŋɔŋ-siɣe sɛŋ-folo-ŋai kpɛtɛ. È zãai ŋí kélee kpɛtɛ a gôo kao. Ǹaa pôlu ma, è gôo kpòŋ-ŋai kpɛtɛ Ŋ̀âla-pɛrɛ Kɛ́tɛi lá-ƃerei mɛni ma. É Gwaa ma-waai ŋɔkwaa ma-waai lá kpôŋ kpɛ́tɛ da gbôŋ kɛ́tɛi ma.