Read Kpelle Kɔlɔnikɔ Veerɛi 7 Bible Online

Kɔlɔnikɔ Veerɛi 7 - Kpelle bible

Kɔlɔnikɔ Veerɛi 7

¹Tãi Saloma ì kpɛ̀ɛ la a Ɣâla fɛliɛɛi, ŋɔŋ è kùla Ɣâla-taa é tóo géreŋ sala-sãai ma da zâla-sãai gbéli. Nye ƃe Yâwɛɛ ŋɔmaa-waa-laai è Ŋ̀âla-pɛrɛ Kɛ́tɛi láa fɛ̀ɛ.

²Yâwɛɛ ŋɔmaa-waa-laai é Ŋ̀âla-pɛrɛ Kɛ́tɛi láa fɛ̀ɛ kpɔ́ zâla-laa soŋ-ƃelai dífe pɔri ní lɔ̂i naa.

³Tãi Eezuɛ-ŋai dí ŋɔŋ kâa la gɛ́ kùla Ɣâla-taai, dí ŋɔ́nɔ Yâwɛɛ ŋɔmaa-waa-laai kâa a Ŋ̀âla-pɛrɛ Kɛ́tɛi láa fɛ́ɛ, díkelee dí díkpêleŋ pìlaŋ ǹɔii ma dí díŋuŋ pîlaŋ ǹɔii ma díkɛ Ɣâla fɛ̀li, díkɛ sɛɣɛ fêi tɛ̀ɛ Yâwɛɛ pɔ́, díkɛ mò dîyɛɛi, “Zɔŋ lɛ̂lɛɛi, ŋɔwɛli-kɛ-maai káa naa wɔ́lɔ-wɔlɔ da wɔ́lɔ-wɔlɔ.”

⁴Nya ƃe Gâloŋ Saloma da ǹûai kélee dí sâla kùla Yâwɛɛ ma.

⁵Gâloŋ Saloma è niŋa wála buu feerɛ káo feerɛ (22,000) é pɛ́lɛ ƃála wála ŋuŋ tɔnɔ pôlu buu feerɛ (120,000) ma kùla a sâla. Gɛ́ɛ tí, Gâloŋ da ǹûai kélee dí nâa Ŋ̀âla-pɛrɛ Kɛ́tɛi kóraŋ ƃò.

⁶Tãi díkɛ̀ Ŋ̀âla-pɛrɛ Kɛ́tɛi kóraŋ ƃôi lai, zâla-laa soŋ-ƃelai dí lì dí tɔ̂ɔi. Liiva-ŋai dîa máŋ díli dítɔ̂ɔi Yâwɛɛ ŋɔwule-too-sãai kɛ́ ƃò díyêei. Gâloŋ Deeƃé ƃé zãâi ŋí kpɛ̀tɛ a gɛ́ɛ díkɛ laa-maa tɛ̂ da sɛɣɛ fêi tɛ̀ɛ la dîɛ, “Ŋɔwɛli-kɛ-maai káa naa wɔ́lɔ-wɔlɔ da wɔ́lɔ-wɔlɔ.” Zâla láa soŋ-ƃelai díkɛ̀ tɔɔ-ni Liiva-ŋai téniŋ ma díkɛ dúrii fɛ̀ɛ. Eezuɛ-ŋai kélee díkɛ̀ tɔɔ-ni naa.

⁷Naa kɛ́ɛ tíi, Saloma è Yâwɛɛ ŋɔɣâla-pɛrɛ kɛ́tɛi ŋɛ́i-tuɛ maa-waa é kéreŋ da sua-wulɔ sala kula, nyíi kɛ̀ a laoi-laa salai. È zâla-ŋai ŋí kùla gîe ma kpɛ́ni fêi m̀ara-ɣala-teƃelei è kɛ̀ a guro té, géreŋ salai, da mii-sãai, é pɛ́lɛ zua-wulɔ sala-sãai kélee mɛni ma.

⁸Maa tãi tí yée mu, Saloma è kúu kɛ́tɛ kɛ̀ a fólo lɔ́ɔlu mɛi feerɛ. Eezuɛ-ŋai díkɛ̀ naa. È kɛ̀ kpɔ́ a kpɔŋ su kɛ́tɛ ma pɔlɔ-pɔlɔɔ. Ǹûai ŋí da-ni díkùla Leƃo, Ama é tóo Ize gɔyɛŋ-perei ma vóloi liî-pere.

⁹Vóloi ǹɔ́ɔlu mɛi-saaƃa ɣele, dí kɔyɛŋ kɛ́tɛi tòo, kpɛ́ni fêi dí kúu kɛ̀ a fólo lɔ́ɔlu mɛi feerɛ ŋ̀âla teƃelei mɛni ma. Dí ŋɔ́nɔ kúu kɛ́ a fólo lɔ́ɔlu mɛi feerɛ kɛ́ gúui mɛni ma.

¹⁰Naa kɛ́ɛ tíi, Saloma è ǹûai kélee tɛ̀ɛ dípɔ-taai a ŋáloŋ ǹɔ́ɔlu mɛi-feerɛi ŋɔfólo buu-feerɛ káo-saaƃa ɣele. Ǹûai kélee dí lì dípɔ-taa a lii-nɛ̃ɛ kɛ́tɛ mɛnii Yâwɛɛ è gɛ̀ Deeƃé da ǹóŋ Saloma é pɛ́lɛ Eezuɛ-ŋai kélee mɛni mai.

¹¹Tãi Saloma è kpɛ̀ɛ la Yâwɛɛ ŋɔpɛ́rɛi da ŋɔkâloŋ pɛrɛi tɔɔ mai, é pɛ́lɛ díi-ŋai kélee ma nyíi è gbɛ̀tɛ gíli-ŋa a gɛ́ɛ é gɛ́ Ŋ̀âla-pɛrɛ Kɛ́tɛi ma ǹíi sui,

¹²Yâwɛɛ è ŋɔ́nɔ kùla ŋ̀ɛ́i a kpíni tɔnɔ ǹyɛɛ mai, “Ŋ́aâ íɣâla fɛli-wooi mɛ́ni ŋa gwaai ŋí ma siɣe a ḿbɔɔ a gɛ́ɛ é kɛ́ a ŋápɛrɛ kɛ́tɛi sâla kula mɛni ma.

¹³À kɛ̀ ŋa ŋ̀ele-kɔlɔŋ láa tɛ̀ a gɛ́ɛ tuna fé ŋɔ́nɔ pù, kpaa máŋ ŋá gɛ́ góto-ŋa dí ǹɔii su kara, kpaa máŋ ŋá kɔlɔ-fela nyɔ́mɔɔ,

¹⁴À kɛ̀ ŋánûai nyii-ŋai ńaai seɣeɛɛi diai da dí maa yêŋdí ɣâla fɛli, dí ŋ́gɔri dí tínaŋ dí dípôlu tɔɔ dí ŋwana lɔɔ tua-ŋai dîa, gɛ̀ ní ŋa pâi lɛɛ̂i Ɣâla-taa ŋá díwoo mɛ́ni ŋá dísɔnyɔ̂ŋ su mɛni lɛɛ, ŋá dílɔii ƃálo.

¹⁵Ǹyaŋ ŋa pâi ŋ́ɛi láa ƃôi ŋá ŋ́woli tɔ́ɔ ŋ̀âla fɛli-woo-ŋai kélee ma nyíi pâi kɛ̂i gwaai ŋí mai.

¹⁶Ŋa gbâa naa Ŋ̀âla-pɛrɛ Kɛ́tɛi ŋí síɣe ŋa maa wáa a gɛ́ɛ é kɛ́ a ḿbɔ́ naa wɔ́lɔ-wɔlɔ da wɔ́lɔ. Ǹyaŋ ŋa pâi kɛ̂i naa ŋ́gɛ nàa mɛi kâa wɔ́lɔ-wɔlɔ da wɔ́lɔ-wɔlɔ.

¹⁷À kɛ̀ a yá, à kɛ̀ ya tùa yɛ̂ɛ berei ínâŋ Deeƃé è tùa la a zãai, í ŋátɔ̂ŋ-ŋai kélee mɛi káa nyii-ŋai ŋá dɛ̀ɛ ípɔi,

¹⁸gɛ̀ ní ŋa pâi íkâloŋ-laai same pîlanii, yɛ̂ɛ berei ŋá ŋ́gono tèe la ínâŋ Deeƃé yêei ńyɛ̃̂ɛ mai, ‘Núu da fé pâi kpɛɛ̂i ípɛrɛi mu a gɛ́ɛ é kɛ́ a kâloŋ Eezuɛ-ŋai mɛi.’

¹⁹Kɛ́lɛ à kɛ̀ ya tìanŋ í ípôlu tɔɔ ŋátɔ̂ŋ-ŋai kélee ma nyii-ŋai ŋá dɛ̀ɛ ípɔi, í lí íkɛ Ɣâla da kpɛ́ni-ŋa fɛ̀li,

²⁰gɛ̀ ní ŋa pâi Eezuɛ ƃúlenii ná gula ŋálɔii ma nyíi ŋá dɛ̀ɛ bɔi, ŋá ńyee kúla Ŋ̀âla-pɛrɛ Kɛ́tɛi ŋí mu nyíi ŋá zìɣe zu ŋ́gbîŋ mɛni mai. Ŋa pâi Ŋ̀âla-pɛrɛ Kɛ́tɛi ŋí kɛ̂i a ǹûai díɣɛlɛ-maa sɛŋ nyíi da pâi lôno nyɔ́mɔɔ támaa kɛ̂i é pîlaŋ mai.

²¹“Berei máŋ Ŋ̀âla-pɛrɛ Kɛ́tɛi ŋí tuŋ káa la mai, ǹûai da kɛ̀ tɛɛ̂i mà da pâi kɛ̂i môi dîyɛɛi, ‘Lé mɛni ƃé ŋí Yâwɛɛ a gɛ́ a ǹɔii ŋí da Ŋ̀âla-pɛrɛ Kɛ́tɛi?’

²²À kɛ̀ tí, ǹûai da pâi zu toôi dîyɛɛi, ‘Kpɛ́ni fêi da dí pôlu tɔɔ Yâwɛɛ Ɣâla nyíi gáa a dínâŋ-ni Díɣâlai, nyíi díkùla Ize lɔii sui da díyee sée ɣâla da kpɛ́ni-ŋa mu díkɛ dífɛ̀li. Díkɛ tíi kɛ̀ dîɛ. Zɛŋ ƃé Yâwɛɛ è mɛnii kpɔ̂lui ŋí làa la dîa.’ ”