Read Kpelle Ɛzura 1 Bible Online

Ɛzura 1 - Kpelle bible

Ɛzura 1

¹Yâwɛɛ è wɔ́lɔ ŋɔmɔ̂leŋ pù Pɛsia kaloŋ Sarɔ kponôi. M̀ɔ̂leŋ ŋɔwála-walai è gɛ̀ Sarɔ é kɔlɔ pɔ̃yɛ, é dɛɛ ŋɔkâloŋ-laa lɔii gwaa kélee Zuda-ŋai ŋuŋ ma ƃó mɛni ma. È m̀ɛnii ŋí kɛ̀ ŋɔkâloŋ-laa koraŋ maa-ŋuŋ su. M̀ɛnii ŋí è kɛ̀ a ŋ̀óoi Yâwɛɛ è wɔ́lɔ mò ŋɔlóno kɛ́-nuui Zɛlemaya sârai ŋàa-see kɛ́ɛ. Ŋ̀óo-ŋai è bù gɔlɔi ŋí sui dîa káa ŋí:

²“Ńyãa Sarɔ, Pɛsia-ŋai díkâloŋ, Ɣâla Yâwɛɛ nyii gáa Ɣâla-taai, a ŋ́gɛ a kâloŋ ǹɔii ŋuŋ-ŋai kélee mɛi ŋ̀éniɛi su. A wála-wala-laa tɛɛ ḿbɔ a gɛɛ ŋá ŋɔpɛ́rɛi tɔ́ɔ Zerusâlɛŋ taa-leei su Zuda lɔii su.

³Káai kélee a Ɣâla ŋɔnûai, Ɣâla é tɔ́ɔ kátuɛ ká lí pôlu Zerusâlɛŋ ká ŋɔpɛ́rɛi tɔ́ɔ pôlu. Ǹyaa ƃa káai a Eezuɛ-ŋai Káɣâlai nyii maa nɛ̃ɛi ká vɛli nɔ́ Zerusâlɛŋ.

⁴Káai ǹûai gɔ́i è dí sòŋ díkaa kásamai, da kɛ̀ liî pôlu, kà kpɔŋ mâa tɛ́ɛ dípɔ a sãa. M̀aa sãai ŋí díkɛ a kâpa, gôo, sãâ-kpulu-kpulu da taa-tulɛ ŋa. Kà sãâ tɛɛ máŋ dípɔ a gɛɛ da lì díkɛ dɛ̀ɛ a sama sãa Ŋ̀âla-pɛrɛ Kɛ́tɛi mu Zerusâlɛŋ.”

⁵Nya ƃe Zuda da Bɛŋsima dísuui su-ƃelai láa túɛ-ƃelai, zâla láa-soŋ-ƃelai, da Liiva-ŋai dí dímu sìɣe a gɛɛ dí lí dí Yâwɛɛ ŋɔpɛ́rɛi tɔ́ɔ pôlu Zerusâlɛŋ. Dí gɛ̀ tí, kpɛ́ni fêi, Ɣâla ŋɔmɔ̂leŋ è dílii mu sìɣe.

⁶Díkɔlɛ maa-ƃelai kélee dí kpɔŋ-maa tɛ̀ɛ dípɔ a sãâ. Zãâi ŋí ƃé kɛ̀ a kâpa sɛŋ-folo-ŋa, gôo, sãâ kpulu-kpulu-ŋa, taa-tulɛ ŋa da sãâ da kpɛ́ni sɔ̃ɔ kpanaŋɔɔ-ŋa. Dí sama sãa tɛ̀ɛ dípɔ máŋ Ŋ̀âla-pɛrɛ Kɛ́tɛi mɛni ma.

⁷Zãâi kélee Gâloŋ Nɛbukinaza è wɔ́lɔ gùla Ŋ̀âla-pɛrɛ Kɛ́tɛi mu Zerusâlɛŋ ŋɔkpɛtɛ-ɣala-ŋai mɛni mai, Gâloŋ Sarɔ è dítɛ̀ɛ pôlu.

⁸È zãâi ŋí kélee tɛ̀ɛ Miturɛda pɔ́. Miturɛda ƃé kɛ̀ a gâloŋ yêei-sãai kélee mɛi-ƃelai láa-tuɛ núu. Miturɛda è zãâi kélee lòno é dílaa pú kɔlɔ ma Sebaza mì, nyíi kɛ̀ a Zuda lɔii láa-tuɛ nuui a maa tãi tí.

⁹Zãâi è dí lònoi, dia káa ŋí: Gôo kawulu buu saaƃa, káne kawulu wála tɔnɔ (1,000), ƃóa buu feerɛ káo-lɔ́ɔlu mɛi náaŋ da gôo kawulu da kpɛ́ni ŋa.

¹⁰Gôo kawulu buu saaƃa, káne káwulu ŋuŋ-náaŋ pôlu puu (410) da sɛŋ-folo da kpɛ́ni-ŋa ŋɔwála tɔnɔ (1,000).

¹¹Zãâi kélee Sebaza è kùla la Babelɔŋ lɔii su é lí la Zerusâlɛŋ è kɛ̀ a gôo, káne da sãâ da kpɛ́ni-ŋa ŋɔwála lɔ́ɔlu pôlu ŋuŋ náaŋ (5,400). Da kɔ-soŋ-ƃela da kpɛ́ni-ŋa ƃé kùla Babelɔŋ dí lí Zerusâlɛŋ.