Read Kpelle Ɛzura 10 Bible Online

Ɛzura 10 - Kpelle bible

Ɛzura 10

¹Ɛzura kɛ́ɛ a ŋuŋ ma pîlaŋɔɔ Ŋ̀âla-pɛrɛ Kɛ́tɛi ŋɛ́i-tuɛ, gɛ́ Ɣâla fɛli, gɛ́ ŋɔsɔnyɔ̂ŋ ƃò wɔ́lɔ wôo sui, Eezuɛ-ƃelai gbulu kɛ́tɛ dí pà gɔlɛ ma dia máŋ dí wɔ́lɔ a zu kɛ́tɛ. Ǹûai ŋí díkɛ̀ a kpakolo-ŋa, nɛyâa da nîa-pɛlɛɛ.

²Nya ƃe Elaŋ ŋɔsuui su-ƃelai láa túɛ-nuui Sekaniya, nyíi kɛ̀ a Zeiɛ ǹóŋ-surɔŋ, è m̀o Ɛzura ma ǹyɛɛi, “Kwa Ɣâla ŋɔtɔ̂ŋ kara. Kwa sîi nɛyaa kula nyíi vé a Ɣâla líi laa mɛnii. Kɛ́lɛ kwa kpera m̀ɛnii ŋí ma. Kili kɛ-zu káa ńyêei a gɛɛ Ɣâla a pâi ŋɔ́nɔ ǹyée seêi kú mù.

³Kɛ́lɛ nyíŋi é lɛ́ɛ pâi kɛ̂i fɛ̂ɛ kú kono-tee kpanaŋɔɔ kɛ́ Kúɣâlai yêei a gɛɛ kwa kúlônii-sinaai kwa pâi kúyee kulâi ǹɛyâai maa mɛni su da ǹîa-pɛlɛi kú dímaa sɔlɔ ƃô dîai, kú dítɛɛ pôlu dípɔ taai. M̀ɛnii kélee yái íkaa a ŋá nuu-namui, ka diai da ƃaa kɛ́-maa tɛ̂ɛ Ɣâla pɔ́i ká kú lia wôo ƃò m̀ɛnii ma, kwa pâi kúyee seêi mù. Kwa pâi siâi yɛ̂ɛ berei Ɣâla ŋɔtɔ̂ŋ káa lai.

⁴Zîi nɛni kula mɛnii kpéra. Ímaa mɛni ká tí. Gbera, kúkaa ípolu.”

⁵Nya ƃe Ɛzura è gɛ̀ zâla láa soŋ-ƃelai láa túɛ-ƃelai, Liiva-ŋai da ǹúui gbéli-ŋai dí díkono tée a gɛɛ m̀ɛnii Sekaniya a m̀ôi díkaa ŋ̀wóo pôlu.

⁶Nya ƃe Ɛzura è kùla Ŋ̀âla-pɛrɛ Kɛ́tɛi lá é lí Iliasi ǹóŋ Zɛoana ŋɔkólii su é nyíi naa. È kɛ̀ naa gɛ́ wɔ̀lɔ diai kùla gɔ-soŋ-laai su dí pá pôlui, dítua-pere nyɔ̂ŋ mɛni ma. È kɛ̀ naa va ǹáa mìi kpaa máŋ é gbele.

⁷Nya ƃe ǹúu láa túɛ-ƃelai dí worɛ̂ tɛ̀ɛ Zerusâlɛŋ taa-leei su da Zuda lɔii m̀éla kpéli ma a gɛɛ diai kélee kùla gɔ-soŋ-laai sui dí koyâŋ too Zerusâlɛŋ. Ǹúui a wàla pá, fólo saaƃa a tɛ̀ɛ, da pâi maa ǹúui kɔ̃liŋ kulâi ǹyêei, va ŋɔ́nɔ kɛ̀ a ǹɔii ǹóŋ da.

⁹Gpakolo-ŋai kélee kɛ̀ Zuda da Bɛŋsima lɔii kpiniŋ sui, dí díŋaa tɛ̀ gîe ma Ŋ̀âla-pɛrɛ Kɛ́tɛi lá vólo saaƃai ŋí yée mu. Vólo saaƃai ŋí maa ɣelei gbɛ̀ɛ-ŋai è kɛ̀ a ŋ̀áloŋ ǹɔ́ɔlu mɛi náaŋ ŋɔfólo buu feerɛ ɣele. Tuna è kɛ̀ pûi a ŋ̀ánaa. Kɛ́lɛ ǹûai dífe gɔyâŋ ŋí siɣe ní ma kpɛ́ni fêi è kɛ̀ a kɔyâŋ kpanaŋ. Díkɛ̀ naa díkɛ kpɛ̃liŋ kpɛ́ni fêi gɔ́lɛi è kɛ̀ pâi. Díkɛ tèla yào m̀ɛnii ma díkɛ̀ naa m̀ɛni mai.

¹⁰Zâla láa soŋ-nuui Ɛzura è mù-siɣe é tɔ́ɔ é mó ǹûai dîa ǹyɛɛi, “Ka Eezuɛ lɔii maa tĩa kara. Ka ŋɔsɔnyɔ̂ŋ su kɛ́tɛ. Kpɛ́ni fêi ka káyee píli sîi da kpɛ́ni nɛyaa kula mɛni su.

¹¹Mɛni ma, ka m̀ó kánâŋ-ni Díɣâlai Yâwɛɛ ma a gɛɛ ka mɛni nyɔ́mɔɔ kɛ́ la. Ka ká sɔnyɔ̂ŋ ƃó ká kálii pene, ká ǹîa mɛni kɛ́. Ka káyee kúla zîi da kpɛ́ni nɛyãai kula mɛni su, ká dítɛɛ pôlu dípɔ taai.”

¹²Ǹûai dí ŋ̀óo su-too a ɣelêi-pere dîyɛ mai, “M̀ɛnii kélee ya m̀o kûai kwa pâi gɛ̂i.”

¹³Dí m̀o ma máŋ dîyɛɛi, “Gbɔŋ su kɛ̂tɛi, dunai kɛ́ pù a ŋ̀ánaa. Kúfa pɔ̂ri kɛ̂i nɔ́ tɔɔ̂-ní duna yâi mu a zu kôyaa. Kúfa pɔ̂ri m̀ɛnii ŋí kɛ̂i a ɣele kûu tɔnɔ kpaa máŋ ɣele kûu feerɛ yée mu. Kúfa pɔ̂ri gɛ̂i tí kpɛ́ni fêi, kúai kúyee káa m̀ɛnii ŋí sui, kú tâmai.

¹⁴Tɔɔ kúlaa túɛ-ƃelai dí lɛ́ɛ Zerusâlɛŋ da diai sîi da kpɛ́ni su nɛyaa káa díyêei, dí mɛni kpɛtɛɛ kɛ́ é pîlaŋ m̀ɛnii ŋí ma. Gɛ̀ ní diai sîi da kpɛ́ni nɛyaa káa díyêei da pâi tãi kpɛ̂tɛi díkɛ kòyaŋ tɛi-tɛi da dítaa-leei láa túɛ-ƃelai é pɛ́lɛ ǹaa mɛni saa-ƃó-ƃelai dîa. A kɛ̀ tí, gɛ̀ ní Ɣâla líi a pâi lâai é ǹíi maa fáleŋ.”

¹⁵Ǹúui kélee dí díyee sèe m̀ɛnii ŋí mu. Kɛ́lɛ Asaye ǹóŋ Zonetaŋ da Tiva ǹóŋ Zaziɛ dífe díyee see ní m̀ɛnii ŋí mu. Mɛsulaŋ da Sabɛtai nyíi-ŋai kɛ̀ a Liiva-ŋai díkɛ̀ ǹûai ŋí pôlu.

¹⁶Gɔ-soŋ-laai su-ƃelai dí díyee sèe m̀ɛni kpɛtɛi ŋí mu. Nya ƃe zâla láa soŋ-nuui Ɛzura a ǹyée lɛ̀ dílaa túɛ-ƃelai da-ŋa dîa dínuu suu-ŋai sámaa é dílaa síɣe. Ŋ̀áloŋ buui ŋɔfólo maa-ŋuŋ ɣele, ǹûai ŋí dí pɛ̀lɛ m̀ɛnii ŋí su kâai.

¹⁷Diai kélee sîi nɛyaa díkɛ̀ díyêei, dí dímaa mɛ̂ni su kàa ɣáloŋ saaƃa yée mu.

¹⁸Zinâai sîi nɛyaa díkɛ̀ díyêei, dí dílaa pɔ̃yɛ yɛ̂ɛ berei dísuui káa lai. Zâla láa soŋ-ƃelai dílônii sinaai nyíi-ŋai sîi nɛyaa kùlai dílaa ƃa: Maaseia, Ilieza, Zari da Gidalia. Ǹûai ŋí dí kùla Zosada ǹóŋ Zasua da ǹêɣe sinaai dísuui su.

¹⁹Dí díkono tèe a gɛɛ dí dínɛyâai tɛ́ɛ pôlu dínûa pɔ́. Dí ƃála sîrɛ sama-sɛŋ tɛ̀ɛ a sâla kula sɛŋ dísɔnyɔ̂ŋ-ŋai mɛni ma.

²⁰Imɛ ŋɔsuui su-sinaai ƃé kɛ̀ a Ananii da Zebadia.

²¹Ariŋ ŋɔsuui su-sinaai ƃé kɛ̀ a Maaseia, Ilaiza, Simaya, Zeiɛ da Uzia.

²²Pasu ŋɔsuui su-ƃelai ƃé kɛ̀ a Ɛlionai, Maaseia, Isimai, Nɛtanɛ, Zozaba da Ilasa.

²³Liiva-ŋai dísuui su-ƃelai ƃé kɛ̀ a Zozaba, Simai, Kilaiya, da dòli máŋ a Kilita, Pataiya, Zuda da Ilieza.

²⁴Ŋ̀âla-pɛrɛ Kɛ́tɛi mu wule too-ƃelai dí-suui su-nuui ƃé kɛ̀ a Iliasi. Ŋ̀âla-pɛrɛ Kɛ́tɛi mɛi káa-ƃelai dísuui su-ƃelai ƃé kɛ̀ a Saluŋ, Tɛlɛŋ da Uri.

²⁵Ǹúu sûu da-kpɛ́ni-ŋai nyii-ŋai sîi-nɛyaa kulai, dia ƃé kɛ̀ a: Parosi ŋɔsuui su-ƃelai ƃé kɛ̀ a Lamiya, Isia, Makiza, Mizami, Ilieza, Makiza da Binaya

²⁶Elaŋ ŋɔsuui su-ƃelai ƃé kɛ̀ a Matania, Zɛkɛraya, Zeiɛ, Adi, Zeremɔ da Ilaiza.

²⁷Zatu ŋɔsuui su-ƃelai ƃé kɛ̀ a Ɛlionai, Iliasi, Matania, Zeremɔ, Zaba da Aziza.

²⁸Bebai ŋɔsuui su-ƃelai ƃé kɛ̀ a Zioanai, Anania, Zabai da Alai.

²⁹Bani ŋɔsuui su-ƃelai ƃé kɛ̀ a Mɛsulaŋ, Malo, Adaya, Zasu, Sea da Zeremɔ.

³⁰Paa-moa ŋɔsuui su-ƃelai ƃé kɛ̀ a Adina, Sela, Benaya, Maaseia, Matania, Bezale, Binui da Manasɛ.

³¹Ariŋ ŋɔsuui su-ƃelai ƃé kɛ̀ a Ilieza, Isiza, Makiza, Simaya, Simeɔŋ,

³²Bɛŋsima, Semaria da Malo.

³³Asuŋ ŋɔsuui su-ƃelai ƃé kɛ̀ a Matenai, Matata, Zaba, Ɛlifelɛ, Zɛremai, Manasɛ da Simai.

³⁴Bani ŋɔsuui su-ƃelai ƃé kɛ̀ a Madai, Amaraŋ, Uɛɛ,

³⁵Banaya, Bideya, Selue,

³⁶Vania, Mɛremɔŋ, Ilaisi,

³⁷Matania, Matenai da Zazu.

³⁸Benui ŋɔsuui su-ƃelai ƃé kɛ̀ a Simɛi,

³⁹Selemaya, Neetɔŋ, Adaya

⁴⁰Manadebai, Sasai, Sârai,

⁴¹Azari, Simaya, Semaria

⁴²Salɔŋ, Amaria da Zosɛ.

⁴³Nebo ŋɔsuui su-ƃelai ƃé kɛ̀ a Zeiɛ, Matia, Zaba, Zebina, Zadai, Zoɛ da Benaya.

⁴⁴Eezuɛ kpakolo-ŋai sîi nɛyaa díkɛ̀ díyêei dílaa káa ŋí. Gpakolo-ŋai ŋí dí dínɛyâai tɛ̀ɛ pôlu dínûai pɔ́ bɛ́lɛɛ dílônii dîa.