Read Kpelle Ɛzura 3 Bible Online

Ɛzura 3 - Kpelle bible

Ɛzura 3

¹Eezuɛ-ŋai kuláa gɔ́-soŋ laai su Babelɔŋ dí ɣáloŋ lɔ́ɔlu mɛi feerɛ sìɣe dí dítaa-ŋai su kpɛ̀tɛ. Ǹaa pôlu ma, dí díŋaa-tɛ gîe ma Zerusâlɛŋ taa-leei su.

²Nya ƃe Zosada ǹóŋ-surɔ̂ŋ Zasua da m̀arâa sala lá-soŋ-ƃelai, Sɛtiɛ ǹóŋ Zɛrubabɛɛ da ŋɔnûai dí díŋa tɛ̀ díkîe ma. Dí Eezuɛ-ƃelai Díɣâlai ŋɔsâla-ŋai kúla kwaai ma tɔ̀ɔ pôlu dí kɛ kéreŋ sala kula naa yɛ̂ɛ berei bɔ̃yɛ̂i la Ŋ̀âla-nuui Mose ŋɔtɔ̂ŋ kɔlɔi sui.

³Dí gwaai ŋí ma tɔ̀ɔ pôlu berei máŋ yao è kɛ̀ la díkɔ̂lɔi é pîlaŋ diai dîa dí páa pôlui, dí dí kàa ǹɔii mai. Nya ƃe dí pɛ̀lɛ ŋɔ́nɔ kéreŋ sala-ŋa kulâi naa Yâwɛɛ ma yɛ̂ɛ berei da kâa gɛ̀ la a bɔlɔ a kpíni da fóloi.

⁴Zuda-ŋai dí Díƃûu Kuui maa mɛ̂ni kɔ́ɔ pîlaŋ ŋɔ́nɔ nàa yɛ̂ɛ berei gáa la Mose ŋɔtɔ̂ŋ wóo mai. Dí pɛ̀lɛ géreŋ sâla-ŋai kélee ŋ̀aa-see kɛ̂i ŋ̀ele kûu tɛi-tɛi-ŋai mɛni ma.

⁵Dí pɛlɛ ŋɔ́nɔ géreŋ sama-sãai kéleŋɔɔ ma yɛ̂ɛ berei díkɛ̀ gɛ̂i la a bɔlɔɔi, díkɛ bɛ̂mɛlɛŋ-kao ninai maa kûui maa salai kûla da Ɣâla ŋɔkúu-ŋai gbéli-ŋai maa salai, díkɛ dí lii kûla sama-sãai kélee gáa Yɛ̂awɛ mɛni mai tɛ̀ɛ bɔ́.

⁶Berei máŋ ǹûai ŋí dífe kɛ́ ní nîi Ŋ̀âla-pɛrɛ Kɛ́tɛi tɔɔi lai, dípɛ̀lɛ kéreŋ sala-ŋa kulâi Yâwɛɛ ma a ŋáloŋ ǹɔ́ɔlu mɛi feerɛi ŋɔɣele kûui maa-ŋuŋ ɣelei.

⁷Ŋ̀âla-pɛrɛ Kɛ́tɛi tɔɔ-ƃelai dífe dɔ̀ɔ-ni kpɛ́ni-kpɛni. Dí gɔni saa-ƃelai da ŋ̀úru-ƃela tii kɛ́-ƃelai féla fè a sɛŋ-kao. Dí mii-sãa, kpele-sãa da ɔle-wulɔ tɛ̀ɛ Taya da Sidɔŋ taa-lee-ŋai su-ƃelai pɔ́. Dí zãâi ŋí tɛ̀ɛ dí pɔ́ sîda wuru-ŋai dí gùla dílɔii su Lɛƃanɔŋ, mɛni ma. Dí pà a ŋ̀úru-ŋai ŋí yá ŋá keleŋ su Zâpa taa-leei su. Pɛsia kaloŋ Sarɔ è fàa ma dílɛɛ pâi ŋ̀úru-ŋai ŋí kulâi Lɛƃanɔŋ.

⁸Dí lenéɛɛ pôlu Zerusâlɛŋ, maa kôraŋ veerɛi ŋɔɣáloŋ veerɛi su ƃé dí pɛ̀lɛ la Ŋ̀âla-pɛrɛ Kɛ́tɛi tɔ̂ɔ ma. Ǹûai ŋí kélee dí díyee pù Ŋ̀âla-pɛrɛ Kɛ́tɛi tɔɔ mɛni su: Zɛrubabɛɛ, Zasua da Zosada ŋɔkáyɔɔ-ŋai, zâla láa-soŋ-ƃelai da Liiva-ŋai é pɛ́lɛ diai kélee kùla gɔ́-soŋ laai su dí lene pôlu Zerusâlɛŋ dîa. Liiva-ŋai kélee kɛ̀ a kóraŋ buu feerɛ é tɛ́ naa túɛ-perei, dí dí pù Ŋ̀âla-pɛrɛi ŋí tɔɔ pôlu maa mɛni láa túɛ.

⁹Liiva-nuui Zasua, ǹônii sinaai da ŋɔnûai, Kamɛɛ da ǹônii sinaai ní díkɛ̀ a bɛ́rɛi ŋí tɔɔ-ƃelai láa-túɛ-nuu kpului su-ƃelai da. Kamɛɛ ŋí da ǹônii dí kùla Odavia nuu-suui su. Díkpɔŋ maa-ƃelai dí kùla Liiva-ŋai kɛ̀ Ɛnadai, dísuui su.

¹⁰Tãi ǹûai dí Ŋ̀âla-pɛrɛ Kɛ́tɛi tɔ̂ɔ kɔ́ɔ pîlaŋ lai, zâla láa-soŋ-ƃelai dí dímaa ɣîri dí túru-ŋa sìɣe Liiva-ŋai kùla Asafa suui sui, dí ɣale sãa siɣe. Dí laa-maa tɛ̂ tɛ̀ɛ Yâwɛɛ pɔ́ a wule-ŋa yɛ̂ɛ berei Gâloŋ Deeƃé è wɔ́lɔ gɛ́-pere lɛ̀ la dîai.

¹¹Dí wule-ŋa tòo Yâwɛɛ ma, ǹúui da-ŋa díkɛ m̀u-see, dîyɛɛi, “Yâwɛɛ lɛ̂lɛɛi. Ŋ̀wɛ̂li kɛ́ maai ǹyêei Eezuɛ mɛni mai, góyaŋ fé ma.” Ǹúui kélee dí làɣi ɣelêi-pere a tɛ̀ɛ-ŋa. Díkɛ̀ Yâwɛɛ láa maa tɛ̂i, kpɛ́ni fêi, a gɛ́ ŋɔpɛ́rɛ kɛ́tɛi tɔ̂ɔ kɔ́ɔ a pîlaŋ.

¹²Zâla láa-soŋ-ƃela pɔlɔ-ŋai, Liiva-ŋai, da ǹúu sûu-ŋai láa túɛ-ƃelai nyii-ŋai wɔ́lɔ Ŋ̀âla-pɛrɛ kɛ́tɛ pɔlɔi kaai, díkɛ̀ naa tãi dí bɛ́rɛi ŋí tɔ̂ɔ kɔ́ɔ pìlaŋ lai. Tãi dí nàa kàa lài, ǹûa pɔlɔ-ŋai dí wɔ̀lɔ a maloŋ-pere, ǹúu gbéli-ŋai díkɛ lii-nɛ̃̂ɛ kùla.

¹³Núu da fé pɔ̂ri ní kɛ̀ díwɔlɔ-wooi ŋá kâai ma, kpɛ́ni fêi ǹíi-nɛ̃ɛ kula-ƃelai wóo è kɛ̀ a dɛ́ɛ díwɔ̂i mɛi-pere. Díwoo è lì kpɔ́ kwaa kôya ma póŋ-poŋ.