Read Kpelle Ɛzura 6 Bible Online

Ɛzura 6 - Kpelle bible

Ɛzura 6

¹Nya ƃe Darɔ è m̀o a gɛɛ dí Babelɔŋ lɔii ŋɔmɛni pɔ̂lɔ kɔlɔ-ŋai su káa.

²Dí m̀ɛni pɔ̂lɔ kɔlɔi ŋí kàa Ɛbatana taa-leei ŋɔmɛni pɔ̂lɔ kɔlɔi sáma Midia lɔii kpiniŋ su. M̀ɛnii kɛ̀ a bɔ̃yɛɛ gɔlɔi ŋí sui, ǹyaa ká ŋí:

³“Gâloŋ Sarɔ ŋɔkâloŋ laa-koraŋ maa ŋúŋ su, è wála-wala laa tɛ̀ɛ Zuda-ŋai pɔ́ a gɛɛ dí Ŋ̀âla-pɛrɛ Kɛ́tɛi tɔ́ɔ pôlu Zerusâlɛŋ taa-leei su. Ǹaa ƃé da pâi kɛ̂i sâla-ŋa kulâi naa díkɛ kéreŋ-sala sãa kèreŋ naa. Ŋ̀âla-pɛrɛi ŋɔmɛi kôya é kɛ́ a kɔ́ɔ ƃɔ́rɔnîi buu lɔ́ɔlu mɛi náaŋ, ŋɔmu-kɛtɛ kɛ́ ƃò a kɔ́ɔ ƃɔ́rɔnîi buu lɔ́ɔlu mɛi náaŋ.

⁴Da kɛ̀ ziɣãŋ-ŋai tɔɔ̂i, da kɔni-ƃela saaƃa làa, dí wúru-ƃela tɔnɔ láa mɛi. Díi da pâi gɛ̂i, maa sɛŋ kaoi é kúla ǹɔii ŋɔsɛŋ-kao lâai kɛ́ kwaai ma.

⁵Gôoi da gáne sɛŋ-folo-ŋai gâloŋ Nɛbukinaza è dí kûla Ŋ̀âla-pɛrɛ Kɛ́tɛi mù é lí a dia Babelɔŋ, dí lí a díkelee pôlu Zerusâlɛŋ dí dísee Ŋ̀âla-pɛrɛi mu ƃɛ́i-ŋai dí wɔ́lɔ kɛ̀ naai.”

⁶Diai kɛ̀ a dítɔɔ Ŋ̀âla-pɛrɛ Kɛ́tɛi tɔɔ-ƃelai dîai, díkɔlɔi su-too wooi ká ŋí Gâloŋ Darɔ è dɛ̀ɛ dîɛi. È mò dîa ǹyɛɛi, “Ŋá fáa yâ Tatɛnai yái íkaa a Yufeletii Ya-leei ŋɔfólo liî pere lɔii kpiniŋ mɛi nuui, Sɛta-bozenai kà ká ƃarâai.” “Kà kúla Ŋ̀âla-pɛrɛ Kɛ́tɛi ŋí tɔɔ-ƃelai kɔlɛ mâ.

⁷Káfe ká lá pìli dɔ̀ɔ mɛni su. Ka tãi tɛɛ Zuda lɔii kpiniŋ mɛi nuui pɔ́ da Zuda-ŋai láa túɛ-ƃelai a gɛɛ dí Ɣâla ŋɔpɛ́rɛi ŋí tɔ́ɔ pôlu ƃɛ́i ƃɔlɔi è kɛ̀ a dɔ́ɔ naai.

⁸Ŋa m̀ôi kâa a gɛɛ ká kpɔ́ŋ dîa díi ŋí kɛ́ mɛni ma. Dɔ̀ɔ sɛŋ kaoi kélee a pâi kulâi ǹɔii ŋɔŋuŋ fela-fei su nyíi ǹûai da gbɛ̀ɛ Yufeletii Ya-leei ŋɔfólo liî pere lɔii su, a gɛɛ maa tîi mɛni fé tòo pôlu kpaa núu da é gɛ́ díkpera.

⁹Zãâi Zerusâlɛŋ sala láa soŋ-ƃelai da ŋ̀wɛlii, ǹɛ̂lɛi ká dɛɛ dípɔi, dia ƃa, niŋa nâɣa-ŋa, ƃála nâɣa-ŋa, ƃála-sirɛ-ŋa, wîi, kpolo-liyeŋ, ŋwãa kpaa máŋ ɔle-wulɔ. Zãai ŋí káa a kéreŋ sala sãa Ɣâla mɛni ma nyii gáa Ɣâla-taai. Ka zãâi ŋí tɛ́ɛ dípɔ a ɣele kélee.

¹⁰Ǹɛ̂lɛi zãâi ŋí díkɛ ƃò naa sâla-ŋa kùla mɛni ma nyíi a Ɣâla, nyii gáa Ɣâla-taai líi laai. Ka nyíŋi-ŋai kɛ́ a gɛɛ ǹûai dí Ɣâla fɛli é lûwa láa gâloŋ ma da ǹônii.

¹¹Ŋá m̀o máŋ a gɛɛ núu da a tɔ̀ɔ ŋ́ooi ŋí ma kpaa máŋ é maa fáleŋ, ŋa pâi ŋɔpɛ́rɛi tôŋ su-wuru kulâi dɔɔ̂i, ŋá ŋ̀á séni ŋá m̀ɔ́ la, ŋá ŋɔpɛ́rɛi wólo.

¹²Kâloŋ kpaa máŋ lɔii-ŋuŋ da a tɔ̀ɔ ŋ́ooi ŋí ma kpaa máŋ é gula dɔɔ̂i a gɛɛ é Ŋ̀âla-pɛrɛ Kɛ́tɛi tɔɔ mɛ̂ni su kara Zerusâlɛŋ, Ɣâla nyíi Zerusâlɛŋ taa-leei sîɣe a ƃɛ́i nûa díkɛ vɛ̀li naai, é ma kâloŋ kpaa maa lɔii-ŋuŋ kúla dɔɔ̂i. Ńyãa Gâloŋ Darɔ, ŋ́oo ká ŋí. Ǹyaŋ fɛ̂ɛ núu kélee é ǹyée sée mu.”

¹³Nya ƃe ǹɔii nuui Tatɛnai, Sɛta-bozenai da díƃarâai dí díyee sèe gâloŋ wóo mu.

¹⁴Zuda-ŋai láa túɛ-ƃelai dí lì tuɛ-pere a Ŋ̀âla-pɛrɛi tɔɔ tîi. Ɣâla ŋɔlono kɛ́-ƃelai Eegai da Zɛkɛraya díkɛ̀ díkɔlɛ ma, díkɛ dílii kùla. Dí Ŋ̀âla-pɛrɛi tɔ̀ɔ dí kpɛ́ɛ ma yɛ̂ɛ berei Eezuɛ Ɣalai è maa wâla-wala-laa tɛ̀ɛ la dípɔi. Dí díi ŋí kɛ̀ Pɛsia kaloŋ-ŋai Sarɔ, Darɔ da Atasɛra-ni dí wála-wala laai sârai.

¹⁵Dí kpɛ̀ɛ Ŋ̀âla-pɛrɛ Kɛ́tɛi ŋí tɔ̂ɔ ma a ŋ̀áloŋ da dòli a Ada ŋɔfóloi zaaƃa ɣele, Gâloŋ Darɔ ŋɔkâloŋ laa koraŋ ǹɔ́ɔlu mɛi dai su.

¹⁶Diai kélee kùla gɔ́-soŋ laai su dí lène pôlu Eezuɛi, dí lii-nɛ̃ɛ kɛ́tɛ kùla a Ŋ̀âla-pɛrɛ Kɛ́tɛi láa ƃó ɣele. Ǹûai ŋí díkɛ̀ a sâla láa soŋ-ƃela, Liivai-nuu suui su-ƃela da nuu-suu da kpɛ́ni-ŋa su-ƃela.

¹⁷Dí pà a taa tûlɛ-ŋa Ŋ̀âla-pɛrɛi láa ƃó mɛni ma. Dí pà a niŋa-sirɛ lonii ŋuŋ tɔ̂nɔ (100), ƃála-sirɛ ŋuŋ feerɛ (200), da ƃála lônii ŋuŋ náaŋ (400). Dí pà a dia sâla kula mɛni ma. Dí pà a ƃoli-sirɛ puu káo feerɛ a sɔnyɔ̂ŋ sama-sɛŋ. M̀olii ŋí dɔnɔ è kɛ̀ Eezuɛ nuu-suu puu káo feerɛi dɔnɔ mɛni ma.

¹⁸Dí zâla láa soŋ-ƃelai da Liiva-ŋai dítii kɛ́ kwaa-ŋai ma lɛ̀ dîa Zerusâlɛŋ taa-leei su yɛ̂ɛ berei bɔ̃yɛ̂i la Mose ŋɔtɔ̂ŋ kɔlɔi sui.

¹⁹Zuda-ŋai kélee kùla gɔ-soŋ-laai su dí pá pôlui, dí Dɛɛ-mɛi-kûui kuláa kɔ́ɔ pìlaŋ pôlu ŋɔ́nɔ. Dí gúui ŋí kùla a tãi dí kpɛ̀ɛ la Ŋ̀âla-pɛrɛ Kɛ́tɛi tɔ̂ɔ ma ŋɔkóraŋ veerɛi ŋɔɣáloŋ maa-ŋuŋ ŋɔfólo puu káo náaŋ ɣele.

²⁰Zâla láa soŋ-ƃelai da Liiva-ŋai dí ǹanii wàa dîa. Liiva-ŋai díƃála-ŋa kùla a sâla Dɛɛ-mɛi-kûui ŋí su. Dí zâlai ŋí kùla dísuui su-ƃelai kúla gɔ́-soŋ-laai sui dímɛni ma, zâla láa soŋ-ƃelai, é pɛ́lɛ dia kpîŋ dîa.

²¹Eezuɛ-ŋai kélee kùla gɔ́-soŋ laai sui, dí zâla sãai ŋí da mìi da diai kùla lɔii kpɛ́ni-ŋa su dí dípôlu tɔɔ dísɔnyɔ̂ŋ-ŋai dîa, dí díyee sèe Eezuɛ Ɣalai Yâwɛɛ mu díkɛ vɛ̀lii.

²²Dí Dɛ́-sɛŋ féu kpoloi maa kûui kɛ̀ ŋɔnɔ. Dí ǹíi-nɛ̃ɛi ŋí kùla a fólo lɔ́ɔlu mɛi feerɛ. Dí lii-nɛ̃ɛ kùla kpɛ́ni fêi, Yâwɛɛ è Pɛsia kaloŋ líi mù sìɣe é kpɔŋ maa tɛɛ dípɔ Eezuɛ Ɣalai ŋɔpɛ́rɛi tɔ̂ɔ pôlu mɛni ma.