Read Kpelle Ɛzura 7 Bible Online

Ɛzura 7 - Kpelle bible

Ɛzura 7

¹Kóraŋ támaa tɛɛ́ pôlu ma, dí Atasɛra kɛ̀ a kâloŋ Pɛsia lɔii mɛi. M̀aa tãi tí nalôŋ tɔnɔ è kɛ̀ naa ǹáa ƃé kɛ̀ a Ɛzura. È dínuu-suui kɔ́ɔ pîlaŋ mɛni pɔlɔi kɔ̂ri é gáa. È gɔ̀lɔŋ a gɛɛ gáa a Eezuɛ ŋɔsâla láa-soŋ nuu kɛ́tɛi Eelɔŋ ŋɔsuui su-nuui da. M̀ɛni-ŋai ŋí ƃé è gàa nyíi ǹɛ ma a gɛɛ gáa a ǹúu suui ŋí su nuu da. Dísuui kɔ́ɔ pîlaŋ-pere káa ŋí: Ɛzura ǹâŋ láa ƃé kɛ̀ a Seraya. Seraya ǹâŋ ƃé kɛ̀ a Azaria, Azaria kɛ́ ƃò a Ikaya ǹóŋ.

²Ikaya ǹâŋ láa ƃé kɛ̀ a Saluŋ, Saluŋ kɛ́ ƃò a Zadɔ ǹóŋ, Zadɔ kɛ́ ƃò a Atu ǹóŋ.

³Atu è kɛ̀ a Amaria ǹóŋ, Amaria kɛ́ ƃò a Azaria ǹóŋ. Azaria ǹáŋ láa ƃé kɛ̀ a Merayo.

⁴Merayo è kɛ̀ a Zeraya ǹóŋ, Zeraya ǹâŋ kɛ́ ƃò a Uzi. Uzi ǹâŋ láa ƃé kɛ̀ a Buki.

⁵Buki è kɛ̀ a Abisua ǹóŋ, Abisua kɛ́ ƃò a Finiya ǹóŋ. Pineya è kɛ̀ a Ilieza ǹóŋ, nyíi kɛ̀ a Eelɔŋ ǹóŋ-surɔŋ.

⁶Ɛzura è kɛ̀ a dareɛ́ɛ a ŋ̀ánaa. E kɛ̀ a gili-ŋa ponoɔɔ Eezuɛ Ɣalai Yâwɛɛ ŋɔtɔ̂ŋ kɔlɔi mɛni su, nyíi è dɛ̀ɛ Mose pɔi. Ŋɔɣâlai Yâwɛɛ è lûwa làa ma. Zãâi kélee è Pɛsia kaloŋ marê kɛ̀ mɛni mai, è dɛ̀ɛ bɔ́. Ɛzura è kùla Babelɔŋ é lí Zerusâlɛŋ. È lì naa a Gâloŋ Atasɛra ŋɔkâloŋ-laa koraŋ ǹɔ́ɔlu mɛi feerɛi su. È lì a Eezuɛ nuu-kpulu-ŋa naa. Ǹúu kpulu-ŋai ŋí ƃé kɛ̀ a zâla láa soŋ-ƃelai, Liiva-ŋai, Ŋ̀âla-pɛrɛi mu wule too-ƃelai, Ŋ̀âla-pɛrɛi mɛi káa-ƃelai da tíi kɛ́ kpakolo-ŋa.

⁸Dí kùla Babelɔŋ a Atasɛra ŋɔkâloŋ laa koraŋ ǹɔ́ɔlu mɛi feerɛ ŋɔɣáloŋ maa-ŋuŋ ŋɔfólo maa ŋúŋ ɣele. Dí sèri naa a ŋ̀áloŋ ǹɔ́ɔlui ŋɔfólo maa ŋúŋ. Ɣâla è kpɔŋ mâa tɛ̀ɛ dípɔ é lɛ́ɛ la zu dí seri Zerusâlɛŋ.

¹⁰Ɛzura è tãi támaa sìɣe Yâwɛɛ ŋɔtɔ̂ŋ kɔlɔi maa kɔ́ri mɛni mà. È maa kɔ̂ri kpɔ́ é pɛ́lɛ ǹɛ́i Eezuɛ-ƃelai dîa. È ǹɛ dîa, é berei lɛ́ dîa da pɔ̂ri zu-tɔŋ-ŋai mɛi kâai lai.

¹¹Gɔlɔi ká ŋí Atasɛra è dɛ̀ɛ Ɛzura pɔ́i. Ɛzura è kɛ̀ a sâla láa soŋ-nuu, gɛ́ ƃò a dɔ̂ŋ lɛ́-nuui da. È kɛ̀ a dareɛ́ɛ Yâwɛɛ ŋɔtɔ̂ŋ-ŋai su nyii è dɛ̀ɛ Mose pɔ́ Eezuɛ-ŋai mɛni mai. Gɔlɔi è dɛ̀ɛ Ɛzura pɔ́i, ŋ̀oo ká ŋí:

¹²“Gɔlɔi ŋí a kulâi ńyãa Gâloŋ Atasɛra yêei. Ŋa dɛɛ̂i yá Ɛzura ípɔ naa, yái íkaa a zâla láa soŋ-nuui, íkɛ ƃò a Yâla nyii gáa Ɣâla-taai ŋɔtɔ̂ŋ lɛ́-nuui dai.”

¹³“Ŋa m̀ôi yâ a gɛɛ Eezuɛ-ŋai kélee díkaa ŋá lɔii kpîniŋ sui, dísâla láa soŋ-ƃelai kpaa máŋ Liiva-ŋai, dífâai ma a gɛɛ ka dîa-ni ká lí Zerusâlɛŋ, ka dîa-ni ka lí.

¹⁴Ńyãa Gâloŋ Atasɛra kwa ńia-woo-ƃo-ƃela lɔ́ɔlu mɛi feerɛ ƃé í tɛɛ̂i. Kwa í tɛɛ̂i a gɛɛ í lí Zerusâlɛŋ taa-leei su da Zuda lɔii kpiniŋ su í ǹaa maa kpɛ́ɛ, í gáa a kɛ̀ ǹaa-ƃelai da siai a Íɣâlai ŋɔtɔ̂ŋ nyii gáa íyêei, ŋ̀óo.

¹⁵Gôo da káne káa kúyêei kwa ńia-woo ƃó-ƃelai a sama sãâ Eezuɛ Ɣalai mɛni ma nyíi ŋɔpɛ́rɛi káa Zerusâlɛŋ. Ŋa pâi dɛɛ̂i ípɔ í lí la naa.

¹⁶Ganei da gôoi í dí kùla Babelɔŋ lɔii kpiniŋ kélee su a ǹɔii ŋɔzûtii, lí a dia naa. Zama-sãai Eezuɛ-ŋai da dísâla láa soŋ-ƃelai dí dɛ̀ɛ Ŋ̀âla-pɛrɛ Kɛ́tɛi mɛni mai, lí a dia máŋ.”

¹⁷“Zɛŋ kâoi kɔ́lɛ a táre-pere. Niŋa-nâɣa-ŋa, ƃála-sirɛ-ŋa da ƃála-saa-ŋa, gbài da ŋwãai yá í dí kúla a sâla ŋ̀âla teƃelei ma Zerusâlɛŋ. Díkaa a sama sãa.

¹⁸Gánei da gôoi nyíi pâi lɛɛ̂i, ká ínûai ka pɔ̂ri tíi da kpɛ́ni-ŋa kɛ̂i a dia nyii ká gɔ́lɔŋ ǹɛ̂lɛi gɛ́ ƃò a Káɣâlai líi láa mɛnii.

¹⁹Díi kɛ́-sãai kélee í zɔlɔ ƃô Ŋ̀âla-pɛrɛ Kɛ́tɛi ŋɔtíi-ŋai kɛ́-mɛni mai, lí a gélee Ɣâla pɔ́ Zerusâlɛŋ.

²⁰Zɛŋ da kpɛ́ni-ŋai nyii ya ŋ̀wɛ̂lii í tíi kɛ́ a dia Ŋ̀âla-pɛrɛ Kɛ́tɛi mɛni mai, ya pɔ̂ri díkulâi ǹɔii ŋɔsɛŋ kâo lâai kɛ́ kwaai ma.”

²¹“Ŋa wála-wala laa tɛɛ̂i ǹɔii ŋɔsɛŋ-kao lâai kɛ́-kwaai ma mɛi káa-ƃela láa túɛ-ƃelai pɔ́ Yufeletii Ya-leei ŋɔfólo liî-pere lɔii su a gɛɛ zɛŋ kélee Ɛzura a ŋ̀wɛ̂lii tíi kɛ́ mɛni mai, dí dɛ̀ɛ bɔ́ a maa félaa. Dífe maa tînaŋ. Ɛzura káa a sâla láa soŋ-nuu, gɛ́ ƃò a Ɣâla nyii gáa Ɣâla-taai, ŋɔtɔ̂ŋ lɛ́-nuui da.

²²A nɛ̃ɛ ma kpîŋ é kɛ́ yɛ̂ɛ káne pãŋ wála lɔ́ɔlu mɛi feerɛ pôlu ŋuŋ lɔ́ɔlu (7,500), wîi pãŋ wála buu feerɛ kao feerɛ (22,000), ŋwãai sane wála feerɛ (2,000), ɔle-wulɔ sane wála feerɛ (2,000) kpaa máŋ kpolo-liyeŋ nyíi kélee a ŋ̀wɛ̂lii.

²³Ka kákpîŋ mɛi káa. Zãâi nyíi kélee ǹɛ̂lɛɛi Ɣâla nyii gáa Ɣâla-taai ŋɔpɛ́rɛi tɔɔ mɛni mai, Ɛzura a ká marê kɛ̀ dímɛni ma, ka dí tɛ́ɛ bɔ́. Káfe maa tînaŋ. Káfe gɛ̀ Ɣâla é ǹíi ŋwána ḿâ kpaa máŋ gâloŋ nyii pâi ḿbɔɔ ŋá siɣêi.

²⁴Káfe ŋuŋ-fela-fei kùla zâla láa soŋ-ƃelai dîa, Liiva-ŋai, Ŋ̀âla-pɛrɛi mu-wule-too-ƃelai, Ŋ̀âla-pɛrɛi mɛi káa-ƃelai da ǹaa tii-kɛ́ kpakolo-ŋai kélee da ma kpaa máŋ Ŋ̀âla-pɛrɛi mu-tii da kpɛ́ni kɛ́-ƃelai.”

²⁵“Yá, Ɛzura, tíi kɛ́ kpɔ́ a dárei nyíi Íɣâlai a dɛ̀ɛ ípɔi. Íyee lɛ́ nûa dîa díkɛ a mɛni sâa ƃó-ƃela, da-ŋa díkɛ ƃò a Yufeletii Ya-leei ŋɔfólo liî-pere lɔii kpiniŋ-ŋai láa túɛ-ƃela. Díkɛ a diai da Ɣâla ŋɔtɔ̂ŋ mɛi kâai. Diai dífe Íɣâlai ŋɔtɔ̂ŋ-ŋai kɔ́lɔŋ, ǹɛ́ dîa.

²⁶Núu da a wàla Íɣâlai ŋɔtɔ̂ŋ-ŋai mɛi káa, kpaa máŋ ǹɔii kpîniŋ ŋɔtɔ̂ŋ, maa nuui kula-maa kɛ́ a maa félaa. Maa nuui kula maa kɛ́ a bere sîi ŋí. Baa kpaa máŋ í gùla ǹɔii ma, kpaa máŋ ígɔ̃liŋ kula ǹyêei kpaa máŋ í ǹɔ́ kpini-pɛrɛ mu wɔ́lɔ-wɔlɔ da wɔ́lɔ-wɔlɔ.”

²⁷Ɛzura è m̀o ǹyɛɛi, “Ŋa laa-maa tɛ̂ tɛɛ̂i kúnuu-pɔlɔ-ŋai Díɣâlai Yâwɛɛ pɔ́. A gɛ́ Pɛsia kaloŋ a ƃaa kɛ́ maa tɛ́ɛ ǹyaa Yâwɛɛ Ŋɔpɛ́rɛi kɛ́tɛi pɔ́ a téla gɛ́ gâloŋ a wála-wala laa tɛɛ Zuda-ŋai pɔ́ a gɛɛ dí ǹyaa Yâwɛɛ ŋɔpɛ́rɛi tɔ́ɔ pôlu a ǹɛ́lɛɛ Zerusâlɛŋ taa-leei su.

²⁸Ɣâla ŋɔƃɛlɛ-seei sârai, Pɛsia kaloŋ, ŋɔlia-woo ƃó-ƃelai da ŋɔtíi láa túɛ-ƃelai kélee da díyee sée ḿu. Ŋáɣâlai Yâwɛɛ a ńii kúla a gɛɛ ŋa Eezuɛ-ŋai kɛ́ gɔ́-soŋ laai sui, dílaa túɛ-ƃelai dámaa líi kúla kwa dîa-ni kwa lene pôlu Zerusâlɛŋ.”