Read Kpelle Niɛmaya 11 Bible Online

Niɛmaya 11 - Kpelle bible

Niɛmaya 11

¹Ǹûai láa túɛ-ƃelai da dínûai dí nâa sèe Zerusâlɛŋ nyii gáa a daa-lee maa waai. Kɛ́lɛ pɛ́rɛ támaa fé kɛ́ ní naa ǹɔii lônii kpéli-ŋai mɛni ma. Núu suu puu sáma, dɔnɔ nɔ́ ƃé zu-ƃela kɛ̂i è kɛ̀ ma daa leêi su. Dí kpɛɛŋ tôo a gɛɛ dí ǹúu suui káa zu-ƃela da pɔ̂ri seêi ǹaa. Kɛ́lɛ ǹûai kpéli-ŋai dí sèe Zuda lɔii ŋɔtaa-lee kpéli-ŋai su.

²Ǹûai kélee dí Ɣâla marê kɛ̀ a gɛɛ é lûwa láa gbakolo-ŋai dîa dílii é kùla a gɛɛ dí sée Zerusâlɛŋ.

³Eezuɛ-ƃelai da-ni, zâla láa soŋ-ƃelai, Liiva-ŋai, diai kɛ̀ tíi kɛ̂i Ŋ̀âla-pɛrɛ Kɛ́tɛi mui, da Gâloŋ Saloma ŋɔtíi kɛ́-ƃelai dísuui su sinaai dí lì dí sée Zuda lɔii ŋɔtaa-leei gbéli-ŋai su dí kɔ̃liŋ-ŋai mɛi. Kɛ́lɛ ǹɔii kpîniŋ-ŋai mɛi-ƃelai dí sèe Zerusâlɛŋ da dínûai.

⁴Zuda da Bɛŋsima dí suui su-ƃelai da-ni dí sèe Zerusâlɛŋ. Zuda ŋɔsuui su-ƃelai veerɛ ƃé sèe Zerusâlɛŋ da dínûai. Ǹûa feerɛi ŋí láa ƃé kɛ̀ a Ataya da Maaseia. Ataya ŋɔnúu pɔ̂lɔ-ŋai láa ká ŋí. Maalalɛ nyii kùla Pɛrɛ ŋɔsuui sui ǹóŋ-surɔŋ ƃé kɛ̀ a Sefatiya. Sefatiya ǹóŋ-surɔŋ ƃé kɛ̀ a Amariya. Amariya ǹóŋ-surɔŋ ƃé kɛ̀ a Zɛkɛraya. Zɛkɛraya ǹóŋ-surɔŋ ƃé kɛ̀ a Uzia. Uzia ǹóŋ-surɔŋ ƃé kɛ̀ a Ataya. Maaseya ǹyaŋ ŋɔnúu pɔ̂lɔ-ŋai láa ká ŋí. Zɛkɛraya nyii kùla Sela ŋɔsuui sui, ǹóŋ-surɔŋ ƃé kɛ̀ a Zoyare. Zoyare ǹyaŋ ǹóŋ-surɔŋ ƃé kɛ̀ a Adaya. Adaya ǹóŋ-surɔŋ ƃé kɛ̀ a Azaya. Azaya ǹóŋ-surɔŋ ƃé kɛ̀ a Kozɛ. Kozɛ ǹyaŋ ǹóŋ-surɔŋ ƃé kɛ̀ a Maaseya.

⁶Pɛrɛ ŋɔsuui su-ƃelai sèe Zerusâlɛŋ, díkɛ̀ a kpakolo wála-walaa ŋuŋ náaŋ pôlu buu lɔ́ɔlu mɛi da kao lɔ́ɔlu mɛi saaƃa (468).

⁷Bɛŋsima ŋɔsuui su-ƃelai láa túɛ-ƃelai nyii-ŋai sèe Zerusâlɛŋ ƃé kɛ̀ a Salu nyii kɛ̀ a Mɛsulaŋ ǹóŋ. Mɛsulaŋ nyaŋ è kɛ̀ a Zoɛ ǹóŋ ŋɔloŋ. Dínûa-pɔ̂lɔ ŋai da-ni ƃe kɛ̀ a Pidaya, Kolaya, Maaseia, Itiɛ da Zisaya.

⁸Gabai da Salai díkɛ̀ a Salu ŋɔkaayɔ ŋa. Bɛŋsima ŋɔsuui su ƃelai nyii kélee sèe Zerusâlɛŋ, díkɛ̀ a kpakolo ŋuŋ lɔ́ɔlu mɛi náaŋ pôlu buu feerɛ kao lɔ́ɔlu mɛi saaƃa (928).

⁹Zikuri ǹóŋ-surɔŋ Zoɛɛ ƃé kɛ̀ a dílaa túɛ-nuu daa-leei su. Asinua ǹóŋ-surɔŋ Zuda ǹyaŋ gɛ́ ƃò a gɔlɛ ma-nuu.

¹⁰Zâla láa soŋ-ƃelai dínuu suui láa túɛ-ƃelai nyii-ŋai sèe Zerusâlɛŋ dia ƃa, Zidaya nyii kɛ̀ a Zoari ǹóŋ-surɔŋ, Zakiŋ.

¹¹Seraya ǹâŋ láa ƃe kɛ̀ a Ɛkeya, nyii kɛ̀ a Mɛsulaŋ ǹóŋ ŋɔloŋ. Dínâŋ pɔ̂lɔ-ŋai ƃe kɛ̀ a Zadɔ, Mɛraiɔ, da Aitɔ, nyii kɛ̀ a zâla-laa-soŋ nuu kɛ́tɛi.

¹²Seraya ŋí ŋɔsuui su-sinaai kɛ̀ tíi kɛ̂i Ŋ̀âla-pɛrɛ Kɛ́tɛi mui, díkɛ̀ a núu ŋuŋ lɔ́ɔlu mɛi saaƃa pôlu buu feerɛ kao feerɛ (822). Zâla láa soŋ-nuui Adaya máŋ è sèe Zerusâlɛŋ. Ǹâŋ láa ƃé kɛ̀ a Zɛroaŋ. Ǹâŋ pɔlɔ kpéli-ŋai láa ƃé kɛ̀ a Pilaliya, Aŋzi, Zɛkɛraya, Pasɔ, da Makiza.

¹³Adaya ŋí ŋɔsuui su-ƃelai kélee dí kɛ̀ a sinâa ŋuŋ feerɛ pôlu buu náaŋ kao feerɛ (242). Zâla láa soŋ-nuui Amasai ǹyaa máŋ è sèe Zerusâlɛŋ. Ǹâŋ láa ƃé kɛ̀ a Azarɛ. Ǹâŋ pɔlɔ kpéli-ŋai ƃé kɛ̀ a Azai, Mɛsilɛmɔ, da Imɛ.

¹⁴Gɔ-kuluƃa-ŋai kɛ̀ ǹúu-suui ŋí sui, díkɛ̀ a kpakolo ŋuŋ tɔnɔ pôlu buu feerɛ kao lɔ́ɔlu mɛi saaƃa (128). Dí láa túɛ-nuu kɛ́tɛi ƃé kɛ̀ a Agidoliŋ ǹóŋ-surɔŋ Zadiyɛ.

¹⁵Liiva-ŋai dámaa dísèe Zerusâlɛŋ. Maa-ŋuŋ ƃé kɛ̀ a Simaya nyii kɛ̀ a Asɔɔ ǹóŋ-surɔŋ. Ŋɔnûa pɔlɔ-ŋai ƃé kɛ̀ a Azarikaŋ, Asabiya da Buni.

¹⁶Liiva nuu feerɛi ŋí, Sabɛtai da Zozaba dia máŋ dí séɛɛ è kɛ̀ Zerusâlɛŋ. Ǹûai ŋí ƃé kɛ̀ Ŋ̀âla-pɛrɛ Kɛ́tɛi ŋ̀íne ŋá tii kɛ́ mɛni-ŋai mɛi.

¹⁷Matania è kɛ̀ a Liiva-nuui dɔnɔ nyii zeɛ́ɛ è kɛ̀ Zerusâlɛŋ. Ǹâŋ láa ƃé kɛ̀ a Maka. Matania ǹâŋ pɔlɔ-ŋai ƃé kɛ̀ a Zadi da Asafa. Matania ŋí ƃé kɛ̀ a Ŋ̀âla-pɛrɛ Kɛ́tɛi ŋɔwule too-ƃelai láa túɛ-nuu. È kɛ̀ a ŋ̀ule too-ƃelai téniŋ tɔ̀ɔ nûu zɛɣɛi fé wule-ŋai tòo pere su. Bakukiya ƃé kɛ̀ a Matania kɔlɛ ma nuu. Ada nyaa máŋ è kɛ̀ a Liiva-nuui dɔnɔ nyii zeɛ́ɛ è kɛ̀ Zerusâlɛŋ. Ǹâŋ láa ƃé kɛ̀ a Samua. Ǹâŋ pɔlɔ-ŋai láa ƃé kɛ̀ a Gala da Zedutuŋ.

¹⁸Liiva-ŋai sèe Zerusâlɛŋ daa-lee maa-waai sui, díkelee díkɛ̀ a núu ŋuŋ feerɛ pôlu buu lɔ́ɔlu mɛi saaƃa kao náaŋ (284).

¹⁹Ŋ̀âla-pɛrɛ Kɛ́tɛi mɛi káa-ƃelai da díkaayɔɔ-ŋai sèe Zerusâlɛŋ díkɛ̀ a kpakolo ŋuŋ tɔnɔ pôlu buu lɔ́ɔlu mɛi feerɛ kao feerɛ (172). Dí láa túɛ-ƃelai ƃé kɛ̀ a Aku da Tamɔŋ.

²⁰Eezuɛ-ŋai, zâla láa soŋ-ƃelai da Liiva-ŋai kélee dífe kwaa ma sɔlɔ ƃó ní Zerusâlɛŋ taa-leei su. Diai dífe kwaa ma sɔlɔ ƃó nii, dí lì Zuda lɔii su taa-ŋai su dí sée dí ǹûai kɔ̃liŋ-ŋai mɛi tɛi-tɛi.

²¹Ŋ̀âla-pɛrɛ Kɛ́tɛi mu tii kɛ́-ƃelai dí sèe Zerusâlɛŋ taa-leei m̀ɛ́i da dòli a Ofɛɛ Yeei ma. Ziɣa da Gipa ƃé kɛ̀ a dílaa túɛ-ƃela.

²²Liiva-ŋai kɛ̀ seê ni Zerusâlɛŋ dí láa túɛ-nuui ƃé kɛ̀ a Uzi. Uzi ǹâŋ láa ƃé kɛ̀ a Bani. Ǹâŋ pɔlɔ-ŋai ƃé kɛ̀ a Asabiya, Matania da Asafa. Asafa ŋɔsuui su-ƃelai ƃé Ŋ̀âla-pɛrɛ Kɛ́tɛi mu-wule too mɛ̂nii è kɛ̀ dîa.

²³Gâloŋ è tɔ̂ŋ kpɛ̀tɛ ŋ̀ule too-ƃelai mɛni ma. Dɔ̂ŋ ŋí è diai lɛ̂ dímaa nɛ̃ɛ̂i dí wule tóo a ŋ̀ele-kuu tɛi-tɛi da ŋ̀ule-ŋai maa nɛ̃ɛ̂i dí doo Ŋ̀âla-pɛrɛ Kɛ́tɛi mu a dí tãi.

²⁴Pitaiya ƃé kɛ̀ a Eezuɛ-ŋai ŋɛ́i gáo Pɛsia kaloŋ ŋɔkâloŋ laai su. Pitaiya ǹâŋ láa ƃé kɛ̀ a Misizabɛ. Misizabɛ è kùla Zela ŋɔsuui su. Zela nuu suui ŋí séɛɛ è kɛ̀ Zuda lɔii kpiniŋ su.

²⁵Zuda-ƃelai da-ŋa dí sèe daa-ŋai ŋí su da ǹaa kɔlɛ ma kpanaŋ-ŋai: Kiria Aba, Dibɔŋ, da Zɛkazɛɛ.

²⁶Da-ŋa dí sèe Zasua, Molada da Bɛpɛlɛ.

²⁷Da-ŋa dí sèe Aza-sua, Bɛɛsiba da ǹaa kɔlɛ ma kpanaŋ-ŋai lá.

²⁸Da-ŋa dí sée Zilɛ, Mikona da ǹaa kɔlɛ ma kpanaŋ-ŋai lá.

²⁹Da-ŋa dí sèe máŋ Ɛrimɔŋ, Zora, Zamu,

³⁰Zanoa, Adulaŋ da dí kɔlɛ ma kpanaŋ-ŋai. Da-ŋa dí sèe Laki da ǹaa kɔlɛ ma kpanaŋ-ŋai lá, Azaka da ǹaa kɔlɛ ma kpanaŋ-ŋai lá. Da-ŋa dí sée Bɛɛsiba da Imɔŋ Tiŋ-tiŋ su loai.

³¹Bɛŋsima ŋɔsuui su-ƃelai dí sèe daa-ŋai ŋí su: Giba, Misima, Aiza, Bɛtɛ, da naa kɔlɛ ma kpanaŋ-ŋai lá.

³²Da-ŋa dí sèe Anatɔ, Nɔɔ, Anaya,

³³Azɔ, Lama, Gitaiŋ,

³⁴Adi, Zɛboiŋ, Nɛbala,

³⁵Lɔɔ, Ono da Ǹyɛrɛ kpakolo-ŋai dí Tiŋ-tiŋ su.

³⁶Liiva-ŋai dí núu-kpulu-ŋai da-ni nyii-ŋai dí séɛɛ è kɛ̀ Zudai, dí dítɛ̀ɛ dí sée Bɛŋsima ŋɔsuui su-ƃelai sáma da dîa-ni díkɛ tíi kɛ̀ gîe ma.