Read Kpelle Niɛmaya 5 Bible Online

Niɛmaya 5 - Kpelle bible

Niɛmaya 5

¹Tãi da tɛɛ́ pôlu ma, zinâai da-ni da dínɛyâa dí kɛ̀ mɛni saâi é pîlaŋ díƃarâa Zuda-ŋai dîa.

²Da-ni dí mò dîyɛɛi, “Kú lonii da kúkayɔɔ-ŋai dí támaai, ǹyaŋ fɛ̂ɛ mii sãa támaa é kɛ́ kúyêei kúkɛ̀-ɣeniɛi mɛni mâ.”

³Da-ni dí mò dîyɛɛi, “Burui a gɛ́ kwa kú kpâlaŋ-ŋai, kúkpɔmɔ-ƃâ kpâlaŋ-ŋai da kúpɛrɛ-ŋai sée nûa yêei a sɛ́ɣɛ a gɛɛ kú mii sãa yá.”

⁴Ǹûai da-ni dí mò máŋ dîyɛɛi, “Fɛ̂ɛ kú kpa sòŋ a gɛɛ kú ǹɔii zûtii kpɛ́ɛ kúkpâlaŋ-ŋai da kúkpɔmɔ-ƃâ kpâlaŋ-ŋai mɛni ma.

⁵Kwa dîa-ni kú fé kula ní koo ƃɔ̂lɔŋ tɔnɔ su? Dínîa pɛlɛi mɛni kpanaŋɔ̂ɔi é tɛ́ɛ kúwɔ̂-ŋai dîa? Gáa, kwa kúnîa pɛlɛi da-ŋa tɛɛ̂i luɛ lâa su, kúkɛ kúlônii-nɛyãai kɔ̂lɛ. Pɔ̂ri mâa tɔnɔ kpîŋ fé ŋɔ́nɔ kûɛ, kpɛ́ni fêi, da kú kpâlaŋ-ŋai da kú kpɔmɔ-ƃa kpâlaŋ-ŋai kélee kúla kúyêei.”

⁶Tãi ŋá ǹûai dí mɛni saa wôoi mɛ̂ni lai, ńii è ŋwàna kpɔ́ a zu kɛ́tɛ.

⁷Gɛ́ɛ tíi, ŋá gbɛ̀tɛ a gɛɛ ŋá mɛni da kɛ́ é pîlaŋ m̀ɛnii ŋí ma. Ŋá ǹûai láa túɛ-ƃelai da diai kɛ̀ naa a gâloŋ ŋɛ́i gaoi tòli díkîe ma ńyɛɛ dîai, “Ka ǹûai ŋí ká kùla koo ƃɔ̂lɔŋ tɔnɔ su da kpa sòŋ káyêei ká kɛ́ gêni laa ma lé mɛni mà?” È kɛ̀ tí, ŋá koyaŋ kɛ́tɛ tòo ŋá m̀ɛnii ŋáa lɛ́ ǹûai láa túɛ-ƃelai dîa.

⁸Ŋá m̀o dîa ńyɛɛ, “Kánûai ká díkɔ̀lɛ lɔii ŋûŋ da kpɛ́ni-ŋa su-ƃela dîai, kú díŋuŋ maa ƃó kú pá a dia pôlu. Kɛ́lɛ ká káa niî gɛ̂i kánûai da-ŋa díkɛ díkpîŋ kɔlɛ káƃarâa Zuda-ŋai kûa!” Tãi ǹûai láa túɛ-ƃelai da diai kɛ̀ naa a gâloŋ ŋɛ́i gaoi dí ŋ́ooi ŋí m̀ɛni lai, dífe pɔ̂ri ní ŋ́oo su toôi, kpɛ́ni fêi, díkɛ̀ a gɔ́lɔŋɔɔ a gɛɛ m̀ɛnii ŋá m̀o dîai è kɛ̀ a tɔ̃yâ.

⁹Ŋá m̀o ŋɔ́nɔ dîa ńyɛɛi, “M̀ɛnii ka gɛ̂i, ǹyɔmɔ̂ɔi! Fɛ̂ɛ nɔ́ kú Ɣâla wóo mɛni, kú m̀ɛnii kɛ́ ǹɛ̂lɛɛi. A kɛ̀ tí, gɛ́ ní kúkpɔara-ƃelai nyíi-ŋai dífe a Zuda-ŋai dífe pâi ɣɛ́lɛ maa kulâi kúkponôi.

¹⁰Ńyãa máŋ, kwa ḿarâai da ŋátii kɛ́-ƃelai kwa sɛŋ káo da mii sãa kpa pìli. Kɛ́lɛ ŋa m̀ôi kâa a gɛɛ kú tée gêni mɛnii pôlu.

¹¹M̀ɛni ma, diai kélee kásɛŋ káo, wîi, ŋwã̂ai da ɔle-wulɔ kpa káa dîai, ka dí su mɛni lɛɛ. Ka díkpâlaŋ-ŋai, díkpɔmɔ-ƃâ kpâlaŋ-ŋai, díɔle-wuru kpɔlɔ-ŋai da dípɛrɛ-ŋai tɛ́ɛ dípɔ loníi ma.”

¹²Ǹûai láa túɛ-ƃelai dí ŋ́oo su tòo dîyɛɛ ḿâi, “M̀ɛnii nyii kélee í mòi, kwa pâi gɛ̂i. Kwa pâi díkɔ̂liŋ tɛɛ̂i dípɔ pôlu. Kúfe pâi dí marê kɛ̂i sɛŋ da kélee mɛni ma.” È kɛ̀ tí, ŋá gɛ̀ dí díkono tée zâla láa soŋ ƃelai ŋɛ́i-tuɛ a gɛɛ da pâi ǹûai kɔ̂liŋ tɛɛ̂i dípɔ pôlu.

¹³È kɛ̀ tí, zeɣe kpûai kɛ̀ a ŋ̀iriɛ́ɛ ńeŋei, ŋá vùloŋ ŋá gula, ŋá gbɛ́mɛŋ díŋɛi-tuɛ, ńyɛɛ dîai, “À kɛ̀ ka wàla kákono teêi ŋàa sèe kɛ́, Ɣâla a pâi ká kpɛ́mɛnîi yɛ̂ɛ berei ŋa zeɣe kpûai ŋí kpɛ̂mɛŋ lai. A pâi ká kɔ̂liŋ kélee kulâi káyêei é pɛ́lɛ máŋ kápɛrɛ-ŋai dîa.” Ǹûai kélee kɛ̀ naai, dí zu tòo dîyɛɛi, “Kwa pâi kúkono têei ŋàa sèe kɛ̂i.” Nya ƃe, dí Yâwɛɛ láa maa tɛ̀. Ǹyaŋ dí díkono teêi ŋàa sèe kɛ̀ yɛ̂ɛ berei dí mò lai.

¹⁴Ńyãa Niɛmaya, ŋá kɛ̀ a Gâloŋ Atasɛra ŋɛ́i gào Zuda lɔii kpiniŋ mɛi a kóraŋ puu káo feerɛ. Gâloŋ Atasɛra è gɛ̀ gâloŋ laai su a kóraŋ buu feerɛ é lɛ́ɛ pâi ńdɛɛ̂i Zuda. È kɛ̀ Zuda-ƃelai dîa a kpa a gɛɛ díkɛ ŋ́gɔnɔŋ kùla kwa ŋá ǹûai. Kɛ́lɛ góraŋ puu kao feerɛi ŋá kɛ̀ la díi ŋí sui, fé Zuda nuu da marê kɛ́ ní mii-sɛŋ mɛni ma.

¹⁵Diai kɛ̀ ǹɔii kpîniŋ ŋí mɛi ńduɛi, dímaa mɛni kélee è kɛ̀ ǹûai ŋí ŋûa a kpîri wuyɛ́ɛ-ŋa. Dí m̀o dîa a gɛɛ díkɛ káne buu náaŋ tɛ̀ɛ dípɔ a ɣele kélee díŋwã̂ai da dímii sãai mɛni ma. Ǹɔii mɛi-ƃelai ŋí díyee mu-ƃelai máŋ dí fũa-fũa támaa tɔ̀ɔ Zuda-ƃelai dîa. Kɛ́lɛ fé gɛ́ ní tí, kpɛ́ni fêi ƃaa kɛ́ maa káa ńyêei Ɣâla mɛni ma.

¹⁶Ŋá ziɣãŋ tɔɔ mɛ̂ni kélee kɛ̀ a ŋ́ûa kpiri. Fé sɛŋ da kélee lâai kɛ́ ní ŋ́gbîŋ mɛni ma a gɛɛ é kɛ́ a ŋ́gɔlîŋ. Ŋá ńyee mu-ƃelai kélee pù dɔ̀ɔ mɛ̂ni su.

¹⁷Ŋa kâa núu ŋuŋ tɔ̂nɔ pôlu buu lɔ́ɔlu (150) kɔ́nɔŋ kùla a ɣele kélee. Ǹûai ŋí da-ŋa dí kɛ̀ a Zuda-ŋa da dílaa túɛ-ƃelai é pɛ́lɛ ŋ̀ɔ̃ya-ŋai dîa kɛ̀ kulâi kúkɔlɛ ma lɔii ŋuŋ-ŋai sui.

¹⁸Zãâi ŋa kâa dɛ̀ɛ mii-sɛŋ mɛni ma a ɣele tɔ̂nɔi, dia ƃa, niŋa tɔ̂nɔ, ƃála kɔlɔ lɛ́lɛɛ lɔ́ɔlu mɛi-da da tɛ́ɛ támaa. Ŋa kâa pà a ŋwãai nina ŋɔgonoŋ támaa fólo puu kélee tɛ́ɛ pôlu ma. Berei máŋ ŋá kɛ̀ sãâ támaa kɔlɛ̂i la mii sãa mɛni mai, fé wɔ́lɔ ǹûai marê kɛ́ ní sɛŋ da mɛni ma kpɛ́ni fêi, nyíŋi kélee è kɛ̀ a kpîri wuyɛ́ɛ ǹûai mɛni ma. Nya ƃe gɛ̀ ḿve ǹûai marê kɛ́ ní ŋ́gɔnɔŋ mɛni ma.

¹⁹Ŋá Ɣâla fɛ̀li a gɛɛ é lûwa láa ḿâ m̀ɛni-ŋai kélee mɛni ma nyii ŋá kɛ̀ gɛ̂i ǹûai mɛni mai.