Read Kpelle Ɛtɛ 1 Bible Online

Ɛtɛ 1 - Kpelle bible

Ɛtɛ 1

¹Atasɛra è kɛ̀ a kâloŋ Pɛsia lɔii mɛi. M̀ɛnii kɛ̀ ŋɔtãi mai, ǹyaa ká ŋí. Atasɛra è kɛ̀ a kâloŋ lɔii-kpiniŋ ŋuŋ tɔ̂nɔ pôlu buu feerɛ káo lɔ́ɔlu mɛi feerɛ mɛi (127). Ǹɔii kpîniŋ-ŋai ŋí kɔ́ɔ è pìlaŋ Iŋdia lɔii ma é tóo Itiopia lɔii ma.

²Pɛsia taa-lee kɛ́tɛi Susa su ƃé è kɛ̀ a zèɛɛ naa gɛ́ gâloŋ-laai kɛ̀.

³Ŋɔkâloŋ-laa kóraŋ zaaƃai su è kúu kɛ́tɛ kɛ̀ ǹyée mu tii kɛ́-ƃela kpaya-kpayai dîa. Diai pà gúui ŋí sui dia ƃa Pɛsia da Midia lɔii kɔ-kuluƃa-ŋai láa túɛ-ƃelai, ǹɔii-ƃela kpaya-kpayai da ǹɔii kâloŋ-ŋai kélee kɛ̀ ǹɔii kpîniŋ-ŋai mɛi.

⁴É gúui ŋí kɛ̀ ɣáloŋ lɔ́ɔlu mɛi da yée mu. M̀aa ɣêle-ŋai yée mu, è kɛ̀ ŋɔtɔɔ-laai da ŋɔkâloŋ laai lɛ́lɛ-pere lɛ̂i ǹûai dîa.

⁵Ǹaa pôlu ma è kúu nina kɛ̀ fólo lɔ́ɔlu mɛi feerɛ yée mu. È gúui ŋí kɛ̀ gâloŋ-pɛrɛi ŋɛ́i-tuɛ. È gúui ŋí kɛ̀ dɔɔ-ƃelai da gôlo-ƃelai kélee mɛni ma ǹɔii ŋɔtaa-lêei su nyii da dòli a Susai.

⁶Gwaai ŋí ma è kɛ̀ a gbɛ̀tɛɛ, seɣe lɛ́lɛɛ-ŋa sɛ̂lɛŋɔɔ naa nyii-ŋai kɛ̀ a díkpɛtɛɛ a yee kôle da yee bûluŋ-kɛɛ. Dísɛ̂lɛŋ ɣɛli-ŋai dí kɛ̀ a díkpɛtɛɛ a seɣe kôle nɛnɛ-fɛfɛ da seɣe kpɔ̂lu mu tɛɣiɛɛ, dípiliɛɛ kane karaŋ-ŋa su. Gane karaŋ-ŋai ŋí díkɛ̀ a díkanaŋɔɔ gɔni kóleŋ-ŋai dîa nyii-ŋai kɛ̀ a dítinaŋɔɔ naa ma. Zee-sãai kɛ̀ naai dí kɛ̀ a díkpɛtɛɛ a gôo da kane, dí séɛɛ kɔni sɔ̃ɔ kpanaŋɔɔ pɔ̃yɛ támaa mɛi.

⁷Dí kɛ̀ ŋwã̂ai ŋáa kɔlɛ̂i gôo kpele-kwɛɛ-ŋa su. Gwɛɛ-ŋai ŋí dí kɛ̀ a díkulaa díkîe-ni yá-mu. Gâloŋ yée láa è kɛ̀ a m̀óɔɔ diai kélee kɛ̀ gúui ŋí sui díperei. È fàa ma a gɛɛ ǹûai kélee dí ŋwã̂ai da kpele yɛ̂ɛ berei dí kɛ̀ ŋ̀wɛ̂lii lai.

⁸Dífe kɛ́-ni ŋwã̂ai kɔ̂ɔnii núu da mɛni ma kpɛ́ni fêi gâloŋ è mò ǹyée mu-ƃelai dîa a gɛɛ nyii kélee núu a ŋ̀wɛ̂lii é gbèlei, nya ƃé é gbele.

⁹Maa tãi tí, Gâloŋ ŋɔnɛnî kɛ́tɛi Vasiti ǹyaa máŋ è kúu kɛ́tɛ kɛ̀ nɛyâai dîa Gâloŋ-pɛrɛi mu.

¹⁰Gúui ŋí ŋɔɣele kûu mɛi feerɛ ɣelei, ǹɔɔi è nâa kɛ̀ Gâloŋ Atasɛra kponôi ǹíi nɛ̃ɛ kpɔ́ a ŋ̀ánaa. È ŋɔtíi kɛ́-ƃela ǹɔ́ɔlu mɛi feerɛ tòli. Dia ƃé kɛ̀ a Miumaŋ, Bizita, Abona, Bita, Abata, Zɛta da Kakai. Zinâai ŋí ƃé da kâa ŋɔnɛyâai mɛi kâa. È mò dîa a gɛɛ

¹¹dí lí dí mó ŋɔnɛnîi Vasiti ma a gɛɛ é m̀aa ɣíri é ŋɔkâloŋ-nɛnî ƃɔrɔi sée ŋ̀ûa é pá a gɛɛ é ŋɔlɛ́lɛ-laai lɛ́ ǹɔii lônii dîa da ǹɔii kpîniŋ mɛi-ƃelai.

¹²Kɛ́lɛ tãi ǹûai ŋí dí lì la dí m̀ó Vasiti mai, vé gɛ́ ní é pá. Nya ƃe gâloŋ è ǹíi ŋwàna a ŋ̀ánaa.

¹³Kɛ́lɛ Atasɛra ŋɔkâloŋ laai su tua-perei va kâa mɛni da kélee kɛ̀ dɔ̂ŋ kɔ́lɔŋ-ƃelai da dáre-ƃelai ŋɛ́i pôlu. Nya ƃe gâloŋ è ǹɔii-ƃela kpaya-kpaya lɔ́ɔlu mɛi feerɛi ŋí tòli é ŋuŋ pîlaŋ a dia. Kasina, Seta, Amaŋta, Tasi, Mɛrɛsi, Masina da Mɛmukãŋ. Ǹûai ŋí ƃé kɛ̀ a gâloŋ ŋɔtíi kɛ́-ƃela kpaya-kpayai nyii-ŋai kɛ̀ gɔlɛ ma Pɛsia da Midia lɔii su.

¹⁵È dímarê kɛ̀ ǹyɛɛ dîai, “Ŋá ńyee mu-ƃelai tɛ̂ɛ ŋánɛnî kɛ́tɛi Vasiti tôlii kɛ́lɛ è ŋ́oo pìli. Lé mɛni ƃé gáa dɔ̂ŋ su é pîlaŋ m̀ɛni sîi ŋí mai?”

¹⁶Mɛmukãŋ è m̀o gâloŋ ma da ŋɔtíi kɛ́-ƃelai kɛ̀ nàai ǹyɛɛi, “Ǹɛnîi fé m̀ɛnii ŋí kɛ́ ní nɔ́ a gâloŋ, kɛ́lɛ aâ gɛ́ a zinâai kélee Gâloŋ ŋɔlɔii gwaa kélee ma.

¹⁷Nɛnî da kélee a m̀ɛnii ŋí m̀ɛni Vasiti è gɛ̀ a gâloŋ, vé pâi ŋumɛ maa tɛ́ɛi ŋɔsurɔ̂ŋ pɔ́. Da pâi môi dîyɛɛi, ‘Gâloŋ è ŋɔnɛnî kɛ́tɛi tòli vé lí ní ŋ̀óo ma.’

¹⁸Sâa foloi ŋí yée mu, Pɛsia da Midia lɔii lá túɛ-ƃelai dínɛyâai da m̀ɛnii ŋí mɛ̀ni, vólo káoi fé pâi toôi dí pɛ́lɛ m̀ôi dísinâai dîa. Dífe pâi wɔ́lɔ kɛ̂i ŋumɛ maa tɛɛ̂i dísinâai pɔ́, woo-lâa maa fé tela pâi kɛ̂i díloai da dîa-ni.

¹⁹Mɛni ma, yà fàa kúwoo ma, tɔ̂ŋ kpɛtɛ kú bú Pɛsia da Midia tɔŋ-ŋai dîa a gɛɛ Vasiti fé wɔ́lɔ pa íŋɛi-tuɛ, ǹyaŋ é kɛ́ a tɔ̂ŋ nyii maa fé pâi wɔ́lɔ fálenîi. Ŋɔkâloŋ-nɛni laai tɛ́ɛ nɛnî da kpɛ́ni pɔ́.

²⁰Da dɔ̂ŋ ŋí lòno ílɔii kpîniŋ-ŋai kélee su, ǹɛyâai kélee da pâi kɛ̂i ŋumɛ mâa tɛɛ̂i dísinâai pɔ́ a nɛ̃ɛ ma díkɛ a díkôloɔɔ kpaa máŋ dí tɔ̂ɔ.”

²¹Gâloŋ da ǹɔii lá túɛ-ƃelai dí díyee sèe Mɛmukãŋ ŋɔlia-wooi mu.

²²Nya ƃe Gâloŋ è dɔ̂ŋ ŋí kpɛ̀tɛ é dɛ̀ɛ ŋɔlɔii kpîniŋ-ŋai kélee su. Dí dɔ̂ŋ ŋí pɔ̃yɛ zîi-woo-ŋai kélee su. Dí bɔ̃yɛ tí a gɛɛ ǹûai dí ǹóno dí kɛ́ ƃò a gɔ́lɔŋɔɔ kpakolo ƃé é kɛ́ ŋɔpɛ́rɛi láa túɛ ǹaa woo gbɛ̀ɛ ŋa kɛ́ ƃò ǹá.