Read Kpelle Ɛtɛ 5 Bible Online

Ɛtɛ 5 - Kpelle bible

Ɛtɛ 5

¹Vólo saaƃa suŋ Ɛtɛ è m̀o Mɔdikai ma a gɛɛ díziɣe gbɛ̀ɛ ŋa ɣelei, Ɛtɛ è ŋɔkâloŋ-nɛni seɣei ɣîri ma é lí é tɔ́ɔ gâloŋ ŋɔpɛ́rɛi ŋɛ́i-tuɛ. Gâloŋ see-sɛŋ è kɛ̀ ƃɛ́i núu a kâa kɛ̀ seei-ni naa gɛ́ ŋ̀énii ŋá pere kàai. Maa tãi tí, gâloŋ è kɛ̀ seê-ni gâloŋ see sɛŋ ŋá.

²Ɛtɛ káa mii, maa mɛ̂ni è ǹíi làa. È ŋɔgôo kaloŋ-wurii sãa ma. Ɛtɛ è lɛ̀ɣɛ la é ǹyée lɛ́ɣɛ ŋ̀úrii ma.

³Gâloŋ è marê kɛ̀ ǹyɛɛ mai, “Ɛtɛ, lé ƃé kɛ̀? Lé ƃé ya ŋ̀wɛ̂lii ŋá gɛ́ yɛ̂i? Ya kɛ̀ kpîŋ ŋ̀wɛ̂lii ŋá ŋákâloŋ lɔii ŋáa kɔ́lɛ zâmai ŋá gbua tɔ̂nɔ tɛɛ ípɔ, ŋa pâi dɛɛ̂i ípɔ.”

⁴Nya ƃe Ɛtɛ è mo ma ǹyɛɛi, “À kɛ̀ gáa a ílii laa mɛni, ŋa ƃɛlɛ tôli ƃôi a yá ka Emaŋ sâa gbínii su. Ŋa pâi kúu kɛ́tɛ kɛ̂i kâa.”

⁵Gâloŋ è Emaŋ tòli ǹyɛɛ mai, “Pá a maa félaa. Ɛtɛ a kútôlii a gɛɛ é kúu kɛ́ kûa.” Emaŋ è pà da gâloŋ dí lí Ɛtɛ pɔ́ naa.

⁶Díkɛɛ ŋwãai kpèlei, gâloŋ è ŋɔ́nɔ Ɛtɛ marê kɛ̀ ǹyɛɛ mai, “Lé ƃé ya ŋ̀wɛ̂lii ŋá gɛ́ yɛ̂i? M̀ɛnii kélee ya ŋ̀wɛ̂lii ŋá gɛ́ yɛ̂, ŋa pâi gɛ̂i a nɛ̃ɛ ma kpîŋ ŋá ŋákâloŋ lɔii ŋáa kɔ́lɛ zâmai ŋá gbua tɔ̂nɔ tɛɛ ípɔ, ŋa pâi dɛɛ̂i ípɔ.”

⁷Ɛtɛ è mò ma ǹyɛɛi,

⁸“À kɛ̀ ḿaa mɛ̂ni a ílaa láa, ífaa ma a gɛɛ í m̀ɛnii kɛ́ ŋa pâi môi yâi, gɛ̀ ní, ŋa ítolii ŋɔ́nɔ ka Emaŋ a ƃɛlɛ-pere. Ka pá tínaa, ŋa pâi ŋɔ́nɔ kúu kɛ́tɛ kɛ̂i kâa. Zɛŋ ŋa ŋ̀wɛ̂lii lai, nàa ƃé ŋa pâi maa m̀ɛnii kpîŋ ƃôi naa yâ.”

⁹Emaŋ è kùla gúui su a lii-nɛ̃ɛ gɛ́ yoŋka tèe. Tãi è kùla la ŋ̀énii ŋái, è Mɔdikai kàa. Emaŋ è ŋ̀á kàa a gɛɛ Mɔdikai fé ŋumɛ maa tɛɛ-ni bɔ́ yɛ̂ɛ berei ǹúui gbéli-ŋai díkɛ̀ gɛ̂i lai. M̀ɛnii ŋí è gɛ̀ gbɔara lîi kɛ̀ Emaŋ líi su é pîlaŋ Mɔdikai mai, zu é kɛ́tɛ.

¹⁰Gɛ́ɛ tíi, Emaŋ è ǹíi maa sòŋ é tɛ́ɛ mà é lí ŋɔpɛ́rɛi lá. È ŋɔwɛli kɛ́-maa-ƃelai kélee tòli ƃɛlɛ-pere su. È ŋɔnɛnîi Zɛrɛ tòli máŋ gbɔŋ ŋí su.

¹¹Dí páai, è yoŋka tèe díŋɛi ǹônii-sinaai da gɔ̃liŋ mɛni ma. È ŋɔ́nɔ yoŋka tèe ŋ̀wála-wala laai mɛni ma gâloŋ è dɛ̀ɛ bɔ́ a gɛɛ gɛ́ ƃò ǹûai da ǹɔii mɛi-ƃelai kélee láa túɛi.

¹²Vé kóyaŋ nɔ́ tí, è mò máŋ dîa ǹyɛɛi, “Ɛtɛ aâ gâloŋ tóli a gɛɛ é kúu kɛ́tɛ kɛ́ mà. Ńyãa tɔnɔ nɔ́ ƃé è mò a gɛɛ kwa gâloŋ kwa pɔ̂ri liî m̀ɛlɛ-tolii tí ma tínaa.

¹³Kɛ́lɛ nyíŋi kélee fé ḿâ a lii-laa mɛni a kɛ̀ nɔ́ ŋà kɛ̀ Zuda-naloŋ Mɔdikai kâai gâloŋ ŋɔpɛ́rɛi lá a vúlu.”

¹⁴Nya ƃe ŋɔnɛnîi da m̀arâai dí mò ma dîyɛɛi, “Yeŋkêŋ tɔɔ mɛi kɛ́ ƃò a kɔ́ɔ ƃɔ́rɔnîi buu lɔ́ɔlu mɛi feerɛ káo lɔ́ɔlu. À kɛ̀ tí, m̀ó gâloŋ ma é Mɔdikai sɛ̂lɛŋ ma a tínaa ɣele-wala. Gɛ̀ ní ya pâi liî gûui su a lii-nɛ̃ɛ.” Ǹia-wooi ŋí è ǹíi làa. È gɛ̀ dí nyeŋkêŋ tɔ́ɔ.