Read Kpelle Ɛtɛ 6 Bible Online

Ɛtɛ 6 - Kpelle bible

Ɛtɛ 6

¹Gâloŋ Atasɛra fé nyìi ní a gbínii tí. È mò a gɛɛ dí pá a ǹɔii ŋɔmɛni-pɔlɔ kɔlɔi dí ǹóno mì.

²Gɔlɔi m̀ɛ́i dí ǹaa lònoi, è kɛ̀ a bîlaŋɔɔ m̀ɛnii ma Mɔdikai è gɛ̀ gâloŋ mii. Nya ƃa tãi Bitanaŋ da Tɛrɛ dí gbɛ̀tɛ la a gɛɛ dí gâloŋ paai. Mɔdikai è wɔ́lɔ lì é m̀ó gâloŋ ma. Ǹûai ŋí ƃé kɛ̀ a gâloŋ ŋɔkpôŋ-lá mɛi káa-ƃelai láa túɛ-ƃela.

³Nya ƃe gâloŋ è dímarê kɛ̀ ǹyɛɛ dîai, “Tãi Mɔdikai è m̀ɛnii lɛ́lɛɛ ŋí kɛ̀ lai, lé ƃaa kɛ́-maa ƃé kú dɛ̀ɛ bɔi? Lé mɛni lɛ́lɛɛ ƃé è zɔlɔ ƃó zui?” Dí mò mà dîyɛɛi, “Kúfe niî mɛni da kélee kɛ́ ní mì.”

⁴Nya ƃe gâloŋ è dímarê kɛ̀ ǹyɛɛ dîai, “Ŋátii kɛ́-nuui nênɛ ƃé bɛ́rɛi lai?” Maa tãi tí Emaŋ a lɔ́ nɔ́ bɛ́rɛi mu. È lɔ̀ bɛ́rɛi mu a gɛɛ é m̀ó gâloŋ ma é wála-wala-laa tɛɛ bɔ́ Mɔdikai sɛ̂lɛŋ mɛni ma ǹyeŋkêŋ ma nyíi è gbɛ̀tɛi.

⁵Nya ƃe ǹyée mu-ƃelai dí mò ma dîyɛɛi, “Emaŋ ƃè.” È mò dîa ǹyɛɛi, “Ka m̀ó mà é lɔ́.”

⁶Tãi Emaŋ è lɔ̀ lai, gâloŋ è m̀arê kɛ̀ ǹyɛɛ mai, “Ílâai la lé ƃaa kɛ́-maa sii ƃé ŋa pɔ̂ri dɛɛ̂i ǹúui pɔ́ nyii maa mɛ́ni a ńii laai?” Emaŋ è m̀o ǹíi su pere ǹyɛɛi, “Gbɛ̂ɛ ƃé gâloŋ a pɔ̂ri ƃaa kɛ́-maa tɛɛ̂i bɔ́ é kúla ḿbôlui?”

⁷È gâloŋ wóo su tòo ǹyɛɛ mai, “Gâloŋ a kɛ̀ ŋ̀wɛ̂lii é ƃaa kɛ́-maa tɛ́ɛ núu da pɔ́ nyii maa mɛ̂ni a ǹíi láai,

⁸a m̀o a gɛɛ dí pá a kâloŋ maa-ɣili sêɣe da, da kâloŋ ƃɔrɔ tɔnɔ, é pɛ́lɛ Gâloŋ ŋɔsooi nyii a sêe m̀ɛ́i ma.

⁹À kɛ̀ tí, a mò ŋɔlɔii láa túɛ-nuu kɛ́tɛi dɔnɔ ma a gɛɛ é gâloŋ seɣei ŋí tóo maa-nuui ma, é gâloŋ ƃɔrɔi sée ŋ̀ûa, é zee gâloŋ ŋɔsooi mɛi. Naa pôlu ma a tɔ̂ɔ dúɛ gɛ́ lolo laa ma gɛ́ tìnaŋ la daa-leei ma gɛ́ mò ǹyɛɛi, ‘Ka gáa, berei ŋí ƃé gâloŋ a ƃaa kɛ́-maa tɛ̂ɛ la ǹúui pɔ́ nyii ǹíi lâai mɛni ma.’ ”

¹⁰Nya ƃe gâloŋ è mò mà ǹyɛɛi, “Lí a maa félaa í pá a ŋá sêɣei da, da kaloŋ-ƃɔrɔ é pɛ́lɛ ŋásooi ma. Gɛ́ nɔ́ Zuda-nuui Mɔdikai mì yɛ̂ɛ berei yá kpîŋ í mò lai. Ya pâi gâai see-ni gâloŋ pɛrɛi lá-ƃelei. M̀ɛni-ŋai kélee í mòi, gɛ́ mì. Ífe da lɛ̀ɛ pôlu.”

¹¹Nya ƃe Emaŋ è lì é zeɣei síɣe da zòoi. E zeɣei tôo Mɔdikai ma, Mɔdikai é tɛ́ zooi mɛi. Emaŋ è tɔ̀ɔ Mɔdikai túɛ gɛ́ tìnaŋ la daa-leei ma gɛ́ lolo lâa mà ǹyɛɛi, “Ka gáa, berei ŋí ƃé gâloŋ a ƃaa kɛ́-maa tɛ̂ɛ la ǹúui pɔ́ nyii ǹíi lâai mɛni ma.”

¹²Ǹaa kɛ́ɛ tíi, Mɔdikai è lì pôlu gâloŋ pɛrɛi lá. Kɛ́lɛ Emaŋ è lì pôlu ŋɔpɛ́rɛi lá a maa félaa ǹyée láa ŋ̀ûa a ŋumɛ-pere.

¹³Zèriɛɛ ŋɔpɛ́rɛi lai, è mɛ̀ni-ŋai kélee su kùla ŋɔnɛnîi ma da m̀arâai. Nya ƃe ŋɔlia-woo ƃó-ƃelai da ŋɔnɛnîi dí mò ma dîyɛɛi, “Íƃaa kúla maai kɔ́ɔ a pîlaŋ Mɔdikai mɛi. Ǹyaŋ Mɔdikai káa a Zuda-nuu. Ífe pâi pɔrîi ǹyée mɛi ɣâlei. Ya kànaŋ ma, ya pâi saa tí-ti sɔlɔ ƃôi.”

¹⁴Díkɛɛ m̀ɛnii ŋí ƃôi mài, gâloŋ ŋɔnɛyâai mɛi káa-ƃelai da-ŋa dí pà Emaŋ perêi a gɛɛ dí lí gúui su a ma félaa nyii Ɛtɛ è maa ƃɛlɛ tòli ƃò a diai.