Read Kpelle Ɛsedɔ 10 Bible Online

Ɛsedɔ 10 - Kpelle bible

Ɛsedɔ 10

¹Yâwɛɛ è ŋɔ́nɔ mò Mose mà ǹyɛɛi, “Lí Gâloŋ pɔ́ naa, ŋa ǹíi su kpànaŋ da ŋɔtíi kɛ́-ƃelai a gɛɛ ŋ̀ɛi-kɛ-maa-ŋai ŋí kɛ́ dísama.

²A gɛɛ ŋɔ́nɔ í pɔ̂ri môi ílônii dîa da ílônii-díwɔ̂ lonii berei ŋá ŋáwala-wâlai lɛ̀ la dîa a tãi ŋá ŋ̀ɛi-kɛ-maa-ŋai ŋí kɛ̀ la dísamai. Kákelee ka pâi gɔ́lɔŋnîi a gɛɛ ńyãa ƃa Yâwɛɛ.”

³Nya ƃe Mose da Eelɔŋ dí lì Gâloŋ pɔ́ naa dîyɛɛ mai, “Yâwɛɛ nyii gáa a Ibulu-ŋai Díɣâlai ǹyɛɛ, ‘Tãi ɣɛɛlu ƃé ƃa pâi ŋ̀óo karâi lai? Ŋánûai lɛ́ɛ naa dí lí a gɛɛ dí vɛli.

⁴Kɛ́lɛ à kɛ̀ ƃà wàla fáa a gɛɛ í ŋɔnûai lɛ́ɛ naa dí lí, gɛ̀ ní ŋa pâi gotó támaa tɛɛ̂i ílɔii su tínaa.

⁵Da pâi ǹɔii mɛi pɛlɛ̂i kpɔ́ a sɛŋ núu fa ŋɔ́nɔ ǹɔii kaoi mâ kàa. Zãai máŋ zãoi fé díkara níi, gotó-ŋai da pâi gélee miî dí ŋ̀úru-ŋai kélee mii ílɔii su.

⁶Da pâi ípɛrɛ-ŋai lá fɛ́ɛ̂i dí ítii-kɛ-ƃelai dípɛrɛ-ŋai lá fɛ́ɛ é pɛ́lɛ Ize-ŋai dípɛrɛ-ŋai dîa. A pâi kɛ̂i a mɛnii ínûai da ínûai díwɔ̂ ǹûai dífe tá gáa ní ɣele ma é síɣe dísɔlɔ ƃó tãi ma.’ ” Nya ƃe Mose è tìnaŋ é Gâloŋ lɛ́ɛ naa é lí.

⁷Nya ƃe Gâloŋ ŋɔtíi-kɛ-ƃelai dí mò mà dîyɛɛi, “Tãi ɣɛɛlu ƃé nalôŋ ŋí a pâi kúpilîi la mɛni kpɔ̂lu sui? Tɔ́ɔ Eezuɛ sinaai dí lí dí Yâwɛɛ fɛ́li nyii gáa a Díɣâlai. Ífe nîi gáa ni a gɛɛ Ize a wólo?”

⁸Nya ƃe dí pà pôlu a Mose da Eelɔŋ Gâloŋ ŋɛ́i-tuɛ. Gâloŋ è mò dîa ǹyɛɛi, “Ka lí ká Yâwɛɛ Káɣâlai fɛ́li. Kɛ́lɛ gbɛ̂ɛ-ni ƃé pâi liî?”

⁹Mose ǹyɛɛ mai, “Kwa pâi liî kwa kúnîa-pɛlɛɛi kúnuu-pɔlɔ-ŋai, kúlônii-sinaai, kúlônii-nɛyãai, é pɛ́lɛ kútaa-tulɛ-ŋai dîa. Kpɛ́ni fêi, kwa pâi kúu kɛ̂i Yâwɛɛ ma.”

¹⁰Gâloŋ è mò dîa ǹyɛɛi, “À kɛ̀ ŋá kálɛ̀ɛ naa ká lí a kánɛyâai da kálônii, gɛ̀ ní Yâwɛɛ a kpɔŋ kâa. Fé pâi kálɛɛ̂i naa ká lí a kánɛyâai da kálônii. Gáa a tɔ̃yâ a gɛɛ kákaa mɛni nyɔ́mɔɔ kpɛtɛ̂i kákili ŋá.

¹¹Káai nɔ́ a zinâai ka lí. Kpɛ́ni fêi nyíti ƃé ka ŋ̀wɛ̂lii.” Nya ƃe Gâloŋ è díkpɛ̀ dí kúla ŋ̀ɛ́i.

¹²Nya ƃe Yâwɛɛ è mò Mose mà ǹyɛɛi, “Íyee sãa Ize lɔii mɛi a gɛɛ gotó é pá Ize lɔii su é galai kélee mii da zãai nyii-ŋai zãoi fé baa níi.”

¹³Nya ƃe Mose è ŋɔsia-wurii sãa Ize lɔii mɛi. Nya ƃe Yâwɛɛ é gɛ́ fãa é kula vóloi-ƃelai pere é tɛ́ɛ Ize lɔii su a maa fóloi tí da maa kpinii. Tãi ɣele-wala è kɛ̀ lai, vãai è pá a gotó támaa.

¹⁴Gotó-ŋai dí Ize lɔii gwaa kélee mɛi pɛ̀lɛ. È kɛ̀ a gotó kpulu su kɛ́tɛ a nyii núu da fé niî wɔ́lɔ da káa ní kpaa máŋ nyii pâi ŋɔ́nɔ kulâi.

¹⁵Dí ǹɔii mɛi pɛ̀lɛ kpɔ́ dí ǹɔii mâ kpíni. Dí gala-ŋai kélee mìi ǹɔii mâ, dí wúru-ƃa-ŋai kélee mìi nyii-ŋai zãoi fé bàa níi. Wúru da kélee láa fé lɛɛ ní ma Ize lɔii su.

¹⁶Nya ƃe Gâloŋ è Mose da Eelɔŋ tòli a maa felaa ǹyɛɛ diai, “Ŋa sɔnyɔ̂ŋ kɛ́ a Yâwɛɛ nyii gáa a Káɣâlai da káa.

¹⁷Mɛni ma ŋa kákperai fêi a gɛɛ ká ńzu-mɛni lɛ̀ɛ a tãi tɔnɔi ŋí ká Yâwɛɛ fɛ́li nyii gáa a Káɣâlai a gɛ́ɛ é zaa tɔŋ-kpɛ-maai ŋí kúla nyée mɛi.”

¹⁸Mose è kùla Gâloŋ pɔ́ naa é lí é Yâwɛɛ fɛ́li.

¹⁹Nya ƃe Yâwɛɛ è vóloi kulai-pere fãai pène a vóloi liî-pere fãai nyii kɛ̀ a zu kpanaŋɔɔ é gotó-ŋai kélee kùla ǹɔii mâ é dípu Ǹyúo Kpɔ̂lui su. Gotó tɔnɔ kpîŋ fé lɛɛ ní Ize lɔii su.

²⁰Kɛ́lɛ Yâwɛɛ è Gâloŋ líi su kpànaŋ. Vé Eezuɛ-ŋai lɛ̀ɛ ní naa dí lí.

²¹Nya ƃe Yâwɛɛ è mò Mose mà ǹyɛɛi, “Íyee sãa ŋ̀elei su a gɛɛ tuna-ya kpini é tóo Ize lɔii su gwaa kélee.”

²²Nya ƃe Mose è ǹyée sãa ŋ̀elei su, tuna-ya kpini su pîlaŋɔɔ é tóo Ize lɔii su a ɣele kûu saaƃa.

²³Ize-ŋai dífe kɛ́ ní pɔ̂ri díkîe-ni kâai, kpaa máŋ dí kula dípɛrɛ-ŋai mu a ŋ̀ele kûu saaƃai. Kɛ́lɛ kwaa ponoɔɔ è kɛ̀ ƃɛ́i Eezuɛ-ŋai dí kɛ̀ naai.

²⁴Gâloŋ è ŋɔ́nɔ Mose tòli ǹyɛɛ mai, “Ka lí ka Yâwɛɛ fɛ́li. Ka kánûai ka lí kɛ́lɛ, ka ká ƃála-ŋai, moli-ŋai da niŋa-ŋai lɛ́ɛ ƃɛ́.”

²⁵Nya ƃe Mose è mò mà ǹyɛɛ, “Gɛ̀ ní fɛ̂ɛ í daa-tulɛ-ŋai ŋí da tɛɛ kúpɔ a gɛɛ kú kéreŋ sâla kula la Yâwɛɛ ma nyii gáa a Kúɣâlai.

²⁶Fɛ̂ɛ nɔ́ kú lí a kútaa-tulɛ-ŋai. Dɔnɔ kpîŋ fa lɛ̀ɛ pôlu. Kpɛ́ni fêi, fɛ̂ɛ nɔ́ kú da siɣe kú sâla kula la Yâwɛɛ Kúɣâlai mâ. Ǹyaŋ kúfe nyii kɔ́lɔŋ-ni kwa pɔ̂ri ziɣêi fɛ̂ɛ kú seri.”

²⁷Kɛ́lɛ Yâwɛɛ è Gâloŋ líi su kpànaŋ. Vé Eezuɛ-ŋai lɛ̀ɛ ní naa dí lí.

²⁸Gâloŋ è mò Mose mà ǹyɛɛi, “Kula ŋ́ɛi! Ífe ŋɔ́nɔ pà ḿbɔ naa. Kɛ́lɛ, ƃa pà ḿbɔ naa ƃa pâi saâi.”

²⁹Mose ǹyɛɛ mai, “Yɛ̂ɛ berei ƃa môi lai, fé ŋɔ́nɔ pâi pâi ípɔ naa.”