Read Kpelle Ɛsedɔ 13 Bible Online

Ɛsedɔ 13 - Kpelle bible

Ɛsedɔ 13

¹Yâwɛɛ è mò Mose ma ǹyɛɛi,

²“Eezuɛ-ŋai dílônii-sinaai maa-ŋuŋ-ŋai kélee tɛ́ɛ ḿbɔ. Eezuɛ-ŋai dílônii-sinaai maa-ŋuŋ-ŋai da dítaa-tulɛ-ŋai dílônii maa-ŋuŋ-ŋai nyii-ŋai díkaa a dísîrɛi díkaa a ḿbɔɔ.”

³Nya ƃe Mose è mò ǹûai dîa ǹyɛɛi, “Ŋele-kûui ŋí é lɛ́ɛ kákili ŋá nyii ká kùla la Ize lɔii su ǹuɛ-laai sui. Kpɛ́ni fêi, Yâwɛɛ è kákùla naa a ŋɔwála-wala-laai. Káfe kpólo mìi nyii tɛ́-sɛŋ káa zui.

⁴Kákaa kulâi Ize lɔii su sâa ká lí Abi-ɣaloŋ ŋí su.

⁵Yâwɛɛ è góno tèe kánûa-pɔlɔ-ŋai yêei a foo-woo a gɛɛ a pâi Keena-ŋai, Ita-ŋai, Amɔra-ŋai, Ivai-ŋai da Zɛƃusa-ŋai dílɔii tɛɛ̂i kápɔ. Gáa a sí-sɛŋ kpɛtɛ lɔii lɛ́lɛɛ. À pà a káa ǹɔii tí ma, ka gúui ŋí kɛ́ ŋáloŋ ŋí su.

⁶Ka tɛ́-sɛŋ féu kpolo mii a fólo lɔ́ɔlu mɛi feerɛ. Vóloi lɔ́ɔlu mɛi feerɛi kpɛɛ ŋá ɣele, ká kúu kɛ́ Yâwɛɛ mà.

⁷Ka tɛ́-sɛŋ féu kpolo mii a fólo lɔ́ɔlu mɛi feerɛ. Káfe kpólo kpɛ̀tɛ nyii tɛ́-sɛŋ káa zui. Tɛ́-sɛŋ fé kɛ̀ kálɔii su gwaa kélee.

⁸Ka m̀ó kálôni-sinaai dîa a gɛɛ kákaa nyíŋi kélee kɛ̂i m̀ɛni-ŋai mɛ̂ni mà Yâwɛɛ è gɛ̀ kûɛ tãi kú kùla la Ize lɔii sui.

⁹Gúui ŋí é kɛ́ a ŋɛi-kɛ-maa káyeêi. É kɛ́ yɛ̂ɛ kili-too-ŋa sɛŋ nyii gbulɔŋɔɔi káyee mà gɛ ƃò kátôŋ lá a gɛɛ Yâwɛɛ ŋɔtɔ̂ŋ é kɛ́ nɔ́ ká lá a tãi kélee. Kpɛ́ni fêi, è kákùla Ize lɔii su a ŋɔwála-wala-laai

¹⁰Mɛni ma ka gúui ŋí kúla a gula tãi a kóraŋ kélee.

¹¹“Yâwɛɛ a pâi pâi a káa Keena-ŋai dílɔii su nyii è góno tèe la a foo-woo káyêei da kánâŋ-pɔlɔ-ŋai. À ǹɔii tɛ̀ɛ kápɔ,

¹²ka kálônii-sinaai maa-ŋuŋ-ŋai tɛ́ɛ Yâwɛɛ pɔ́. Kátaa tulɛ-ŋai dílônii-sirɛi maa-ŋuŋ-ŋai díkaa a Yâwɛɛ pɔ́ɔ.

¹³Ká ŋ̀wɛlɛ-sôo-ŋai dílônii-sirɛi maa-ŋuŋ-ŋai ŋuŋ ma ƃo a ƃála-loŋ, kpaa máŋ kà wàla díŋuŋ ma ƃó, fɛ̂ɛ ká dípaa. Fɛ̂ɛ ká kálônii-sinaai maa-ŋuŋ-ŋai kélee ŋuŋ ma ƃó.

¹⁴Kálônii-sinaai da kámarê kɛ̀ tínaa-tuɛ-pere dîyɛɛ kâa, ‘Nyíŋi su-kulai ƃa lé?’ Ka m̀ó dîa kâa. ‘Yâwɛɛ è wɔ́lɔ kúkùla luɛ-laa su.

¹⁵Tãi Gâloŋ fé fáa ní la mà a ŋɔlii-kpanaŋ a gɛɛ é kúlɛɛ naa kú líi, Yâwɛɛ è Ize lɔii su-ƃelai dílônii-sinaai maa-ŋuŋ-ŋai kélee pàa. È núu-kpune ǹônii-sinaai maa-ŋuŋ-ŋai pàa da daa-tulɛ-ŋai dílônii-sirɛi maa-ŋuŋ-ŋai. Mɛni ma kúkaa kúlônii-sinaai maa-ŋuŋ-ŋai kulâi a sâla Yâwɛɛ mà. Kɛ́lɛ fɛ̂ɛ kú kúlônii-sinaai maa-ŋuŋ-ŋai ŋuŋ ma ƃó.

¹⁶Fɛ̂ɛ gúui ŋí é kɛ́ a ŋɛi-kɛ-maa káyêei. É kɛ́ yɛ̂ɛ kili-too-ŋa sɛŋ nyii gbulɔŋɔɔi káyee ma da kátôŋ lá. Kpɛ́ni fêi, a pâi ǹɛ̂i kûa a gɛɛ Yâwɛɛ è kúkùla Ize lɔii su a ŋɔwála-wala-laai.’ ”

¹⁷Tãi Gâloŋ è tèe la ǹûai dîa a gɛɛ dí líi, Ɣâla fé dílɛɛ ní naa dí tɛ́ɛ a Felesia-ŋai dílɔii su-pere, berei máŋ nàa pere è kɛ̀ la a gbuaa la diai. Kpɛ́ni fêi, Ɣâla è mò ǹyɛɛi, “Gɛ̀ ní ǹûai da pâi dílii penêi tãi da kɔ́ kàa lai, dí lí pôlu Ize.”

¹⁸Kɛ́lɛ Ɣâla è ǹûai kɛ̀ dí tɛ́ɛ a vɛ̃ɛ-kpâlaŋ su-pere Ǹyúo Kpɔ̂lui ma-pere. Eezuɛ-ŋai dí kùla Ize lɔii su, díkpɛtɛɛ kɔ́ kɔ́ mɛni ma.

¹⁹Nya ƃe Mose è lì a Zosɛ káo. Kpɛ́ni fêi, Zosɛ è wɔ́lɔ Eezuɛ-ŋai kɛ̀ dí dífoo ǹyɛɛ diai, “Ɣâla a pâi káŋuŋ mâ ƃôi, gɛ̀ ní ka lí a ŋ̀áo.”

²⁰Nya ƃe dí kùla Sukɔ dí díƃûui pú Itaŋ vɛ̃ɛ-kpâlaŋ kɔlɛ.

²¹Yâwɛɛ è tɔ̀ɔ dítuɛ a ɣele-ƃɔɔ ɣele-kɔlɔŋ kole su a gɛɛ é berei lɛ́ dîa. É tɔ́ɔ dítuɛ ŋɔŋ-leŋ su a gbínii a gɛɛ é kwaa ponoɔɔ tɛ́ɛ dípɔ. È gɛ̀ tí a gɛɛ díkɛ sía a ɣele-bɔɔ da kpini.

²²Ŋele-kɔlɔŋ kolei è kɛ̀ ŋ̀ele-bɔɔi mɛ̂ni ma. Ŋɔŋ-leŋ kɛ́ gbínii mɛ̂ni ma. Dífe kula ní ǹûai túɛ.