Read Kpelle Ɛsedɔ 14 Bible Online

Ɛsedɔ 14 - Kpelle bible

Ɛsedɔ 14

¹Yâwɛɛ è mò Mose mà ǹyɛɛi,

²“M̀ó Eezuɛ-ŋai dîa dí lene pôlu dí díƃûui pú Pi-Ailo ŋɛ́i-tuɛ Midɔ da ǹyái dí loai Bazɛfɔŋ ŋɛ́i-tuɛ. Díƃûui é kɛ́ ŋ̀ɛ́i ǹyái kɔlɛ.

³Gâloŋ a pâi gíli ŋá siâi a gɛɛ Eezuɛ-ŋai díkaa nɔ́ ɣilînii ǹɔii su, ǹyaŋ vɛ̃ɛ-kpâlaŋ tínaŋɔɔ dîa.

⁴Ŋa pâi Gâloŋ líi su kpananîi. A pâi Kákpɛ̂i. Ŋa pâi ŋáfolo-laai lɛ̂i Gâloŋ mâ da ŋɔkɔ́ kɔ́-ƃelai. Gɛ̀ ní Ize-ŋai da pâi gɔ́lɔŋnîi a gɛɛ ŋ̀gáa a Yâwɛɛ.” Eezuɛ-ŋai dí gɛ̀ yɛ̂ɛ berei Mose è mò la diai.

⁵Tãi Ize Kâloŋ è mɛ̀ni la a gɛ́ɛ Eezuɛ-ŋai da púi, da ǹyée mu-ƃelai dí dílii maa fàleŋ dîyɛɛi, “Lé ƃé kwa gɛ́ ŋíi? Kwa Eezuɛ-ŋai lɛ́ɛ naa da lí da kúla ǹuɛ-laai su kúyêei”

⁶Nya ƃe è ŋɔkɔ́kɔ keleŋ kpɛ̀tɛ é ŋɔkɔ́ kɔ́-ƃelai síɣe,

⁷é kɔ́kɔ-keleŋ lɛ́lɛɛ ŋuŋ lɔ́ɔlu mɛi da (600) síɣe da gɔ́kɔ-keleŋ-ŋai kélee kɛ̀ Izei, gɔ́-kuluƃa-ŋai dí ƃò gélee su.

⁸Yâwɛɛ è gâloŋ líi su kpànaŋ gɛ́ Eezuɛ-ŋai kpɛ́. Kɛ́lɛ Eezuɛ-ŋai dí kɛ̀ liî Yâwɛɛ ŋɔwála-wala-laai su.

⁹Ize-ŋai da gâloŋ ŋɔsoo-ŋai é pɛ́lɛ gɔ́-kɔ́ keleŋ-ŋai kélee dîa da ŋɔsoo-mɛi-ƃelai é pɛ́lɛ ŋɔkɔ́kɔ-ƃelai kélee dîa dí lɛ̀ɛ Eezuɛ-ŋai kpɛ̂i dí díkaa ƃɛ́i dí díƃûui pù naa ǹyái kɔlɛ Pi-Ailo da Bazɛfɔŋ díŋɛi-tuɛi.

¹⁰Tãi Gâloŋ è lɛ̀ɣɛ la a Eezuɛ-ŋai, dí Ize-ŋai kàa díkɛ pà dîa. Dí kɛ̀ yaôi. Nya ƃe dí wɔ̀lɔ Yâwɛɛ ma.

¹¹Dí mò Mose ma dîyɛɛi, “ƃolôŋ fé Ize lɔii su, mɛni ƃé í pà la a kúa a gɛ́ɛ kú saa vɛ̃ɛ-kpâlaŋ su ƃɛ́i? Í kùla a kúa Ize lɔii su lé mɛni ma?

¹²Kúfe m̀ó ní yâ Ize lɔii su a gɛ́ɛ í kúlɛɛ naa kú tíi kɛ́ Ize-ŋai dîɛ? Eêi pɔrîi kɛ̂i a ǹɛ́lɛɛ a gɛ́ɛ kúkɛ a Ize-ŋai díluɛ é tɛ́ɛ la kúsaa mâ vɛ̃ɛ-kpâlaŋ su ƃɛ́.”

¹³Nya ƃe Mose è mò dîa ǹyɛɛi, “Káfe yào. Ka tɔ́ɔ tɔ̂ŋ ká Yâwɛɛ ŋɔƃálo-laai káa a pâi dɛɛ̂i kápɔ sâai. Kpɛ́ni fêi, Ize-ŋai ŋí ka díkâai sâai, káfe pâi ŋɔ́nɔ wɔ́lɔ díkâai.

¹⁴Yâwɛɛ a pâi kámaa kɔ́ kɔ̂i. Vé a sɛŋ ká mɛni da kélee kɛ́.”

¹⁵Nya ƃe Yâwɛɛ è mò Mose mà ǹyɛɛi, “Íkaa wɔ̂lɔi ḿâ lé mɛni ma? M̀ó Eezuɛ-ŋai dîa dí lí túɛ-pere.

¹⁶Ísia wurii siɣe í íyee sãa la ǹyái mɛi a gɛ́ɛ ŋá é kɔ́lɛ, Eezuɛ-ŋai dí ǹyái tíyeŋ lɔii kpala ma.

¹⁷Ŋa pâi Ize-ŋai líi su kpananîi a gɛɛ dí lɛ́ɛ Eezuɛ-ŋai pôlu. Ǹyaŋ ŋa pâi ŋáfolo-laai lɛ̂i Gâloŋ mâ da ŋɔkɔ́ kɔ́-ƃelai é pɛ́lɛ ŋɔkɔ́kɔ keleŋ-ŋai dîa da ŋɔsoo-mɛi-ƃelai.

¹⁸Tãi ŋa pâi ŋáfolo-laai lɛ̂i la diai, da pâi gɔ́lɔnîi a gɛɛ ńyãa ƃa Yâwɛɛ.”

¹⁹Nya ƃe Ɣâla ŋɔkélai nyii kɛ̀ tɔ́ɔni Eezuɛ-ŋai túɛi, è tɛ̀ɛ dípôlu-pere, ŋ̀ele-kɔlɔŋ kolei kɛ́ dítuɛ-perei è tɛ̀ɛ dípôlu-pere.

²⁰Ŋele-kɔlɔŋ kolei é kɛ̀ Ize-ŋai da Eezuɛ-ŋai díloai. Ŋele-kɔlɔŋ kolei ŋí pôlu-pere è kɛ̀ a gbíniɛ. Ize kɔ-kuluƃa-ŋai dífe pɔ̂ri ní lɛɣɛ̂i Eezuɛ-ŋai dîa gbínii su.

²¹Nya ƃe Mose è ǹyée sãa ǹyái mɛi, Yâwɛɛ è fãa su kpanaŋɔɔi kɛ̀ é kúla vóloi ƃêlai-pere é lí a ǹyái pôlu père. È ǹyái kɛ́ é kpála, zu é tée.

²²Nya ƃe Eezuɛ-ŋai dí tɛ̀ɛ ǹyái sâmai ǹɔii kpalai mâ, ǹyái tɔɔ dílaa mii-yee mɛi pêre da díkɔɔ-yee mɛi-pere yɛ̂ɛ pɛ́rɛ kâŋ.

²³Ize-ŋai dí kɛ̀ díkpɛ̂i a kîrɛ. Gâloŋ ŋɔsoo-ŋai, ŋɔkɔ́kɔ-keleŋ-ŋai da ŋɔsoo sia-ƃelai kélee dí lɛ̀ɛ dípôlu ǹyái sáma.

²⁴È kɛ̀ a ɣele-wala pɛpɛ Yâwɛɛ é ŋ̀ɛ́i pìlaŋ ǹɔii ma ŋ̀ele-kɔlɔŋ kolei su da ŋɔŋ-leŋ é Ize kɔ́ kɔ́-ƃelai káa è díkɛ wúlee.

²⁵È díkeleŋ ŋai kɛ̀ díkɛ kânaŋ-kànaŋ nyii gɛ̀ dísiâi é kpanaŋ. Nya ƃe Ize-ŋai dí mò dîyɛɛi, “Kwaa kú pú kú kúla Eezuɛ-ŋai ŋɛ́i. Kpɛ́ni fêi, Yâwɛɛ káa kɔ̂i kúpɔ dímɛni ma.”

²⁶Nya ƃe Yâwɛɛ è mò Mose ma, ǹyɛɛi, “Íyee sãa ǹyái mɛi a gɛɛ ǹyái é pá pôlu gîe mà é sía Ize-ŋai mɛi, díkeleŋ-ŋai da dísoo-sia-ƃelai.”

²⁷Mose è ǹyée sãa ǹyái mɛi, ǹyái é pá pôlu gɛ́-pere pɔlɔi su yɛ̂ɛ berei è kɛ̀ la a ŋ̀ele-waa pɛpɛi. Nya ƃe Ize-ŋai dí kîrɛ sìɣe zu, Yâwɛɛ é díkɛ dí lɛ́ɛ ǹyái su ǹyái sáma.

²⁸Ǹyái è pà pôlu é sia géleŋ-ŋai mɛi da zoo sia-ƃelai é pɛ́lɛ máŋ Gâloŋ ŋɔkɔ-kuluƃa-ŋai kélee dîa, nyii-ŋai lɛ̀ɛ Eezuɛ-ŋai pôlui ǹyái sui. Ǹúui dɔnɔ kpîŋ fé kula ni zu.

²⁹Kɛ́lɛ Eezuɛ-ŋai dí sìa ǹɔii kpalai mâ ǹyái sáma, ǹyái tɔɔ dílaa-mii-yee mɛi da díkɔɔ-yee mɛi yɛ̂ɛ pɛ́rɛ kâŋ.

³⁰Bere sîi tí ƃé Yâwɛɛ è Eezuɛ-ŋai ƃàlo la Ize-ŋai yêei a maa ɣelei tí. Ǹyaŋ Eezuɛ-ŋai dí Ize-ŋai poma kàa láani zîŋ ma.

³¹Eezuɛ-ŋai dí díi kɛ́tɛi kàa Yâwɛɛ è gɛ̀ a Ize-ŋai. Ǹyaŋ ǹûai dí yào a m̀ɛnii Yâwɛɛ è gɛ̀ a Ize-ŋai. Ǹûai dí nâa yào Yâwɛɛ mà, dí láa la da ŋɔtíi-kɛ-nuui Mose.