Read Kpelle Ɛsedɔ 15 Bible Online

Ɛsedɔ 15 - Kpelle bible

Ɛsedɔ 15

¹Nya ƃe Mose da Eezuɛ-ŋai dí ŋulei ŋí tòo Yâwɛɛ ma dîyɛɛi, “Ŋa pâi wule tôoi Yâwɛɛ ma, kpɛ́ni fêi, a ŋɔfólo-laa tii kɛ́. A zoo-ŋai ŋuŋ lá píli ǹyái su da zia-ƃelai.

²Yâwɛɛ káa a ŋáwala-walai laa. Ŋa pâi ǹáa maa tɛ̂i ŋáwule-ŋai su. Ŋáɣâlai ká ŋí, ǹyaŋ ŋa pâi ǹáa maa tɛ̂i. Gáa a ńâŋ ŋɔɣâlai, ǹyaŋ ŋa pâi ǹáa maa tɛ̂i.

³Yâwɛɛ káa a kɔ-kuluƃa. Ǹáa ƃa Yâwɛɛ.

⁴“È Gâloŋ ŋɔkéleŋ-ŋai da ŋɔkɔ́kɔ-ƃelai lɛ̀ɛ ǹyái su. Gɔ-kûluƃa-ŋai mɛi-ƃelai è dílɛ̀i, dí lɛ̀ɛ Ǹyúo Kpɔ̂lui su.

⁵Ǹyái è dímɛi pɛ̂lɛ. Dí yéŋ ǹya-kaoi ma yɛ̂ɛ kɔni.

⁶“Óo Yâwɛɛ, ílaa-mii-yee maa pɔlɔ-pɔlɔɔi. A íkpɔara ƃelai su kara.

⁷Ífolo-laai ŋɔkɛ́tɛ-laai su, ƃa diai yée mɛi ɣále da tɔ̂ɔ yâi. Ƃa ílii-ŋwânai tɛ̂ɛ a díkereŋ yɛ̂ɛ mɔlɔŋ-kpaŋ.

⁸Nya-ŋai ŋáa a tɛ́ díkîe ma a ílɛ̂woi. Ǹyá-fɛɛ-ŋai dí tɔ́ɔ déŋ-deŋ yɛ̂ɛ yée. Bari-ŋai dí kpànaŋ ǹyái sáma.

⁹Gbɔara-nuui è mò ǹyɛɛi, ‘Ŋa pâi díkpɛ̂i ŋá dísoŋ. Ŋa pâi díkɔliŋ ŋá kɔlɛ̂i ŋá lii-nɛ̃ɛ kúla díkponôi. Ŋa pâi ŋáƃoa-sɔkpɔi ɣâlai ŋá dísu kara a ǹyée.’

¹⁰Kɛ́lɛ í lɛ̂woi ŋɔfãa è ǹyái kɛ̀ é dímɛi pɛ́lɛ. Dí yèŋ ǹyá kɛ́tɛi mu yɛ̂ɛ fomâ.

¹¹“Gbɛ̂ɛ ƃé gáa yɛ̂ɛ yá ŋ̀âla-ŋai sáma Óo Yâwɛɛ? Gbɛ̂ɛ ƃé gáa yɛ̂ɛ yá, yái íwala-walai maa-waa-laa su, ímaa pɔlɔ-pɔlɔɔ fólo-laa tua-kɛɛ su, da ŋɛi-kɛ-maa kɛ́ɛi?

¹²Í ílaa-mii-yee sãa, ǹɔii é kúkpɔara-ƃelai kpéle.

¹³Ǹûai í díŋuŋ ma ƃòi, ƃa tɔɔ dítuɛ a ímaloŋ-kâa wɛli-kɛ-maai. Berei a lî íkɛ̂i maa waai mai, ƃa ǹɛ́ dîa a íwala-walai.

¹⁴Ǹûai da mɛni, dímaa è kpɛ̃lîŋ. Yao è pà Felesia-ƃelai kɔlɔ̂i.

¹⁵Idɔŋ kaloŋ-ŋai da yào. Môa-ŋai ŋuŋ-túɛ-ƃelai maa kɛ́ kpɛ̀liŋ. Keena lɔii su-ƃelai líi à tòo pôlu.

¹⁶Yao da lii-sɛlɛŋ dí kɛ̀ dîa. Íyee ŋɔwála-walai, Óo Yâwɛɛ È díkɛ̀ dí dímɛi sáa a yao, é lɛ́ɛ la zu ínûai dí tɛ́ɛ, nyii-ŋai díkaa a ípɔɔi.

¹⁷Ƃa pâi pâi a dia í dísee íkpɔɔi yeei ma, Óo Yâwɛɛ, ƃɛ́i í nàa kɛ̀ a ípɔ taai, gwaa maa waai ma, nyii í nàa kpɛ̀tɛ a íyeei.

¹⁸Yâwɛɛ a pâi kɛ-mɛi-laa kɛ̂i wɔlɔ-wɔlɔ da wɔlɔ-wɔlɔ.”

¹⁹Tãi Gâloŋ ŋɔsoo-ŋai da ŋɔkéleŋ ŋai é pɛ́lɛ ŋɔsoo sia-ƃelai dîa dí sèri la ǹyái sui, Yâwɛɛ è pà pôlu a ǹyái é sía dímɛi. Kɛ́lɛ Eezuɛ-ŋai dí sìa lɔii kpala ma dí tɛ́ɛ ǹyái sáma.

²⁰Eelɔŋ zaaƃɔlɔ Miriaŋ nyii kɛ̀ a Ɣâla ŋɔlóno kɛ́-nuui, è nyɛ̃ɛ nyɛŋ sìɣe nɛyâai kélee dí lɛ̂ɛ bôlu gɛ́ ŋ̀ale díkɛ́ mãla.

²¹Miriaŋ è ŋulei ŋí tòo dîa ǹyɛɛi, “Ka wule tóo Yâwɛɛ ma, kpɛ́ni fêi, a mɛni maa pɔlɔ-pɔlɔ kɛ́. A zooi da zia-nuui kɛ́ da lɛ́ɛ ǹyái su.”

²²Nya ƃe Mose è tɔ̀ɔ ǹûai túɛ dí kula Ǹyúo Kpɔ̂lui ma dí lí Sûu fɛ̃ɛ-kpalaŋ su-pere. Dí sìa vɛ̃ɛ-kpâlaŋ su a fólo saaƃa dífa yá kàa.

²³Tãi dí sèri la yá mai dífe pɔ̂ri ní díkpelêi naa, kpɛ́ni fêi, nàa yai è kɛ̀ a ŋwánaa. Mɛni ma dí nàa tòli a Mala.

²⁴Nya ƃe ǹûai líi è ŋwàna Mose mà dîyɛɛi, “Lé ƃé kwa pâi kúkpelêi lai?”

²⁵Nya ƃe Mose è Yâwɛɛ fɛ̀li a gbanaŋɔɔ. Yâwɛɛ è wúru da lɛ̀ Mose ma Mose é doo ǹyái su, ǹyái é nɛ́ɛ. Nàa ƃé Yâwɛɛ è tɔ̂ŋ tɛ̀ɛ naa dí pɔ́ é dísu kɔɔŋ,

²⁶Ǹyɛɛ diai, “À kɛ̀ kà ŋ̀óo mɛ̀ni kpɔ́ a ǹɛ́lɛɛ ńyãa Yâwɛɛ Káɣâlai, ka mɛni-ŋai kɛ́ ŋá ŋ̀wɛ̂lii ká gɛ́i ká ŋátɔ̂ŋ-ŋai kélee mɛi káa, gɛ̀ ní fé pâi tɔ̂ŋ kpɛ̂i kâa a gɔlɔ-fela sîi ŋai ŋá dɛ̀ɛ Ize-ŋai mɛni mai. Ńyãa ƃa Yâwɛɛ nyii káƃaloi.”

²⁷Nya ƃe dí pà Iliŋ ƃɛ́i yá pɛlɛɛ puu káo feerɛ dí kɛ̀ naa da tóu wuru buu lɔ́ɔlu mɛi feerɛi. Dí díƃûui pù naa ǹyái kɔlɛ.