Read Kpelle Ɛsedɔ 18 Bible Online

Ɛsedɔ 18 - Kpelle bible

Ɛsedɔ 18

¹Midiaŋ sala láa-soŋ-nuu kɛ́tɛi Zɛtulo, nyii kɛ̀ a Mose mɔ̂lɔi, è mɛni-ŋai kélee mɛ̀ni Ɣâla è gɛ̀ Mose mì da ŋɔnûai Eezuɛ-ŋai, da berei Yâwɛɛ è Eezuɛ-ŋai kùla la Ize lɔii sui.

²Mose mɔ̂lɔ Zɛtulo è pà a Zipôla nyii Mose è nɛ̀ɛ bɔ̂taai.

³Zɛtulo è pà máŋ a Mose ǹônii-sinaa feerɛi Gêsɔŋ da Ileyîisɛ. (Mose è mò ǹyɛɛ, “Ŋá kɛ̀ a ŋɔ̃́ya ŋɔ̃́ya lɔii su.”) M̀ɛni ma è ǹóŋ dɔnɔ láa sèe a Gêsɔŋ.

⁴È mò ŋɔ́nɔ ǹyɛɛ, “Ńâŋ Ŋɔɣâlai ƃé kɛ̀ a kpɔŋ mâ é ŋ́gula gâloŋ ŋɔƃóa sɔkpɔi ŋá.” M̀ɛni ƃé è ǹóŋ gbéli láa sèe là a Ileyîisɛ.

⁵Mose mɔ̂lɔ Zɛtulo è pà a Mose ŋɔnɛnîi da ǹônii-sinaai ƃɔ́ vɛ̃ɛ-kpâlaŋ su, ƃɛ́i è ŋɔƃûui pù naa Ɣâla ŋɔyéei mai.

⁶Tãi Mose è mɛ̀ni la a gɛɛ m̀ɔ̂lɔ Zɛtulo káa pâi a ŋɔnɛnîi da ǹônii-sinaa feerɛi,

⁷é mu sìɣe é lí m̀ɔ̂lɔ túɛ tɔɔ̂i. È pɛ̀lɛ gɔ́ɔ mu é ǹá-gbɔ see ma. Dí díkîe-ni marê kɛ̀ díkɔlɔ̂i pono mɛni ma dí lí pôlu dí lɔ́ ŋɔsua kɔlɔ-seɣe pɛrɛi mu.

⁸Nya ƃe Mose è mɛni-ŋai kélee ƃò m̀ɔ̂lɔ ma nyii Yâwɛɛ è gɛ̀ a Ize Kâloŋ, Eezuɛ-ŋai mɛni mai. È mɛni-soli-ŋai kélee mɛni ƃò mà nyii-ŋai kùla dîa berei su, da berei Yâwɛɛ è díŋuŋ ma ƃò la Ize-ŋai yêei.

⁹Zɛtulo líi è nɛ̃ɛ mɛni-ŋai kélee mɛni ma Yâwɛɛ è gɛ̀ Eezuɛ-ŋai mɛni ma díŋuŋ ma ƃo mɛni ma Ize-ŋai yêei.

¹⁰Nya ƃe Zɛtulo è mò ǹyɛɛi, “Laa-maa-tɛ é tɛ́ɛ Yâwɛɛ pɔ́ nyii kákùla Ize-ŋai yêei da Gâloŋ.

¹¹Ŋa nâa gɔ́lɔŋ a gɛɛ Yâwɛɛ kɛ̂tɛi é tɛ́ɛ ŋ̀âla-ŋai kélee ǹûai da kɛ̀ vɛlii dîa. Kpɛ́ni fêi, a ǹûai kula Ize-ŋai yée mu, nyii-ŋai dí díŋɛi nàŋiŋ dímɛi.”

¹²Nya ƃe Zɛtulo è kéreŋ sala da sâla da kpɛ́ni-ŋa kùla Ɣâla ma. Eelɔŋ da Eezuɛ núu pɔlɔ-ŋai kélee dí pà a gɛɛ da dîani dí dílaa mii gîe ma Ɣâla ŋɛ́i-tuɛ.

¹³Bôlu ma ɣele-walai Mose è nâa sèe a gɛɛ é ǹûai dímɛni-sâa ŋai ƃó. Ǹûai dí lɛ̀ɛ tɔɔni ŋ̀ɛi-túɛ é síɣe ɣele wâla ma é tóo ɣele-wuli ma.

¹⁴Tãi Mose m̀ɔ̂lɔ è mɛni-ŋai ŋí kélee kàa la Mose è kɛ̀ gɛ̂i ǹûai mɛni mai, è mò m̀a ǹyɛɛi, “Lé ƃé ŋí íkaa gɛ̂i ǹûai mɛni mai? Lé mɛni ƃé íkaa seeni la ƃɛ́ ya tɔnɔ, ǹûai dí lɛ́ɛ tɔɔ̂ni íŋɛi-túɛ é síɣe ɣele-wala ma é tóo ŋ̀ele-wulii mai?”

¹⁵Nya ƃe Mose è m̀ɔ̂lɔ wóo su tòo ǹyɛɛi, “Kpɛ́ni fêi, ǹûai da pâi ḿbɔ a gɛɛ dí m̀ɛnii kɔ́lɔŋ Ɣâla a ŋ̀wɛ̂lii.

¹⁶À kɛ̀ laa-saa à tòo núu feerɛ loai, da pà ḿbɔ, ŋa pâi môi ŋa gáa núui ŋɔi lɛ̂lɛi. Ǹyaŋ ŋa Ɣâla ŋɔtɔ̂ŋ-ŋai lɛ̀ dîa da ŋɔmɛni ŋá teeɛi.”

¹⁷Mose m̀ɔ̂lɔ è mò ǹyɛɛi, “M̀ɛnii íkaa gɛ̂i, vé lɛ́lɛ ní.

¹⁸Ka ǹûai ka pâi kɔlɔ kpɛɛi kákpîŋ kâa, kpɛ́ni fêi, m̀ɛnii ŋí wiyɛɛ̂i ímɛni ma, ífa pɔ̂ri mu yá tɔnɔ.

¹⁹Ŋ̀óo mɛni, ŋa pâi ílîa-woo ƃôi, Ɣâla é kɛ́ íkɔlɛ. Tɔɔ Ɣâla ŋɛ́i-tuɛ ǹûai ḿɛni ma í pá bɔ́ a dímɛni-ŋai.

²⁰Ɣâla ŋɔtɔ̂ŋ-ŋai da ŋɔlia-woo-ŋai lɛ́ ǹûai dîa í berei lɛ́ dîa dí sía la da m̀ɛnii da pɔ̂ri gɛ́i.

²¹Kpakolo nyii ŋai í laai a diai kúla ǹûai kélee sama, nyii-ŋai da yào Ɣâla ma, dífa yee-pɛlɛ ǹá-sɛŋ soŋ wôya mɛni mai. Dí dítɔɔ núu-kpulu-ŋa láa tuɛ yɛ̂ɛ wála tɔnɔ (1,000), ŋuŋ tɔnɔ (100), buu lɔ́ɔlu da núu puu.

²²Tɔɔ ǹúu-tuɛ-ƃelai ŋí díkɛ ǹûai dímɛni-ŋai ƃôi díloai a tãi kélee. Mɛni-ŋai dífa pɔrîi môi, dí pá a dîa ípɔ. Kɛ́lɛ dí mɛni pɛlɛɛ-ŋai ƃó díloai. Bere-sii ŋí tí su, kpîri wiyɛɛ fé pâi ŋɔ́nɔ kɛ̂i íyêei. Kpɛ́ni fêi ka dîa-ni ká káa ziɣei.

²³À kɛ̀ ƃà m̀ɛni-ŋai ŋí kɛ̀ nyii-ŋai díkaa a Ɣâla nîa-mɛnii, gɛ̀ ní a pâi wála-wala tɛɛ̂i ípɔ ífe pâi kɔlɔ kpɛ̂ɛ íkpîŋ ma. Ǹyaŋ gɛ̀ ní ǹûai kélee da pâi liî pôlu lii-see su.”

²⁴Mose è ŋ̀óli tɔ̀ɔ mɛni-ŋai kélee ma m̀ɔ̂lɔ è mò mai. È gélee kɛ̀ yɛ̂ɛ berei è mò la mai.

²⁵Mose è ténîŋ ƃô kpakolo-ŋa kùla Eezuɛ-ŋai sáma é dítɔɔ ǹûai mɛi. É dítɔ̀ɔ núu wála tɔnɔ (1,000), ŋuŋ tɔnɔ (100), buu lɔ́ɔlu da núu puu mɛi.

²⁶Ǹúu túɛ-ƃelai ŋí dí kɛ ǹûai loai mɛni ƃôi a tãi kélee. Da kâa pà Mose pɔ́ a m̀ɛni kpanaŋ-ŋai. Kɛ́lɛ dakâa m̀ɛni pɛlɛɛ-ŋai ƃò díkîe-ni loai dîa kpîŋ.

²⁷Nya ƃe Mose è vɛ̀li m̀ɔ̂lɔ mà, m̀ɔ̂lɔ é lene pôlu ƃɔ́ taai.