Read Kpelle Ɛsedɔ 22 Bible Online

Ɛsedɔ 22 - Kpelle bible

Ɛsedɔ 22

¹“À kɛ̀ núu à niŋa tɔnɔ ŋùma kpaa máŋ ƃála tɔnɔ é baa kpaa máŋ é gɔlɛ fɛ̂ɛ maa nuui tí é niŋa lɔ́ɔlu tɛ́ɛ ǹiŋa tɔnɔi tí pɔ́ɔ ŋá, kpaa máŋ ƃála náaŋ tɛ́ɛ m̀ála tɔnɔi tí pɔ́ɔ ŋá. Fɛ̂ɛ é da tɛ́ɛ pôlu. Da à wàla kɛ́ ǹyɛ̂ɛi, fɛ̂ɛ dí gɔlɛ dí zɛŋ fela-fei kɛ́ è ŋùmai.

²À kɛ̀ núu a lɛ̀ɛ ŋuma kɛ̂i da pà dí gáa naa dí pɛlɛ namu kɔi a lɛ̀ɛ la zu ŋuma núui a saa, gɛ ni baa mɛni fé ǹuui tí baai ḿâ.

³A kɛ̀ daa-tulɛi káa niî ŋùma ǹúui ǹyêei a vúlu, a nɛ̃ɛ ma é kɛ́ a niŋa, wɛlɛ-sôo kpaa máŋ ƃála, fɛ̂ɛ ŋ̀uma-nuui tí é zɛŋ tí è ŋumai kɛ́ feerɛ é dɛ̀ɛ pôlu.

⁴“À kɛ̀ da ŋ̀úma-nuu sòŋ gɛ́ pɛ́rɛ wòlo a kpíni, mu-sãa ŋúma mɛni mà, da lɛ̀ɛ nôkwai da bàa, gɛ̀ ní mɛni da fé baa-mɛni su. Kɛ́lɛ da zòŋ a ɣele-ƃɔɔ, da bàa, gɛ̀ ní bàa ḿɛni káa ǹúui tí baai ḿâ.

⁵“À kɛ̀ kpâlaŋ-namui a ŋɔtaa-tulɛ-ŋai pù ŋɔkpâlaŋ ŋá a gɛɛ dí kala míi naa, kɛ́lɛ dí ŋɛ̀lii tée díli kpâlaŋ da kpɛ́ni ŋá dí nàa mii, gɛ̀ ní fɛ̂ɛ daa-tulɛ-namui é ŋɔkpâlaŋ ŋá-sãai ǹɛ́lɛɛ-ŋai tɛ́ɛ gbâlaŋ tí ǹâmu pɔ́.

⁶“À kɛ̀ núu à ŋɔŋ tòo ŋɔŋ é kala kpala soŋ é lɛ́ɛ gêrenii é seri mɔlɔŋ kɔlɔŋ-ma é géreŋ, kpaa máŋ é mɔlɔŋ-kpalaŋ kéreŋ, gɛ̀ ní fɛ̂ɛ ǹúui ŋɔŋ tòoi, é vela-fe kɛ́.

⁷“Núu à sɛŋ-kao tɛ̀ɛ m̀arâŋ-nuu pɔ́ ǹâai kɛ̂i, kpaa máŋ sɛŋ-kpanaŋ da kpɛ́ni, núu da é ŋúma, gɛ̀ ní da ŋ̀úma-nuui sòŋ, fɛ̂ɛ é gɛ́ feerɛ é dɛ̀ɛ pôlu ǹâmu pɔ́.

⁸À kɛ̀ da wàla ŋuma nuui káa, gɛ̀ ní fɛ̂ɛ ǹúui kɛ̀ m̀araŋ-nuui kɔ̃liŋ laai kɛ̂i é pá Ɣâla ŋɛ́i-tuɛ é vóo dí gáa à kɛ̀ ǹyaa fé m̀arâŋ-nuui kɔ̃liŋ sìɣe.

⁹“Laa-saa à tòo nûa loai kɔ̃liŋ mɛni ma, a nɛ̃ɛ ma kpîŋ é kɛ́ a niŋa, wɛlɛ-sôo, ƃála, seɣe kpaa máŋ sɛŋ da kpɛ́ni-ŋa nyii láŋ, a kɛ̀ núu a mò ǹyɛɛ bɔ́ɔ ƃa diai, fɛ̂ɛ maa-ƃelai dí pá Ɣâla ŋɛ́i-tuɛ. Ǹúui nyii m̀ɛnii káa a zɔŋ, fɛ̂ɛ maa-nuui é m̀arâŋ-nuui kɔ̃lîŋ kɛ́ feerɛ é dɛ̀ɛ bɔ́ pôlu.

¹⁰“À kɛ̀ núu à niŋa tɛ̀ɛ m̀arâŋ-nuu pɔ́ dɔɔ-mɛni ma, kpaa máŋ wɛlɛ-sôo, kpaa máŋ ƃála, kpaa máŋ taa-tulɛ da kpɛ́ni, maa-taa-tulɛi a sàa, kpaa máŋ da ŋ̀wana, kpaa máŋ núu da kpɛ́ni a zòŋ é lí la núu da fé gáa ní,

¹¹gɛ̀ ní fɛ̂ɛ ǹúu feerɛi tí dí dífoo Yâwɛɛ ŋɛ́i-tuɛ a gɛɛ daa-tulɛ-namui é gáa à kɛ̀ maa nuui fé gɔ̃liŋ síɣe ní. À kɛ̀ vé ziɣe ni, gɛ̀ ní fɛ̂ɛ nɔ daa-tulɛ-namui é ǹyée sée ŋ̀óo mu, m̀arâŋ-nuui fé ŋɔtaa-tulɛ da tɛ̀ɛ.

¹²Kɛ́lɛ à kɛ̀ dí daa-tulɛi ŋùma ǹyêei, gɛ̀ ní fɛ̂ɛ é da tɛɛ pôlu ǹâmu pɔ́.

¹³Kɛ́lɛ à kɛ̀ lɔɔ-fɛnɛ-sãa ƃé zòŋ, fɛ̂ɛ é pá a gbua a gɛɛ dí gɔ́lɔŋ. Vé a sɛŋ é daa-tulɛi fela-fei kɛ́ nyii lɔɔ-fɛnɛ-sãa dí zòŋ.

¹⁴“Núu à taa-tulɛ síɣaŋ sòŋ m̀arâŋ-nuu yêei, da daa-tulɛi ŋwàna, kpaa máŋ à sàa daa-tulɛ-namui ŋɛ́i pôlu, gɛ̀ ní fɛ̂ɛ daa tulɛ síɣaŋ-soŋ-nuui é vela-fe kɛ́.

¹⁵À kɛ̀ ǹâmu à kɛ̀ naa, vé a sɛŋ a gɛɛ daa tulɛ síɣaŋ-soŋ nuui é vela-fei kɛ́. Gáa a síɣaŋ-taa-tulɛ. Ǹyaŋ à làŋ, zɔ̃ɔ káa nɔ́ a síɣaŋ taa-tulɛ sɔ̃ɔ.

¹⁶“À kɛ̀ surɔ̂ŋ à nɛnî kpela nyii ve nîi lɔ-pɔ̂rɔŋ kɛ ni líi pène a gɛɛ é lɔ́ la pɔ̂rɔŋ nyii dífe nîi gɔli-kao láa níi, fɛ̂ɛ maa-sûrɔŋ é maa sɛŋ kɔlɛ é gula a nɛnî.

¹⁷Kɛ́lɛ à kɛ̀ nɛnîi ǹâŋ à wàla fáa a gɛɛ é dɛ̀ɛ zurɔ̂ŋ tí pɔ́, gɛ̀ ní fɛ̂ɛ zurɔ̂ŋ é sɛŋ-kao kɔlɛ ǹaŋ nuui mâ é seri nɛni-kpela kula sɛŋ-kao su.

¹⁸“Ífe wúlu-nɛni lɛ̀ɛ ɣele ma.

¹⁹“Núui kélee à lɔ pɔ̂rɔŋ a fɛnɛ-sɛŋ, fɛ̂ɛ dí maa núui páa.

²⁰“Ǹúui kélee a sâla kùla ɣâla da kpɛ́ni mâ é kúla mbôlu Ńyãai Yâwɛɛ, fɛ̂ɛ dí maa ǹûui tí páa.

²¹“Káfe ŋɔ̃ya sòŋ a nyɔ́mɔɔ kpaa máŋ ká mɔ̃lɛ. Kpɛ́ni fêi, ká kɛ̀ a ŋɔ̃ya-ŋa Ize lɔii su.

²²Káfe pɔɔ-nɛni sòŋ a nyɔ́mɔɔ kpaa máŋ tee-loŋ.

²³Ka dísôŋ a nyɔ́mɔɔ, ǹyaŋ da wɔ̀lɔ ḿâ, ŋa pâi díwɔlɔ-woo mɛnîi,

²⁴gɛ̀ ní níi a pâi ŋwânai ŋá kápaa kɔ̂i, kánɛyâai dí lɛ́ɛ a pɔɔ-nɛyaa, kánîa-pɛlɛɛi dínâŋ-ni dífa ŋɔ́nɔ kɛ̀ mà.

²⁵“Ƃà sɛŋ-kao kpa pìli ŋánûai da ma nyii gôloɔi ífe gɛ̀ yɛ̂ɛ sɛŋ-kao kpa pili-nuu. Ífe gêni làa ma.

²⁶À kɛ̀ íkɔlɛ-ma-nuu à ŋɔseɣei sèe íyêei a sɛ́ɣɛ sɛŋ-kao ŋuŋ mu, fɛ̂ɛ í dɛ́ɛ bɔ́ pôlu vólo-kaoi é lɛ́ɛ toôi.

²⁷Kpɛ́ni fêi, gbono mɛi pɛlɛ-sɛŋ nɔ́ ká tí nyii a gbonoi fãai. Seɣe da kpɛ́ni fé naa a gɛɛ é bɛlɛ mɛi. À wɔ̀lɔ ḿâ a gɛɛ ŋá kpɔ́ŋ m̀a, ŋa pâi ŋ̀óo mɛnîi ŋá kpɔ́ŋ mà. Kpɛ́ni fêi, ŋ́gaa a Maloŋ-kâa-ɣala.

²⁸“Ífe lòno a nyɔ́mɔɔ é pîlaŋ Ɣâla ma. Ífe ínûai túɛ-nuu làraŋ.

²⁹“Pá a í mii-sãa sama-sɛŋ, kpele-sɛŋ sama-sɛŋ, da ɔle-wurɔ sama-sɛŋ, a tãi gáa a sɛŋ í dítɛɛ lai. “Íloŋ-surɔ̂ŋ maa-ŋuŋ tɛ́ɛ ḿbɔ.

³⁰Fɛ̂ɛ í íniŋa-ŋai da íƃala-ŋai dílônii maa-ŋuŋ sirɛ-ŋai tɛ́ɛ ḿbɔ bere-sîi tí su. Dí lɛ́ɛ dílee-ni dîa a fólo lɔ́ɔlu mɛi feerɛ, mɛi saaƃa-ɣelei í dítɛɛ ḿbɔ.

³¹“Kákaa a ŋánûa maa-waa-ŋa. Mɛni ma káfe taa-tulɛ mii nyii lɔɔ-fɛnɛ-sãa dí zòŋ. Ka maa-fɛnɛ-sɛŋ píli ŋîla-ŋai dîɛ.”