Read Kpelle Ɛsedɔ 3 Bible Online

Ɛsedɔ 3 - Kpelle bible

Ɛsedɔ 3

¹Mose è nâa kɛ̀ m̀ɔ̂lɔ Zɛtulo ŋɔƃála-ŋai mɛi kâai. Zɛtulo è kɛ̀ a Midiaŋ sala láa-soŋ-nuu kɛ́tɛi. Mose è lì a m̀ála-ŋai vɛ̃ɛ-kpâlaŋ pôlu é pá Ɣâla ŋɔyéei ma nyii da dòli a Sanai.

²Nya ƃe Yâwɛɛ ŋɔkélai è kùla nɔ̀ɔi sáma é kúla ŋ̀ɛ́i yɛ̂ɛ ŋɔŋ-leŋ. Mose è nàa kàa é nɔ̀ɔi káa ŋɔŋ kɛ́ sóŋ ma, kɛ́lɛ vé kɛ́ ní kêrenii.

³Mose è mò ǹyɛɛ, “Ŋa pâi tɛɛ̂i ǹaa kɔlɛ ŋá mɛni-tarei ŋí káa lé mɛni ƃé nɔ̀ɔi fé kêrenii lai.”

⁴Tãi Yâwɛɛ è gàa la a gɛɛ Mose a lɛ̀ɣɛ naai, Ɣâla wóo è kula nɔ̀ɔi sáma nyii ŋuŋ è kɛ̀ mai ǹyɛɛ ma, “Mose, Mose.” Mose ǹyɛɛ mà, “Ńyãa ká ŋí.”

⁵Ɣâla ǹyɛɛ mai, “Ífe lɛ̀ɣɛ naa. Íkɔlɔi kúla íkɔɔ ŋá. Kpɛ́ni fêi, ƃɛ́i íkaa tɔɔ-ni naai, nàa káa a lɔii maa-waa.

⁶Ńyãa ƃa ínâŋ-ni dí Ɣâlai, Eberaɣɛ̃ɛ Ŋɔɣâlai, Aise Ŋɔɣâlai da Zeeka Ŋɔɣâlai.” Nya ƃe Mose è ŋ̀ɛ́i lòo. Kpɛ́ni fêi, è kɛ̀ yaôi a gɛɛ é Ɣâla ŋɛ́i káa.

⁷Nya ƃe Yâwɛɛ è mò m̀a ǹyɛɛi, “Ŋa ŋánûai dímɛni-sôlii káa nyii-ŋai díkaa Ize. Ŋa díwɔlɔ-wooi mɛ́ni kpɔŋ-maa mɛni ma dímɔ̃lɛ-ƃelai yêei. Ŋá dímɔ̃lɛi kɔ́lɔŋ.

⁸Ŋa pá a gɛɛ ŋá díkula Ize-ŋai yêei ŋá pá a dia lɔii kɛ́tɛ lɛ́lɛɛ su ƃɛ́i Keena-ŋai díkaa naa da Ita-ŋai, Amɔra-ŋai, Pɛriza-ŋai, Iva-ŋai, é pɛ́lɛ Zɛbusa-ŋai dîa.

⁹Ŋa Eezuɛ-ŋai dímɛni-solii maa wɔlɔ-wooi mɛ́ni. Ŋa gáa berei Ize-ŋai da dímɔ̃lɛi lai.

¹⁰Ŋa pâi ítɛɛ̂i Gâloŋ pɔ́ naa a gɛɛ í ŋánûai Eezuɛ-ŋai kúla Ize lɔii su í pá a dia.”

¹¹Kɛ́lɛ Mose è mò Ɣâla ma ǹyɛɛi, “Gbɛ̂ɛ ƃa ńyãa a gɛɛ ŋa pɔ̂ri liî Gâloŋ pɔ́ naa a gɛɛ ŋá Eezuɛ-ŋai kúla Ize ŋá pá a diai?”

¹²Ɣâla ǹyɛɛ mai, “Ŋa pâi kɛ̂i íkɔlɛ. Ŋ̀ɛi-kɛ-maai ká ŋí nyii pâi ǹɛ̂i a gɛɛ ŋa ítɛɛ̂i. Ƃà kùla a ǹûai Ize, ƃà pà a dia, ka ḿvɛli ǹyéei ŋí ma.”

¹³Nya ƃe Mose è mò Ɣâla ma ǹyɛɛi, “À kɛ̀ ŋà lì Eezuɛ-ŋai pɔ́ naa ŋá m̀ó dîa a gɛɛ dínâŋ-ni Díɣâlai ƃé ńdɛ̀ɛ dípɔ naa, da ímarê kɛ̀ dîyɛɛ, ‘Ǹyáa ƃa gbɛ̂ɛ?’ Lé ƃé ŋa pɔ̂ri môi dîa?”

¹⁴Ɣâla ǹyɛɛ Mose mai, “ŃYÃA ƂA NYII ŃGAA LAI. M̀ó Eezuɛ-ŋai dîa yɛɛ̂i, ‘ŃYÃA ƂA ƃé ńdɛ̀ɛ kápɔ-naa.’ ”

¹⁵Mó Eezuɛ-ŋai dîa a gɛɛ Ńyãa Yâwɛɛ nyii gáa a dínâŋ-ni Díɣâlai, Eberaɣɛ̃ɛ Ŋɔɣâlai, Aise Ŋɔɣâlai, da Zeeka Ŋɔɣâlai, ǹyaa ƃé ítɛ̀ɛ dípɔ naa. Ńaa ká ŋí wɔlɔ-wɔlɔ da wɔlɔ-wɔlɔ nyii fɛ̂ɛ núu kélee dí ńdoli lai.

¹⁶Lí í Eezuɛ nuu-pɔlɔ-ŋai ŋá tɛ́ gîe ma yɛ̂ɛ dîa, Ńyãa Yâwɛɛ nyii gáa a dínâŋ-ni Díɣâlai, Eberaɣɛ̃ɛ Ŋɔɣâlai, Aise Ŋɔɣâlai da Zeeka Ŋɔɣâlai è kùla íŋɛi. Mó dîa a gɛɛ ŋá m̀ɛnii kɔ́lɔŋ Ize-ŋai da gɛ́i a dia Ize lɔii sui.

¹⁷Ǹyaŋ ŋa gbɛtɛ ŋ́gili ŋá a gɛɛ ŋá díkula Ize lɔii su ƃɛ́i díkaa mɛni-sôli kâai naai, ŋá pá a dia Keena-ŋai, Ita-ŋai, Amɔra-ŋai, Pɛriza-ŋai, Iva-ŋai da Zɛbusa-ŋai dílɔii su nyii gáa a lɔii lɛ́lɛɛi.

¹⁸“Ŋánûai da pâi díwoli tɔɔ̂i yâ. Gɛ̀ ní ka dîa-ni ka lí Ize kaloŋ pɔ́ naa kâa mai, ‘Yâwɛɛ, nyii gáa a Ibulu-ŋai Díɣâlai a pá kúpɔ. Mɛni ma kpera yɛ̂ ǹɛɛ naa kú lí a ɣele-kûu saaƃa sia vɛ̃ɛ-kpâlaŋ su a gɛɛ kú sâla kula Yâwɛɛ Kúɣâlai ma.’

¹⁹Ŋa gɔ́lɔŋ a gɛɛ Ize kaloŋ fé pâi ká lɛɛ̂i naa ká lí fɛ̂ɛ ŋá gɛ́ la a wála-wala-laa.

²⁰Mɛni ma ŋa pâi tíi kɛ̂i a ŋáwala-wâla-laai ŋá tɔ̀ŋ-kpɛ-maa tɛ́ɛ Ize pɔ́ a ŋ̀ɛi-kɛ-maa-ŋai ŋa pâi gɛ̂i. Gɛ̀ ní a pâi ká lɛɛ̂i naa ká lí.

²¹“Ŋa pâi Ize-ŋai kɛ̂i dí ƃaa-kɛ-maa tɛ́ɛ ŋánûai pɔ́ a gɛɛ kà kɛ̀ liî, káfe lì a káyee-fôlo.

²²Nɛnî kélee a pâi marâŋ-nɛni marê kɛ̂i nyii da ǹyaa díkaa pɛ́rɛ tɔnɔ mu da kóli tɔnɔ sui, a gɛɛ é káne da gôo, da m̀aa-ɣiri-sãa tɛɛ bɔ́ é pɛ́lɛ seɣe-ŋa dîa. Ka pâi zãâi ŋí toôi kálônii-sinaai da kálônii-nɛyãai dîa. Bere-sii ŋí ƃé ka pâi Ize-ŋai dítɔɔ-sãai kulâi la díyêei.”