Read Kpelle Ɛsedɔ 32 Bible Online

Ɛsedɔ 32 - Kpelle bible

Ɛsedɔ 32

¹Tãi ǹûai dí gàa la a gɛɛ Mose è kɛ̀ tûai ǹyéei ma vé kɛ́ ní pâi a maa felai, dí díŋa tɛ̀ gîe ma Eelɔŋ ŋɛ́i-tuɛ dîyɛɛ mai, “Pá í ɣâla kpɛtɛ kúmɛni ma a gɛɛ é tɔ́ɔ kútuɛ, kpɛ́ni fei, kúfe mɛnii kɔ́lɔŋ kɛ̂i a Mose nyii kú kula Ize lɔii su.”

²Nya ƃe Eelɔŋ è mò dîa ǹyɛɛi, “Ka ŋ̀ôlii-sãai kúla kánɛyâai, kálônii-sinaai, da kálônii-nɛyãai wôli, ká pá a dia ḿbɔ.”

³Nya ƃe ǹûai kélee dí díwôlii-sãai kùla díwôlii dí pá a dia Eelɔŋ pɔ́.

⁴Eelɔŋ è ŋ̀ôlii-sãai sòŋ é zéɣeŋ é gbɛtɛ yɛ̂ɛ niŋa-sirɛ pɔkɔɔŋ. Nya ƃe ǹûai dí mò dîyɛɛi, “Óo Eezuɛ-ŋai kúɣâlai ká ŋí nyii kú kùla Ize lɔii sui!”

⁵Tãi Eelɔŋ è nyíŋi káa lai, è Ɣâla-teƃele kpɛ̀tɛ niŋa-sirɛ pɔkɔɔŋ ŋɛ́i-tuɛ, é mó ǹûai dîa ǹyɛɛi, “Kwa tínaa kúu kɛ̂i Yâwɛɛ ma.”

⁶Nya ƃe ǹûai dí dímu sìɣe a bôlu ma ɣele-wala pɛ̀pɛi, dí kéreŋ sala kula dí lii-see sala kula. Dí sée dí dílaa míi, dí dímu sìɣe dí pɛ́lɛ pêle kɛ́ɛ ma.

⁷Yâwɛɛ è mò Mose mà ǹyɛɛi, “Yeŋ ǹyéei kwára. Kpɛ́ni fêi, ínûai í díkùla Ize lɔii sui da ŋumɛ-mɛni kɛ́i.

⁸Berei ŋá nɛ̀i da siɣe ma. Da niŋa-sirɛ pɔkɔɔŋ kpɛtɛ a gôo díkpîŋ mɛni ma díkɛ vɛ̀li díkɛ sâla kùla ma. Díkɛ mò dîyɛɛ ŋ̀âlai díkùla Ize lɔii sui ǹyaa ká tí.”

⁹É ŋɔ́nɔ mò Mose ma ǹyɛɛi, “Ŋá ǹûai ŋí kɔ́lɔŋ. Díŋuŋ su kpanaŋɔ̂ɔi.

¹⁰Tɔɔ ŋá dísu kara a ŋálii-ŋwanai. Kɛ́lɛ, ŋa pâi ka ínûai ká kɛ̂i a lɔii-ŋuŋ su kɛ́tɛ.”

¹¹Kɛ́lɛ Mose è Ŋɔɣâla Yâwɛɛ kperai fè ǹyɛɛ mai, “Óo Yâwɛɛ, ƃa pâi ínûai nyii-ŋai í díkula Ize lɔii su a íwala-laai kɛ́tɛi su-karai a ílii-ŋwanai lé mɛni ma?

¹²Ƃà nyíŋi kɛ̀, gɛ̀ ní Ize-ŋai da pâi môi a gɛɛ í díkùla Ize a gɛɛ í pá a dia ǹyéei ma í díŋuŋ la píli naa. Ílii maa fáleŋ í ílii ŋáa yéŋ. Ífe pà a mɛni-kpɔlui ŋí ínûai pɔ́.

¹³Íkili ŋá sía í bîlaŋ ítii kɛ́-ƃelai Eberaɣɛ̃ɛ, Aise da Zeeka-ni dîa nyii-ŋai í íkono tèe díyêei í mó dîa yɛ̂ɛi, ‘Ŋa pâi kásuui tâmai yɛ̂ɛ bɛ̂mɛlɛŋ-kao-ŋai díkaa ŋ̀elei sui, ŋá ǹɔii-ŋai ŋí tɛ́ɛ kásuui pɔ́ nyii ŋá ŋ́gono tèe la káyêei, nyii pâi kɛ̂i a dípɔɔ wɔlɔ-wɔlɔ da wɔlɔ-wɔlɔi.’ ”

¹⁴Nya ƃe Yâwɛɛ è ǹíi maa fàleŋ. Vé ŋɔ́nɔ m̀ɛnii kɛ́ ní a ǹûai nyii è kɛ̀ ŋ̀wɛ̂lii a gɛɛ é gɛ́ a diai.

¹⁵Nya ƃe Mose è tìnaŋ é yéŋ ǹyéei kwára a gɔni-ƃela feerɛi nyii-ŋai kɛ̀ a bɔ̃yɛɛ gwaa feerɛ mai.

¹⁶Ɣâla ǹyaa kpîŋ ƃé gɔni-ƃela-ŋai sàa é ŋɔwóo-ŋai pɔ̃yɛɛ dîa.

¹⁷Tãi Zasua è ǹûai láɣi-woo mɛ̀ni lai, è mò Mose ma ǹyɛɛi, “Ŋa kɔ́-kɔ woo mɛnii mûui su.”

¹⁸Kɛ́lɛ Mose è mò mà ǹyɛɛi, “Dífe lâɣii a gɛɛ dí kɔ́ yée mɛi ɣále kpaa máŋ da lâɣii a gɛɛ kɔ́ a díyee mɛi ɣále. Kɛ́lɛ ŋa díwoo mɛnîi yɛ̂ɛ wule-woo.”

¹⁹Kɛ́lɛ tãi Mose è lɛ̀ɣɛ la mûui kɔlɛi é niŋa-sirɛ pɔkɔɔŋ káa, é ǹûai káa díkɛ mãla. Ǹíi è ŋwàna kpɔ́ a ŋánaa. Gɔni-ƃela-ŋai è kɛ̀ liî a diai è dítòo ǹyéei kwára é díwolo-wolo.

²⁰È niŋa-sirɛ pɔkɔɔŋ kèreŋ é vũa-fũa é bú ǹyái su é Eezuɛ-ŋai kɛ́ dí gbele.

²¹Nya ƃe Mose è mò Eelɔŋ ma ǹyɛɛi, “Lé ƃé ǹûai dí gɛ̀ a yá ǹyaa ƃa díkɛ, díkɛ sɔnyɔ̂ŋ kɛ́ɛ ŋí kɛi?”

²²Eelɔŋ è mò Mose ma ǹyɛɛi, “Ífe ílii ŋwàna ḿâ mɛi-nuui. Kpɛ́ni fêi, ínûai ŋí kɔ́lɔŋ berei dílii kpanaŋɔ̂ɔi la sɔnyɔ̂ŋ kɛ́-mɛni mai.

²³Dí mò ḿâ a gɛɛ ŋá ɣâla kpɛtɛ dîɛ a gɛɛ é tɔ́ɔ dítuɛ. Kpɛ́ni fêi, Mose nyii díkùla Ize lɔii sui, dífe kɛ́ ní a mɛnii kɔ́lɔŋɔɔ kɛ̀ kɛ̂i lai.

²⁴Nya ƃe ŋá mò dîa a gɛɛ ǹúui kélee gôo káa ǹyêei é gula é dɛɛ ḿbɔ. Nya ƃe dí dɛ̀ɛ ḿbɔ ŋá doo ŋɔŋ ŋá é séɣeŋ ŋá ǹiŋa-sirɛ pɔkɔɔŋ ŋí kpɛtɛ la!”

²⁵Mose è gàa a gɛɛ ǹûai ŋuŋ-su-ɣɛli a tée, kpɛ́ni fêi, Eelɔŋ è díkùla woo-mɛni mu é dílɛɛ naa dí dípôlu fé Ɣâla mì díkpɔara-ƃelai sáma.

²⁶Nya ƃe Mose è tɔ̀ɔ mûui ŋɔsiɣãŋ lá ǹyɛɛ diai, “Gbɛ̂ɛ ƃé gáa Yâwɛɛ ŋɔƃéla ma-pere? Maa-ƃelai dí pá ḿbɔ.” Nya ƃe Livai-ŋai kélee dí tìnaŋ mà.

²⁷È mò ǹyɛɛi, “Yâwɛɛ Ɣâla nyii gáa a Eezuɛ-ŋai Díɣâlai, è mò ǹyɛɛ, ‘Kákelee ká káƃoa-sɔkpɔ-ŋai síɣe ká lí mûui su gwaa kélee é kúla ziɣãŋ ŋí ma é lí gbéli ma, ká káƃarâai páa da kálêɣe-ni é pɛ́lɛ kálîa-ni dîa.’ ”

²⁸Nya ƃe Livai-ŋai dí gɛ̀ yɛ̂ɛ berei Mose è mò la diai. Dí núu pàa kpɔ́ a ŋ̀elei tí yɛ̂ɛ núu wála saaƃa (3,000).

²⁹Mose è mò dîa ǹyɛɛi, “Ka sâa kákpîŋ see a Ɣâla ŋɔsâla láa-soŋ tii-kɛ-ƃela a káƃarâai páa da kálîa-ni é pɛ́lɛ kálêɣe-ni dîa. Mɛni ma Yâwɛɛ a sâa lûwa láa kâa.”

³⁰Mose è mò ǹûai dîa a bôlu ma-ɣelei ǹyɛɛi, “Ka sɔnyɔ̂ŋ kɛ́tɛ kɛ́. Ǹyaŋ ŋa pâi tɛ̂i ǹyéei ma Yâwɛɛ pɔ́ naa, tãi da ŋa pâi kásɔnyɔ̂ŋ maa kpera-fe kɛ̂i.”

³¹Nya ƃe Mose è lì pôlu Yâwɛɛ pɔ́ naa ǹyɛɛ mai, “Ǹûai da sɔnyɔ̂ŋ kɛ́tɛ kɛ́. Da niŋa-sirɛ pɔkɔɔŋ kpɛtɛ dímɛni ma a gôo.

³²Kɛ́lɛ ŋa íkpera fé a gɛɛ í dísu-mɛni lɛɛ. A wàla kɛ́ tí, fɛ̂ɛ nɔ́ í ǹáa kúla gɔlɔi su í bɔ̃yɛɛi.”

³³Kɛ́lɛ Yâwɛɛ è mò Mose ma ǹyɛɛi, “Ǹúui a sɔnyɔ̂ŋ kɛ̀ ŋɛ́i-tuɛi, maa nuui ƃé ŋa pâi ǹáa kulâi ŋákɔlɔi ŋá.

³⁴Lí nâa a ǹûai ƃɛ́i ŋá nàa lɛ̀ yâi. É kɛ́ íkili ŋá a gɛɛ ŋákelai a pâi tɔɔ̂i kátuɛ. Kɛ́lɛ tãi ŋa pâi dínaa kâai lai, ŋa pâi dísɔnyɔ̂ŋ maa tɔ̂ŋ kpɛ̂i dîa.”

³⁵Nya ƃe Yâwɛɛ è kɔlɔ-fela pìli ǹûai sáma. Kpɛ́ni fêi, dí Eelɔŋ kɛ̀ é niŋa-sirɛ pɔkɔɔŋ kpɛtɛ dîɛ a díɣâla.