Read Kpelle Ɛsedɔ 33 Bible Online

Ɛsedɔ 33 - Kpelle bible

Ɛsedɔ 33

¹Yâwɛɛ è mò Mose ma ǹyɛɛi, “Ka ǹûai í díkùla Ize lɔii sui ka lí. Lí a dia ǹɔii su ŋá ŋ́gono tèe a gɛɛ ŋa pâi dɛɛ̂i Eberaɣɛ̃ɛ, Aise, Zeeka da dísuui su ƃelai pɔ́i.

²Ŋa pâi ŋákelai tɔɔ̂i kátuɛ. Ŋa pâi Keena-ƃelai kpɛ̂i da Amɔra-ŋai, Ita-ŋai, Pɛriza-ŋai, Iva-ŋai é pɛ́lɛ Zɛbusa-ŋai dîa.

³Ka liî sí-sɛŋ kpɛtɛ lɔii ma. Kɛ́lɛ kwa káa-ni kúfe pâi liî. Kpɛ́ni fêi, kákaa a wolii kpɔ̂lɔ-ƃela. Tãi da fa lâa kásu kara la berei ma.”

⁴Tãi ǹûai dí mɛnii ŋí mɛ̀ni lai, díkelee dí kɛ̀ wɔ̂lɔi díkoi pere, dífe dímaa ɣiri ní.

⁵Kpɛ́ni fêi, Yâwɛɛ è mò Mose ma a gɛɛ é mó dîa a gɛɛ díkaa a wolii kpɔ̂lɔ-ƃela. Ǹyaŋ a kɛ̀ da dîa-ni da lì a tãi kpua, a pâi dísu karâi. È mò dîa a gɛɛ í dímaa ɣîri sãai kúla dîa, gɛ̀ ní a pâi mɛnii kɔ̂lɔnii a pâi gɛ̂i a diai.

⁶Mɛni ma é síɣe tãi ma dí kɛ̀ la Olɛ yeei mai, dífe ŋɔ́nɔ dímaa ɣîri sãai too ní dîa.

⁷Mose a kâa Yâwɛɛ ŋɔsua-kɔlɔ seɣe pɛrɛ maa waai kùla mûui su é lí la kwaa kôya loŋ ma. È dòli a Ɣâla Yâwɛɛ ŋɔsua-kɔlɔ seɣe pɛrɛ maa waai. Ǹúui nyii kélee kɛ̀ ŋ̀wɛli a gɛɛ é lóno Yâwɛɛ pɔ́i, a kâa lì Bɛrɛ maa waai ŋí mu.

⁸Tãi Mose a kâa kɛ̀ liî la Bɛrɛ maa waai ŋí mui, ǹûai kélee da kâa dímu sìɣe dí tɔ́ɔ dísua kɔlɔ-seɣe pɛrɛ-ŋai lá dí kɛ́ gàa é lɛ́ɛ la zu é lɔ́.

⁹Tãi Mose a kâa lɔ̀ la Bɛrɛi ŋí mui, ŋ̀ele-kɔlɔŋ kolei a kâa yèŋ é tɔ́ɔ gbôŋ lá, Yâwɛɛ kɛ́ ƃo zu gɛ lòno Mose pɔ́.

¹⁰Tãi ǹûai da kâa ŋ̀ele kɔlɔŋ kolei kàa la Yâwɛɛ ŋɔsua-kɔlɔ seɣe-pɛrɛi lái, díkelee da kâa dímu sìɣe dí tɔ́ɔ dísua kɔlɔ-seɣe pɛrɛ-ŋai lá díkɛ Ɣâla fɛli.

¹¹Ǹyaŋ Yâwɛɛ da Mose da kâa lòno díkîe-ni pɔ́ yɛ̂ɛ núu da m̀arâŋ. Tãi Mose a kâa kùla la Bɛrɛ maa waai mu é pá pôlu mûui sui, a kâa ŋɔyee mu-nuui Zasua, nyii kɛ̀ a Nuŋ ǹóŋ-surɔ̂ŋ lɛ̀ɛ naa.

¹²Mose è mò Yâwɛɛ ma ǹyɛɛi, “Gáa ƃa mó m̀â a gɛɛ ŋá pá a ǹûai ŋí. Kɛ́lɛ ífe niî ǹɛɛ ní naa ŋá ǹúui kɔ́lɔŋ ƃa pâi kútɛɛi kwa ǹyaai. É máŋ kɛ́ tí, ƃa mó a gɛɛ í ŋ́gɔlɔŋ ǹaa ma, ǹyaŋ ŋa ƃɛlɛ-see sɔlɔ ƃó íyêei.

¹³Mɛni ma, ŋa ífɛlîi nâa, à kɛ̀ ŋa ƃɛlɛ-see sɔlɔ ƃó íyêei, ínîa-mɛnii lɛ́ nâa mâ a gɛɛ ŋá gɔ́lɔŋ ŋa ƃɛlɛ-see sɔlɔ ƃó íyêei. É lɛ́ɛ íkili ŋá a gɛɛ ǹûai ŋí díkaa máŋ a ínûa.”

¹⁴Yâwɛɛ è mò ǹyɛɛ, “Ŋa pâi kɛ̂i íkɔlɛ ŋá gɛ́ íyee é tɛ́ɛ íkpɔara-ƃelai dîa.”

¹⁵Mose è mò ǹyɛɛi, “À kɛ̀ ífe pâi kɛ̂i ŋ́gɔlɛ, gɛ̀ ní ífe kúkùla ƃɛ́.

¹⁶Da pâi gɔ́lɔnîi léŋ a gɛɛ ílii lâai kwa ínûai kúyêei? Kwa kâa-ni kúkɛɛ liî fé a kúkɛ a ǹûa da kpɛ́ni-ŋa ǹûai kélee díkaa ŋ̀éniɛi sui samai?”

¹⁷Nya ƃe Yâwɛɛ è mò Mose ma ǹyɛɛi, “Mɛnii ŋí ƃa lônoi é pîlaŋ mai, ŋa pâi gɛ̂i. Kpɛ́ni fêi, ǹíi lâai íyêei, ŋ́gɛ ƃò a íkɔlɔŋɔɔ a ǹɛ́lɛɛ.”

¹⁸Mose ǹyɛɛ mai, “Ŋa ífɛli í ífolo-laai lɛ́ mâ.”

¹⁹Yâwɛɛ ǹyɛɛ mai, “Ŋa pâi ŋásɔŋ-lɛlɛɛ-laai kélee kɛ̂i é tɛ́ɛ íŋɛi túɛ. Ŋa pâi Yâwɛɛ laai lɛ̂i yâ. Ŋa pâi ƃɛlɛ-see tɛɛ̂i diai pɔ́ ŋa pâi ƃɛlɛ-see tɛɛ̂i dípɔi, ŋá diai malôŋ káa ŋa pâi dímaloŋ kâai.

²⁰Kɛ́lɛ ífa pɔ̂ri ŋɛ́i kâai. Kpɛ́ni fêi, núu fa ŋ́gaa é lɛ́ɛ ɣele ma.

²¹Kwaa ma káa ŋ́gɔlɛ ƃɛ́i ƃa pâi tɔɔ̂i naa gɔnii ŋái.

²²Ŋáfolo-laai à kɛ̀ tɛɛ̂i, ŋa pâi ílɔ̂i gɔni woloi su ŋá ímɛi pɛ́lɛ a nyée é lɛ́ɛ la zu ŋá tɛ́ɛ.

²³Gɛ̀ ní ŋa pâi ńyee siɣêi ímɛi. A kɛ̀ tí, ƃa pâi mbôlu pere kâai, kɛ́lɛ ífa ŋɛ́i pere kàa.”