Read Kpelle Ɛsedɔ 37 Bible Online

Ɛsedɔ 37 - Kpelle bible

Ɛsedɔ 37

¹Bɛzale è Gbanaŋ-woo-kɛɛ maa gãlai kpɛ̂tɛ a kpitili-ƃela nyii ŋɔkôya è kɛ̀ a kɔ́ɔ-ƃɔlɔnii náaŋ, ŋɔŋa-kɛtɛ kɛ́ ƃò a kɔ́ɔ-ƃɔlɔnii feerɛ, ŋɔmɛi kôya kɛ́ ƃò a kɔ́ɔ-ƃɔlɔnii feerɛi.

²È gôo pù bôlu-pere da zu-pere, é gôo karaŋ tínaŋ mà é doo gîe.

³È gãlai siɣe-sɛŋ kpɛ̀tɛ a gôo é bú gãlai kpóŋ ŋá m̀éla naaŋɔɔ ma, veerɛ kɛ́ ƃò m̀éla tɔnɔ ma, veerɛ kpélii kɛ́ ƃò m̀éla kpéli ma.

⁴È wúru kôya feerɛ kpɛ̀tɛ a kpitili é gôo pú dîa.

⁵È ŋ̀úru kôya-ŋai lɔ̀ gãla-siɣe-sãai su a gɛɛ dí gãlai síɣe la.

⁶È gãlai mɛi-pɛlɛ-sɛŋ kpɛ̀tɛ a gôo tee-tee, ŋɔkôya kɛ́ ƃò a kɔ́ɔ-ƃɔlɔnii náaŋ, ŋɔŋa-kɛtɛ kɛ́ ƃò a kɔ́ɔ-ƃɔlɔnii feerɛ.

⁷È Ɣâla-taa kooŋ-sɛŋ pɔkɔɔŋ feerɛ ɣàle a gôo gãla lá-tɛ-sɛŋ gwaa feerɛ ma,

⁸dɔnɔ kɛ́ ƃò gãlai lá-tɛ-sɛŋ gwaa tɔnɔ ma, gbéli kɛ́ ƃò gwaa dɔnɔ ma. Gãla lá-tɛ-sɛŋ da bɔkɔ̂ɔŋ-ŋai dí kɛ̀ a díkpɛtɛɛ a gôo tɔnɔi tí.

⁹Bɔkɔ̂ɔŋ-ŋai koôŋ è sàla gãlai lá-tɛ-sɛŋ mɛi dí m̀ɛi pɛ́lɛ a díkoôŋ, díŋɛi páa díkîe-ni pɔ́ pere, díkɛ gãlai lá-tɛ-sɛŋ kàa.

¹⁰È teƃelei kpɛ̀tɛ a kpitili-ƃela, ŋɔkôya è kɛ̀ a kɔ́ɔ-ƃɔlɔnii saaƃa, ŋɔŋa-kɛtɛ kɛ́ ƃò a kɔ́ɔ-ƃɔlɔnii tɔnɔ da gbûra, ŋɔmɛi-koya kɛ́ ƃò a kɔ́ɔ-ƃɔlɔnii feerɛ.

¹¹È gôo tee-tee pù ŋ̀á é gôo karaŋ tínaŋ mà é doo gîei.

¹²È wúru-ƃela làa teƃelei wóli lá nyii ŋɔŋa-kɛtɛ è a yɛ̂ɛ núu yée ŋái tɔnɔ, é dínaŋ ma. È gôo tìnaŋ ŋ̀úru-ƃelai mâ é doo gîei.

¹³È teƃelei siɣe-sɛŋ kpɛ̀tɛ náaŋ a gôo é bú teƃelei sonoŋ naaŋɔɔ su tɛi-tɛi ƃɛ́i teƃelei kɔ́ɔ naaŋɔɔ è kɛ̀ naai.

¹⁴Teƃelei siɣe-sãai nyii-ŋai kɛ̀ ŋ̀úru kôya-ŋai mɛni ma teƃelei siɣe-mɛni mai, dí kɛ̀ ŋ̀úru-ƃelai kɔlɛ nyii kɛ̀ a dínaŋɔɔ teƃelei wóli lai.

¹⁵È kpitili wúru kôya-ŋa kpɛ̀tɛ a é gôo pú dîa nyii-ŋai kɛ̀ a teƃelei siɣe-wûru-ŋai.

¹⁶È sɛŋ-fôlo-ŋa kpɛ̀tɛ teƃelei mɛni ma a gôo tee-tee, peleti-ŋa, kɔ̂pu-ŋa, sane-ŋa da kawulu-ŋa nyii-ŋai kɛ̀ a gbele-sɛŋ sala maa tii-kɛ-sãai.

¹⁷È laŋpo see-wurui kpɛ̀tɛ a gôo tee-tee. È gɔ́ɔ da gbono ɣàle a kpɔ́kpɔ, é wúru-poa pɔkɔɔŋ-ŋa kpɛtɛ gbono ma a maa-ɣîri-sɛŋ.

¹⁸Laŋpo see-wurii ƃeɣêŋ è kɛ̀ ma lɔ́ɔlu mɛi da. Zaaƃa è kɛ̀ gwaa dɔnɔ ma, zaaƃa kɛ́ ƃò gbéli ma.

¹⁹È kɔ̂pu saaƃa kpɛ̀tɛ m̀eɣêŋ-ŋai kélee dîa tɛi-tɛi, nyii-ŋai kɛ̀ yɛ̂ɛ âmɔŋ wuru-poai.

²⁰È kɔ̂pu náaŋ kpɛ̀tɛ laŋpo see-wurii kpono ma nyii-ŋai kɛ̀ yɛ̂ɛ âmɔŋ wuru-poai.

²¹Kɔ̂pu-ŋai ŋí dɔnɔ è kɛ̀ mèɣeŋ lɔ́ɔlu mɛi dai veerɛ kélee koyanii laŋpo see-wurii kpono ma.

²²Laŋpo see-wurii da kɔ̂pu-ŋai é pɛ́lɛ m̀eɣeŋ-ŋai dîa dí kɛ̀ nɔ́ a dí kpɛtɛɛ a gôo tɔnɔ nyii dí ŋàle a kpɔ́kpɔi.

²³È laŋpo lɔ́ɔlu mɛi feerɛ kpɛ̀tɛ laŋpo see-wurii mɛni ma da maa-tii kɛ́-sãai a gôo tee-tee.

²⁴È laŋpo see-wurii da maa tii kɛ́-sãai kélee kpɛ̀tɛ a gôo tee-tee nyii ŋɔwiɛ è kɛ̀ a pãŋ ŋuŋ tɔnɔi (100).

²⁵È géreŋ-sɛŋ kúŋ nɛ̃ɛ kéreŋ ɣâla-teƃelei kpɛ̀tɛ a kpitili. Ŋɔkôya è kɛ̀ a kɔ́ɔ-ƃɔlɔnii tɔnɔ da gbûra. Ŋɔŋa-kɛtɛ kɛ́ ƃò a kɔ́ɔ-ƃɔlɔnii tɔnɔ da gbûra. Ŋɔmɛi-kôya kɛ́ ƃò a kɔ́ɔ-ƃɔlɔnii saaƃa. M̀ela kélee è kɛ̀ a bɔriɛɛ. Da m̀eɣêŋ-ŋai dí kɛ̀ nɔ́ a díkpɛtɛɛ tɔnɔɔ.

²⁶È gôo kpîŋ-kpîŋ pù ma. È bù mɛi-pere da gɔ́ɔ ma é dínaŋ ma é pɛ́lɛ m̀eɣêŋ-ŋai dîa. È gôo tìnaŋ ma é doo gîei.

²⁷È ziɣe-karaŋ feerɛi kpɛ̀tɛ a gôo é bú gôo-ƃelai ma nyii dínaŋɔɔi mai, mu-pere gwaa feerɛ ma a ŋ̀úru kôya-ŋai nyii-ŋai da kâa kɛ̀ ziɣe lai lɔ̂i.

²⁸È kpitili ŋ̀úru kôya-ŋai kpɛ̀tɛ é gôo pú dîa.

²⁹È ŋ̀ulɔ maa waai da bù núu ŋûa da géreŋ-sɛŋ kúŋ nɛ̃ɛi kpɛ̀tɛ. È dí sùmo a gîe yɛ̂ɛ berei wúru-ya kpɛtɛ-nuu a gɛ̀ lai.