Read Kpelle Ɛsedɔ 39 Bible Online

Ɛsedɔ 39 - Kpelle bible

Ɛsedɔ 39

¹Dí seɣe lɛ́lɛɛ-ŋai kpɛ̀tɛ a yee bûluŋ kɛ́ɛ, yee kpɔ̂lu m̀u-tɛiɣɛɛ da ƃála-leɣa kpɔ̂lu zâla láa soŋ-ƃelai mɛni ma nyii-ŋai dí doo dîa dítii kɛ́-mɛni ma Gwaa ma waai ma. Dí Eelɔŋ ŋɔsâla láa soŋ-seɣe-ŋai kpɛ̀tɛ yɛ̂ɛ berei Yâwɛɛ è nɛ̀ la Mose mai.

²Dí ɛfɔi kpɛ̀tɛ a gôo, yee bûluŋ kɛ́ɛ, yee kpɔ̂lu m̀u tɛiɣɛɛ da ƃála-leɣa kpɔ̂lu.

³Dí gôo ɣàle a m̀éla ŋá kɛ́tɛ, dí m̀éla-ƃela a bɛlɛɛ, dí bala a yee bûluŋ kɛ́ɛ, yee kpɔ̂lu m̀u tɛiɣɛɛ da ƃála-leɣa kpɔ̂lu.

⁴Dí ɛfɔi kâraŋ-ɣɛli kɛ̀ m̀éla veerɛ ma a gɛɛ núu é gbulɔ̂ŋ gîe ma.

⁵Bɛ̂ti palaa lɛ́lɛɛ kɛ̀ mai dí bàla nɔ́ da ǹyaa tɔnɔ gîe ma a gôo yee bûluŋ kɛ́ɛ, yee kpɔ̂lu m̀u tɛiɣɛɛ da ƃála-leɣa kpɔ̂lu yɛ̂ɛ berei Yâwɛɛ è nɛ̀ la Mose mai.

⁶Dí kɔni sɔ̃ɔ kpanaŋɔɔ-ŋai sàa dí dímaa tínaŋ a gôo. Dí Eezuɛ ǹônii láa pɔ̃yɛ dîa yɛ̂ɛ berei kɔni-saa-nuu a ŋɔkɔni sàa lai.

⁷Dí dísɔ̀lɔ ɛfɔi kâraŋ ŋá ɣɛli-ŋai dîa a gɛɛ dí kɛ́ a kili-too-ŋa kɔni-ŋa Eezuɛ ǹônii mɛni ma yɛ̂ɛ berei Yâwɛɛ è nɛ̀ la Mose mai.

⁸Dí geŋe lá seɣe kpuai kpɛ́tɛ a yɛrɛ-pere nɔ́ yɛ̂ɛ berei dí ɛfɔi kpɛ́tɛ la a gôo, yee bûluŋ kɛ́ɛ, yee kpɔ̂lu m̀u tɛiɣɛɛ da ƃála-leɣa kpɔ̂lu.

⁹M̀éla kélee è kɛ̀ a bɔriɛɛ bɛlɛɛ gîe la. Ŋɔkôya è kɛ̀ a îŋse lɔ́ɔlu mɛi náaŋ, Ŋɔŋa-kɛtɛ kɛ́ ƃò a îŋse lɔ́ɔlu mɛi náaŋ.

¹⁰Dí kɔni sɔ̃ɔ kpanaŋɔɔ pù naa a ŋɛli náaŋ, nyii-ŋai kɛ̀ a kɔni sîi tɛi-tɛi. Gɔni saaƃai dí bù ŋɛlii maa-ŋuŋ mai láa ƃa, lubi, tópazi, da ganɛ.

¹¹Dí zaaƃa pú ŋɛlii veerɛi ma, nyii-ŋai da kɛ́ dîa, ɛmɛra, safari, da damaŋ.

¹²Dí zaaƃa pú ŋɛlii zaaƃai ma, nyii-ŋai da kɛ́ dîa, tɔkwii, agete, da ameta.

¹³Dí zaaƃa pú ŋɛlii náaŋ ma, nyii-ŋai da kɛ́ dîa, bɛlaa, kaneliaŋ, da zasipa. Dí gɔni-ŋai ŋí kélee ma tînaŋ a gôo.

¹⁴Dí Eezuɛ ǹônii láa pɔ̃yɛ gɔni puu káo feerɛi ŋí kélee ma tɛi-tɛi a gɛɛ dí tɔ́ɔ Eezuɛ ŋɔsuu puu káo feerɛi pɔ́ɔ ŋá.

¹⁵Dí yɔlɔ kpɛ̀tɛ a gôo kpîŋ-kpîŋ yɛ̂ɛ ɣɛli, geŋe lá seɣe kpuai mɛni ma.

¹⁶Dí gôo kalaŋ feerɛ kpɛ̀tɛ dí geŋe la seɣe kpuai gólo kɛ́ ma a gôo mɛi-pere sonoŋ feerɛi su.

¹⁷Dí nyɔlɔ feerɛi lɔ̀ geŋe lá seɣe kpuai ŋɔkólo-ŋai su.

¹⁸Dí gôo yɔlɔ feerɛ ŋuŋ kpulûŋ gôo kalaŋ feerɛi ma. Dí díkpùlɔŋ máŋ a bere sii ŋí ɛfɔi karaŋ ŋá ɣɛli-ŋai dîa nàa túɛ pere.

¹⁹Dí geŋe lá seɣe kpuai gólo feerɛ kpɛ̀tɛ a gôo dí bú mu-pere-ƃelai kwára-pere sonoŋ veerɛi su.

²⁰Dí kólo feerɛ kpɛ̀tɛ ŋɔ́nɔ a gôo dí bú ɛfɔi kâraŋ ŋá seɣe-ŋai mu nàa túɛ pere bɛ̂tii kpulɔ̂nii mɛi-pere.

²¹Yɛ̂ɛ berei Yâwɛɛ è mò la Mose mai. Dí geŋe lá seɣe kpuai ŋɔkólo-ŋai kpùlɔŋ ɛfɔi ŋɔkólo-ŋai dîa a ɣɛli bûluŋ kɛ́ɛ a gɛɛ geŋe lá seɣe kpuai é láa bɛ̂tii mɛi-pere a gɛɛ vé fúloŋ.

²²Ǹyokpoi gáa ɛfɔi mɛni mai dí gbɛ̀tɛ a seɣe bûluŋ kɛ́ɛ.

²³Dí ǹyokpoi kɔŋ su tèe a núu ŋuŋ lɔ̂i. Dí gɔŋ su pàla dí dínaŋ ma a gɛɛ vé fàla.

²⁴Dí pɔmegurane pɔkɔɔŋ-ŋa kpɛ̀tɛ ǹyokpoi wóŋ lá a yee bûluŋ kɛ́ɛ, yee kpɔ̂lu m̀u tɛiɣɛɛ da ƃála-leɣa kpɔ̂lu.

²⁵Dí gôo taniŋ-ŋa pù pɔmegurane pɔkɔɔŋ-ŋai loai dí dínaŋ nyokpoi wóŋ lá.

²⁶Dí dániŋ-ŋai pù pɔmegurane pɔkɔɔŋ-ŋai loai tɛi-tɛi nyokpoi wóŋ lá dí dínaŋ ma dísâla láa soŋ-tii mɛni ma yɛ̂ɛ berei Yâwɛɛ è mò la Mose mai.

²⁷Nyɛkɛ-ŋai díkaa Eelɔŋ da ǹônii-sinaa mɛni mai, dí díkpɛ̀tɛ seɣe kole nɛnɛ-fɛfɛɛ lɛ́lɛɛ.

²⁸Dí zâla láa soŋ-nuu kɛ́tɛi ŋɔƃɔrɔi kpɛtɛ a seɣe kole nɛnɛ-fɛfɛɛ lɛ́lɛɛ. Dí m̀ɔrɔ kpéli-ŋai kpɛtɛ máŋ a seɣe kole nɛnɛ-fɛfɛɛ lɛ́lɛɛ-ŋa. Dí díbɛrɛ kpua-ŋai kpɛtɛ a seɣe kole nɛnɛ-fɛfɛɛ lɛ́lɛɛ.

²⁹Dí bɛ̂ti kpɛtɛ a seɣe kole nɛnɛ-fɛfɛɛ lɛ́lɛɛ, yee bûluŋ kɛ́ɛ, yee kpɔ̂lu m̀u tɛiɣɛɛ da ƃála-leɣa kpɔ̂lu. Ǹyɛrɛ kɛ́-ƃelai dí bɔ̃yɛ a ǹɛ́lɛɛ yɛ̂ɛ berei Yâwɛɛ è mò la Mose mai.

³⁰Dí gôo kalaŋ maa waai kpɛ̀tɛ zâla láa soŋ-nuu kɛ́tɛi ŋɔƃɔrɔi mɛni ma. Dí ŋ̀óo-ŋai ŋí pɔ̃yɛ ma a gôo kpîŋ-kpîŋ, “Maa Waâi Yâwɛɛ ŋɛ́i.” Dí bɔ̃yɛ yɛ̂ɛ berei yɛrɛ kɛ́-nuu a kɔli ma pɔ̃yɛ lai.

³¹Nya ƃe dí ŋiri m̀ɔrɔi túɛ-pere a ɣɛli bûluŋ kɛ́ɛ, yɛ̂ɛ berei Yâwɛɛ è mò la Mose mai.

³²Ɣâla ŋɔpɛ́rɛi tɔɔ tîi è nâa kpɛ̀ɛ. Eezuɛ-ŋai dí mɛnii kélee kɛ̀ Yâwɛɛ è mò Mose ma a gɛɛ dí gɛ́i.

³³Dí pà a Bɛ́rɛi Mose pɔ́ da maa sãai kélee, gólo-ŋai, bîlaŋ-wuru-ŋai, ŋ̀úru kôya-ŋai, zeɣe-soŋ-wûru-ŋai da bîleki-ŋai.

³⁴Dí pà a mɛi-pɛlɛ-sãai nyii-ŋai kɛ̀ a m̀ála sirɛ kɔlɔ kpɔlu da zua kɔlɔ lɛ́lɛɛi, da zeɣei gáa Gwaa Maa Waai mɛni mai.

³⁵Dí pà a Gbanaŋ-woo-kɛɛ maa gãlai da ziɣe-wuru-ŋai é pɛ́lɛ mɛi-pɛlɛ-sɛŋ ma.

³⁶Teƃelei da maa sãai kélee é pɛ́lɛ gbóloi ma dí dɛ̀ɛ Ɣâla pɔ́i.

³⁷Dí pà máŋ a laŋpo see-wurii nyii kɛ̀ a gbɛtɛɛ a gôo kpîŋ-kpîŋ, da laŋpo-ŋai é pɛ́lɛ dímaa-sãai kélee dîa da laŋpo wulɔi.

³⁸Dí pà a zâla sɛŋ kéreŋ-teƃelei nyii kɛ̀ a gbɛtɛɛ a gôo, bu-ŋua-wulɔi, géreŋ-sɛŋ kúŋ nɛ̃ɛi da Bɛ́rɛi lá seɣei.

³⁹Dí pà a m̀ara-teƃelei nyii m̀ara-ƃela palaai káa mai, ziɣe-wuru-ŋai, da maa tíi-kɛ-sãai kélee é pɛ́lɛ m̀ara-sɛŋ-foloi ma da zee-sɛŋ.

⁴⁰Dí pà máŋ a zeɣe-ŋai nyii-ŋai díkaa zeɣe-koraŋ mɛni mai da zeɣe-soŋ wuru-ŋai é pɛ́lɛ maa bîleki-ŋai dîa góraŋ lá seɣei, maa ɣɛli-ŋai é pɛ́lɛ dɔɔ-wuru-ŋai dîa da maa tíi-kɛ-sãai kélee bɛ́rɛi mɛni ma.

⁴¹Dí pà a zâla láa soŋ tii kɛ́-seɣe maa waa-ŋai nyii-ŋai díkaa Eelɔŋ mɛni ma da ǹônii-sinaai. Dí pà a dia dítii kɛ́-mɛni ma Gwaa Maa Waai ma.

⁴²Díi-ŋai kélee Yâwɛɛ è mò Mose ma a gɛɛ Eezuɛ-ŋai dí gɛ́i, dí gélee kɛ̀.

⁴³Mose è díi-ŋai kélee kàa, é gáa a gɛɛ ǹûai dí gɛ̀ nɔ́ yɛ̂ɛ berei Yâwɛɛ è mò la mai. Ǹyaŋ è lûwa làa dîa.