Read Kpelle Ɛsedɔ 4 Bible Online

Ɛsedɔ 4 - Kpelle bible

Ɛsedɔ 4

¹Nya ƃe Mose è zu tòo ǹyɛɛ, “Kɛ́lɛ dífe pâi lâai a ńyãa kpaa máŋ dí díwoli tɔ́ɔ ŋ̀óo mà. Kpɛ́ni fêi, da pâi môi dîyɛɛi, ‘Yâwɛɛ fé pá ní ípɔ.’ ”

²Yâwɛɛ è mò mà ǹyɛɛi, “Lé ƃé tí íyêei?” Mose ǹyɛɛ mai, “Sia-wuru.”

³Yâwɛɛ ǹyɛɛ mai, “Dòo ǹɔii mâ.” Nya ƃe è dòo ǹɔii mâ é pene a kali. Nya ƃe Mose è yào ma é pú.

⁴Kɛ́lɛ Yâwɛɛ è mò Mose ma ǹyɛɛi, “Zoŋ a ŋóŋ.” Nya ƃe Mose è zòŋ a ŋ̀óŋ é ŋɔ́nɔ kɛ̀ ǹyêei a sia-wûru.

⁵Yâwɛɛ è mò mà ǹyɛɛi, “Nyíŋi kɛ́ ǹûai ŋ̀ɛ́i a gɛɛ dí láa la a gɛɛ ńyãa ƃa Yâwɛɛ nyii gáa a dínâŋ-ni Díɣâlai, Eberaɣɛ̃ɛ Ŋɔɣâlai, Aise Ŋɔɣâlai da Zeeka Ŋɔɣâlai ŋá pà ípɔ.”

⁶Yâwɛɛ è ŋɔ́nɔ mò ma, “Íyee lɔ́ íseɣei mu.” Mose è ǹyée lɔ̀ ŋɔseɣei mu. Tãi è gùla lai, gbôdo è ǹyée kòle kpɔ́ yɛ̂ɛ yee fũa.

⁷Yâwɛɛ è mò ma ǹyɛɛi, “Íyee lɔ́ pôlu íseɣei mu.” È ǹyée lɔ̀ pôlu ŋɔseɣei mu. Tãi è ǹyée kùla lai è ŋɔ́nɔ kɛ̀ pôlu a gbɛtɛɛ yɛ̂ɛ berei è kɛ̀ la a bɔlɔɔi.

⁸Yâwɛɛ è mò ma ǹyɛɛi, “Dà wàla láa a yá kpaa máŋ da wàla díwoli tɔ́ɔ ŋ̀ɛi-kɛ-maai maa-ŋuŋ ma, da pâi lâai a veerɛi.

⁹Dà wàla láa máŋ a ŋ̀ɛi-kɛ-maa feerɛi ŋí kpaa máŋ da wàla díwoli tɔ́ɔ íwooi ma, gɛ̀ ní Ǹâai Ya-leei da kɔɔ í bú ǹɔii ma. Ǹyái a pâi penêi a ŋãa.”

¹⁰Kɛ́lɛ Mose è mò Yâwɛɛ ma ǹyɛɛi, “Óo Yâwɛɛ, fa pɔ̂ri kpɔŋ-su lòno kɛ̂i. Fé niî wɔ́lɔ da kɛ́ ní ŋáfulu-laai su. Fé niî máŋ pɔ̂ri ní lônoi é síɣe tãi ma í lòno la ḿbɔi. Ńônoi maa tínaŋɔ̂ɔi.”

¹¹Nya ƃe Yâwɛɛ è mò ma ǹyɛɛi, “Gbɛ̂ɛ ƃé núu-kpune lá kɛ̀ mai? Gbɛ̂ɛ ƃa núu kɛ̀ a mûgbɛ-nuu kpaa máŋ woli-tiniŋ-nuu? Kpaa máŋ gbɛ̂ɛ ƃa núu kɛ̀ gɛ́ kwaa kâa kpaa máŋ a ŋɛi-pu-nuu? Ńyãai a Yâwɛɛ, ńyãa fêi?

¹²Mɛni ma lí. Ŋa pâi kpɔnîi yâ í lóno. Ŋa pâi m̀ɛnii lɛ̂i yâ ƃa pâi môi.”

¹³Kɛ́lɛ è mò mà ǹyɛɛi, “Óo ŋánuu-namui, kpera yɛ̂ núu da kpɛ́ni tɛ́ɛ.”

¹⁴Nya ƃe Yâwɛɛ è ǹíi ŋwàna ǹyɛɛ mai, “Ilîa Eelɔŋ fé naa nyii gáa a Liivai-nuui? Ŋa ǹá fúloŋ a pɔ̂ri lônoi a ǹɛ́lɛɛ. Ǹyaa ká tí pâi máŋ a gɛɛ é íkaa. A íkàa, ǹíi a pâi nɛ̃ɛ̂i.

¹⁵M̀ɛnii ƃa ŋ̀wɛ̂lii í mói, ƃa pɔ̂ri môi mà a gɛɛ é mó. Ŋa pâi kpɔnîi káfeerɛ kâa ŋá m̀ɛnii ƃó kâa ka pâi m̀ôi da m̀ɛnii ka pâi gɛ̂i.

¹⁶A pâi lônoi ǹûai pɔ́ ímɛni ma. A pâi kɛ̂i a íla-gbɔ̀, í ƃò yɛ̂ɛ ŋɔɣâla íkɛ m̀ɛnii ƃò mà a pâi môi.

¹⁷Ǹyaŋ zia-wurii ŋí a pâi kɛ̂i íyêei nyii ƃa pâi ŋɛ́i-kɛ-maa-ŋai kɛ̂i lai.”

¹⁸Mose è lì pôlu m̀ɔ̂lɔ Zɛtulo pɔ́ naa ǹyɛɛ mai, “Kpera yɛ̂, tɔɔ ŋá lí pôlu Ize ŋá ŋánûai naa káa à kɛ̀ díkaa niî ɣele ma.” Nya ƃe Zɛtulo è mò ma ǹyɛɛi, “Lí lii-see su.”

¹⁹Nya ƃe Yâwɛɛ è mò Mose mà Midiaŋ ǹyɛɛ mai, “Lí pôlu Ize. Kpɛ́ni fêi, diai kélee kɛ̀ ŋ̀wɛ̂lii dí ípaai, da saa.”

²⁰Nya ƃe Mose è ŋɔnɛnîi sìɣe da ǹônii-sinaai é dísee wɛlɛ-sôo mɛi dí lí pôlu Ize lɔii su. Mose è lì a zia-wurii Ɣâla è mò ma a gɛɛ é ziɣei.

²¹Nya ƃe Yâwɛɛ è mò Mose ma ǹyɛɛi, “Ƃà lì pôlu Ize lɔii su, ŋ̀ɛi-kɛ-maai ŋí kélee kɛ́ Gâloŋ ŋɛ́i-tuɛ nyii-ŋai ŋá dímaa wála-wala tɛ̀ɛ ípɔi. Kɛ́lɛ ŋa pâi ǹíi su kpananii a gɛɛ vé ǹûai lɛ̀ɛ naa dí lí.

²²Gɛ̀ ní m̀ó Gâloŋ ma yɛ̂ɛ Yâwɛɛ ǹyɛɛi, ‘Eezuɛ káa a ǹóŋ-surɔ̂ŋ maa-ŋuŋ.

²³Mɛni ma ŋa mó yâ a gɛɛ í ńoŋ-surɔ̂ŋ lɛ́ɛ naa é lí é ḿvɛli. Kɛ́lɛ ƃà wàla ǹɛɛ naa é lí, gɛ̀ ní ŋa pâi íloŋ-surɔŋ maa-ŋuŋ paâi.’ ”

²⁴Mose-ni kɛ́ɛ liî, gbínii è pɛ̀lɛ dîa. Ƃɛ́i dí nyìi naai, Yâwɛɛ è pà naa Mose pɔ́ a gɛɛ é Mose paa.

²⁵Nya ƃe Zipola è kɔni-ƃela ŋáliɛ sìɣe é Mose ǹóŋ-surɔŋ sée la kpono ma, é maa kɔlɔ-kpuai tí síɣe é zee Mose kɔ́ɔ ma ǹyɛɛi, “Tɔ̃yâ ma, íkaa a ŋásurɔ̂ŋ nyii ŋá ǹɛ̂wo maa kɔ̃ɔ a ŋ̀ãai ŋí.”

²⁶Nya ƃe Yâwɛɛ è Mose malôŋ kàa vé baa ní. Maa mɛni ƃe Zipola è mò la ǹyɛɛi, “Íkaa a ŋásurɔ̂ŋ nyii ŋá ǹɛ̂wo maa kɔ̃ɔ a ŋ̀ãai ŋí, zee-kpono-mai sârai.”

²⁷Yâwɛɛ è mò Eelɔŋ ma ǹyɛɛi, “Lí vɛ̃ɛ-kpâlaŋ sú a gɛɛ í Mose túɛ tɔ́ɔ.” Nya ƃe è lì da Mose dí koyâŋ Ɣâla ŋɔyéei ma, é kpulɔ̂ŋ ma.

²⁸Nya ƃe mɛni-ŋai kélee Yâwɛɛ è Mose tɛ̀ɛ lai è zu kùla Eelɔŋ ma da ŋ̀ɛi-kɛ-maa-ŋai kélee è mò ma a gɛɛ é gɛ̂i.

²⁹Mose da Eelɔŋ dí lì dí Eezuɛ nuu-pɔlɔ-ŋai kélee ŋá tɛ́ gîe ma.

³⁰Nya ƃe Eelɔŋ è mɛni-ŋa kélee ƃò nyii-ŋai Yâwɛɛ è mò Mose mai. Mose é ŋ̀ɛi-kɛ-maa-ŋai kélee kɛ́ ǹûai ŋɛ́i.

³¹Ǹûai dí làa a mɛni-ŋai Eelɔŋ è m̀oi. Tãi dí mɛ̀ni la a gɛɛ Yâwɛɛ è Eezuɛ-ŋai nàa kàa lai a gɛɛ ŋɔ́nɔ a dímɛni-solii káai, dí díŋuŋ ma pìlaŋ dí Ɣâla fɛli.