Read Kpelle Ɛsedɔ 5 Bible Online

Ɛsedɔ 5 - Kpelle bible

Ɛsedɔ 5

¹Nàa pôlu ma Mose da Eelɔŋ dí lì Gâloŋ pɔ́ naa dîyɛɛ mai, “Yâwɛɛ nyii gáa a Eezuɛ Ŋɔɣâlai è mò ǹyɛɛi, ‘Ŋánûai lɛ́ɛ naa dí lí a gɛɛ dí kúu kɛ́ ḿâ vɛ̃ɛ-kpâlaŋ su.’ ”

²Kɛ́lɛ Gâloŋ è mò ǹyɛɛ, “Yâwɛɛ ƃa gbɛ̂ɛ nyii ŋa pâi ŋ̀óli tɔɔ̂i mà a gɛɛ ŋá Eezuɛ-ŋai lɛɛ naa dí líi?”

³Nya ƃe dí mò dîyɛɛi, “Kwa Ibulu-ŋai Díɣâlai kú kúkîe-ni kàa. Mɛni ma kpera yɛ̂ ǹɛ́ɛ naa kú lí vɛ̃ɛ-kpâlaŋ su a ɣele-kûu saaƃa sia a gɛɛ kú sâla kúla Yâwɛɛ Kúɣâlai ma. A wàla kɛ́ tí, a pâi kúpaâi a kɔlɔ-fela kpaa máŋ a kɔ́.”

⁴Kɛ́lɛ Ize kaloŋ è mò dîa ǹyɛɛi, “Mose da Eelɔŋ, ká káa ǹûai siɣêi dítii mɛi lé mɛni ma? Luɛ-ŋa, ka lí pôlu kátii ma.”

⁵Gâloŋ è mò ǹyɛɛ, “Ka gáa, ǹûai ŋí da nâa táma da tɛ́ɛ ǹɔii-ƃelai dîa. Ka ŋ̀wɛ̂lii ká díkpera dítii ma?”

⁶Diai kɛ̀ Eezuɛ-ŋai mɛi a gɛɛ dí tíi kɛ́ a diai, Gâloŋ è mò dîa da díikɛ-ƃelai nyii-ŋai kɛ̀ a Eezuɛ-ŋai ǹyɛɛ diai,

⁷“Káfe ŋɔ́nɔ kala kpâla tɛ̀ɛ ǹûai pɔ́ bɔ̂rɔi kane-mɛni ma yɛ̂ɛ berei ká kɛ gɛ̂i la a maa-ŋuŋ. Ka tɔɔ dí lí ganai dîa kpîŋ.

⁸Kɛ́lɛ bɔ̂rɔ kanei dí kɛ̀ gbɛtɛ̂i a maa-ŋuŋ, káfe da kula ma. Tɔɔ díkɛ nɔ́ gbɛtɛ̂i. Kpɛ́ni fêi, dínyɛ̃-nyɛŋɔɔ̂i. Mɛni ƃé da wɔ̂lɔi la dîyɛɛi, ‘Kwaa lí kú sâla kula Kúɣâlai ma.’

⁹Ka díkɛ dí tíi kɛ́ a gbanaŋɔɔ é tɛ́ɛ bɔlɔi ma. Díŋɛi à kɛ̀ díi ma, dífe pâi díwoli tɔɔ̂i lɛ́ɛ-lono kɛ́-woo-ŋa dîa.”

¹⁰Nya ƃe díi-mɛi-ƃelai da díyee mu-ƃelai tii-kɛ ƃelai dí lí dí mó ǹûai dîa dîyɛɛi, “Gâloŋ è mò kûa ǹyɛɛi, ‘Káfe ŋɔ́nɔ kala-kpala tɛ̀ɛ ǹûai pɔ́.

¹¹Tɔɔ dí lí ganai ƃɛ́i kélee da pɔ̂ri gâai naai. Kɛ́lɛ fɛ̂ɛ nɔ́ bɔ̂rɔ kanei díkaa gbɛtɛ̂i dí gbɛ̀tɛ káfe da kula ma.’ ”

¹²Nya ƃe Eezuɛ-ŋai dítàa-taa Ize lɔii su a gɛɛ dí kala-kpala kɔ́ri.

¹³Díi mɛi-ƃelai dí kɛ̀ dífũa-fũai dîyɛɛi, “Bɔ̂rɔ-kanei ká kɛ̀ gbɛtɛ̂i fólo tɔnɔ ma tãi kú kɛ̀ kala-kpala tɛ̀ɛi la kápɔi, ka kɛ́ nɔ́ gbɛtɛ̂i.”

¹⁴Díi mɛi-ƃelai nyii-ŋai Gâloŋ è díkɛ̀ Eezuɛ-ŋai mɛi, da díyee mu-tii-kɛ ƃelai nyii-ŋai dia máŋ dí dípù Eezuɛ-ŋai mɛi, dí dímarê kɛ́ dîyɛɛi, “Bɔ̂rɔ kanei ka gbɛtɛ fólo mai, káfe sâa gbɛ̀tɛ ní lé mɛni ma?”

¹⁵Nya ƃe díi mɛi-ƃelai da díyee mu-ƃelai dí pà Gâloŋ pɔ́ dîyɛɛ mai, “Í tùa tí a íyee mu-ƃelai lé mɛni ma?

¹⁶Dífe kala-kpala tɛɛ ní kúpɔ, ǹyaŋ dîyɛɛ fɛ̂ɛ nɔ́ kú bɔ̂rɔi kane yɛ̂ɛ berei kwa kâa gɛ̀ lai. Nya ká ŋí da kúlôkwai kúai a íyee mu-ƃelai. Kɛ́lɛ ínûai sɔŋ ƃe.”

¹⁷Kɛ́lɛ è mò dîa ǹyɛɛi, “Kányɛ̃-nyɛŋɔɔ̂i. Mɛni ƃé ká mò kâai, ‘Kwaa lí kú sâla kúla Yâwɛɛ ma.’

¹⁸Ka lí pôlu kátii ma. Dífe pâi kala-kpala tɛɛ̂i kápɔ. É máŋ kɛ́ tí fɛ̂ɛ nɔ́ bɔ̂rɔi ka gane fólo mai, ká gàne.”

¹⁹Díi mɛi-ƃelai dí nâa gàa a gɛɛ mɛni-kpanaŋ ká tí kɛ dípôlu. Tãi dí mò la dîa a gɛɛ bɔ̂rɔ-kanei da gbɛ̀tɛ fólo mai fɛ̂ɛ nɔ́ dí gbɛ̀tɛi.

²⁰Tãi dí kùla la Gâloŋ pɔ́ naai, dí Mose kàa da Eelɔŋ, nyii-ŋai kɛ̀ dímaa kpɛ̂nii.

²¹Ǹûai dí mò dîa dîyɛɛi, “Yâwɛɛ a mɛnii kâai ká gɛ̀i, ǹyaŋ a pâi tɔ̂ŋ kpɛ̂i kâa. Kpɛ́ni fêi, ka gɛ́ Gâloŋ da ŋɔtíi mɛi-ƃelai da kúkpɔara. Ka ƃóa-sɔ̂kpɔ lɔ́ díyêei a gɛɛ dí kúpaa.”

²²Nya ƃe Mose è ŋɔ́nɔ tìnaŋ Yâwɛɛ pɔ́ naa pere ǹyɛɛi, “Óo Yâwɛɛ, í tùa a ǹûai ŋí a nyɔmɔɔ lé mɛni ma? Í ńdɛ̀ɛ ŋaŋ lé mɛni ma?

²³É síɣe tãi ma ŋá pà la a gɛɛ ŋá lóno Gâloŋ pɔ́ ílaai sui, gáa nɔ́ niî ínûai sonîi a nyɔ́mɔɔ. Ǹyaŋ ífe kpɔŋ ní ínûai dîa a dɔnɔ kpîŋ!”