Read Kpelle Zôo 14 Bible Online

Zôo 14 - Kpelle bible

Zôo 14

¹“Ǹúui-nyii kélee nɛnî è maa sɔlɔ ƃôi, víi kpɛɛ̂i, pɔ̂ri maa fé mì. Ŋɔfúlu-laai láa fɛ̂ɛi a mɛni kpɔ̂lu, m̀ɛni ma, a sâa a maa félaa.

²Ŋɔkɛ̀ ɣéniɛi kɔ́ɔ a pîlaŋ nɔ́ yɛ̂ɛ wúru pôa, nàa à kɛ̀ tí é kpála. A lâŋ nɔ́ yɛ̂ɛ núu ninîŋ.

³Ɣâla, íkpaaŋɔ̂ɔi, í gɔ́lɔŋ a gɛɛ ŋ́gaa ƃɛ́? Ya pâi liî a ńyãa m̀ɛni-sâa ƃó-kerei mu í ŋá mɛnii ŋá tée?

⁴Sɛŋ maa-waa fa pɔ̂ri kulâi sɛŋ da kponôi nyii maa fé waa nii yɛ̂ɛ nuu-kpunei.

⁵Yaâ gbɛtɛ íkili-ŋa a gɛɛ í núu-kpune ŋɔkɛ-ɣeniɛi su kpua. Ya núu-kpune ŋɔkɛ-ɣeniɛi kóyɛŋ láa a gɛɛ vé tɛ̀ɛ naa ma.

⁶Mɛni ma, ye tée bôlu é víi tɔ́ɔ, é ŋɔtíi kpânaŋ ŋaa-nɛ̃ɛ kula.

⁷“À kɛ̀ núu da a wúru tèe, kili kɛ-zu káa maa-nuui tí yêei a gɛɛ ŋ̀úru-ŋumei tí a pâi sôoi ŋɔ́nɔ pôlu. Kili kɛ-zu a kɛ́ ǹyéei a gɛɛ ŋ̀úru-ŋumei tí a pɔ̂ri ƃɔɔ̂ŋ-nii é ŋɔ́nɔ kɛ́ ɣele ma.

⁸É máŋ kɛ́ tí, ŋ̀úru-samei a pâi nâmui ǹɔii mu é lɛ́ɛ la zu é lûla.

⁹A pɔ̂ri ƃɔɔ̂ŋ-nii a nina à kɛ̀ nɔ́ a yá-loŋ sɔlɔ ƃô.

¹⁰Núu-kpune a sàa ŋɔtãi a kpɛ̂ɛ. Ǹyaŋ à kɛ̀ kwa sàa, mí ƃé kwa kɛ̂ naai?

¹¹Núu-kpune ŋɔkɛ-ɣeniɛi káa nɔ́ yɛ̂ɛ póa a kpàla, kpaa máŋ yɛ̂ɛ ya-lee à kpèra ɣilîŋ-nii.

¹²Bere-sii ŋí nɔ́ ƃé núu-kpune a sàa la, pere fa ŋɔ́nɔ kɛ̀ naa é pá pôlu. Tãi nɔ́ ŋ̀ele-kɔlɔŋ káa la naai, zaa-nuui fa pɔ̂ri mu siɣêi kpaa máŋ é mu-siɣe saa yêei.

¹³“À kɛ̀ nɔ́ ya pɔ̂ri ńoôi saa-táa í mɛi káa, é lɛ́ɛ la zu ílii-ŋwanai ŋá é yéŋ ítãi láa mà, ɣele ɣɛɛlu ƃé ŋa pâi gɛ̂i saa-taai ífe nîa mà.

¹⁴À kɛ̀ núu da a sàa a ŋɔ́nɔ pà pôlu? Ŋa pâi lɛɛ̂i tɔɔ̂ni ƃɛ́ é lɛ́ɛ la zu núu da é pá é ḿaa tée.

¹⁵À kɛ̀ ya ŋ̀wɛ̂lii ńyãai a íkpɛtɛ-sɛŋ í ńdoli, gɛ̀ ní ŋa pâi fâai.

¹⁶À kɛ̀ tí, gɛ̀ ní ya pâi ḿɛi kâai. Ífe ŋɔ́nɔ pâi ḿaa kpɛɛ̂i ŋá sɔnyɔ̂ŋ mɛni ma.

¹⁷Ya pâi ŋá sɔnyɔ̂ŋ pûi ƃɔrɔ su í ǹáa ɣíri, ífa ŋɔ́nɔ zìɣe a ńzɔŋ.

¹⁸“Ǹyaŋ ǹyée kɛ́tɛi a pâi pûi zu, gɔni-ŋai kélee dí kúla dílâai.

¹⁹Ǹyái a pâi gɔni-ŋai kélee fũai, ǹyá-kpoloŋ a pâi ǹɔii mâ kɔɔ̂i. Gɛ̀ ní ya pâi núu-kpune ŋɔkili-kɛ-zui su-karai.

²⁰Í tɔɔ̂i núu-kpune ma a tãi kélee, mɛni ma a pâi saâi. A kɛ̀ saâi, ŋ̀ɛ́i maa a fâleŋ.

²¹Ǹyaŋ à kɛ̀ da ƃaa kɛ́-maa tɛ́ɛ ǹônii-sinaai pɔ́ va kɛ a gɔ́lɔŋɔɔ, kpaa máŋ à kɛ̀ da ƃâa kùla dîa va kɛ̂ a gɔ́lɔŋɔɔ.

²²Gbɔ́ɔi sɛŋ-soli maai nɔ́ ƃé a kɛ̂ a gɔ́lɔŋɔɔ. À kɛ̀ tí gbîŋ nɔ́ ƃé a malôŋ sèe.”