Read Kpelle Zôo 15 Bible Online

Zôo 15 - Kpelle bible

Zôo 15

¹Tema-nuui Ɛlifa è Zôo wóo su tòo ǹyɛɛ mai,

²“Zôo, táre-nuu kɛ́ɛ yɛ̂ɛ yá fé kɛ̀ lônoi nyii ŋuŋ fé ma.

³Zôo, ífe lòno nɔ́ kpɛ́ni, kpɛ́ni fêi, ífe pâi sɛŋ da kulâi ílono-woo su.

⁴Ya Ɣâla ŋɔyao-mai mɛni foânii yâ. Ya Ɣâla fɛli mɛni kɛ́ a gbanaŋɔɔ ǹûai ŋɛ́i.

⁵Ya lônoi a bere-sii tí kpɛ́ni fêi, í ŋwana-lɔ̂ɔi. Ínɛŋ káa íla feerɛ.

⁶Ḿve ímɛnii ŋá tée-ni. Íkpɔɔi wooi ƃé m̀ɛnii lɛ̂ɛ yâ.

⁷“Zôo, yá ƃa núu-kpune maa-ŋuŋ nyii díwɔlɔ maa sɔlɔ ƃôi? Díwɔlɔ í maa sɔlɔ ƃô Ɣâla é lɛ́ɛ pâi ǹyée-ŋai kpɛtɛ̂i?

⁸Tãi Ɣâla è ŋɔkoyɛ̂ŋ tòo la Ɣâla-taai íkɛ̀ naa? Í íwoli tɔ̀ɔ m̀ɛnii ma è kɛ̀ môi? Ya tɔnɔ nɔ́ ƃa ǹúui nyii dáreɛi?

⁹M̀ɛnii í gɔ́lɔŋ da fé naa nyii kúfe gɔ́lɔŋ. Ǹyaŋ m̀ɛnii nyii kélee í gɔ́lɔŋ, kúa máŋ kú gɔ́lɔŋ.

¹⁰Táre-ƃela pɔlɔ-pɔlɔ-ŋa nyii-ŋai díkɛ̀ a dítɛɛ ínâŋ mai ƃé wɔ́lɔ dárei ŋí lɛ̀ kûa.

¹¹“Íkaa niî ŋanɛ̂nɛ da kpɛ́ni wɛ̂lii é tée Ɣâla ŋɔi mâ? Kúlòno ípɔ a maa-yeŋ pere.

¹²Lé mɛni ƃé ílii a kɔ̂i la ípɔi? Lé mɛni ƃé ya íŋɛi-gao kulâi la kûai?

¹³Lé mɛni ƃé ílii ŋwânai la Ɣâla ma íkɛ wóo-ŋa kɛ́ɛ tí ƃò mai?

¹⁴“Núu da fé naa nyii maa waai. Núu da fa pɔ̂ri kɛ̂i a deniŋ ƃôɔɔ Ɣâla ŋɛ́i-tuɛ.

¹⁵Gáa a tɔ̃yâ a gɛɛ Ɣâla fé láa ní a gbîŋ kela-ŋai. Dí maa fé waa ní ŋ̀ɛi-tuɛ.

¹⁶Núu-kpune láa fɛ̂ɛi a sɔnyɔ̂ŋ. A sɔnyɔ̂ŋ kɛ̀ a zu kɛ́tɛ yɛ̂ɛ núu ƃé yá kpelêi.

¹⁷“Íwoli tɔ́ɔ. Ŋa pâi mɛni da ŋáa lɛ̂i yâ nyii ŋaâ gaai.

¹⁸M̀ɛnii dáre-ƃelai dí mò ḿâi ŋá gɔ́lɔŋ. Zɛŋ-lɛɛi nyii dáre-ƃelai dí gɛ̀i è kùla dínâŋ-ni yêei.

¹⁹Ɣâla è ǹɔii ŋí tɛ̀ɛ nɔ́ dáre-ƃelai pɔ́ dítee-tee. Ǹyaŋ lɔii da kpɛ́ni su nuu da fé tá gɛ́ ní dí kúla Ɣâla pôlu.

²⁰“Ɣâla a ŋ̀wana-lɔ̂ɔ-ƃelai kula maa kɛ̂. Da pâi lɛɛ̂i mɔ̃lɛ̂i é lɛ́ɛ la zu dísaa.

²¹A núu maa yao-woo sii támaa mɛni. Tãi nɔ́ a gàa la yɛ̂ɛ sɛŋ ƃé ŋuŋ ma ƃôɔɔi lai, maa tãi tí ƃé ŋúma-ƃela da pɛ̂lɛ la mà.

²²Pere-sii kélee da fé naa ǹúu nyɔ́mɔɔi tí é pú saa yêei. Núu da a kɛ̂ nɔ́ maa kpɛnîi a gɛɛ é baa a ƃóa-sɔ̂kpɔ.

²³À kɛ̂ ɣilinîi gɛ́ gɔ́nɔŋ kɔ̀ri. È gɔ́lɔŋ a gɛɛ núu da a pâi baâi.

²⁴Mɛni kpɔ̂lu a pâi lâai mà gbínii su. Ǹíi a pâi toôi pôlu, malôŋ é tóo mà yɛ̂ɛ kâloŋ kpɔara-ƃela da kɔ́ pɛ̀lɛ mà.

²⁵È Ɣâla maa fôo a gɛɛ va pɔ̂ri tɔɔ̂i ŋ̀ɛ́i namu su. È nɛ̀ a gɛɛ a pɔ̂ri tɔɔ̂i Ŋ̀wála-wâla kélee Ɣalai ma.

²⁶Ŋ̀wana-lɔ̂ɔ-nuui a gbîŋ maa kɔ̃̀ɔ é kirɛ̂ siɣe gɛ́ lì pɛlɛ̂i Ɣâla ma.

²⁷Gbono kɛ̂tɛi, dɔ́ɔ, gɛ́tɛɛ gbîŋ ŋɛ́i.

²⁸“Gáa taa pîleŋ ŋá nyii zu-ƃelai da wɔ́lɔ pui. Gɛ́ nyìi pɛ́rɛ-ŋa mu nyii maa fé nɛ̃ɛ ní núu é nyíi mui.

²⁹Vé pâi lɛɛ̂i a dɔɔ a tãi su kôyaa. Ŋɔtɔɔ-sãai su a pâi karâi.

³⁰Vé pâi pûi gbínii yêei. A pâi kɛ̂i yɛ̂ɛ wúru, ǹyaŋ ŋɔŋ a pâi ŋ̀owo kérenii. Ɣâla a pâi vɛ̂ɛi a ǹɛ̂wo.

³¹Vé gíli tɔ̀ɔ ŋɔtɔɔ-sãai dîa. A gɛ̀ tí, da pâi bɛlɛ̂i.

³²Gáa yɛ̂ɛ wúru-woŋo a kpàla ŋɔtãi é lɛ́ɛ pâi serîi nyii vé ŋɔ́nɔ pâi kɛ̂i a ŋúnu.

³³A pâi kɛ̂i yɛ̂ɛ ƃá-kpɔmɔ nyii m̀á a pû mù é lɛ́ɛ pâi kpɔlûi, boa kɛ́ pù yɛ̂ɛ ɔle-wuru.

³⁴Núu-kpulu nyii vé láa-ni a Ɣâlai a pâi kpɛɛ̂i. Ŋɔŋ a pâi dípɛrɛ-ŋai kérenii nyii dí dɔ̀ɔ a yee-pɛlɛ ǹá sɛŋ-kaoi.

³⁵Ǹûai ŋí ƃé da mɛni kpɔ̂lu kpɛ̀tɛ díkɛ mɛni nyɔ́mɔɔ kɛ̀. Ǹyaŋ dílaa fɛ̂ɛi a núu pɛlɛ mɛni-ŋa.”