Read Kpelle Zôo 19 Bible Online

Zôo 19 - Kpelle bible

Zôo 19

¹Nya ƃe Zôo è Beeda wóo su tòo ǹyɛɛi,

²“Lé mɛni ƃé kákaa ńii toôi la pôlu a kálono támaai ŋí, ká kɛ́ gɛ̀ ńii kɛ́ tòo pôlu a gɛɛ ŋíi?

³Kákaa nɔ́ ńarânii a ɣele kélee, ŋumɛ fé ká ŋɛ́i a gɛɛ m̀ɛni-ŋai kákaa môi káa gɛ̂i ŋ́gɛ mɔ̃lɛ?

⁴À kɛ̀ ŋa mɛni nyɔ́mɔɔ kɛ́, ká mɛni da fé zu.

⁵Ka gâai yɛ̂ɛ sɛŋ ƃé ká kɛ̂tɛi é tɛ́ɛ ḿâ. Ka gâai yɛ̂ɛ ŋa mɔ̃lɛi kpɛ́ni fêi ŋá mɛni nyɔ́mɔɔ kɛ̀.

⁶Ka kɛ́ a gɔ́lɔŋɔɔ a gɛɛ Ɣâla ƃé gɛ̂i ŋ́gɛ mɔ̃lɛ. A ŋɔdeɣaŋ kpíniŋ a ńyãa.

⁷Ŋa tóli ƃôi a gɛɛ ká kpɔŋ ḿâ nuu da fa ŋ̀oli tɔ̀ɔ ḿâ. Ŋa tóli ƃôi kpɔŋ mâa mɛni ma, kɛ́lɛ núu da fé naa é kpɔŋ ḿâ a teniŋ ƃô-pere.

⁸Ɣâla a siɣãŋ tínaŋ mâ a gɛɛ fé pɔ̂ri tɛɛ̂i. A ńɛɛ kpînii a gɛɛ ḿve ńdɛ̀ɛ-pere kàa.

⁹A ŋátɔɔ-laai da ŋáƃaa kɛ́-maa kélee kúla ńyêei.

¹⁰A ŋ̀wolo-wolo yɛ̂ɛ núu a pɛ́rɛ-kâŋ wòlo. A ŋákili tɔɔ-maai ƃúleŋ yɛ̂ɛ núu a wúru ƃùleŋ.

¹¹Ŋɔlii ŋwânai a ŋ́gerenîi. A kɔ̂i ḿbɔ yɛ̂ɛ núu ƃé kɔ̂i ŋɔkpɔara-nuu pɔ́.

¹²Ɣâla a ŋɔkɔ-kuluƃa-ŋai tɛ́ɛ a gɛɛ dí pɛ́lɛ ḿâ. Da gbã́ tée ŋápɛrɛi ma díkɛ díkpîŋ kpɛ̀tɛ a gɛɛ dípɛlɛ ḿâ.

¹³“Ɣâla a gɛ́ ŋánûai da díkpôlu tɔ̀ɔ ḿâ. Diai kɛ̀ a ŋgɔ́lɔŋɔɔi da nia ḿâ.

¹⁴Ŋánûai da ḿarâai da dípôlu tɔ̀ɔ mâ.

¹⁵Diai kélee ŋá ńyee sèe dímui da nia ḿâ. Ǹɛyâai da tíi kɛ̀ ŋápɛrɛi mui dífa ŋɔ́nɔ díwoli tɔ̀ɔ ḿâ. Ŋ́gaa nɔ́ nâa díŋɛi yɛ̂ɛ ŋɔ̃́ya.

¹⁶Nalôŋ tíi kɛ̂i ŋápɛrɛi mui ŋá máŋ dóli, va ŋ́oo su tòo a nɛ̃ɛ ma ŋá pɛ́lɛ a gɔ́ɔ.

¹⁷Ǹá-kuŋ a nâa nyɔ́ŋ ŋánɛnîi sũai. Ńîa kpaa máŋ ńêɣe sinaai da dímaa kôya ḿâ.

¹⁸Ŋ́gaa nâa a ɣɛ́lɛ-maa sɛŋ ǹîa-pɛlɛɛ-ŋai yêei. Ŋá máŋ mu-siɣe a gɛɛ ŋá sía, da kɛ̂ ɣɛ̂lɛi ḿâ.

¹⁹Ḿarâai kwa dîa-ni kwa kâa kúlaa mìi gîe mai da dípôlu tɔɔ ḿâ. Diai kélee ŋá kɛ̀ a díwɛliɛɛi, da dípôlu tɔɔ ḿâ.

²⁰Ŋa kpála ŋ́gɔlɔ sɛ̂lɛŋɔɔ nɔ́ ḿâ. Naa è lɛ̀ɛ nɔ́ té a gɛɛ ŋá sáa.

²¹“Óo káai a ḿarâai, kákpera kâa ká malôŋ káa, kpɛ́ni fêi Ɣâla a ńzoŋ a ńdoo ǹɔii ma.

²²Lé mɛni ƃé ka ƃâa kulâi la ḿâ, yɛ̂ɛ berei Ɣâla a gɛ́ la a ńyãai? Lé mɛni ƃé ka mɔ̃lɛi ŋí la a ŋanaai?

²³“Eêi pɔ̂ri kɛ̂i a sɛŋ núu da é ŋ́oo pɔ̃yɛɛ kɔlɔ ma nyii zu fa pɔ̂ri karâi.

²⁴Tɔɔ núu da é bɔ̃yɛɛ kɔni ma a kɔlɔ-pɔ̃yɛɛ kɔli a gɛɛ zu fa lâa kara la.

²⁵Kɛ́lɛ é máŋ kɛ́ tí, ŋá gɔ́lɔŋ a gɛɛ núu da káa naa nyii pâi ḿaa kɔ̃ɔ̂i. Nya ƃe pâi ŋá lónoi gbɛɛ-ŋai kɛ̂i.

²⁶Kɛ́lɛ berei máŋ kɔlɔ-fela a ŋ́gbono kélee su kara lai, ŋa pâi Ɣâla kâai.

²⁷Ńyãa kpîŋ ŋa pâi gâai a ŋ́gbîŋ ŋɛi-gao. Ǹyaŋ ŋa pâi gâai a ŋ́gɔlɔŋ nuu. “Ńii a pâi tôoi pôlu, kpɛ́ni fêi ká mo kâai,

²⁸‘Kwa pɔ̂ri gɛ̂i léŋ é mɔ̃lɛ a ŋánaa? Ǹyaa kpîŋ ƃé pà a mɔ̃lɛ-laai gbîŋ pɔ.’

²⁹Ka yao Ɣâla ŋɔmɛni ŋáteɛi ma. Kpɛ́ni-fêi Ɣâla ŋɔlii ŋwânai a pâ a mɛni ŋáteɛɛ. M̀ɛni ma kɛ́ a gɔ́lɔŋɔɔ a gɛɛ Ɣâla a mɛni ŋátèe sɔnyɔ̂ŋ-ƃela sáma.”