Read Kpelle Zôo 21 Bible Online

Zôo 21 - Kpelle bible

Zôo 21

¹Nya ƃe Zôo è Zofa wóo su tòo ǹyɛɛi,

²“Ŋ̀aa-nɛnɛi nɔ́ ya pɔ̂ri gɛ̂i ḿîi ƃa í íwoli tɔ́ɔ ḿâ a ǹɛ́lɛɛ.

³Ka kálii kpéle ká káwoli tɔ́ɔ ḿâ a ǹɛ́lɛɛ. Ŋà kpɛ̀ɛ a lónoɔɔ, gɛ̀ ní ka pɔ̂ri ɣɛ́lɛ maa kulâi ŋ́gbonôi.

⁴“M̀ɛnii ŋa zaâi, vé pîlaŋ-ni núu-kpune ma. M̀ɛni ƃé fé pâi ńii maa sonîi la.

⁵Ka ŋ́gaa. M̀ɛnii kɛ̂i a ńyãai gáa a laa kpâla maa mɛ̂ni nyii a pɔ̂ri gɛ̂i ká faa pɔ̂ri lônoi.

⁶Ŋá máŋ ŋ́gili-ŋa sía é pîlaŋ ŋá mɛni kpɔ̂lui mâ, ŋa yào kpɔ́ a ŋánaa. Ŋ́gbonôi gwaa kélee a kɛ̂ kpɛ̃linii ḿâ a ŋánaa.

⁷“Lé mɛni ƃé Ɣâla a ǹɛɛ̂i la naa a gɛɛ ŋ̀wana-lɔ̂ɔ-ƃelai díkɛ nàmu ɣele mâ é lɛ́ɛ la zu dípɔlɔ díkɔ̃liŋ támaa kɛ́ ƃò mai?

⁸Dínîa-pɛlɛɛi da kɛ̂ díkɔlɛ mâ é lɛ́ɛ la zu dílônii díwɔ̂-lonii díkula zu.

⁹Da kɛ̂ dípɛrɛ-ŋai mû lii-see su, dífa yào a gɛɛ núu da a pâi dípɛrɛi wôloi. Ɣâla fa dímɛnii ŋá tèe a ŋɔsia-tuaŋ.

¹⁰Tãi nɔ́ ŋ̀wana-lɔ̂ɔ-nuui ŋɔniŋa-sirɛi a tɛ̂ la záa-ŋai dîai da díkaa a ǹɛ́lɛɛ. Ŋ̀wana-lɔ̂ɔ-nuui ŋɔniŋa sâa-ŋai da díkaa kpɔ́ a ǹɛ́lɛɛ.

¹¹Dínîa-pɛlɛɛi da kɛ̂ pêle kɛ̂i díkɛ kîrɛ sìɣe yɛ̂ɛ ƃála-lonii-ŋa díkɛ mãla.

¹²Dínîa-pɛlɛi da kɛ̂ wule tôoi nûa díkɛ nyɛ́yɛŋ ɣàle da kɔnîŋ. Dínîa-pɛlɛɛi díkɛ mãla ƃɔɔ fɛ́ɛ woo ma.

¹³Ŋ̀wana-lɔ̂ɔ-ƃelai da nâmu ɣele mâ díkɛ ƃò a dítɔɔ. Ǹyaŋ dífa mɔ̃lɛ díkɛ sàa.

¹⁴“Ŋ̀wana-lɔ̂ɔ-ƃelai da kɛ̂ Ɣâla mà ‘Tée kúpôlu. Kúfe ŋ̀wɛlii a gɛɛ kú mɛni da kɔ́lɔŋ é pîlaŋ yâ.

¹⁵Gbɛ̂ɛ ƃa Ŋ̀wála-wâla kélee Ɣalai nyii ŋ̀wɛ̂lii a gɛɛ kú ǹîa mɛni kɛi? Kwa vɛ̀li, lé ƃé kwa zɔlɔ ƃô zui?’

¹⁶Gáa díkili-ŋa a gɛɛ díkpîŋ wala-wala-laai ƃé da tíi kɛ̂i la. Fa ŋ́gili ŋá sìa yɛ̂ɛ dia a dɔnɔ kpîŋ.

¹⁷“Lé tãi ƃé ka tá gáa ŋ̀wana-lɔ̂ɔ-ƃelai díŋɔŋ é líiŋ? Lé tãi ƃé ka tá gáa la kpalo é ƃéla dîai? Ɣâla fé tá ǹíi ŋwána-ni dîa a gɛɛ dí mɔ̃lɛ.

¹⁸Dífe yɛ̂ɛ kala a gɛɛ vãai é tɛ́ɛ a dia. Vãai a pɔ̂ri koôŋ-nii a dia?

¹⁹“Í mò yɛ̂ɛ Ɣâla a pâi dísɔnyɔ̂ŋ maa tɔ̂ŋ kpɛ̂i dínîa-pɛlɛi dîa. Tɔɔ Ɣâla é ǹâŋ-ƃelai kula maa kɛ́ a gɛɛ dí dísɔnyɔ̂ŋ kɔ́lɔŋ.

²⁰Tɔɔ ŋ̀wana-lɔ̂ɔ-ƃelai ŋí dia kpîŋ dí díkpîŋ sɔnyɔ̂ŋ maa mɔ̃lɛ-laai sɔlɔ ƃó. Tɔɔ dí Ŋ̀wála-wâla kélee Ɣalai ŋɔlii ŋwânai kɔ̂ɔŋ.

²¹Dífa kɛ̂ a díkpaaŋɔɔ a gɛɛ dísɛŋ da lɛɛ dínîa-pɛlɛɛi mɛni ma dí lɛ́ɛ pâi saâi.

²²Núu da fa pɔ̂ri sɛŋ lɛ̂i Ɣâla ma kpɛ́ni fêi, wála-wala káa ǹyêei ŋ̀âla-taa kela-ŋai mɛi.

²³“Núu da-ŋa dí kɛ̀-ɣeniɛi a lɛ̂ɛ a ǹɛ́lɛɛ é lɛ́ɛ la zu dísaa.

²⁴A mii-sɛŋ lɛ́lɛɛ támaa mìi. Gɔlɔ kɛ́ ƃò mà nɛ̃ɛ-nɛ̃ɛ.

²⁵Ǹúui da-ŋa lii-see fa kɛ̂ díyêei dí kɛ̀-ɣeniɛi su. Da lɛ̂ɛ mɛni kpɔ̂lu su é lɛ́ɛ la zu dí sáa.

²⁶Kɛ́lɛ núu kélee a pâi saâi dí díloo, gbèli-ŋai dí dímii.

²⁷“Ŋá ká kákili-ŋa sîai kɔ́lɔŋ é pîlaŋ ḿâ. Ka gbɛ̀tɛ a gɛɛ ká mɛni nyɔ́mɔɔ kɛ́ a ńyãa.

²⁸Ká mare kɛ̂ɛ kɛ̀ kâai, ‘Ŋ̀wana-lɔ̂ɔ kaloŋ tí ŋɔpɛ́rɛi kɔɔ?’

²⁹Ka diai marê kɛ́ da sîa bere-ŋai mai, a gɛɛ dí ká kíli-ŋa pono.

³⁰Ɣâla a ǹíi ŋwàna à kɛ̀ pâi nûa kula maa kɛ̂i, zɔnyɔ̂ŋ-ƃelai ƃé a dí malôŋ kàa.

³¹Núu da fé naa a gɛɛ é zɔnyɔ̂ŋ-ƃelai dí sɔnyɔ̂ŋ ƃó dîa kpaa máŋ é dí kula maa kɛ́.

³²Ǹyaŋ tãi da kɛ̂ liî la molôŋ lai, ǹûa da kɛ̂ naa díkɛ m̀olôŋ mɛi kâa.

³³Núu-kpulu kɛ́tɛ a kɛ̂ zàa mâ. Ǹɔii a kɛ̂ líi nɛ̃ɛ̂i kulâi a gɛɛ é ǹyée sée mu.

³⁴“Ka ŋáa nɛnɛ̂i a ƃoo-woo-ŋa. Mɛni-ŋai nyii kélee kaâ ŋ́oo su tòo lai, gáa a lɛ́ɛ tèe-tee.”