Read Kpelle Zôo 26 Bible Online

Zôo 26 - Kpelle bible

Zôo 26

¹Nya ƃe Zôo è ŋ̀óo su tòo a ɣɛ́lɛ maa kuláa kponôi père, ǹyɛɛi,

²“Yâa kpɔŋ mâa tɛ̀ɛ núu fíi kpɛɛ kɛ́ɛ yɛ̂ɛ ńyãa ḿbɔ nyii pɔ̂ri fé ḿîi.

³Berei káa yâa kili-ŋa pôno tɛ̀ɛ la ƃoo-nuu kɛ́ɛ yɛ̂ɛ ńyãa ḿbɔi. Yaâ táre támaa lɛ́ ḿâ.

⁴Gbɛ̂ɛ ƃé dáre-ŋai ŋí tɛ̀ɛ ípɔi? Gbɛ̂ɛ ƃé gili-ŋa sîa sii ŋí lɛ̀ yâ íkɛ lòno a gɛɛ ŋii?

⁵“Zaa mɔ̂leŋ-ŋai díkaa ǹɔii da ǹyái mu perei, da kpɛ̃lînii.

⁶Ɣâla káa saa-taa gwaa kélee kâai. Ǹaa mɛni da fa lôo ma.

⁷Ɣâla è yá-ŋua ɣele-kɔlɔŋ da ŋ̀éniɛi sɛ̀lɛŋ.

⁸È ŋ̀ele-kɔlɔŋ kolei láa fɛ̀ɛ a tuna ǹyaŋ duna-yai fé niî ŋ̀ele-kɔlɔŋ ƃɔ́ ní.

⁹È ŋ̀aloŋ mɛi pɛ̂lɛ a ŋ̀ele-kɔlɔŋ kolei.

¹⁰È kpíni da kwaa ponoɔɔ loai lâa yúo mɛi.

¹¹À kɛ̀ Ɣâla a ŋ̀ele-kɔlɔŋ sòŋ-sãai maa yào, da kɛ̂ kpɛ̃lînii a yao.

¹²Ɣâla è yúo su-sɛŋ maa pɔlɔ-pɔlɔi nyii da kɛ̂ ma Leɣai pâa a ŋɔwála-walai é gɛ́ yúo é see tɔ̀ŋ.

¹³Ɣâla è ŋ̀ele-kɔlɔŋ ma fɛ̂ɛ a nɛwo nàa é pono é yúo su kali kɛ́tɛi páa a ǹyée.

¹⁴M̀ɛnii nyii-ŋai ŋ́gaa sâa môi díkaa nɔ́ a dûa-pere-ŋai sṹa loŋ, ǹyaŋ m̀ɛnii nyii kélee kwa m̀ɛnii é pîlaŋ mɛni-ŋai dîa a gɛ̀i, díkaa nɔ́ a niɣɛ-niɣɛ. Gbɛɛ ƃa pɔ̂ri Ɣâla ŋɔkɛ́tɛ-laai ŋá kâai.”