Read Kpelle Zôo 30 Bible Online

Zôo 30 - Kpelle bible

Zôo 30

¹Ǹîa-pɛlɛɛi nyii-ŋai dífe tɛ́-ni ḿbɔi díkaa nâa ɣɛ́lɛ-maa kulâi ŋ́gbonôi. Dínâni kpɛ́ni-kpɛniɛi kpɔ́ a sɛŋ nyii ḿva pɔ̂ri dí marê kɛ̂i a gɛɛ dí kpɔŋ mâa tɛɛ ŋáɣila-ŋai pɔ́ a gɛɛ dí ŋáƃála-ŋai mɛi kaa.

²Lé mɛni lɛ́lɛɛ ƃé ŋa pɔ̂ri gulâi núu kɛ́ɛ-ŋai tí kponôi, díkpono su a gbâa sàa.

³Ǹûai ŋí díkɛ̀ kpɔ́ a díkôloɔɔ díkɛ sàa a puru, díkɛ wúru-same kulâi ǹɔii kpalai ma vɛ̃ɛ-kpâlaŋ su a kpíni díkɛ mìi.

⁴Díkɛ̀ wúru-ŋa wêyenii vɛ̃ɛ-kpâlaŋ su díkɛ zame mîi. É máŋ kɛ́ yɛ̂ɛ wawa-wuru-same nyii nɛ̃ɛ pɔ̂ɔ fé mai.

⁵Ǹûa díkɛ̀ lâɣii dîa díkɛ dí kpɛ̀ yɛ̂ɛ da kɛ̀ ŋúma-ƃela kpɛ̂i.

⁶Díkɛ̂i nɔ́ ƃé kɛ̀ a nóa-ŋai su da kɔni wôlo-ŋa.

⁷Díkɛ̀ wɔ̂lɔi yɛ̂ɛ fɛnɛ-sãa ƃé wɔ̂lɔi kwaa kôyaa ma. Da díŋa tɛ̀ gîe ma kpɔlɔ mu.

⁸Díkaa a ǹûa kpɛ́ni-kpɛni ŋá kpɛ̂ɛ dîa. Nyii-ŋai dí díkpɛ dílɔii ma.

⁹Ǹyaŋ dínîa-pɛlɛɛi da pá díkɛ ɣɛ́lɛ-maa kûla ŋ́gbônoi. Ŋ́gaa nɔ́ nâa a díɣɛlɛ maa-sɛŋ.

¹⁰Da tûa a ńyãa a nyɔ́mɔɔ da dípôlu tɔɔ ḿâ. Ḿɛlɛ è kɛ̀ a gbɛ́ɛ díkoi da ŋ́gàa díkɛ dílâya pù.

¹¹Ɣâla a ŋákerâŋ ɣɛli tée. M̀ɛni ma pɔ̂ri fé ŋɔ́nɔ mî. Tãi dí ŋ́gàa lai, dí dínîa kɛ̀ a ńyãa.

¹²Díkɛ a díkpulu dípɛlɛ ḿâ. Dí ŋ́gɛ̀ ŋá pú. Dípɛ̀lɛ ḿâ díkɛ ŋ̀wɛli dí ḿbaa.

¹³Dí ḿberêi pù a gɛ́ɛ ḿva lâa pú la. Dí gɛ̀ ƃâa é kúla ḿâ. Núu da fé naa é kpɔ́ŋ mâ tɛɛ ḿbɔ.

¹⁴Ziɣãŋ nyii kɛ̀ ḿaa kɔ̃ɔ̂i, dí ŋ̀olo. Dí kɛ̀ pâi ḿâ yɛ̂ɛ ya ɣîliŋ.

¹⁵Ŋá yào kpɔ́ a ŋánaa é tɛ́ɛ ńii pôlu. Ḿaa kɛ́-maai nûa da kâa dɛ̀ɛ ḿbɔi a tɛɛ̂i nɔ́ yɛ̂ɛ fãa a tɛ̀ɛ. Gili kɛ́-zui nyii gáa ńyêei é pîlaŋ ŋáwala-wala-laai mai a tɛɛ̂i nɔ́ yɛ̂ɛ ŋ̀ele-kɔlɔŋ kolei.

¹⁶Ŋákɛ̀-ɣeniɛi a nâa pá kpɛɛ̂i. Ŋámɔ̃lɛ-laai kɔ̃yɛŋ fé mà.

¹⁷Kpíni a pɛ̀lɛ, ŋ́gao kélee a kɛ̂ sôlii ŋ́gbonôi. Zɛŋ sôli-maai a mɔ̃lɛi kpɔ́ gɔ́yɛŋ fé ma.

¹⁸Ɣâla è ńzòŋ kpɔ́ a ŋáseɣei a wála-wala-laa é kánaŋ kpɔ́ ŋ́gɔŋ ma yɛ̂ɛ yɛkɛ-kɔŋ lá koro-te a kànaŋ nâmu kɔŋ mâ.

¹⁹Ɣâla a ńdoo ǹɔii ma bɔ̂rɔi su ŋa kɛ́ yɛ̂ɛ muluŋ da luu.

²⁰Óo Ɣâla, ŋá ítòlii, kɛ́lɛ, ífe íwoli tɔɔ̂i ḿâ.

²¹Ya tûa kpɔ́ a ńyãa a ŋwana-lɔ̂ɔ-pere. Ya ḿɔ̃lɛ a íwala-wala-laai kélee.

²²Ya gɛ́ vãai a ńziye a koôŋ a ńyãa, gɛ́ ńdòo-too.

²³Ŋá gɔ́lɔŋ a gɛɛ íkaa nâa liî a ńyãa dɔ̃yâ kanai ƃɛ́i núu kélee à sàa a lî naai.

²⁴Lé mɛni ƃe ƃa pɛ̀lɛ la ǹúui mà nyii gáa mɔ̃lɛi, ǹúui nyii va pɔ̂ri mɛni da kɛ̂i fɛ̂ɛ nɔ́ é fɛli kɛ́ kpɔŋ mâa mɛni mai?

²⁵Diai mɔ̃lɛi ŋá dímaa wɔ̂lɔ kɛ̀ a tãi támaa. Diai sɛŋ-da fé díyêei, ŋá dímalôŋ sèe.

²⁶Tãi kili kɛ-zu è kɛ̀ la ńyêei a gɛɛ ŋá mɛni lɛ́lɛɛ sɔlɔ ƃôi, lii-too pôlu ƃé ŋá zɔlɔ ƃô.

²⁷Ńii káa nɔ́ kpɛ̃linii ŋ́goi. Ŋá mɔ̃lɛ-laai su kɛ́ kɛ̀tɛ nɔ́ a ɣele kélee.

²⁸Ńii toɔɔ̂i kpɔ́ pôlu, vóloi fa pɔ̂ri toôi é ŋánɛnɛ. Ŋá tɔ̀ɔ daa-ƃelai díkɔyɛ̂ŋ su ŋ́gɛ ǹûai marê kɛ̀ a gɛɛ díkpɔŋ mâa tɛ̀ɛ ḿbɔ.

²⁹Ŋ́gaa nɔ́ yɛ̂ɛ fɛ̃nɛ-sɛŋ, ŋá maloŋ-too-maai su, kpaa máŋ yɛ̂ɛ kpúɛŋ.

³⁰Ŋ́gɔlɔ a tɛ̂i ḿâ ŋ́olo-woloŋ kɛ́ ƃò. Ŋ́gɔlɔ a fãa kpɔ́ ḿâ a ŋánaa ŋ́gbonoi kɛ́ kèreŋ.

³¹Ŋá ɣale-sãai wóo a kɛ́ a wɔ́lɔ-woo, ŋáturu-wooi kɛ́ ƃò yɛ̂ɛ saa wɔ̂lɔ kɛ́-ƃela wóo.