Read Kpelle Zôo 32 Bible Online

Zôo 32 - Kpelle bible

Zôo 32

¹Zôo m̀araa saƃaai kɛ́ɛ da gáa a gɛɛ è kɛ̀ a maa waa gbîŋ ŋɛ́i, dí nâa dí mɛi sâa dífe ŋɔ́nɔ ŋ̀óo su too ní a dɔnɔ kpîŋ.

²Nya ƃe Ɛliu nyii kɛ̀ tɔɔ̂-ni naai è nâa ǹíi ŋ̀wana Zôo ma kpɛ́ni fêi, Zôo è kɛ̀ môi a gɛɛ vé niî mɛni nyɔ́mɔɔ da kɛ́ ní. Kɛ́lɛ Ɣâla ƃé mɛni nyɔ́mɔɔ kɛ̀. Ɛliu è kɛ̀ a Barasiɛ ǹóŋ. Barasiɛ kɛ́ ƃò a Buzi-nuu. È kɛ̀ a Laŋ ŋɔsuui su nuui da.

³Ɛliu è ǹíi ŋwàna Zôo ǹâoi-ni dîa, kpɛ́ni fêi dífe pɔ̂ri ní môi a gɛɛ Zôo è kɛ̀ mɛni nyɔ́mɔɔ kɛ̂i. Dí gɛ̀ yɛ̂ɛ sɛŋ ƃé Ɣâla ƃé kɛ̀ mɛni nyɔ́mɔɔ kɛ̂i.

⁴Ɛliu è mɛi sâa é lɛ́ɛ la zu díkelee díkpɛɛ a lónoɔɔ kpɛ́ni fêi, nya ƃé kɛ̀ a ǹôloŋ ɣelei dí sáma.

⁵Ɛliu kɛ́ɛ a gáa a gɛɛ Zôo ǹâoi-ni dífe kɛ́ ní ŋ̀oo su toôi, è ǹíi ŋwàna dîa.

⁶È nâa pɛ̀lɛ lônoi. Ŋ́gaa a lôloŋ. Ǹyaŋ kákaa a núu pɔ̂lɔ-ŋa. M̀ɛni ma ŋá kɛ̀ yaôi a gɛɛ ŋá ŋákili-ŋa sîai lɛ́ kâa.

⁷Ŋákɛ̀ môi ŋ́goi-pere ńyɛ̂ɛi Tɔɔ ǹúu-pɔlɔ-ŋai dílono a gɛɛ dí dítarei lɛ́.

⁸Gáa a tɔ̃yâ a gɛɛ núu kélee táreɛ̂ɛi. Kɛ́lɛ a dárei ŋí sɔlɔ ƃô Ŋ̀wála-wâla kélee Ɣalai yêei.

⁹Pɔlɔ-pɔlɔ-laa fa pâ a táre kpáa máŋ é kpɔŋ kûa kú mɛni sãa ŋá káa.

¹⁰Mɛni ma, ka káwoli tɔ́ɔ ḿâ ŋá m̀ɛnii lɛ́ kâa nyii ŋá gɔ́lɔŋ.

¹¹Ŋá ŋ́woli tɔ̀ɔ kâa a gɛɛ ŋá berei káa ká mɛni ŋákaai káa lai. Ká kɛ̀ kákili-ŋa siâi m̀ɛnii ma ka pâi môi.

¹²Ŋá ŋ́woli tɔ̀ɔ kpɔ́ kâa a ǹɛ́lɛɛ. Kɛ́lɛ ḿve gáa ní ká ta é nɛ́ Zôo ma a gɛɛ m̀ɛnii è kɛ̀ môi vé a tɔ̃yâ.

¹³Káfe mò a gɛɛ kátarêɛi. Ɣâla nɔ́ ƃa pɔ̂ri Zôo wóo su toôi núu-kpune fêi.

¹⁴Zôo fé ŋɔmɛni ŋá lɛ́ɛi téniŋ tɔɔ ní ḿâ. Berei máŋ vé gɛ́ ní tí lai, fé pâi ŋ̀óo su toôi yɛ̂ɛ berei ká gɛ̀ lai.

¹⁵Zôo, ílâoi-ni wóo a láŋ díla, m̀ɛni ma dífe berei kɔ́lɔŋ dí íwoo su too lai.

¹⁶M̀ɛni ma ŋá lɛ́ɛ a ḿɛi saá fé lòno ípɔ kpɛ́ni fêi dí mɛi saâi? Dítɔ̂ɔi naa dífe mɛni da ƃôi yâ.

¹⁷Ńyãa máŋ ŋa pâi íwoo su toôi. Ŋa pâi ŋákili-ŋa siâi lɛ̂i yâ.

¹⁸Wóo támaa káa ńa mó mɛ̂ni ma. Ḿva pɔ̂ri ńii ma sonîi mó mɛ̂ni ma.

¹⁹Ńa fɛ̂ɛi kpɔ́ yɛ̂ɛ núu a lɔɔ pû sua-kɔlɔ gonoŋ su a ǹá tɛ̀. À kɛ̀ ŋa wàla lóno, ŋa pâi ƃêlai.

²⁰Tɔ̃yâ ma, fɛ̂ɛ nɔ́ ŋá lóno. Ḿva pɔ̂ri lɛɛ̂i a mɛi sâa.

²¹Ḿve pâi tɔɔ̂i núu da pôlu. Ḿve pâi núu da mu tɛ̂i a ńa-woo folo.

²²Kpɛ́ni fêi, ḿve berei kɔ́lɔŋ ŋa pɔ̂ri núu da mu tɛ̂i la a ńa-woo foloi. Ŋà gɛ̀ tí, gɛ̀ ní Ŋ́gbɛ̀tɛ nuui a pâi ḿbaâi.