Read Kpelle Zôo 37 Bible Online

Zôo 37 - Kpelle bible

Zôo 37

¹“Vãai è gɛ̀ ŋá yao kpɔ́ ńii kɛ́ kpɛ̃liŋ ŋ́goi. Ŋá yào kpɔ́ ńii é tée ŋ́goi.

²Kà káwoli tɔ́ɔ Ɣâla wóo ma. Ŋ̀óo káa yɛ̂ɛ ŋ̀ele-gbana à kɛ̀ toôi.

³A gɛ̀ ŋ̀ele-gbanai ŋɔmãla-mãlai kɛ́ tɛ̀ɛ ŋ̀elei su. Ŋ̀elei ŋɔmãla-mãlai ŋí a kɛ̂ tɛɛ̂i ŋ̀elei m̀éla kélee ma.

⁴A kɛ̀ tí, Ɣâla wóo a kɛ̂ tɛ̂i a wála-wala-pere. Ǹyaŋ bere sîi tɔnɔi tí nɔ́ ƃé a kɛ̂ ŋ̀elei ŋɔmãla-mãlai tɛɛ̂i la.

⁵Ɣâla a lòno, ŋ̀óo a kɛ̂ yɛ̂ɛ ŋ̀ele-gbana tíŋ, ǹyaŋ ya ŋ̀óo mɛ̀ni, a kɛ̂ a mɛni maa pɔlɔ-pɔlɔɔ. A mɛni kpaya-kpaya kɛ̀ nyii núu fa tarê zui.

⁶Ɣâla a sãɔ tɛ̀ɛ ǹɔii ma, é gɛ́ tuna kɛ́tɛ é pú ǹɔii ma.

⁷Ɣâla a gɛ̀ ǹûai dítee dítii-ŋai kɛ́ɛ ma a gɛɛ dí ŋɔwála-wala-laai kɔ́lɔŋ.

⁸Ǹɔɔ fɛnɛ-sãai da dílòo ǹóa-ŋai su.

⁹Duna-fãai a kûla yá-kwara-pere, gɔ́lɛi kɛ́ kùla yá-ŋua-pere.

¹⁰Ɣâla a ǹɛ̂wo pù ǹyá-ŋai dîa dí kpanaŋ kpɔ́ yɛ̂ɛ kɔ́lɛ kane.

¹¹Ɣâla a ŋ̀ele-kɔlɔŋ láa fɛ̀ɛ a tuna, é gɛ́ ŋ̀ele-gbanai kɛ́ kɛ̀ mãla-mãla ŋ̀ele-kɔlɔŋ su.

¹²Ɣâla a gɛ̀ ŋ̀ele-kɔlɔŋ kolei kɛ́ tìnaŋ, a gɛɛ é Ɣâla wóo ŋ̀aa see kɛ́ ŋ̀éniɛi gwaa kélee.

¹³Ɣâla a tuna tɛ̂ɛ a gɛɛ é ǹɔii yɔ́ɔ. Tãi da a dɛ̀ɛ a gɛɛ é núu kúla maa kɛ́, kpaa máŋ é ŋɔwɛli kɛ́-maai lɛ́.

¹⁴“Zôo, ye tɔɔ í m̀ɛni maa pɔlɔ-pɔlɔɔ-ŋai káa Ɣâla a gɛ́i.

¹⁵Í bere kɔ́lɔŋ Ɣâla a gɛ̀ la ŋ̀ele-kɔlɔŋ kolei kɛ́ ŋ̀óo mɛnii? Kpaa máŋ é gɛ́ ŋ̀elei ŋɔmãla-mãlai kɛ́ tɛ̀ɛ ŋ̀ele-kɔlɔŋ kolei sui?

¹⁶Í berei kɔ́lɔŋ ŋ̀ele-kɔlɔŋ kolei kɛ́-pere káa la ŋ̀elei sui, nyii gáa a díi kpaya-kpayai Ɣâla a gɛ́i?

¹⁷Tãi séɣai-pere fãai a kɛ̂ pâi lai, a gɛ̀ íkponôi é wúleŋ.

¹⁸Ya pɔ̂ri kpɔnîi Ɣâla ma ŋ̀ele-kɔlɔŋ kolei kpɛtɛ mɛni ma gɛ́ fôlo yɛ̂ɛ mɛ̃lɛ-mɛ̃lɛ?

¹⁹M̀ɛnii lɛ́ kûa nyii kwa pɔ̂ri môi mài. Kúkili-ŋa tɛiɣiɛ̂ɛi kúfa pɔ̂ri mɛni da ƃôi.

²⁰Ḿva pɔ̂ri mare kɛ̂ɛ kɛ̂i a gɛɛ ŋá lóno Ɣâla pɔ́. Núu da fa pɔ̂ri kɛ̂i a moɔɔ a gɛɛ é gɛ́ Ɣâla é baa.

²¹“Núu da fa pɔ̂ri vólo-kaoi kâai ŋ̀elei su, tãi vãai a ŋ̀ele-kɔlɔŋ kolei kûla la berei. A kɛ̂ fóloi kpɔ́ a ŋánaa.

²²Ɣâla ŋɔfólo-laai è kùla yá-ŋua pere. Ŋ̀wála-wâla kélee Ɣalai ŋɔmaa waa-laa kɛ́tɛi a gɛ̀ kú yao m̀a.

²³Núu da fa Ŋ̀wála-wâla kélee Ɣâlai kâa. Ŋɔwála-wala-laai kɛ̂tɛi. Zɔŋ lɛ̂lɛɛi, deniŋ ƃôɔɔ, va núu fìli.

²⁴M̀ɛni ma nûa da yâo m̀a. Ǹúui kélee a gbîŋ sìɣe a táre-nuui, Ɣâla fa ǹyée sèe mu.”