Read Kpelle Zôo 38 Bible Online

Zôo 38 - Kpelle bible

Zôo 38

¹Naa kɛ́ɛ tíi, Yâwɛɛ è lòno Zôo pɔ́ vãa kɛ́tɛi su ǹyɛɛ mai,

²“Lé wala-wala-laa ƃé íyêei a gɛɛ í ŋámɛni kpɛtɛɛi kpéra a í ƃoo lôno-ŋai?

³Í mu-siɣe í ísama ɣíri yɛ̂ɛ kpakolo. Ŋa pâi í marê kɛ̂i ízu-kula mî.

⁴À kɛ̀ ya mɛni ŋá kàa kpɔ́ a ǹɛ́lɛɛ kɛ́ɛ ŋí, mí ƃé íkɛ̀ naa tãi ŋá kɛ̀ ŋ̀éniɛi ŋí kɔ́ɔ pîlanii lai?

⁵Gbɛ̂ɛ ƃé gɔ̀ɔŋ-maa lɛ̂i? Tɔ̃yâ ma í gɔ́lɔŋ. Gbɛ̂ɛ ƃé gɔ̀ɔŋ é gáa a gɛɛ zãâi?

⁶Lé sɛŋ ƃé ŋ̀éniɛi yée mu-wuru-ŋai tɔɔ̂i mɛi? Kpaa máŋ gbɛ̂ɛ ƃé zônoŋ-su koni-ŋai lâa ǹâai,

⁷ŋ̀ele-wala pɛmɛlɛŋ-kao-ŋai díkɛ̀ wule tôo mà ŋ̀âla-taa kela-ŋai dí kɛ́ lii-nɛ̃ɛ kùlai?

⁸“Gbɛ̂ɛ ƃa yúo kpèra a gɛɛ vé ɣìliŋ ǹɔii ma gwaa kélee, tãi ǹya-lee-ŋai da fɛ̂ɛ la dí táa-taa ǹɔii mai?

⁹Ńyãa ƃé yúo maa kpîniŋ a ŋ̀ele-kɔlɔŋ kolei, ŋá gɛ́ a zu-kpiniɛ.

¹⁰Ńyãa ƃé yúo ŋɔgɔyɛŋ-perei lâa, a gɛɛ vé fɛ̀ɛ é tɛ́ zîŋ ŋá.

¹¹Ŋá mò ma ńyɛ̂ɛi, ‘Yúo, ya pɔ̂ri nɔ́ kperâi ƃɛ́. Ífa naa maa tîyeŋ. Ƃɛ́ ŋí nɔ́ ƃé í kpéra naa a ízikɛ-zikɛi.’

¹²Íkɛ-ɣeniɛi su, ya tá wɔ́lɔ mó ɣele-ƃɔi tãi ma a gɛɛ é pá, kpaa máŋ í gɛ́ ɣele é ƃɔ́?

¹³Ya tá gɛ́ ŋ̀ele-ƃɔi kwaa ponoɔɔi é táa-taa ǹɔii ƃéla kélee ma, nyii a gɛ́ ŋ̀wana-lɔ̂ɔ-ƃelai dí púi?

¹⁴Ɣele a ƃɔ̀, núu a ǹyée-ŋai da diŋ-tiŋ-ŋai kélee kàa, yɛ̂ɛ berei núu a seɣe pɔ̃yɛ kaa lai, kpaa máŋ yɛ̂ɛ berei núu a pɔ́ɔ-ŋa kàa la ƃóo pɔ̂rɔ mai.

¹⁵Ŋ̀ele ƃɔ́ɔi su ponôɔɔi a ŋánaa ŋ̀wana-lɔ̂ɔ-ƃelai mɛni ma. A gɛ̀ dífa pɔ̂ri mɛni nyɔ́mɔɔ kɛ̂i a núu da.

¹⁶“Ya tá wɔ́lɔ lí yúo ŋɔya ɣîliŋ su, kpaa máŋ í sía gáo ma?

¹⁷Núu da a tá wɔ́lɔ saa-taa perei su kpòŋ lá lɛ́ yâ, nyii gáa a zaa-ƃelai dítaai su kpiniɛɛi lá kpoŋ?

¹⁸Í ŋ̀éniɛi ŋɔsu-kɛtɛ kɔ́lɔŋ? Ye ŋ́oo su too à kɛ̀ í gɔ́lɔŋ.

¹⁹“Í ƃɛ́i kɔ́lɔŋ kwaa ponoɔɔ a kûla naai, kpaa máŋ ƃɛ́i kpíni a lî naai?

²⁰À kɛ̀ í naa kɔ́lɔŋ, gɛ̀ ní ya pɔ̂ri ƃɛ́i lɛ̂i dîa da lî naai da ƃɛ́i da pɔ̂ri lenêi naa pôlui.

²¹Ya gɛ̂i yɛ̂ɛ sɛŋ ƃé í pɔlɔ-pɔlɔi í kɛ́ ƃò naa a tãi ŋá kɛ̀ ǹɔii kpɛ̂tɛi lai.

²²“Ya tá lí ƃɛ́i ŋá kɔ́lɛ da sã́ɔ lâai kɛ̀ naai?

²³Ŋa dílâai kɛ̀ mɛni kpɔ̂lu, làa-sâa da kɔ́kɔ mɛni ma.

²⁴Í ƃɛ́i kɔ́lɔŋ kwaa ponóɔɔ a kûla naai, kpaa máŋ ƃɛ́i vãai nyii a kûla vóloi ƃélai perei a lî naai?

²⁵“Gbɛ̂ɛ ƃé berei láa ƃò ŋ̀ele-gbanai perêi, da duna kɛ́tɛi nyii a kɛ̂ pûi ǹɔii mai?

²⁶Gbɛ̂ɛ ƃa gɛ̀ tuna kɛ́ pù gwaa-ŋai ma, kpaa máŋ vɛ̃ɛ-kpâlaŋ su ƃɛ́i núu da fé naai?

²⁷Gbɛ̂ɛ ƃa gɛ̀ tuna é pú ǹɔii kpâlai ma a gɛɛ gala-ŋai dí sóoi?

²⁸Tuna kpaa máŋ lúu ǹâŋ káa mà yɛ̂ɛ núu-kpune?

²⁹Kɔ́lɛ ǹee káa mà nyii maa sɔlɔ ƃôi? Kɔ́lɛ kâne ǹee káa mà yɛ̂ɛ núu-kpune,

³⁰nyii a gɛ̀ ǹyái é kpanaŋ yɛ̂ɛ kɔni, yúo é kpanaŋ?

³¹“Ya pɔ̂ri bɛ́mɛlɛŋ-kao kpului nyii da dòli a géleŋ ma-wûui kpulɔ̂ni gîe ma? Kpaa máŋ ya pɔ̂ri bɛ́mɛlɛŋ-kao kpului nyii da dòli a ǹiyeŋ-kpului ŋ̀ɛli teêi ma?

³²Ya pɔ̂ri gɛ̂i bɛ́mɛlɛŋ-kao-ŋai dítɔɔ ŋ̀elei su a tãi maa nɛ̃ɛ̂i dítɔɔ lai? Ya pɔ̂ri gɛ̂i bɛ́mɛlɛŋ-kao kpulu-loŋ da gbulu kɛ́tɛi dí tɔ́ɔ dítɔ̂ɔi ŋ̀elei su?

³³Í ŋ̀elei su mɛi káa tɔŋ-ŋai kɔ́lɔŋ? Ya pɔ̂ri dɔ̂ŋ-ŋai ŋí kɛ̂i ŋ̀aa-see é kɛ́ ǹɔii ma ƃɛ́?

³⁴“Ya pɔ̂ri lâɣii ŋ̀elei su ma a gɛɛ tuna é pú ǹɔii ma?

³⁵Ya pɔ̂ri gɛ̂i ŋ̀ele-gbana é tóo, é pá é gúlaŋ ƃó yɛ̂?

³⁶Gbɛ̂ɛ ƃé táre tɛ̀ɛ ŋ̀ele-kɔlɔŋ pɔ́ a gɛɛ é tuna pú ǹɔii mai? Gbɛ̂ɛ ƃé táre tɛ̀ɛ ǹuui pɔ́ a gɛɛ é pɛ́lɛ gɛ́ pui?

³⁷Gbɛ̂ɛ ƃé táre káa ǹyêei a gɛɛ é ŋ̀ele-kɔlɔŋ kolei lóno, kpaa máŋ é gɛ́ tuna é pu,

³⁸é gɛ́ bɔ̂rɔi é kane a gbanaŋɔɔ, é gɛ́ bɔ̂rɔ-kane-ŋai díkanaŋ díkîe-ni dîai?

³⁹“Ya pɔ̂ri yala-sulu-ŋa ŋáa kɔŋ-nii? Ya pɔ̂ri yala-sulu lonii-ŋa kɛ̂i dípila dílii é láa,

⁴⁰a tãi da kɛ̂ la díkɔni wôlo-ŋai sui, kpaa máŋ í díkɔnɔŋ lɔ́ dîa dí kɔni wôloi su?

⁴¹Gbɛ̂ɛ ƃa gɔ̃ɔ-ŋai kɔ́nɔŋ kùla a tãi puru a dílônii kɛ̂i lai, díkɛ ɣìliŋ díkɛ wɔ̀lɔ Ɣâla ma a gɛɛ é kpɔ́ŋ dîa é dí kɔ́nɔŋ kulai?”