Read Kpelle Zôo 4 Bible Online

Zôo 4 - Kpelle bible

Zôo 4

¹Naa kɛ́ɛ tí, Ɛlifa nyii kùla Tema taa-leei sui, è nâa pɛ̀lɛ lónoɔɔ ma ǹyɛɛ mai,

²“Ya pâi íwoli tɔɔ̂i ḿâ à kɛ̀ ŋa lòno ípɔ? Kpɛ́ni fêi ḿva pɔ̂ri kɛ̂i nɔ́ a ḿɛi sâa íkɔlɛ.

³Kɛ́ a gɔ́lɔŋɔɔ a gɛɛ yâ núu támaa téniŋ tɔ́ɔ íkɛ diai dífii kpɛɛ̂i dí kponôi kpànaŋ.

⁴Deniŋ-ƃo woo-ŋai ya mò diai dîa díkaa mɛni kpɔ̂lu-ŋa sui, a dí ŋá nɛ̀nɛ é gɛ́ dítɔɔ̂i é kpanaŋ.

⁵Kɛ́lɛ tãi íwɔ mɛni-kpɔlui ŋɔtãi aâ seri lai, ílii aâ too pôlu a zu kɛ́tɛ.

⁶Í yao Ɣâla mai a gɛ́ kili-tɔɔ ma kɛ́ ƃò íyêei. Mɛni ma fɛ̂ɛ í íkili tɔ́ɔ Ɣâla ma kili-kɛ-zu kɛ́ ƃò íyêei.

⁷Lé tãi ƃé ya tá sɔŋ lɛ̂lɛ-nuu káa Ɣâla é baai? Kpaa máŋ lé tãi ƃé ya tá gáa Ɣâla kɛ́ mɛni kpɔ̂lu làa núu ma nyii zɔŋ fé zui?

⁸Ŋá kɛ̀ ɣéniɛi su, ŋá gɔ́lɔŋ a gɛɛ diai da sɔnyɔ̂ŋ sîi, díkɛ ŋwana-lɔ̂ɔ kao sí yɛ̂ɛ berei tíi-kɛ-nuu a sí-sɛŋ kao sì la ŋɔkpâlaŋ ŋái, bere nɔ́ ƃé a pâi ŋwana-lɔ̂ɔ da mɛni kpɔ̂lu ƃá kulâi la.

⁹Ɣâla è nɛ̂wo pù dîa dísaa. È dífɛ̀ɛ díkelee dílaŋ.

¹⁰Ŋwana-lɔ̂ɔ-ƃelai da kɛ̂ kpêɣei díwoo su kpíniɛɛ yɛɛ yala-sulu-ŋa, kɛ́lɛ Ɣâla a dínyiŋ ɣàle é dímɛi sáa.

¹¹Ǹyala-sulu-ŋai nyii-ŋai dífe niî sɛŋ da paa-ni dí mii, da sâa dílônii dí táa-taa díkɛ díkɔnɔŋ kɔ̀ri.

¹²“Zĩa è tɛ̀ɛ a ńyãa a kpíni tɔnɔ da. Zĩâi ŋí su, núu da è lòno ḿbɔ ŋ̀óo lòŋ su. Ŋ̀óo è kɛ̀ kpɔ́ a guro-te ḿve pɔrîi mɛnîi a ǹɛ́lɛɛ.

¹³Ḿve pɔ̂ri ní nyîi, kpɛ́ni fêi zĩâi è kɛ̀ yɛ̂ɛ ƃili-sîi a kɛ̀ seêni ŋ́uŋ mɛi.

¹⁴Ŋá yào kpɔ́, ǹyaoi é tɛ́ɛ ńii pôlu. È gɛ̀ ŋ́gbonôi gwaa kélee kɛ́ kpɛ̃liŋ.

¹⁵Gɛ́ɛ tíi, fãa-laɣi è pù ŋ́ɛi, mĩli-mĩli é pú ḿâ.

¹⁶Ŋá sɛŋ-da kàa tɔɔ̂ni, kɛ́lɛ gɛ́-pere kíli fé lɛɛ ní ŋ́gili ŋa. Naa è kɛ̀ tɔŋ. Gɛ́ɛ tíi, ŋá wóo mɛ̀ni é kúla nàa pere. Ŋ́ooi ŋí ƃé ŋá mɛ̀ni,

¹⁷‘Núu sîi kélee da fé teniŋ ƃô-ni é tɛ́ɛ Ɣâla ma. Wála-wala-nuu kpîŋ maa fé waa ní é tɛ́ɛ gbɛ̀tɛ-nuu ma.

¹⁸À kɛ̀ Ɣâla fé láa ní a ǹyée mu-ƃelai nyii-ŋai díkaa bɔ́-taai, à kɛ̀ a ŋɔkéla-ŋai sɔŋ kâa dîa,

¹⁹gɛ̀ ní a pɔ̂ri lâai a núu-kpune nyii è gbɛ̀tɛ a pɔ̂rɔi, nyii è gbɛ̀tɛ a muluŋ, nyii ƃa gìiŋ a sâa a maa félaa yɛ̂ɛ núu a gôi-gono kîiŋ?

²⁰Núu-kpune a pɔ̂ri kɛ̂i ɣele ma a vúlu a ɣele-wala, kɛlɛ a pɔ̂ri saâi ɣele-wulii é lɛ́ɛ pâi kɛ̂i nyii maa mɛni fa lɛ̂ɛ núu da kíli-ŋa.

²¹Da gɔ̃liŋ kélee kùla ǹyêei. Va kɛ̂ a Ɣâla ŋɔtûa-perei kɔ́lɔŋɔɔ é lɛ́ɛ la zu é sáa.’