Read Kpelle Zôo 41 Bible Online

Zôo 41 - Kpelle bible

Zôo 41

¹“Ya pɔ̂ri yúo zele-kali kulâi a kpawɔ? Ya pɔ̂ri ǹɛ́ŋ ɣirîi a ɣɛli?

²Ya pɔ̂ri ɣɛli toôi zũai, Ya pɔ̂ri kpawɔ-kao pilîi nɛ̃ɣɛ̂ŋ-kpau su í zóŋ lá?

³A pɔ̂ri í marê kɛ̂i a gɛɛ ízu mɛ̂ni lɛɛ? A pɔ̂ri lônoi ípɔ a la-nɛ̃ɛ-maa wôo a gɛɛ é ílii kúla?

⁴Ka ǹyaa ka pâi káwoo sêei? A pâi gono-teei íyêei a gɛɛ a pâi kɛ̂i a íyee-ŋa nuu wɔ́lɔ-wɔlɔ da wɔ́lɔ-wɔlɔ?

⁵Ya pâi ɣɛli toôi mà í pêle kɛ́ la yɛ̂ɛ berei núu a ɣɛli tôo la ŋɔni kɔ́ɔ mà gɛ́ pêle kɛ̀ lai? Kpaa máŋ ya pâi ɣɛli toôi mà í kɛ́ sìa la íyee-mu nɛ̃yaai ŋɛ́i-tuɛ díkɛ gàa?

⁶Ǹyá kpɛ́-ƃelai da pâi kɛ̂i sîa toôi zɔ̃ɔi da pâi gɔlɛ̂i lai mɛ̂ni ma? Pɔni tɔɔ-ƃela da pâi zu-têei a gbua-kpûa díkɛ gɔ̀lɛ?

⁷Ya pɔ̂ri baâi a kpála kpaa máŋ íŋuŋ ƃó a yá kpɛ́-kpála?

⁸À kɛ̀ ya íyee lɛ̀ɣɛ ma, ǹamui pâi teêi ká loai gíli fé pâi kpɛɛ̂i íŋa. Ífa ŋɔ́nɔ pɔ̂ri íyee lɛɣɛ̂i ma a tãi veerɛ ɣelei.

⁹“M̀ɛni ma, núu-kpune gɔkili kɛ́-zui su a kara é tóo nɔ̀ii ma tãi a yúo zele-kali kàa laâ-ni lai.

¹⁰Núu da fé naa é yúo zele-kali maa fóo é tɔ́ɔ ŋ̀ɛ́i. M̀ɛni ma gbɛ̂ɛ ƃé naa a pɔ̂ri ḿaa fôoi é tɔ́ɔ ŋ́ɛi-tuɛi?

¹¹Gbɛ̂ɛ ƃa tá sɛŋ da tɛɛ ḿbɔ a gɛɛ ŋá vela fé m̀ɛni mai? Zɛŋ kélee gáa ɣele mai, gáa a ḿbɔɔ.

¹²“Ŋa pâi lônoi ípɔ é pîlaŋ yúo zele-kali kɔ́ɔ ma, da mɛni kɛ́tɛi ma a gɛ̀i da ŋɔwála-wala-laai.

¹³Gbɛ̂ɛ ƃa pɔ̂ri ŋɔseɣei mɛi-pere ŋɔi kulâi mai, kpaa máŋ é gɔli-yɛkɛi nyii a gbono maa kɔ̃ɔ̂i, falai?

¹⁴Núu da fa pɔ̂ri gɛ́i é ǹá táa. Ǹyíŋ kâo káa a yao mâa-sɛŋ.

¹⁵Bôlu-pere mɛi pɛlɛ̂i a gala kpanaŋɔɔ-ŋa nyii-ŋai dí pûɔɔi ŋ̀ɛli ma. Gala-ŋai ŋí káa nɔ́ a zîi tɔnɔ bɔ̃yɛɛ púɔɔ gîei gbanaŋɔɔ yɛ̂ɛ kɔni.

¹⁶Gala-ŋai seɣɛ̂ɛi kpɔ́ gîe ŋá, fãa lâɣi fa pɔ̂ri tɛɛ̂i díloai.

¹⁷Gala pɛlɛɛ̂i kpɔ́ gîe pôlu nyii sɛŋ da fa pɔ̂ri gulai gîe ma.

¹⁸Tãi a tîso lai, gbãlê a tâa-taa, ŋ̀ɛ́i-gao kɛ́ kpɔ̂lu yɛ̂ɛ fólo-nɛnɛŋ ma folo-kao.

¹⁹Ŋɔŋ a kɛ̂ kulâi ǹá, gbãlê kɛ́ tàa-taa.

²⁰Luru a kɛ̂ kulâi zũâi yɛ̂ɛ leɣi ƃé nɛ́nîi ŋ̀wíleŋ kɛ́ tɛ̀ɛ.

²¹Ǹɛ̂wo a ŋɔŋ têe tiɣi ma, ŋɔŋ kɛ́ kùla ǹá.

²²Wála-wala làa támaa káa gɔŋ su. Sɛŋ nyii kélee a tɔ̂ɔ ŋ̀ɛ́i, a sâa a yao.

²³Gbono m̀ɛ́i víi kpɛɛi, ǹaa kpanaŋɔɔ yɛ̂ɛ kɔli.

²⁴Ǹíi kpanaŋɔ̂ɔi kpɔ́ yɛ̂ɛ kɔni, gbanaŋɔɔ kpɔ́ yɛ̂ɛ mii-sɛŋ kîiŋ kɔni.

²⁵Tãi a m̀u sìɣe lai, ŋ̀wála-wala sãai kélee da yâo. Da yâo kpɔ́ díkɛ pù.

²⁶Dí máŋ kpîŋ zɔɔ a kpála, kpaa máŋ sɔla, kpaa máŋ ƃóa-sɔ̂kpɔ, da fa pɔ̂ri sɛŋ da kɛ̂i la.

²⁷Kɔli-sɛŋ káa nɔ́ gbono ma yɛ̂ɛ mɔlɔŋ-kpaŋ, ƃara kɛ́ ƃò ma yɛ̂ɛ wúru lula.

²⁸Sɔla fa sɛŋ da kɛ̀ la. Vûma kɔni káa nɔ́ mà yɛ̂ɛ mɔlɔŋ-kala.

²⁹Gbɔ̂ŋ-kpua káa nɔ́ mà yɛ̂ɛ mɔlɔŋ-kpaŋ. Dí máŋ zɔɔ a kpála va gíli kɔ̀lɔŋ.

³⁰Goo-ƃɔlɔŋ ma kalai káa yɛ̂ɛ pɔ̂rɔ-leɣi-kalaŋ ŋá liɛɛ-ŋa. Tãi a sîa la bârai ŋái, bɔ́ɔ a lɛ̂ɛ naa yɛ̂ɛ da ŋalêŋ-wuru ɣàla naa.

³¹Tãi a lɔ̂ la yúo sui, ǹyái a kɛ̂ kpɔ́ tínanîi yɛ̂ɛ leɣi ƃé nɛ́nîi. À kɛ̂ kpɔ́ nɛ́nîi yɛ̂ɛ sále-leɣi ƃé ŋ̀úleŋ a tɛɛ̂i.

³²Tãi a lɔ̂ la ǹyái sui, gbárɔ a lɛ̂ɛ kpɔ́ ǹyái ŋá a yá-fule kole gɛ́ fòlo.

³³Móloŋ-maa da fé ɣéniɛ. Gáa a fɛnɛ-sɛŋ nyii va yâo.

³⁴Va fúlu-sɛŋ sii kélee da kàa ŋ̀ɛ́i a sɛŋ da. Nya ƃe gáa a vɛ̃nɛ-sãai kélee díkâloŋ.”