Read Kpelle Zôo 8 Bible Online

Zôo 8 - Kpelle bible

Zôo 8

¹Zôo kɛ́ɛ a kpɛɛ a lónoɔɔi, Sûa lɔii su nuui Beeda è ŋ̀óo su tòo ǹyɛɛ mai,

²“Yâa lóno, ǹyaŋ mɛni-ŋai ya môi, gáa nɔ́ yɛ̂ fãa kɛ́tɛ ƃé va kpêra.

³Ɣâla fa mɛni ŋá tèe a wôya. Ŋ̀wála-wâla kélee Ɣalai a mɛni ŋá tèe a zãa.

⁴Tãi da ínîa-pɛlɛɛi dí sɔnyɔ̂ŋ kɛ̀ a Ɣâla, ǹyaŋ a díkula maa kɛ́ a díkpɔ̂ɔi sɔnyɔŋ m̀ɛni mà yɛ̂ɛ berei gáa lai.

⁵Ye Ŋ̀wála-wâla kélee Ɣalai fɛ́li a gɛɛ é íŋɛi malôŋ káa.

⁶À kɛ̀ íkaa a teniŋ ƃô nuu maa waa, gɛ̀ ní a pâi ímɛi kâai, é ísãâi da pɔɔ tôo tɛɛ.

⁷Zãâi pâi kɛ̂i íyêei a gbɛ̀ɛ-ŋai, a pâi kɛ̂i a dámaa é tɛ́ɛ duɛ-tuɛi ma nyii Ɣâla è dɛ̀ɛ ípɔi ma.

⁸“Kúnûa pɔlɔ-ŋai dítûa-perei maa kpɛ́ɛ, Í dítarei maa kɔ́ri nyii-ŋai díwɔlɔ ǹɛi.

⁹Kúkɛ ɣéniɛi káa nɔ́ a tãi kpua, ǹyaŋ kúfe mɛni da kɔ́lɔŋ. Nàa a kɛ̀ tí, kúfulu-laai é tɛ́ɛ nɔ́ yɛ̂ɛ ninîŋ ƃé siâi ǹɔii ma.

¹⁰Kúnûa pɔlɔ-ŋai da pâi dítarei lɛ̂i yâ. Da nɛ̀ yâ fɛ̂ɛ í íyee sée mù.

¹¹“Yá-wuru da fa lɛ̂lɛ yá ŋɛ́i pôlu. Yá kɔlɛ nɔ́ ƃé da lɛ̂lɛɛ naa.

¹²À kɛ̀ ǹyái a kpàla, dia ƃa kɛ̂ a maa-ŋuŋ dí sáa. Da lɛ̂ɛ a dítɔɔ nyii núu fa pɔ̂ri dêei dí sáa.

¹³Diai da Ɣâla wóo pìlii, da kɛ̂ nɔ́ yɛ̂ɛ ŋ̀úru-ŋai ŋí. Diai Ɣâla ŋɔyao-maai fé díyêei kili-kɛ-zu fé pâi kɛ̂i díyêei a dísaa tãi.

¹⁴Da díkili tɔ̀ɔ nɔ́ zɛŋ ma nyii vé kpanaŋ nii. Dí mɛi-kaa-sɛŋ ŋɔkpanaŋɔɔ káa nɔ́ yɛ̂ɛ sĩi-nãanɔ̂ɔ.

¹⁵Da díkili tɔ̀ɔ nɔ́ dítɔɔ-laai ma a gɛɛ dí dímɛi káa, kɛ́lɛ pere fa kɛ̂ naa. Da díkili tɔ̀ɔ díkɔ̃liŋ ma kɛ́lɛ va nâmu díyêei.

¹⁶“Díkaa nɔ́ yɛ̂ɛ wúru-ŋa nyii-ŋai sí-sɛŋ sí-nuu a yá pù mà a ɣele wâla pɛpɛi. Ǹyaŋ à kɛ̀ tí, dí pɔmûŋ a kûla zûai gwaa kélee ma.

¹⁷Dísame a kpîniŋ a gɔni-ŋai, díkɛ díkɛ̂i kɔ̀ri gɔni-ŋai sáma.

¹⁸À kɛ̀ núu da a dí ƃùleŋ é díkula dí dɔɔ̂i, gɛ̀ ní ǹûai da pâi môi dîyɛɛ sɛŋ dá fé tá tɔɔ-ni ƃɛ́.

¹⁹Ŋ̀wana-lɔ̂ɔ-ƃelai dí lii-nɛ̃ɛi su fa kɛ̂ a gôyaa. À kɛ̀ tí, ŋ̀wana-lɔ̂ɔ-ƃelai da kpɛ́ni-ŋa da pâ dítɔɔ dí pɔ́ɔ ŋá.

²⁰“Ɣâla a ǹyée sèe diai dísɔŋ fé dîai dí mu, kɛ́lɛ va kpɔŋ mâa tɛ̀ɛ ŋ̀wana-lɔ̂ɔ-ƃelai pɔ.

²¹A pâi gɛ̂i íɣɛlɛ, íkɛ làɣi a koi-nɛ̃ɛ-pere.

²²Diai dítɔ̂ɔ yâi, Ɣâla a pâi dí ŋumɛi. Ɣâla a pâi ŋ̀wana-lɔ̂ɔ-ƃelai dípɛrɛ-ŋai wôloi.”