Read Kpelle Wule-woo-ŋa 10 Bible Online

Wule-woo-ŋa 10 - Kpelle bible

Wule-woo-ŋa 10

¹Óo Yâwɛɛ, yâ ímaa kôya kûa lé mɛni ma? Lé mɛni ƃé yâ íloo la kûa a tãi kúkaa la mɛni-kpɔ̂lu sui?

²Ŋ̀wana-lɔ̂ɔ-ƃelai da ǹyoŋka tèe díkɛ ǹûai pɔ̂ri mâa fé dîɛi sôŋ a nyɔ́mɔɔ. Tɔɔ dí kɔ́ a díkpɔɔ ƃare-ŋai.

³Da mɛni nyɔ́mɔɔ-ŋa kpɛ̀tɛ díkɛ maa yôŋka tèe. Dísɛŋ wɛ̂lii a gɛ́ díkɛ mɛni nyɔ́mɔɔ-ŋa ƃò Yâwɛɛ ma, dífe díyee seêi m̀u.

⁴Dísu-mɛni kɛ̂tɛi. Dífe kpáaŋ ní Yâwɛɛ mɛni ma. Da kɛ̀ m̀ôi dîyɛɛi, “Ɣâla fé ɣele ma.”

⁵Díkɛ mɛni kélee ŋ̀aa-see a kɛ̂ díyêei a ǹɛ́lɛɛ. Dífa târe Ɣâla ŋɔmɛni ŋá-tee-pere su. Da ɣɛ́lɛ maa kûla díkpɔara-ƃelai kponôi.

⁶Da kɛ́ môi díkpîŋ ma dîyɛɛi, “Kúfe pâi fɛɣɛ̂i. Kúfe pâi wɔ́lɔ kɛ̂i mɛni kpɔ̂lu su.”

⁷Ŋ̀óo-ŋai da kûla dílai, dílaa fɛ̂ɛi a naɣaŋ-laa, lɛ́ɛ-woo, da maa-yao woo-ŋa. Dímaa felaâi a gɛ́ɛ díƃɛlɛ-kpɛɛ goi wôo-ŋa da ŋwana-lɔ̂ɔ woo-ŋa ƃó.

⁸Da dílôo gbanâŋ-ŋai lá, díkɛ maa kpɛ̂ŋ kɛ̀ a gɛɛ diai dísɔŋ fé diai dí dípaa. Da kɛ̂ díŋuŋ mâ lâai diai dîa pɔ̂ri mâa fé dîɛi.

⁹Da kɛ̂ maa kpɛ̂ŋ kɛ̂i díloo-pere-ŋai su yɛ̂ɛ yala-sulu-ŋa. Da dílòo gôlo-ƃelai perêi. Da dísòŋ a díƃare-ŋai díkɛ dí ɣala.

¹⁰Diai pɔ̂ri mâa fé dîɛi, da dí tôo dí ƃɔ́rɔŋ dîa. Da díyee mɛi ɣâle a díwala-wala-laai kélee.

¹¹Ŋwana-lɔ̂ɔ-ƃelai da m̀o dîyɛɛi, “Ɣâla fé kpáaŋ ni! A ŋɛ́i lá tɛ́, ǹyaŋ vé pâi ŋ́gaai!”

¹²Óo Ɣâla Yâwɛɛ, ŋ̀wana-lɔ̂ɔ-ƃelai tí kula ma kɛ́! Diai mɔ̃lɛi dí malôŋ káa!

¹³Ŋwana-lɔ̂ɔ-ƃelai da pɔ̂ri dípôlu tɔɔ pere kɛ̂i léŋ Ɣâla ma díkɛ m̀o díkpîŋ ma dîyɛɛi, “Vé pâi ŋ́gula ma kɛ̂i”?

¹⁴Kɛ́lɛ, ya mɔ̃lɛ-laa da mɛni kpɔ̂lu kàa, íkpîŋ kpɛtɛ a gɛɛ íkpɔŋ maa tɛɛ. Ǹyaŋ diai pɔ̂ri maa fé dîɛi, da díkpîŋ tɛ̀ɛ ípɔ. Ya kpɔŋ mâa tɛ̀ɛ dee-lôŋ-ŋai pɔ́.

¹⁵Ŋ̀wana-lɔ̂ɔ-ƃelai da m̀ɛni nyɔ́mɔɔ kɛ́-ƃelai díwala-wala-laai su kara. Díkula ma kɛ́ dímɛni nyɔ́mɔɔi mɛni ma é lɛ́ɛ la zu dífe ŋɔ́nɔ da kɛ̀.

¹⁶Yâwɛɛ káa a kâloŋ wɔ́lɔ-wɔlɔ da wɔlɔ-wɔlɔ. Diai da ɣâla da kpɛ́ni-ŋa fɛlii, da pâi lánîii ǹɔii su.

¹⁷Óo Yâwɛɛ, ya pâi íwoli tɔɔ̂i diai sɛŋ da fé díyêei díɣâla fɛli wooi ma. Ya pâi kili kɛ-zu tɛɛ̂i dípɔ.

¹⁸Ya pâi íwoli tɔɔ̂i diai mɔ̃lɛi da dee-lôŋ-ŋai díwɔlɔ-wooi ma. Ya pâi dímaa kɔ̃ɔ̂i a ǹɛ́lɛɛ, a gɛɛ núu-kpune fé ŋɔ́nɔ dímaa yâo.