Read Kpelle Wule-woo-ŋa 104 Bible Online

Wule-woo-ŋa 104 - Kpelle bible

Wule-woo-ŋa 104

¹Ŋa pâi Yâwɛɛ láa maa tɛ̂i a ńii kélee. Óo Yâwɛɛ Ŋáɣâlai, íkɛtɛ-laai mĩli-miliɛi. Ƃaa kɛ́-maa káa yâ, wála-wala-laa kɛ́ ƃò íyêei.

²Ya ímaa tínaŋ a kwaa ponoɔɔ yɛ̂ɛ yokpo kole. Ya ŋ̀ele-kɔlɔŋ tɛ́ ɣelêi yɛ̂ɛ núu a kêre pìli ɣelêi.

³Ya ípɛrɛi tɔ́ɔ ŋ̀ele-kɔlɔŋ mɛi pere ǹyái ŋá. Ŋ̀ele-kɔlɔŋ ƃé gáa a ísoo sia-keleŋ, íkɛ ƃò vãai su gɛ́ lì a yá.

⁴Vãai ƃa lî a íworɛ̂-wooi, ŋ̀ele-gbânai ŋɔmãla-mãlai kɛ́ tíi kɛ̀ yɛ̂.

⁵Í ǹɔii kpóŋ sèe a gbanaɔɔ, ǹyaŋ zeêi nɔ́ ƃa zeêi.

⁶Yúo è kɛ̀ a bɛlɛ́ɛ ǹɔii mɛi yɛ̂ɛ seɣe, ǹyái pɛlɛ́ɛ ǹyée-ŋai mɛi.

⁷Í làɣi ǹyá-ŋai dîa dí kolôŋ. Gɛ́ɛ da ílaɣi wooi mɛnii,

⁸dí lì ǹyée-ŋai su da ǹyée-ŋai loai ƃɛ́i í naa kpɛ̀tɛ dímɛni mai.

⁹Í díkoyɛŋ lɛ̀, ǹyaŋ da fa nâɣiŋ naa mɛi é ǹɔii mɛi pɛ́lɛ.

¹⁰Í gɛ̀ ya ɣɛ̂li-ŋa dí láa dìŋ-tiŋ-ŋai su, ǹyá-lee-ŋai dí láa ǹyée kpaya-kpayai loai.

¹¹Ǹyá-ŋai ŋí díkaa naa vɛnɛ-sãai kpele mɛ̂ni ma. Naa ƃé ŋ̀wɛlɛ sôo-ŋai ǹɔɔi sui da díkpèle naa dílii é láa.

¹²Ŋ̀úru-ŋai ǹaa kɔlɛ mai, ŋ̀ɔni-ŋai da dítaa tɔ̂ɔ zu, díkɛ díɣaloŋ pù naa, díkɛ ƃò naa díkɛ wule-ŋa tòo.

¹³Í gɛ̀ tuna é pú ǹyée-ŋai dîa, ǹɔii láa é fɛ́ɛ a mii-sãa ísârai.

¹⁴Ya gɛ̀ kala-ŋa dí kpɛtɛ daa-tulɛ-ŋai mɛni ma, da sí-sãa kúai a núu-kpunei, kúmɛni ma, nyii kwa pɔ̂ri dísîi, díkɛ ƃûu ƃò díkɛ ƃò a kúkɔnɔŋ ǹɔii ma ƃɛ́.

¹⁵Í ŋwã̂ai kpɛ̀tɛ, kwa gbèle kúlii é nɛ̃ɛ, í ɔle-wulɔ kpɛtɛ, kwa zìa kûa, kúkɔlɔ ŋɛ́i é kúla, í mii-sɛŋ kpɛtɛ, kwa mìi, kúkponôi é kpanaŋ.

¹⁶Yá támaa káa naa Lɛƃanɔŋ sîda wuru-ŋai mɛ̂ni ma. Yâwɛɛ ǹyaa kpîŋ ƃé ŋ̀úru-ŋai ŋí sì.

¹⁷Ǹaa ƃé ŋ̀ɔni-ŋai da dítaa tɔ̂ɔ naa, niŋa pôlu-lɛŋkpɛŋ-ŋa díkɛ dítaa tɔ̂ɔ naa fîi wuru-ŋai su.

¹⁸Lɔɔ-ƃoli-ŋa díkaa ǹyée kpaya-kpayai su, déli-ŋai díkɛ ƃò naa gɔni wôlo-ŋai su.

¹⁹Í ŋ̀áloŋ kpɛ̀tɛ a gɛɛ é ŋ̀áloŋ ninai kɔ́ɔ pîlanii lɛ́ kúa, vóloi é ǹí-tãi da bá-tãi kɔ́lɔŋ.

²⁰Yá ƃé kpíni kpɛ̀tɛ. Ǹyaŋ kpíni a pɛ̀lɛ, vɛnɛ-sãai kélee da kûla.

²¹Ǹyala-sulu-ŋai da kɛ̀ díkɔnɔŋ kɔ̂rii, da kɛ̂ kpêɣei, díkɔnɔŋ nyii Ɣâla è dɛ̀ɛ dímɛni mai.

²²Vóloi a kùla, da lî pôlu vùu-wolo-ŋai su dí pɛ́lɛ.

²³Ɣele a ƃɔ̀, nûa da lî dítii kɛ́ kwaa-ŋai ma tíi kɛ̂i, dí lɛ́ɛ naa ɣele wûlii é kɛ́.

²⁴Óo Yâwɛɛ, í sãa támaa kpɛ̀tɛ. Í gélee kpɛ̀tɛ a táre-pere. Ǹɔii láa fɛ̂ɛi a íkpɛtɛ-sãai.

²⁵Í yúo kpɛ̀tɛ, gôyaa, ŋ̀á kɛ́tɛɛ. Í fúlu-sãa támaa kpɛ̀tɛ í dípu zu nyii núu fa pɔ̂ri dílônoi, da-ŋa pɛlɛ-pɛlɛɛi, da-ŋa kpaya-kpayaa,

²⁶tîma-ŋa díkɛ sìa ŋ̀á. Í yûoi zere kali kɛ́tɛi kpɛ̀tɛ a gɛɛ gɛ́ pêle kɛ̀ ǹyái su.

²⁷Díkelee díkili káa yâ a gɛɛ í díkɔnɔŋ tɛ́ɛ dípɔ a dɛɛ tãi.

²⁸Ya díkɔnɔŋ tɛ̀ɛ dípɔ dí mìi, dí péla, dílii é láa.

²⁹Yà íŋɛi lòo dîa, dílii a tôo pôlu dí yao. Ya dílɛ̂wo kùla díkponôi, da sâa, dí lene pôlu bɔ̂rɔi pɔ́.

³⁰Í díkpɛ̀tɛ, í ílɛ̂wo pù díkponôi, ǹyaŋ í pà fúlu-laa nina ǹɔii su.

³¹Tɔɔ Yâwɛɛ ŋɔfólo-laai é kɛ́ naa wɔ́lɔ-wɔlɔ da wɔ́lɔ-wɔlɔ. Tɔɔ lii-nɛ̃ɛ é kɛ́ m̀a ŋɔkpɛtɛ sãai mɛni ma.

³²À ǹɔii kâa, ǹɔii a kpɛ̃liŋ. À ǹyée lɛ̀ɣɛ ǹyée-ŋai dîa, ŋɔŋ a têe naa.

³³Ŋa pâi wule toôi Yâwɛɛ ma ŋáfulu-laai su. Tãi nɔ́ ŋ́gaa la ɣele mai, ŋa pâi kɛ̂i nɔ́ laa maa tɛ̂ wule-ŋa toôi Ŋáɣâlai ma.

³⁴Tɔɔ ŋáwule-wooi é kɛ́ a ǹíi-nɛ̃ɛ wule-ŋa, kpɛ́ni fêi, ǹyaa ƃe a gɛ̀ lii-nɛ̃ɛ kɛ́ ƃò ḿâ.

³⁵Tɔɔ zɔnyɔ̂ŋ-ƃelai su é kara, ŋ̀wana-lɔ̂ɔ-ƃelai ŋuŋ lá é píli, dílaa é láŋ. Ŋa pâi Yâwɛɛ láa maa tɛ̂i a ńii kélee. Ka Yâwɛɛ láa maa tɛ́.